امبده ... امبده ليه ؟؟؟

[شوقي بدري]

امبده .... امبده ليه ؟؟

من حكماء امدرمان ود ارصد . وكان سائق تاكسي . وكان فردة البطل اللواء عوض عبد الرحمن صغير .وهو من رفض قتل المواطنين في اكتوبر . وضغط مع آخرين علي عبود للتنازل. وقديما كانت المهنة او التعليم لا تفرق بين الناس . تجد المنجد صديقا للقاضي مثل يوسف ومولانا عبد الحليم الطاهر متعه الله بالصحة . او العربجي عثمان طه ورئيس الجيش السوداني حمد النيل ضيف الله . ولحمد النيل ابن اسمه عثمان طه ولعثمان طه ابن اسمه حمد النيل .

بينما ود ارصد مستلقيا في السيارة في ليل شتاء بارد ، تقدم منه ثلاثة من ضخام الاجسام ونقروا علي الزجاج , وبعد ان فتح الزجاج قليلا قالوا له .... قوم ودينا امبده . فغسلهم بنظرة طويله وقال لهم قبل ان يقفل الزجاج ...... امبده... ليه ما تدقوني هني وتشيلوا القريشات . ووقتها لم تكن الكهرباء والماء قد وصلت الي امبده وكان الفراغ بين الاحفاد وامبدة يغص بالرباطين .

دلوكت الانقاذ قايمة وقاعدة ومؤجرة بيوت ومكاتب وعربات وهيلة وهيلمانة . امبده ليه ؟ مايدقوا الشعب ده في محله ويركيبوا البشير رئيس . ونرتاح من السفر والتكسر والسرادق والحفلات والترليونات الحتتصرف في حاجة نتيجتها معروفة كان بي خج كان بي قلع .

المحنة السودانية ان الانقاذ بتصدق كذبها قبل الآخرين . انهم يبحثون عن الشرعية عن طريق الانتخابات . والشرعية قد اتحرجمت لانها ذبحت بي قزازة . الدستور السمكرته الانقاذ قاموا عليه معطوه وظعطوه . تقول لي امبده .

غندور ده غبي ام متغابي هل يؤمن بانه بيفاوض . نافع قبل كده مش عرض وبشر وقال لقد اتيت لكم بالسلام ونحنا ونحنا الشرف الباذخ .. ورجع البشير هجروه وطلعوه خارج عن الملة . وعلي عثمان الطرطش غازي وركب في سرج نيفاشا وعمل فيها لقمان الحكيم . وكان يتوقع ان يفوز بجائزة نوبيل للسلام وبدأ في تحضير العبايه وسمعنا قالوا بيتدرب قدام المراية علي الخطبة الحيلقيها في النرويج . بعد ما طار البترول قبلوا عليه وخلوا ريحتو جاز جاز . وبمناسبة الجاز . الجماعة مش حسدوه وبدأ الكلام عن سكنه في جزيرة النخلة في دبي . وخلوه دلوكت يتضاير .

يتكلمون عن القوي الامين . وانهم سيحاربون الفساد وسيضعون الرجل المانسب في المكان المناسب . وحيجيبوا ناس مابتعرف تاكل . ما عارف كوز ما بياكل ده بيجيبوه من وين . لقد كتبنا وقلنا ان الانقاذ تحمل بذور الفناء داخلها . لان من سرق يريد ان يسرق زيادة . ومن لم يسرق ينتظر دوره . ومن لم يجد فرصة سينقلب او سيعارض وينقسم . وده الحاصل دلوت .

الكيزان ديل لو شافوا اي انسان بيعمل حاجة لوجه الله بيفتفتوا من الزعل . قبل كدة الاحفاد عندها مركز لرعاية الامومة والاطفال . ومجاني وده البجنن بوبي . قاموا قفلوه وشمعوه بالشمع الاحمر . قاسم بدري لافي شهرين ما لاقي السلطة الشمعت المركز . في النهاية كسر الشمع وفتح المركز . وقال عاوز اي زول يجي يسأل علشان يعرف من هو من شمع المركز . ولم يظهر احد . وغبينة مامون حميدة مع مستشفي جعفر ابنعوف ومستشفي الخرطوم هي نتاج لهذا الحقد علي العمل الصالح . ناس تقفل المستشفيات وتفتح وتوسع السجون . امبدة ليه ؟؟

احد الظباط نزل المعاش وكان عنده عربية . فكر ينزلها تاكسي . وزمان التكس بيدخل ذي مرتب رئيس الوزراء او اكتر حوالي 150 جنيه في الشهر . فاتصل الظابط المعاشي بصديقه اللواء عوض عبد الرحمن صغير وصديقه ود ارصد . وطلب الظابط ان يأتي له ود ارصد بسواق امين ما ياكلو . فقال له في هذه الحالة في حلين ,,,, يا تسوق العربية دي انت او تسوقها امك . لانه لو ابوك ساقها حياكلك ,, الانقاذ دي الا تجيب امها علشان تمسك الوزارات والمنظمات لان ابوها معرف حرامي ومجرم وقاتل وكذاب . لكن الانقاذ دي طفل انابيب . ام ماعندها ام .

