عـِيـَنْ الخريف

[الرشيد اسماعيل محمود]

وتاني برضو شبارقة قال طرفة عين الاسد المعروفة! داير اعرف عنها! والسؤال عام لأنو شكلو شبارقة دا ما حيلقي ليهو رواقة يجينا بيها!

[أبوبكر عباس]

عينة الخرسان،، شنو علاقتها بالأسد!؟

المفروض يا رشيد، نوع الأسئلة البسيطة دي يكون زمنها مع قوقل دا إنتهى، بمعنى المفروض يكون سؤالك في أي حوار هو بعد أن تكون كملت القوقلة.
سؤالك أعلاهو المفروض يكون:
من وين لينا أنو الخرسان هو منتصف الرأس في الأسد (أو ما يبرز منه) كما يشاع في الميديا؟
أها بعد يعجز قوقل والناس العاديين بنجي نحن
هكذا يكون الحوار يا تعبان

[كيشو]

المشاركة الأصلية كتبت بواسطة الرشيد اسماعيل محمود

وتاني برضو شبارقة قال طرفة عين الاسد المعروفة! داير اعرف عنها! والسؤال عام لأنو شكلو شبارقة دا ما حيلقي ليهو رواقة يجينا بيها!

بتسأل عنها برغبة شديدة كدا مالك؟ عايز تدخّلا في قصة مفيدة؟
سلام يا حبيبنا وألف حمد لله على السلامة، وزواج مبارك تاني وتالت ورابع
سؤالك لفت نظري يا الرشيد
ويا عين بتخافي مالك
من عين الخايفة عينو

[كيشو]

المشاركة الأصلية كتبت بواسطة أبوبكر عباس

المفروض يا رشيد، نوع الأسئلة البسيطة دي يكون زمنها مع قوقل دا إنتهى، بمعنى المفروض يكون سؤالك في أي حوار هو بعد أن تكون كملت القوقلة.
سؤالك أعلاهو المفروض يكون:
من وين لينا أنو الخرسان هو منتصف الرأس في الأسد (أو ما يبرز منه) كما يشاع في الميديا؟
أها بعد يعجز قوقل والناس العاديين بنجي نحن
هكذا يكون الحوار يا تعبان

ههههههههههه
ياخ أسئلة الرشيد دي عايزة تأمل

[طلال دفع الله]

نحتاج للتركيز على زمن و خواص كل عِينة من عينات الخريف،
إبداعياً وظفها ود شروني، فأرجو أن يرفدنا مَن يملك المزيد.
التحايا للجميع و طيب الأمنيات.

[شبارقة]

السلام عليكم جميع الإخوة المتداخلين

نأسف للتأخير .. ونشكركم على إثراء البوست وإحياء المنتدى ورد الروح فيه

حافظ حسين ما قصـّر تب يا معتصم .. شكلي وقعت ليهو في الأتو بتاعو
وبعدين حافظ ده بيشترك معانا في إنو (مزارع بات على عشقين .. تراب بلدو وسماح فوق بت مزارعية) زي ما قال القدال .

ويا الرشيد يا أخوي نحن الآن خلـّصنا الضراع والنترة ولسه ما جينا للخرسان (الخريسان- الخرصان - الخريصان - وبعضهم يسميه الخيرسال) ولكن هذا لا يمنع إنو نرد عليك بإقتضاب ونقول ليك إنو هناك علاقة وسنتطرق إليها في حينها حسب ترتيب العـِيـَنْ في الطبيعة وفي البوست ... أما بخصوص طرفة عين الأسد فعليك الجلوس أمام أسد وراقب إحدى عينيه ( طبعا ً أقصد الجلوس أمام يوتيوب أو ناشيونال جيوغرافي )

[شبارقة]

المشاركة الأصلية كتبت بواسطة طلال دفع الله

نحتاج للتركيز على زمن و خواص كل عِينة من عينات الخريف،
إبداعياً وظفها ود شروني، فأرجو أن يرفدنا مَن يملك المزيد.
التحايا للجميع و طيب الأمنيات.

