الليله يوم رقيس العروس ــ هي بسم الله ــ رقيص الرئيس

[زول الله]

يا ناصر منعوك من الرقيص بسبب ابوعركي ما بسبب تاني



تخريمة:
غايتو انا بتخيل لي مفروض البشير الإنقلابي دا:
* مايرقص في الحفلات الخاصة
* ماياكل زي باقي خلق الله
* مايمشي بي كرعينو
* ماينوم في سرير زي باقي الناس
* مايفتح خشمو ويتكلم
* مايعمل زي الناس زاتو

حكمتو بالغة






اقول قولي هذا واستغفر الله لي .............

[مبر محمود]

ناصر يا سيدي، تحيّاتي والمحبة.
أرى في نشر هذا الفيديو على اليوتيوب إنتهاك غير أخلاقي لخصوصية عمر أحمد البشير وأسرته.
لا يمكن لنا بأي حال من الأحوال أن نستلف عقليتهم البائسة ونأتي لنحاكمهم بها..ما الفرق إذاً!؟

[سماح محمد]

أنا بتفق مع (ناصر) بفهم بسيط:

(لاتنه عن منكرٍ وتأتي بمثله)

والكلام ده ممكن أحاسب بيهو أي زول بيتناقض في تصرفاتو..
ونعم ضد إنتهاك الخصوصية..ضد مصوري المشاهير البيحرسو الناس ويلقطوهم من شبابيك بيوتهم..ويستغلو صورهم وكدة..
لكن دي مناسبة عامة..لاحظ دهشة الحضور ذاتهم..

في ضريبة لأنك تكون شخصية عامة..
ما معناتها انك ما تمارس حياتك بصورة طبيعية..
لكن على الأقل ما تتناقض لينا قدام وشوشنا!!

(أردوغان) يغني بي حقو..لا حجّب الإعلاميات غصب..لا منع الرقص في الحفلات العامة..
حيشوفوهو الأتراك ويبتسموا..الوضع أكيد مختلف

وشبعانين حراق دم وروح..

[مبر محمود]

المشاركة الأصلية كتبت بواسطة سماح محمد

ونعم ضد إنتهاك الخصوصية..ضد مصوري المشاهير البيحرسو الناس ويلقطوهم من شبابيك بيوتهم..ويستغلو صورهم وكدة..
لكن دي مناسبة عامة..لاحظ دهشة الحضور ذاتهم..

تحيّاتي يا سماح، وكل سنة وإنتِ طيبة.
تجدني متفهم لوجهة نظركم القائلة: بلا تنه عن منكر وتأتي بمثله [مع إنني طبعاً لا أرى في الرقص والطرب ما يستنكر]
ولكن أولاً من قال إنها مناسبة عامة!؟ وهل هنالك شخصية عامة غير الرئيس في مقطع الفيديو؟
ثمّ إن تصوير هذا المقطع وإدراجه في اليوتيوب لا ينتهك خصوصية البشير فقط بل ينتهك خصوصية جميع الراقصين معه.
هل إستأذن أحداً منهم؟
الحقوق لا تتجزأ يا سماح، وفي طريق الإنتصار لها يجب أن ننتبه أن لا ندوس على حقوق الأخرين.

[سماح محمد]

تحياتي يا مبر وكل سنة وانت طيب

المشاركة الأصلية كتبت بواسطة مبر محمود

ولكن أولاً من قال إنها مناسبة عامة!؟ وهل هنالك شخصية عامة غير الرئيس في مقطع الفيديو؟
ثمّ إن تصوير هذا المقطع وإدراجه في اليوتيوب لا ينتهك خصوصية البشير فقط بل ينتهك خصوصية جميع الراقصين معه.
هل إستأذن أحداً منهم؟
الحقوق لا تتجزأ يا سماح، وفي طريق الإنتصار لها يجب أن ننتبه أن لا ندوس على حقوق الأخرين.

