بعد الليلْ ما جَنْ ناس ليلى جَنِّي
أجَّنْ نار جَناني وهيَّجَنِّي
...
رَبّات الحُسون القاتلة جَنِّي
ناعسات العيون الكاحله جَنّي
وبى رمز الحواجب بنّجَنِّي
وفي رياضات مَزاجِن زجّجَنِّي
أخَدَنَّي في ساعة وعالجَنِّي
بي مَرهَم صِلاتِن صَهْوَجَنِّي
بى الصحة ورفقٍ أولجني
في خدود القبول الواجَجَنِّي
قالَن لي سَلامات ألهجَنِّي
بي حُلَل الحُلِيّ هِن نَشَّجَنِّي
كَشَفَن عن خِمارِن مازجَنِّي
بالرفق والحنان واللين شجَنِّي
قالَن ليَّ قوم معشوقنا غَنِّي
غنيتْ بى الطَّرَب للازمَنِّي
جَادَن بالدموع عَينَاي رقَنِّي
وبى كاس الهوى المسموم سقَنِّي
قُتْ يا قلبي آه يامَا رمَنِّي
بيى لحَظات عيونكَن أضرمَنِّي
لم أفهم سوى لا تلاحمَنِّي
عِيلْ صبري إنمَكَنْ لا تحرمَنِّي
قُتْ ليهن فلا لا تبارحَنِّي
بى طِب طيب شذاكِن ارشحَنِّي
بي تقبيل كفوفهِن راحمَنِّي
لا خَلَّنِي حَيّ لا أعدمَنِّي
قُتْ ليهِن لَزِيمكَنْ ضَاجِعَنِّي
لي برود نار حَشَاي خير أسمِعَنِّي
من فاهْكِن ولو رشفَة امنحَنِّي
فضّاح حُبكِن، لا تفضحَنِّي
قالن ليَّ قِر عيناً دنَنِّي
طِب نفساً، وبالإقبال عنَنِّي
قُت ليهِن شُؤونكن مَكِنَنِّي
فِيكَن حِسّ ومعنىً أمنَنِّي
قالنلي الأمان لكَ والتمَنِّي
يا مقرون، بعدَ ما نادمَنِّي
راقَبْ لي ذواتِنْ، راقَبََنِّي
لم أرغب سواهِن كَهرَبَنِّي
وَقَفَن لي هُنيهة وراجعَنِّي
أبكَنِّي وبَكَنْ حينْ وادعَنِّي
قُتْ ليهِن عَليكَن أجمعَنِّي
وفي رياضات مَدَاكِن متعَنِّي
بي أهلاً وسهلاً خاطبَنِّي
وبي أرض الوصول والليم حبَنِّي
قالن ليَّ لا، لكن دعَنِّي
وفي الروضة أم حصير أخي خلّعَنِّي
يا مشغول بهِن أنا مَاشْ اغَنِّي
حُب ناس ليلى سَلمى ولا بدَنِّي
بى حُب الحبيب لو كان كتلَنِّي
مشغول لم أفِضّ عن آبسَنِّي
في شان السِّيَر بها عرفَنِّي
ببدأ بالسطور الكيفَنِّي
والبدرين ونُوقاً سَرَّفَنِّي
والعود والنَّسِجْ والباض كفَنِّي
وكم في إسرا كم، كم طمعَنِّي
تخفيف الفروض عنكم وعَنِّي
الجَّنات بما فيها اشبِعَنِّي
والتاج والشفاعة الآتعَنِّي
شوف بالليل بريقاتِن شفَنِّي
في المال والبنون أنا عوفَنِّي
وا أسفي المآثِم كتفَنِّي
وأيام الزمن ما أنصفَنِّي
صلواتاً علي كابي أطربَنِّي
فخراً ضَارَبَن مَن ضَارَبَنِّي
في هَا هِي وهُنالكَ وَجَّبَنِّي
نجَّن لى حياتي وحَجَّبَنِّي
...
بعد الليل ما جَنْ ناس ليلى جَنِّي
أجَّنْ نار جَناني وهيَّجَنِّي
https://www.youtube.com/watch?v=pYJzMSMgVvs