انتو عرمان القادة تفاوض فيه الحكومة وغندور يحضن فيه ذي تقول نسيبه . مش الحكومة دي حاكمة عليه بالاعدام مع عقار والحلو ؟ والله لو لقيت لي زول يقدر يحل لي المعادلة دي ، انا حاكون شاكر وممتن ليه بقية حياتي . ناس غندور ديل عارفين انه طلبات الجبهة الثورية عادلة وصحيحة . وانهم ما حيقدروا ينفذوها . ولسة يدلكوا في درب اديس اببا وده بقي اكبر ديداب في الدنيا بعد ده الا يرصفوه . كلموا غندور . ديداب دي ما نبذ معناها سكة البهايم والناس في الخلاء . يقوم يزعل ويتهيخ ويطق . وهو عنده القابلية للطق . لمن هاجموه في حزب الامة اتنفخ زياده .خفت علي نضافة قبه المجلس البلدي في امدرمان . قال امبدة قال . امبد ... لييييييه ؟

[صديق عيدروس]

المشاركة الأصلية كتبت بواسطة شوقي بدري

. ناس غندور ديل عارفين انه طلبات الجبهة الثورية عادلة وصحيحة . وانهم ما حيقدروا ينفذوها

السلام عليكم استاذنا الكريم
خلينا من ناس غندور ،،انا وانت سودانيين عايزين نعرف الحاصل ونحكم عليه بعيدا عن مزايدات الحكومة والحركات المسلحة وداعميهم

ماهي طلبات الجبهة الثورية الصحيحة والعادلة ؟

[ناصر يوسف]

والله فعلاً يا عم شوقي ،،

أمبده ؟؟ !! أمبده ليييه ياخ ؟؟ !!!

ليهم يوم ولينا وللطن رب بيحمينا

[صديق عيدروس]

المشاركة الأصلية كتبت بواسطة شوقي بدري

ناس غندور ديل عارفين انه طلبات الجبهة الثورية عادلة وصحيحة

المشاركة الأصلية كتبت بواسطة ناصر يوسف

والله فعلاً يا عم شوقي ،،

أمبده ؟؟ !! أمبده ليييه ياخ ؟؟ !!!

ليهم يوم ولينا وللطن رب بيحمينا

سلام ياناصر
تكرار الكلام في سوء وسيئات الحكومة يعتبر تحصيل حاصل ،، واحيانا مقصود وموجه ،، الناس كلها عارفه عيوب وإنحرافات النظام ،،وبرضو عارفين كويس جدا عيوب وإنحرافات وجرائم المعارضين ،، المسلحين منهم والغير مسلحين ،، العنصريين وغير العنصريين

المشكلة الاكبر والماعارفنها كل الناس هي الدور الغريب البيقوم بيه (كتّاب المعارضة) ،، بقصد او بغير قصد ،، فهم يخدمون نفس الاهداف والاجندات الاستعمارية المشبوهة والتي تمول وتؤجج الصراعات في بلادنا والبلدان المجاورة

الناس اليوم ياناصر محتاجة ان يتكاتف الشرفاء والفضلاء ومن له قدر من المرؤة والاخلاق وبعد النظر للمساعدة في إنقاذ بلادنا من الوقوع في هوة الفوضى والاقتتال والحرب الاهلية كواجب اخلاقي وديني ،، ومن لم يستطع ان يقوم بذلك فخيرا له ان يصمت ،، لاننا مسؤلون عما نقول ونكتب ، خاصة إذا ترتب عليه إذكاء وتأجيج للفتنة ،،،
فال صلى الله عليه وسلم :: ( من كان يؤمن بالله واليوم الآخر ، فليقل خيرا أو ليصمت ، ومن كان يؤمن بالله واليوم الآخر ، فليكرم جاره ، ومن كان يؤمن بالله واليوم الآخر ، فليكرم ضيفه ) رواه البخاري ومسلم .