وأنا أيضا أتفهم وجهة نظرك التي تدعو الى إحترام حقوق الغير (بمثاليــة)..
ولكن..لنكن واقعيين:
أين هي دولة القانون التي تُحترم فيها حقوق الإنسان الأساسية من حقة في الحياة ذاتها والتعليم والصحة وغيرها؟؟!..حتى ننظر أو ننتظر منها التعامل بهذا القدر من التقدم في إحترام خصوصية الغير..
نعم الحقوق لا تتجزأ..كما أن المشاكل الإجتماعية في هذا الوطن لا تتجزأ..ويمكن أن نرى أسوأ من ذلك في ظل التردي على كافة المستويات وعلى رأسها القانون..!!

نحن لا نعالج مشكلة بمشكلة..ولسنا سعيدين لرؤية خصوصية (البشير) وهي تُنتهك..
ولكن حقّ لنا أن نتعجب..مجرد تعجب..من هذا التناقض المثير

_____________

بالنسبة لعمومية المناسبة فأقصد بها أنا المناسبات الإجتماعية في السودان-في الغالب- لا تتم عبر كروت دعوة، وغالبا ما تكون النوادي ودور المناسبات مفتوحة لجميع المهنين، مما يجعل تصوير شخصية عامة فيها متاحا..ولايُشترط أن يتم خلسة..
وأتفق أن في إنزاله عبر اليوتيوب إنتهاك لخصوصية الكثيرين..لا إختلاف في ذلك

[منال]

ناصر ازيك

بالجد مستغربه للاهتمام المتنامى فى السايبر لشوت الفيديو ده
ويتسال المغزى من الاهتممام شنو و الناس مالا تعبانه و تكتب كمان حاجه عجيييييييييييييييبه

يا ناسى دى استغمايه ليه كده كل المنتديات شنو داك بوستات بالردوم
ده مفعول اكيد من الجماعة عشان يشغلوكم بس البهلى الفيديو يطلع اسه و ينسحب شنو ... فكرتو فيها
زى حكاية الكوكب و لا القمر داك و (طالعنا فايتبن الناس مسافه )

وليه الاهتمام و الكتابه دى ما كانت لامن قالو قولتو فى العيد الشهيرة
و هو اصلو كينج فى الراندوك و زاده كمان لامن الضحك شرطنا
و الله يرحم سيداحمد الخليفة رئيس تحرير جريدة الوطن وهو بكتب عن .... الفاتيه

و كنتو وين انتو لامن كان .... و لا اعتبرتو هظار كمان

غايتو ثبت اننا شعب مسكين ... نكوس لى البرق همنا و نشوف رقيضو ...
هو رقص على تفتيت الوطن و اشلاء المواطنين المدنين ... ما يرقص كان رقص!!!

و كمان فايقين .... و شنو داك
والتحيه لصاحب المقوله ليهم حق الكيزان .... و يحكمونا و يتحكموا فى مزاجنا

و سلام لكل الكرام

[ZEIN ABDALLA]

عقد قران كريمة الشهيد إبراهيم شمس الدين : الرئيس وكيل العروس وطه وكيلاً للعريس




10-18-2009 10:17 AM
بمزرعة الحاج بشير محمد عيد بالجريف غرب ، تناول عدد كبير من وجهاء العاصمة وكبار المسؤولين بالدولة وأصدقاء الأسرة ، طعام الغداء بمناسبة عقد قران المهندس محمد حاج بشير على كريمة الشهيد ابراهيم شمس الدين والسيدة الأولى وداد بابكر حرم رئيس الجمهورية . ومساء ذات اليوم الجمعة تم عقد القران في التاسعة مساءاً بالمسرح الخارجي لمعرض الخرطوم الدولي . والعروس (فاطمة ابراهيم شمس الدين) طالبة جامعية تدرس اللغة الصينية ، ويعمل العريس محمد حاج بشير مهندساً وتخرج من الجامعة الإسلامية . وقد عقد القران على يد الشيخ احمد علي الإمام مستشار رئيس الجمهورية لشؤون التاصيل ، وكان وكيل العروس السيد الرئيس عمر البشير ، ووكيل العريس الاستاذ علي عثمان محمد طه ، نائب رئيس الجمهورية . وكان الحضور كبيراً يتقدمه من السادة والقادة السيدين الصادق المهدي ومحمد عثمان الميرغني . وعدد كبير من سفراء ورجالات السلك الدبلوماسي ، الي جانب الوزراء الاتحاديين والولائيين وقادة الحزب والدولة . وكان الحفل الكبير في صالتين منفصلتين في معرض الخرطوم الدولي ، وتخللته اناشيد دينية واغاني حقيبة شدى بها الفناون فرفور والبنا وفرقة الصحوة ، وبحسب صحيفة الوطن يذكر ان الجيرة بالجريف غرب هي التي ربطت منذ فترة طويلة بين الأسرتين الكبيرتين . جعله الله زواجا مباركاً وسعيداً ، وخالص التهاني للأسرتين الكريميتين ،وللسيدة الأولى ولفخامة رئيس الجمهورية والد الجميع .