حبابك أخونا طلال ومرحب بيك في سودانيات

زمن أو توقيت العـِيـَنة هو الأساس في تحديد دخول العينة وهو بالتأكيد له علاقة بالنجوم والسماء ولذلك نحن حريصين في هذا البوست على تحديد الزمن وعدد الأيام

أما بخصوص الخواص .. نعم فاتنا أن نذكر بأن مطر الضراع والنترة هو مطر غزير يروي الأرض و يقفل الشقوق وبسبب تسرب المويه لباطن الأرض تبدأ بعض حشرات الأرض في الظهور وتتكاثر بسرعة وبالذات في النترة .. وصوت الرعد بيكون ليس بتلك الشدة التي تزيد في العين التي تليها.

[شبارقة]

بيقولوا : موية المطرة تختلف من عـِينـَة لعـِينة ..

وأنا أقول الكلام ده صحيح ولكن مع بعض التحفظ .. ممكن فعلا ً موية الضراع تكون أكثر حامضية من موية النترة .. والسبب علمي بحت وهو أن الفضاء يحتوي على العديد من الغازات ومنها النيتروجين وأكاسيده وعندما تتحد مع ماء المطر تتحول لسائل يحتوي على بعض خواص حامض النيتريك (وهذا كمثال) ولذلك كان أهلنا في الماضي يجمعون موية المطر ويتعالجون بها من بعض الأمراض ومنها الأمراض الجلدية ...

[أبوبكر عباس]

يعني يضع رجله على الأرض برفق ويرفعها برفق (نوع من التيه والخيلاء والشوفونية ) وياها دي النترة زاتا .. وشبه هذه المشية بفعل الطبيب عندما يجس المريض

هناك من يقول بأن النترة هي زئير الأسد وهذا غير صحيح والدليل على ذلك إنو هناك عـِينة تقابل زئير الأسد

سلام،
النترة لا تحتمل هذا الإجتهاد؟؟
النترة هي نجوم النثرة المعروفة من مجموعة نجوم الأسد وهي من منازل القمر وتشير إلى طرف أنف الأسد أو شيء نثره الأسد بأنفه

[طارق صديق كانديك]

متعة كبيرة فاتت طارق كانديك والله ياسلام ياشبارقة ياخي.

طبعا كما أشار العمدة لبوست ود الحاج الغزل بمرابيع النجوم قراية هذين البوستين في تقديري يضعان المتأمل في تمام العافية والتصالح مع الطبيعة وكيفية ترابطها بشكل ساحر مستصحبين الشعر الذي عبر عن كل هذا الجو الاحتفالي بعبارة تماثل روعة الجو الذي يفرضه الخريف.

في كثير من مناطق السودان -بحسب علمي- الثابت أن العصا العطشانة وأختها الرويانة مقدمات للخريف فعلاً ولا يتم احتسابهما في عينات الخريف، ومع ذلك تظل بدايات الخريف بما تحملها من بشائر محفزات للكتابة حتى اذا ما (البراق برق وجاب القِرة) كما كتب الحاردلو اخضرّت الأرض وأنبتت من كل زوجٍ بهيج.

شكراً يا شبارقة دائماً مجوّد شغلك.

[الرشيد اسماعيل محمود]

بابكر عباس،،،
النترة تحتمل هذا الاجتهاد!
اغنية الحماسة بتقول :
الفارس النتر بي جاي،
اخوي شقيقي براي
النترة في رأيي ما ليها علاقة بالنثرة!

....
ما داير اوصف مداخلتك بالضعف!

[شبارقة]

المشاركة الأصلية كتبت بواسطة طارق صديق كانديك

متعة كبيرة فاتت طارق كانديك والله ياسلام ياشبارقة ياخي.


