الانتخابات
الانتخابات يا سيدنا .. كيف بالله
"شعر/ عمر علي عبد المجيد"
:
جيت أوريكم عتات الوجعة
والزيف والغباين ..!
إنتو أصلا جيتو من وين ..؟
جيتو من خارج حدود الوعي بالفكرة النبيلة
جيتو كمثال حي وواقع للسياسات الرزيلة
جيتو من أجل إنحسارنا وإنحدارنا وإنكسارنا
جيتو وجعتنا الطويلة ..!
وتحت عنوان الفضيلة
تقتلوا الزول بي إيدنكم وتدفنوه
وتمشوا لي أهلو تغنوا
تسووا للزين والعديلة
تحت عنوان الفضيلة
بي إختصار .. كنتو اسوأ سمعة
لاقت لي عيون عزة وخليلا
وتحت عنوان الفضيلة
جامعة الخرطوم تدنت
وهي الجميلة ومستحيلة
تحت عنوان الفضيلة
إغتنيتو .. وإدعيتو .. إفتريتو
وفوق ده كلو ..
عدتو بالبلد المسالم
لي مربع فات وطول
هو التناحر بالقبيلة
تحت عنوان الفضيلة
الشوارع عدمت الخير
والحدائق عدمت الطير
والفهم كفيت ودفير
والمواطن غالبا حيلة ..!
نحن قبال ما تجونا
لا بنسب لي جار ونلعن
لا في جيران بلعنونا
لا باسم عزة مارقين للتسول
والاغاثات والمعونة
عشان كده
قلناها بدري
وتاني ليك بنقولا برضو
إنتو ناس ما بتشبهونا ..!!
انتو تلبسوا بس براكم
والخلائق ماشة تحفي
انتو بتربوا الغبائن
والاله علمنا نعفي
انتو علمتوا الشوارع دي الخيانة
والبلد علمنا كيف نصبح لي أوفي ..؟!!
الا ساي بعدين تعالوا
إنتو كمثال حي وواقع
للتخاذل والتشاؤم والتواطؤ والتردي
في فهمكم هل يجوز
هل دي بتعدي ..؟
أنتخب زول في مواقفو
لا بجيب لي لا بودي ..؟
انتخب ناس لاعبة بينا
ربع قرن "سدي ردي" ..؟
انتخب ناس تبدأ فكرتا بالشريعة
وتبقي قفلتا "عدي بي يا شوق وعدي" ..؟
ياخ اخجلو من نفسكم
وعاينو لي الفي السوق مكاتلة
زولة من صبح الله مارقة
من التعب عينيها ناصلة
ما بتقبل تبقي عاطلة
وإنتو بتكشوها برضو
بي دواعي سخيفة باطلة ..!
وانتو عارفين الحقيقة
لا في دين لا دعوة شاملة
تاني نازلين إنتخابات ..!!؟
إنتخابات تاني برضو ..!!؟
وتاني بي إسم الله كضبة
تاني ح تغشونا برضو ..؟
بالسلامة وبالمحبة
تاني تبدوها بالشريعة
وترقصوا تموها ربة ..؟
تاني ح تسرقو البلد دي
في المفضل فيها حبة ..؟
الا مسئولين من الخير
ياتو شافع من كضبكم
ما شبع ما قام وشب ..؟!
ياتو زول فاهم وواعي
ماصبح مليان معبأ ..؟
ياتو انسان في البلد دي
ما مصدق ولاّ فاهم
إنو كل القصة لعبة ..؟!!
ياتو زول ما واقعة ليهو
انو فكرتكم دي نصبة ..؟!!
انتخابات في البلد دي ..؟
حقو تخجلو تعملوها
إختلفتو وإتفقتو
وقلتو برضو الشعب صدق ..
قلنا فوت ..
جيتوا راجعين تاني برضو
بي اسم فقه الضرورة
وقلتو ردوا الطلقوها
حيلة كانت بالمصاحف في الرماح العلقوها
قبل مايبدأ إتفاقكم
شوف كم روح ازهقوها ..؟
كم وصل عدد البيوت المن كضبكم ودينكم الزيف سددوها ..؟
ياخي والله عيب عليكم ..!!
أقروا يس .. بنجهوكم
شعبكم مات من عشقكم
وسك لي موية وضوءكم
مافي حالة من الغزل
جات بادية بي إنعل أبوكم ..!
إنتو نص خاص
مستفز جد للغة وجد بحسدوكم
"أستغفر الله"
إنتو ضوقتونا مُرة
شاحد الله نشوفا باينة
في جناكم وفي حلوكم
لما تتهزأ الشوارع
وللحقوق الناس يجوكم
بكرة اصحاب المواجع
في بيوتكم بوصلوكم ..!!
حتي عند الله الخلقنا
يوم حسابو القالو بجمع
يوم يقيف الناس ويبكوا
ويدفنونا ويدفنوكم
يومو داك بتقولو لي شنو ؟
يوم ملايكتو يسألوكم
حسبي الله الوكيل هو
يكفي انو هو بس عدوكم ..!!