وكان الحفل الكبير في صالتين منفصلتين
يا جماعة قالوا ليكم الرجال براهم والنسوان براهم.
السؤال كيف سمح ناس الامن بتصوير عمر بشير يرقص
مع الفتيات.....هذه مؤامرة صهيونية

.

[أبوبكر عباس]

المشاركة الأصلية كتبت بواسطة عبدالمنعم الطيب حسن

ليس هنالك ابوه ولا يحزنون
كلنا شفنا الاباء السودانيين
لم نر منهم من يرقص ويكشف هكذا ،
بل لا ياتوا للحفلات من اساسو
مع ان الحفلات في عرفهم وقناعاتهم حلال
هنا الوضع معكوس
رئيس الجمهوريه شخصيه اعتباريه
لا ينبغي له الرقص هكذا
لم ارى رجلا سودانيا تجاوز الستين يحتوا هكذا
ولكن لهذا اللرئيس خبره
في الرقص
ومن جانب اخر قانون النظام العام يمنع الرقص المختلط
واذا رقص ضعيفا طبقوا عليه الحد الم يمنع النظام العام
واعتقل المتواجدين في حفل بيت الفنون للاستاذ طارق الامين
مالكم كيف تحكمون !!!

وبعضهم يدافع عن هذا النظام بلا منطق
اللهم لاتمحنا ولا تبلينا ،
ناصر يوسف كل عام وانت بالف خير
وبلِغ تحياتي لمراتع الصبا بطرفكم

الجزء البي الأحمر من مداخلتك دي فيهو حجة قوية، لكن الجزء البي الأخضر دا كلام ساكت وضعيف وعاطفي وينطبق عليهو معكوس مقولتك:
وبعضهم "يعارض" هذا النظام بلا منطق!!

[بابكر مخير]

المشاركة الأصلية كتبت بواسطة ZEIN ABDALLA

وكان الحفل الكبير في صالتين منفصلتين
يا جماعة قالوا ليكم الرجال براهم والنسوان براهم.
السؤال كيف سمح ناس الامن بتصوير عمر بشير يرقص
مع الفتيات.....هذه مؤامرة صهيونية

.

زين
شكرا علي توضيح أصل القصة،،
يعني بالله شوف،،
البت القالت ليهو "كل زول بتحبه (بتزوج) أمه"،،
بقت قدر كدي وعروسة كمان،،
والله حقيقي "هرمنا"..............

_______________


ملحوظة: تم تغير كلمة صعبة "مراعاة للأداب العامة" بكلمة (بتزوج)
يعني حسي بعد ما الربيع يغشانا، فلول البت والولد ديل يحرم على مسلمة الزواج منهم

[بابكر مخير]

المشاركة الأصلية كتبت بواسطة ZEIN ABDALLA

وكان الحفل الكبير في صالتين منفصلتين
يا جماعة قالوا ليكم الرجال براهم والنسوان براهم.
السؤال كيف سمح ناس الامن بتصوير عمر بشير يرقص
مع الفتيات.....هذه مؤامرة صهيونية

.

بسيطة حكاية المصوراتي،،
لأنها كانت مرأة...
________

لا ولكن وهلماجرا،،
الادهش،،
الفنانين والعازفين،،
ديلا،،
يكونوا "أغاوات" جابوهم من مكة..
"وجه مستعجب ومستغرب،، مراعاة غير متاح عندي أيقونات"

[عبدالمنعم الطيب حسن]

المشاركة الأصلية كتبت بواسطة بابكر عباس

الجزء البي الأحمر من مداخلتك دي فيهو حجة قوية، لكن الجزء البي الأخضر دا كلام ساكت وضعيف وعاطفي وينطبق عليهو معكوس مقولتك:
وبعضهم "يعارض" هذا النظام بلا منطق!!

