ألعابنا زمان, نبهني صديق إلى أنها تتلاشى, ذكريات ممتعة عن ألعابنا زمان, هنا "توثيق وحفظ" لها

[أحمد المجتبى]

وعليكم السلام أخت بدور, العنوان ممكن يكون طويل ذي لعبة الحبل, لكن أنا قلت الغرض الأساسي هو التوثيق يعني ما داير أجزب الناس بعنوان منمق, العنوان به الحقيقة القصة المختصرة,
ومتزكر الألعاب القلتها "تقريبا" بس زكرها ما يعطبر توثيق لأننا بننسى طريقة اللعب, فعشان كدا كلام بسيط عن اللعبة بيثبتها ويخلي الناس يعرفوها إذا عندها إسم تاني, شكرا ليك, بعدين الحبل دي منو والله ما ما عرفتها, ما تكوني قاصدة نط الحبل بتاعة النفرين يلفوا الحبل والجماعة جوا ينططوا لحدي ما, بتاعت الأرواح ديك والله كانت جميلة, لكن البنات هم أصحاب اللعبة فأنحنا ما كنا بجودتهم.
وبعدين العصاية دي منو والحفرة دي البتتلعب بالزرار بتاع القمصان دا "بتذكر زمان البلقا ليهو قميص مخستك دا كا نلقا غنيمة" ولا ما ياهة, ولا تكوني قاصدة طقش طقش الذي البلي لكن في حفرة, ولا أقوليك آخر تخمين وهي لعبة البنات فيها الأفضل بتاعت تجع الحصا فوق وتحصل الفي الحفرة أو حاجة زي دي, متذكر حفرة وحجار صغيرة تتطاير, وتشيل من الحفرة وتطلع برة بنظام حاجة زي دي, أظن دي الصحيحة.


في نقطة مهمة في لعبة زرد البصلة, هي اللعبة لازم تلعب في أرض ساهلة وطرية نوعا ما, يعني ترابية ما تكون جامدة, لأن اللعبة فيها "نطات" عالية,
وفي حاجة نسيتها, بعد ما في عملية الزردة, تقريبا الفريق مكون من إتنين أو ثلاثة ما عارف بالظبط, المهم الزرد يكون بالدور نفر نفر والإتنين أو الواحد البرا يحاول يخلص زميله من قبضة "زردة" الفريق المنافس, وفي اللحظات دي الشخص المزرود يكون في معانة من القبضة بالإرجل وزميله البحاول يجره ويملصه من بينها, وكمان على ما أذكر النط أو محاولة إجتياز درجات اللعبة عندها شروط أدق, منها النط بالأرجل مضمومة, لحدي ما تكون عالية بثلاث أرجل فوق بعض, يبدأ تتغير طريقة النط

"الحكاية تبقى صعبة, بعد الأربع أرجل فوق بعض "طبعا دي رجلين الفريق الأول وهو جالس على الأرض يعملها", فبعد الأربع أرجل توضع اليد الأولى وتكون في وضعية "الشبر", ثم الثانية وبنفس الطريقة الثالثة والرابعة, والله الحكاية محتاجة مرونة بتاعة جسم غريبة "ما شاء الله علينا زمان", الكلام دا كان يحصل من الفريق العلى الأرض, بيصل مرحلة يكون اللاعب يدينو فوق ما متكل على شي,

فقط مرونة وقوة بطن وكدا, وفي الحتة دي بيكون الحاجز بقى عالي جدا, الفريق يشمر السواعد في كل مرحلة ويجي جاري ويتجهز وينط نطة جميلة وفاهمة من غير ما يلمس وفي نفس الوقت لازم يمر بأعلى نقطة اللهي في نص", بعداك اللعبة تستمر بالطريقة دي تقريبا.

من الألعاب الجميلة الممتعة المزكرها كويس جدا "لأن لعبتها قريب كم سنة لورا"

لعبة سكج مكج

[أحمد المجتبى]

الاسم : سكج مكج

صفات : تلعب بالعصايات من أنواع معينة من الشجر لأنها محتاجة تستحمل, بها "عصاية وضقل" عندها شروط معينة للإختيار, اللعبة ممتعة لدرجة غريبة, خصوصا عند ضربك للضقل بالعصاية اللحظة دي.....

طريقة اللعب : بإختصار, بعد تجهز العصاية والضقل, من نوع قوي من الشجر, ننقسم لفريقين, وتبدأ المرحلة الأولى بإستخدام القوة والعصاية تقرف الضقل من الحفرة لبعيد, والفريق الثاني يحاول لقفوا أو من بعد يقع يستخدم مهارته ويرميه ويضرب العصاية من بعيد, إذا عدت الحتة دي, تبدا المرحلة التانية, وفيها تضرب الضقل ضربة خفيفة تخليه يطير لعلى معين, وبعدها وبسرعة تضربه ضربة قوية "تتمقى فيها" يصل بعيد, وبعدها عندك 5 ضربات بنفس الطريقة لكي توصله أبعد مسافة ممكنة, ومن هنا تحسب النقاط, والفريق التاني ليه المحاولة ومسك الضقل في وسط هذا "خطرة", وبرضها عايزا مساحة مناسبة كنا بنلعبها في الشارع عادي بس نخلي مساحة قدامنا.........

لعبة شد وأركب

[bayan]

بوست موفق جدا

لدي صديق كتب بحثه عن العاب الصبية
جمع كل اللعبات دي ممكن تلقاه في مكتبة المعهد العالي للموسيقى

والمسرح
اسم الباحث مصطفى آدم دراج


هاك دي لعبة بنات بريلا بيرلا برلالالا المرسال جاكم


انا برضو من عطبرة الداخلة

[أحمد المجتبى]

شكرا ليك يا بيان وجاري البحث عن "الباحث والبحث", ولعبتك دي جبتيها من وين, إسمها براه عجيب, لكن نظرا لأنها لعبة بنات ف...., وأجمل مافي الداخلة "الشجر", أنا مرة زمان طشيت, هي ما طشة لكن "حوامة" المهم حمتها تمام وسبحان الله.

اسم اللعبة : شد وأركب

صفات : لعبة بسيطة نوعا ما وفيها مجهود عضلي.

طريقة اللعب : بالجد أنا ما متذكر منها حاجة ولا حتى شروطها بس متذكر أنو بتركب ظهر المعاك ويشيلك ويقوم جاري بيك, لكن الشروط وكدا ما متذكرها بالظبط لكن أظن فيها جري وخطوط وكدا "مسحتها".

لعبة حنجلة يا ......