إنتخابات .. تاني كضبة
فيها زدتو المحلبية ..
إنتو صورة جلية واضحة
للتتر والبربرية
إنتخابات جامعة ساكت
إنتو جواها بتخشوا
بالكلاش والبندقية
لسة خاتين في فهمكم
إنو كل الشعب ممكن
ليقكم إنقاد عنترية
نحن لسة ملانة إيدنا
ولسة ما فاقدين هوية
بس سؤال .. بس سؤال
لو عِدتو جواك يا حبيبنا
تعرف انو القصة لسة
ولسة جوانا القضية
والسؤال الداير إجابتو ..
إنتو كم يا الجبهجية ..؟!
إنتو كم ..؟!
وبرضو مسئولين من الخير
دولة الدين التبعكم
مالو أصبح صوتا أشتر ..؟
وينو مشروعا الحضاري
وينا عبلة ووينو عنتر ..؟!
انتو ناس تاريخكم اسود
حتي دينكم كلو مظهر
ثم هل يا إنتو واعين
إنو تاريخكم ده كلو
كل تاريخكم مزور ..؟!
ما علينا ..!!
بس أفهموها
إنتو بعتوها البلدي دي
ما فضل فيها البتكتح
لا في يابس لا في أخضر
كلو مرهون بنوكة
والصكوك دم شعب مجبر
إنتو شوهتو إنتمانا
للمكان البيهو بنفخر
ياخي مما جيتو انتو
نحن من الفقر أفقر
انتو شككتونا حتي
في البقول الله أكبر
والوجع مكتوب مقطر
كلو في التاريخ مسطر ..!!
إنتخابك ليك مبروك
انت ما سيد السياسة
بيع حلائب بيع شلاتين والقضارف
بيعنا في سوق النخاسة
كٓرِّه الناس دينا ذاتو
وكل علاقتا بالقداسة
دُك قيمنا ومجتمعنا وإقتصادنا
وبرضو أرقص يوم يسوو غُنا الحماسة
وكل ماتحصل مصيبة في البلد دي
ابقي انت سِبة فيها
وانت برضو سبب خٓلاصا
لما تكمل كل مصائبك
وإبقي ما عندك مصيبة
تدق نحاسا
سوطا دارفور كردفان
كل البلد دي
وبالشرق أفتِنٓا وكتر دُواسا
أوعي تفتر .. ما كملنا
نحن قاعدين في الشوارع
وانت خليك في الرئاسة
وأوعي ما تختار بطانتك
إلالما يكونو خبرة
في الدسائس والخباثة
لُخ عجينك بي مهلتك
إلا بس يا حبيبنا
أبقي بعدين قدر العواسة ..!
والنبي إنكان ترحمونا
عذبونا وأقهرونا
نحن جد ما شعب عاطل
واي شئ نسويهو نحن
بدون رضاكم يبقي باطل
إنتو ما أهل البلد دي
إنتو عِزها وعِزنا
إنتو ما صفة العدالة
إنتو ما رجال الهنا
انتو لا يمكن تكونو
مرة في يوم زينا
انتو أخوان مسلمين جد
ونحن كفار كلنا
ياخي بالامس القريب ده
انت ماااااا ....
انقذتنااا
يعني ناسين فضلك إحنا ..؟!
ولاّ قلنا ظلمتنا ..؟
حوا ما بتجيبو زيك
لو تلد مليون سنة
"أستغفر الله العظيم"
جيتونا في بداية الطريق
مارقين تكوركو حرام .. حرام
مكنتوا ناسكم كم سنة ..؟
لفقتوا دينا علي الحيط
كبري البخاري البي هنا
أسال براك كل الشوارع
وشوفو وين راح حِسٓنا
نصك براك هو البتسمع ليك في الشعر
وتراهو ده نوع نصنا ..!
بعدين تعال يا سيد ابوك
ياخي انت هو الزيك منو ؟
والله ما يصيبك شكك
الشعب منك وبيك ولك
ونحن ليك نهتف عديييل
تحيا القلوب الحبتك
والثورة ذاتا الجابتك
والانتخابات اللتك
والله أكبر حقتك
والشعب ما غنمك عديل
بس انت أشر وقول لي تٓك ..!
ياخ انت هو الزيك منو ؟
ياخ انت ما راجل نبيل
غيرك انت السُلطة لي منو
وغيرك إنت منو الكفيل ..؟
نحن لو فتناك انت
العيشة بعدك مستحيل
إنتخابات تاني لي شنو ؟
ساكت اقعد يا جميل
إنعل أبو القال بسألك
وإنعل أبو القال ليك بشيل
ياخ انت هو الزيك منو ..؟
انت ياخي عسل عديييييل
هذا البلد لولاك ما جري تحتو نيل
كيفن نجيب غيرك بديل ..؟
ياخ انت هو الزيك منو ؟
سفلتنا يا شيخنا اب ظلط
طاعم كلامك وسلسبيل
متعنا ياخي ومطو مط
حشاك لا كضاب ولا بتغش نفر
واحد كلامك وقدرو ظط
نحن من عشقك يمين
متكيفين ووقفنا لط ..!