في كثير من مناطق السودان -بحسب علمي- الثابت أن العصا العطشانة وأختها الرويانة مقدمات للخريف فعلاً ولا يتم احتسابهما في عينات الخريف

شكراً يا شبارقة دائماً مجوّد شغلك.

مرحبا ً وحباب أخونا طارق كانديك وعساك طيب

العصايات ديل فعلا ً لا يتم إحتسابهما من ضمن عـِيـَنْ الخريف .. والمطر البجي فيهن أهلنا بيعتبروهو تثبيت للواطة وتقليل الغبار وفاتحة خير وبعض البشارات .. وبيديهم نوع من الإستعداد والتجهز للخريف.

شكرا ً على كلامك السمح .. تسلم.

[شبارقة]

المشاركة الأصلية كتبت بواسطة الرشيد اسماعيل محمود

اغنية الحماسة بتقول :
الفارس النتر بي جاي،
اخوي شقيقي براي

حباب الرشيد العريس

الهدف من البوست ده هو إضاءة وتعريف وتبسيط لمسميات عـِينات الخريف .. وهناك ناس كتيرين سامعين بيها لكن ما بيعرفوها وما بيعرفو ترتيبها .. والأيام دي ح يهل علينا الخريف وقلنا دي مناسبة ... وقد تختلف المسميات ويمكن يكون ما عندها علاقة بالأسد أصلا ً (وهي فعلا ً بالنجوم) ولكن أهلنا رمزوا ليها بالأسد في التراث بتاعنا (يمكن عشان يسهل حفظ ترتيبها) .. بلادنا ما زالت كبيرة وواسعة (شعوبا ً وقبائل) ولذلك قد يختلف تعريف بعض المسميات ما بين البطانة والنيل الأزرق والجزيرة وكردفان ودارفور إلخ .. وثقافتنا سماعية .. وقوقل ما بيكون سمع بيها زاتو (في بوست مصطلحات عامية كنت بديهم كلمة وقول ليهم أمشوا فتشوها في قوقل وأنا متأكد تماما ً إنو قوقل ما ح يعرفها )

في أوبريت سودانية (المنسوب للشريف الهندي) بيقول:

بت الحر .. وأم الحر .. وأخت الحر
وسـِت الضنبو مردوم .. بي وراهو يجر
وسـِت الفي الخـُشش من العصير بنتر
وسـِت الخيل وسـِت الفي القلوب بنقر
وأم الحلفوا بيك وبالعذاب المر
ما بختولِك الشينة ومناحة الكر

وعندنا في مناطقنا .. البعض يقول ليك : والله نترني نترة لمن فكّ لي سدري ..( المعنى جذبه إليه بقوة) ..

شكرا ً يا الرشيد ياخي .. تسلم،،،

[شبارقة]

جانا الضـُراع والغيث دفـــق في الوادي
أنبسط البلد لي بلادي شلـــــــــت عتادي
أصلـّح في الكسور كل مرة أطفـّر غادي
جافيت المقيل طاري ام خدود في بُعادي

جافيت المقيل طاري ام خدود في بُعادي .. حاجة كده زي : ولقد ذكرتك والرماح نواهل ٌ مني

[شبارقة]

العـِينـة التالتة : الطَـرفة

تبدأ الطرفة من يوم 4 أغسطس إلى 17 أغسطس .. والطرفة هي عين الأسد لما تطرف .. وتسمى الطرفة الندّاية بسبب كثرة الندى على النباتات وأوراق الاشجار ويعود السبب للمطر الليلي .. وتسمى كمان الطرفة البكـّاية

مطرها خفيف وناعم وقد يستمر طول الليل أو طول النهار .. يقيف شوية ويواصل تاني وهكذا طول اليوم .. وبيسموها الشكشاكة ... تقيف شوية بالليل تقوم تـِطـِّلع عنقريبك عشان تنوم تجيك تاني وهكذا .... متعة والله.

قال سماعين ود حد الزين : وعشان ما تبكي ببكي أنا واحاكي الطرفة في عز الخريف بكـّاي