شكرا للاعتراف بالاحمر ...!
بالاخضر دا لب المداخله واصلها ...
مره اخرى لا يحضر الاباء حفلات بناتهم ...
ولان السودانيين ناس راقيين وحساسيين - هنالك استثناءات -
يخاف الاب على تقييد فرحه بناته واولاده وباقي شباب الاسره
ويتركهم لياخذوا راحتهم في يوم فرحتهم الكبرى ....
واذا اضطرته الظروف للحضور يبشر ويغادر سريعا
ولا يحت ويكشف ويرقص هكذا
خاصه اذا تجاوز الستين
بالعكس الكلام متماسك ومنطقي ومقنع وواقعي ....
بس انت من حقك ان تراه ضعيفا مع انو في اعماقك مقتنع بتماسكه
ولكنها الشتاره وعين السخط ...
وكتابتك - اذا جاز ان نطلق عليها كتابات - كلها ضعيفه وتبعث على الملل
وكلام الطير في الامارات ....

[kabashi]

سلام يا ناصر
في اعتقادي أن الأمر غير عادي ولا مقبول وهو الآن وقعه عليهم أشد من أي سلاح أستخدم ضدهم لأنهم منافقين لا يريدون الظهور بوجوههم الحقيقية .
وما عادي للاتي :
*طريقة الرقص ماجنة لا تليق برجل وقور في مثل سنه .
*الرقص وسط النساء كما هو في الشريط لا يليق بمتدين في مجتمعنا .
*الراقص رئيس دولة أي شخصية اعتبارية ولهذا المنصب هيبته وبرتوكولاته التي تتنافى مع الرقص الماجن أعلاه .
*الرجل رئيس حكومة تدعي تطبيق الشريعة وقد سنت في قوانينها ما يحرم هذا الفعل .
المشاعر الأبوية التي حاول البعض أن يجعل منها ساتر للفعلة لا تقوى على ذلك لأننا لم نعتاد ذلك من آبائنا فأبو العروس همه في البستر حاله في ضيوفه وليس الرقص في الحفلة .

[أبوبكر عباس]

المشاركة الأصلية كتبت بواسطة kabashi

]*طريقة الرقص ماجنة لا تليق برجل وقور في مثل سنه .

سلامات كباشي
ليش يا كباشي طريقة الرقص دي ماجنة؟

[أبوبكر عباس]

المشاركة الأصلية كتبت بواسطة عبدالمنعم الطيب حسن

مره اخرى لا يحضر الاباء حفلات بناتهم ...
....

هل ممكن يحضروا حفلات بنات أخوانم أو أخواتم أو أصدقائهم؟

[سماح محمد]

مره اخرى لا يحضر الاباء حفلات بناتهم ...
ولان السودانيين ناس راقيين وحساسيين - هنالك استثناءات -
يخاف الاب على تقييد فرحه بناته واولاده وباقي شباب الاسره
ويتركهم لياخذوا راحتهم في يوم فرحتهم الكبرى ....
واذا اضطرته الظروف للحضور يبشر ويغادر سريعا
ولا يحت ويكشف ويرقص هكذا
خاصه اذا تجاوز الستين
....

والله كلام عبدالمنعم الفوق ده هو البيحصل في الغالب وكلام منطقي جدا
دي سودانويتنا بتفاصيلها وأعرافها الممكن ما تكون مثالية..لكن ده واقعها

المشاركة الأصلية كتبت بواسطة بابكر عباس

هل ممكن يحضروا حفلات بنات أخوانم أو أخواتم أو أصدقائهم؟

أبوي مواليد 1954 (يعني أصغر من الريس ).. راجل ليبرال جدا..وبتذكر في طفولتي بيهجج ويرقص ويحت ذاتو..هسه الوضع اتغير .. أي نعم بيحضر وممكن يجامل ببشيرة..لكن كمان ما بيحتو..فللسن وقارها..
وده مثال بس..سووو نفهم رأيك..ما فيها حاجة يعني رقصتو؟؟!