ياخ انت هو الزيك منو ؟
قالوا الحرامية المعاك
أكلوا وشبعوا .. وبالهنا
مال البلد ما حقكم
هو في ياتو يوم كان حقنا
ما نحنا اولاد كلب ساي
بالنسبة لي ولادة الهنا
خموا القروش ودوها ماليزيا سويسرا وإن اعترضتا دُقٓنا
ما نحن شعب قليل أدب
جد ليك حق ما تحبنا
ما انت ياخ الغنوا ليك
"أوريك طبك"
ما انت ياخ مااااااطِبنا
ونحن كان ما ساي وهم
كيفن بنغضب ربنا
ما انت زي ما قلت ليك
قبال ده بي اسم الله
جيت انقذتنا
تسعة وتمانين الف خازوق محترم ركبتنا
وبقينا ياخي مهذبين
والحمد لله الذي بي حكمتك أدبتنا
ياخ انت هو الزيك منو ..؟
ياخ انتو ما ناس المهابة
ونحن ناس ساكت مساكين
يعني بين قوسين غلابة
قبل ما تطلونا انتو
الفهم كان بالترابا
لاعلاج لا صحة
لا دين لا وطن
ساي كنا غابة
بس بعد ما جيتو انتو
الحمد لله اتحدنا
وعاد جنوبنا شموخ مهابة
الله أكبر ..!!
صُنتو دارفور .. في أمان الله زاهية
صُنتو للاوطان شبابا
اما عن صحتنا
ده بالنسبة ليكم ..!
إنتو ليكم حق تغنوا
الغنية ديكا ..
"وطني ياوطن الصلابة"
اما عن تعليمنا أصلا
إنتو ما فقرة كتابة
إنتو بترولنا ودهبنا
وإنتو في السماء ده السحابة
إنتو كان ما الدنيا خايبة
كنتو طاااخ جايين صحابة ..!!
انتخابات تاني لي شنو ؟
يعني ليي ساويها ذاتو ..؟
مافي مشكلة في أمان الله نحن
الوطن ماتو جُباتو
اوعي تسمع للمعارضة
وإفتراها
وناس حفاتو وناس عُراتو
ديل بيقصدوا دينا نحن
ودينا ما بنبيع صِلاتو
للنصيحة وللامانة
عيبو لي حكمك ده مالو ..؟
في أمان الله .. حلاااااتو
واي زول ساي شاكي منك
شاحد الله تقع لهاتو ..!
إنت ياخ زيك في انسان
ولاّ بعدك نحن بنعيش
مافي مشكلة لو كملنا
بكرة إشتري ليك مواطنين
تحكمهم طبيظ ودقيش
القروش ما راقدة عندك
والمواطنة في الزمن ده
إما بالسكن وإما بالعيش
نحن آسفين يا سعادتك
لو قعدنا وما كملنا
نحن تعبناكا معليش
كل ما نقول ليك دايرين
تمشوا تكتلوا فينا بالديش
للامانة وقبل ما تدقونا بالنار
كنا لما نقولا دايرين
انتو كنتو تقولوا مافيش
لما تزعل من سؤالنا
بعد ذلك ببقي هاك الرقدة يا عيش
تبقي ضيقة ولاّ مافي
"ما العمارة"
عِشك معروشة بي خيش
نحن آسفين يا سعادتك
نحن تعبناك .. معليش ..!
انت ياخ زيك في انسان
ولاّ بعدك لينا قيمة
إنتو ما اهل التسامح
وإنتو ما اهل العزيمة
إنتو ما النية السليمة
وإنتو ما الاسر الكريمة
إنتو بينكم والملايكة
تحت تحت عُشري قديمة
ااااه ياحبيبنا
أوع تزعل مننا
دي تكون غبينة حاقدين
ما تشتغل بالمارقين المرجفين الزينا
هاك بيع وإشتري فينا ساي
ما ضعاف نحن
ولو ما مصدق جِسنا
بااااااااع .. جِسنا
مبروك عليك الانتخابات
يازعيم الأمة
يا مدلعنا يا مشبعنا
يا متعنا يااااااا
حييييييي .. أنا ..!
مبروك عليك
بنباركو ليك الفوز ضمان
بس للاسف
لا انت لا الناس المعاك
أصبحتو حاجة تخصنا
بس هاك مني وأسمعا
الكلمة البتمرق كل يوم ضد القيود
ما دمت انت وشلتك بتختوا يومي في نارنا عود
صدقني والله العظيم
شوف عينك إكتوبر بعود
بينا الشوارع يازعيم
والشعب مهرنا للخلود ..!!
|