[عبد المنعم حضيري]

المشاركة الأصلية كتبت بواسطة صديق عيدروس

سلام ياناصر
تكرار الكلام في سوء وسيئات الحكومة يعتبر تحصيل حاصل ،، واحيانا مقصود وموجهه ،، الناس كلها عارفه عيوب وإنحرافات النظام ،،وبرضو عارفين كويس جدا عيوب وإنحرافات وجرائم المعارضين ،، المسلحين منهم والغير مسلحين ،، العنصريين وغير العنصريين

المشكلة الاكبر والماعارفنها كل الناس هي الدور الغريب البيقوم بيه (كتّاب المعارضة) ،، بقصد او بغير قصد ،،فهم يخدمون نفس الاهداف والاجندات الاستعمارية المشبوهة والتي تمول وتؤجج الصراعات في بلادنا والبلدان المجاور

الناس اليوم ياناصر محتاجة ان يتكاتف الشرفاء والفضلاء ومن له قدر من المرؤة والاخلاق وبعد النظر للمساعدة في إنقاذ بلادنا من الوقوع في هوة الفوضى والاقتتال والحرب الاهلية كواجب اخلاقي وديني ،، ولم يستطع ان يقوم بكل ذلك فخيرا له ان يصمت ،، لاننا مسؤلون عما نقول ونكتب ، خاصة إذا ترتب عليه إذكاء وتأجيج للفتنة ،،،
فال صلى الله عليه وسلم :: ( من كان يؤمن بالله واليوم الآخر ، فليقل خيرا أو ليصمت ، ومن كان يؤمن بالله واليوم الآخر ، فليكرم جاره ، ومن كان يؤمن بالله واليوم الآخر ، فليكرم ضيفه ) رواه البخاري ومسلم .

أخي صديق

تحية طيبة وإحتراماً لك ولقلمك الرشيق وأنت تتناول المواضيع المختلفة في أزقة وحواري هذا المنبر العامر وأنا بذلك لسعيد.

أتفق معك بأن هنالك معارضة رهنت قرارها لغيرها وتمرغت ذلاً وإنكساراً تستجدي الآخرين مقابل إفتعال معارك تكون في أغلب الأحيان وهمية ولكنها ترضي ساداتهم وهؤلاء لا اعتقد بأنه سيكون لهم موضع قدم في حكم السودان ذهبت الإنقاذ أو بقيت لأن المواطن فطن ويعلم خائنة الساسة وما تخفي صدورهم ويعلم كذب إدعائاتهم.... ولكن ألا تتفق معي بأن هنالك معارضة وطنية خالصة همها الأول القضاء على نظام حكم البلاد بالقوة ويريد الإستمرار في حكمه هذا برغم إخفاقاته التي شهد بها أهله قبل أعدائه إلى أن يرث الله الأرض ومن عليها.
ومثل ما قلت أن تكرار الكلام عن سواءات النظام صار مكروراً وممجوجاً أرجو أن تسقط كلامك هذا على تكرار دفوعاتكم عن الحكومة وكلامكم عن المعارضة دون أن تفرقوا بين معارضة عميلة ومعارضة وطنية.

تحياتي وتقديري

[صديق عيدروس]

المشاركة الأصلية كتبت بواسطة عبد المنعم حضيري

أخي صديق

تحية طيبة وإحتراماً لك ولقلمك الرشيق وأنت تتناول المواضيع المختلفة في أزقة وحواري هذا المنبر العامر وأنا بذلك لسعيد.

أتفق معك بأن هنالك معارضة رهنت قرارها لغيرها وتمرغت ذلاً وإنكساراً تستجدي الآخرين مقابل إفتعال معارك تكون في أغلب الأحيان وهمية ولكنها ترضي ساداتهم وهؤلاء لا اعتقد بأنه سيكون لهم موضع قدم في حكم السودان ذهبت الإنقاذ أو بقيت لأن المواطن فطن ويعلم خائنة الساسة وما تخفي صدورهم ويعلم كذب إدعائاتهم.... ولكن ألا تتفق معي بأن هنالك معارضة وطنية خالصة همها الأول القضاء على نظام حكم البلاد بالقوة ويريد الإستمرار في حكمه هذا برغم إخفاقاته التي شهد بها أهله قبل أعدائه إلى أن يرث الله الأرض ومن عليها.
ومثل ما قلت أن تكرار الكلام عن سواءات النظام صار مكروراً وممجوجاً أرجو أن تسقط كلامك هذا على تكرار دفوعاتكم عن الحكومة وكلامكم عن المعارضة دون أن تفرقوا بين معارضة عميلة ومعارضة وطنية.

تحياتي وتقديري

حياك الله اخونا عبدالمنعم
ياخي انا مادافعت عن الحكومة ولن ادافع عنها ،، راجع كلامي كويس ،، انا اتكلم عن الموقف الحالي والظرف الحرج والحساس الذي تمر به البلاد ،، والذي لايحتمل غيرالحكمة وبعد النظر والتروي (الف مرة ) للمساعدة في ايجاد حل امن ومضمون يضمن عدم انزلاق بلادنا في الفوضي ،،، أمّا من اراد ان يصم اذنيه ويغمض عينيه ويستمر في تكرار العبارة الموهمة (اسقاط النظام )،، فهذا شأنه ،، لان كل اطفال وصبيان السودان لديهم تصور صحيح وناضج لما يمكن ان تؤول اليه الامور في ظل وجود جيوش ومليشيات مسلحة تستهدف الدولة قبل النظام ،، لانها موجودة وفاعلة على الارض قبل ان يأتي النظام