اللهم يا الله يا من بيدك الشفاء
نسألك تمام الشفاء للحبيب خالد وأن تقرّ أعيننا بأن نراه هنا بيننا لك الحمد والشكر يا مستوجب الحمد . |
اقتباس:
اولا: تسلم اخي من قصور الفهم... ثانيا: اشكر لك الصبر وسعة الصدر ووعيك التام بانك ترد على تساؤلات احباء للحبيب خالد بالطبع انت احدهم... بالنسبة لي ربما اختلط العام بالخاص... العام...حال العلاج والتطبيب والمستشفيات وتهيئتها وتجهيزاتها و قد يكون من قصور ترتبت عليه نتائج كارثيه... الخاص...ان يتكرر نموذجا اخر... ثالثا: اتقدم بالشكر والتقدير لك ولزملائك من الاطباء اسامه، صلاح، احمد، انس والطواقم الطبيه المساعده واسرة وادارة مستشفى الزيتونه... رابعا:ان طاشت سهامي في لحظات ما..واكيد دون قصد..فاني اعتذر ممن اصابته... مرة اخرى..تقديري وشكري لكم... |
صباح الخير يا عم فتحي :
الموضوع دا حلّو وفك اشتباكو ليس بيد أحد غير دكتور زين عبدالله ذات نفسو .. الدكتور دا قاعد في سودانيات ..وبيقرا في كلامنا دا ..وأمس في نص المعمعة دي مشي جدع ليهو فتوي بخصوص تحسّن حالة خالد في نيروبي في بوست تاني في المنتدي العام ..يعني ماهو بعيد .. البمنعو شنو يجي يقول إنّي استجوبت ووجهت الدكتور المعالج ؟؟ ويقول فعلا خالد كان بيتم علاجو في العناية المركزة بطريقة بلدية ؟؟ وإنو في غلط في أسلوب علاجو ؟؟ يا عم فتحي الأطباء بمستشفي الزيتونة كتبوا رايهم ومختوت في البوست دا والناس كلّها قرتوا ..ومن ناحية إنو الموضوع دا ما رضّاهم .. ما رضّاهم ..وسبب الكلام دا كلّو هو ما نقل عن د/زين ..فليه تجي إنت وللا أحمد زين تشرحوا موقفو؟؟ يجي هو ويشيل كي بوردو زيّو وزي أخوانو ..ويحكي الحصل ..وكان طلعكم إنتو كضّابين يبقي دا شي تاني .. أي كلام بيتكتب هنا أنا شخصيا بفترض إنو الزول الكتبو مسئول وصادق ..خصوصا لما الكلام دا تتبني عليهو نتايج زي الشايفنها قدامنا دي .. يا عم فتحي بالله المرّة الجاية لما تجي ترد عليّ ..جيب معاك د/زين عبدالله .. نقطة تانية : حكاية سفري للقاهرة مع شقيقتي للعلاج ماعندها أي علاقة بالحالة النحن فيها دي ..فأختي/ك لم تكن تتعالج بمستشفي الزيتونة ..مشكلتها جزء من مشكلة كبيرة جدا في النظام الصحّي بالسودان ..وليس بمستشفي الزيتونة ..وبدل السببين الذكرتهم ديل ممكن أديك عشرة أسباب تانية وأزيدك .. لكن الكيمان مفروزة عندي يا عم فتحي .. العندو راي في النظام الصحّي في السودان ..ممكن يسوق بوست آخر بهذا الشأن وسيعرف من لايعرف رأينا ..لكن ماعلاقة النظام الصحي بالسودان بأداء الأطباء بمستشفي الزيتونة في حالة خالد الحاج ؟؟ |
اقتباس:
المشاركة الأصلية كتبت بواسطة طارق الحسن محمد http://sudanyat.org/vb/images/buttons/viewpost.gif اقتباس:
ياطارق الحسن لمن انا كتبت انو دكتور زين لازم يعتذر طبعا ده بي اعتبارات انو كتب والكلام ده عن لسانو هو وانا الفترة الفاتت لاني كنت مريضة ما بدخل البورد ولمن كنت بدخل مابقدر اقرا كل الكلام كنت بختار لظروف صحية ونفسية متعلقة بي مراحل استشفاء الخال ولمن قريت انتظار طيبان لي د/زين رجحت انو كتب هنا من هنا بعتذر اذا زين ما كتب الكلام ده والنقلو عنو المفروض يعتذر لانو من الطبيعي بين الاطباء الشورى والماطبيعي انو نخلي الجهد البذلوهو المختصين ونقول الفضل يرجع لي زين عشان يوجهم لي كده زين ماقصر كعضو من سودانيات وابن من ابناءها ويساهم بي مخزونو الطبي عشان يساعد في علاج للخال بس برجع اقول اي زول شكك في اهتمام الاطباء او مقدراتهم الطبية في الوصول لي علاج لي خالد الحاج يعتذر الطبيب اكتر من انو مهني الى انو الجانب الانساني هو البيتفاعل فيواكيد الاكيد انو ما حيكون في تقصير |
اقتباس:
إدعاء البطولة لايشترط النطق بها ..ولكن أن ينسب له النّاس بطولة - ودي ما المشكلة - يقابلها تقليل من شأن زملاء أطباء - ودي العوجة - .. فيفترض يدخل وينصف زملاهو ديل .. وللا شنو ؟؟ هناك أسئلة موجّهة لدكتور زين من أطباء الزيتونة ..ومن المهم الرد عليها .. وعشان الناس نقلو كلام ..فوجودو مهم لتوضيح الكلام .. __ الإجابات علي أسئلتك الأخيرة بعضها مضمّن برد د/أنس ..ولمزيد من الإجابات علي الأسئلة ناس الزيتونة قالوا ماعندهم مانع الداير يسأل يجيهم وح يجاوبوهوا ( رغم إنهم ما ملزمين ) .. |
اقتباس:
اما التوضيح فدا واجب انساني بحت اماعلاقته بالبوست قد ذكرته في اول مداخلتي بما انك ادرجت مداخلتي في احد ردودك وربما لتشابه الاتهامات والسلام امان |
اقتباس:
بوست واحد بينسحب مافي .. الونسة التي تبخّس الناس مجهودهم يا بابكر لازم ينقطع خبرا .. وإنت زول حقّاني كما أعرف .. يجي د/زين يقول رايو ..ويجاوب أسئلة زملاهو ناس الزيتونة خليها أسئلتنا نحن .. ويابابكر : لما انت عملت لي البوست داك .. أنا فعلا لم أكن نشطاً في المنتدي ولا في هذا البوست تحديدا - يمكن مراجعة توقيت المداخلات- وأنت تعلم الأسباب .. لكن جنس الونسة الهدّامة دي .. تستحق الواحد يصاقر المنتدي .. _ تحياتي .. |
اقتباس:
أصلو التنوير ما قاعدين ناباهو ..والتوضيح برضو قاعدين ندورو .. إدراجي لمداخلتك ومداخلات إخوة آخرين ..لأنّها متعلّقة بمافُهم نقلاً عن د/زين عبدالله ..بإنو ثمّة تقصير حدث في الزيتونة .. وعشان يتم إستعدال الفهم المغلوط والذي انبنت عليه مداخلات ترسّخ ذات الفهم ..طالبنا فقط - وطالب بعدنا أطباء الزيتونة - بتوضيح من د/زين . بعدها نجي كلّنا نحكي عن مواجع النظام الصحّي في السودان ..وفرضية ممالاة الأطباء لبعضهم البعض ..ونصرتهم لإخوانهم ظالمين أو مظلومين .. __ سلام .. وأمان |
والله يا اخونا
اناماشايفة انه دكتور زين ملزم بانه يدافع او يوضح ماقام به بنفس القدر الذي لايلزمك بتوضيح لماذا تدهور تصحة خالد الحاج بعد دخوله المشفى |
اقتباس:
احمد زين بنتو ملاذ مريضه الان بمستوصف تعاني من التهاب و حمى و تتنفس باكسجين ايضا |
اقتباس:
يازول كدي النقول ليك كلام مارسمي ..إنطباعي يعني ..كونو مستشفي الزيتونة تكون فيها التجهيزات الموجودة دي يفترض نحمد الله ونسكت .. هل تساءل أحدكم عما يدور في المستشفيات الحكومية ؟؟ هل يمكن تصديق أن مستشفي الخرطوم باسمها وتاريخها كلّه ..لا يتجاوز عدد الأسرّة بقسم العناية المكثفة فيها (AB ROOM )لا يتجاوز 8 أسرّة ؟؟ الكلام دا كان لحدي شهر سبعة الفات دا ..يمكن وسعوها بعد داك ماعندي فكرة .. الدخول لغرفة العناية المكثفة بالخرطوم أحياناً يحتاج لزول حريف في (لعبة الكراسي ).. وبعض مرضي الحالات الحرجة يتم (تقريشهم) بالمستشفيات الخاصة القريبة في إنتظار فراغ سرير ليبدا السباق لحجزه ..وهنا إنت وشطارتك وسرعتك .. عدد من مرضي الحالات الحرجة بيكونوا موضوعين في عنابر مقرفة ..ويرجوا الله عشان ينزلوا عنبر العناية المحتاجين ليها ..وفيها دخلوا وفيها لا .. مستشفي الشعب العريق ..تحمل إليه مريضك في حالة فشل في القلب ونقص حاد في الأوكسجين يعتذر لك الطبيب عن الكشف ليس فقط لعدم توفّر سرير ..بل لعدم توفّر تربيزة كشف يرقّدوا عليها المريض ويشوفوا الحاصل عليهو .. ذات المستشفي التي تحمل إليها مريضاً في حالة شبه غيبوبة ..ليرزعوك بالإجابة الغريبة ماعندنا سرير فاضي .. وحكايات أخري ..أملك تفاصيلها من واقع عملي كطبيب ..ومن واقع مرافقتي لمرضي يخصّونني جدا ..وخلال أشهر طويلة لا مجرّد حالة عرضيّة .. (الكلام الفوق دا أنا مسئول عنّو تماماً.. ياناس مستشفي الخرطوم ..ومستشفي الشعب ) .. لكن كل هذا لن يبرّر لي يوماَ الإساءة لزملاء (أطباء وكوادر طبيّة ) يقدّمون أقصي ما لديهم في ظل ظروف كهذه ..فلهم مني الشكر كلّه ووافر الثناء .. ولعنة الله علي الحكومة ..وعلي وزراء صحّتها ..وعلي كل مسئول نام عن إصلاح ما يمكن إصلاحه .. كدي بس إنتو افتحوا ملف الوضع الصحّي بالسودان ..وستدهشكم الحقايق .. وكمان عشان ماتبقي الحكاية موجّهة للمستشفيات الحكومية ..تعالوا نفتح ملف المستشفيات الخاصة وتجّار الطب في الخرطوم ..لكن قبل كل شئ فلنتفق أن إلقاء التهم بلا أدلّة شئ مؤذي وغير كريم .. الزول الداير يوجّه سهام إنتقادو لأيّ مؤسسة خاصّة .. يفترض ينجّض شغلتو أوّل .. __ تحياتي .. ___ |
اقتباس:
أوكي يا طيبان ما دام الموضوع بقى حق و قانون انت ما عندك حق تطالب د. زين يجي هنا يوضح موقفو لبش؟ لانك ما عندك بينة عليهو و هو غير مطالب بنفي الكلام دا! الزول دا يا طيبان (لو صح الكلام) إتونس ليهو ونسة خاصة مع صديق كونو الونسة دي تصلك، دي بتبقى مشكلة فتحي و ما مشكلة أي زول تاني.. أنا شايف من حق زين ما يجي هنا... بالعكس البوست دا فيهو تعدى على خصوصية ونسات الزين السرية هسع انت أمشي الشرطة قول ليهم يا أخي أنا داير أشتكي بابكر عباس دا، لانو قال فيني كدا و كدا طوالي بقولوا ليك دليلك شنو؟ لو قلت ليهم فلان قال سمعو من فلان التاني، على طول بقولوا ليك عليك الله أمشي ما عندك حجة.. |
اقتباس:
انت شايفة إنّو ما ملزم ..وأنا شايف إنّو ملزم .. لماذا تدهورت حالة الأخ خالد بعد دخوله المستشفي ؟ ..بالمناسبة إلإجابة علي السؤال دا حايمة وموجودة في البوست دا .. |
اقتباس:
و بعدين قلت لي في المؤسسات الحكومية نردم ساي ما بتجينا العوجة الا الخاصة مفروض ننجض شغلنا؟ معليش يا طيبان منطقك غريب و شكلك بتكتب تحت تأثير غضب روق شوية يا خي و راجع مداخلاتك الواحدة بتنطح التانية |
اقتباس:
يبدو انك مافهمتني اناقصدت عدم الزامك جاي من انك لست الطبيب المعالج ومعليش لوتقلنا عليك |
اقتباس:
انا عندما قلت العام (اللون الاحمر في اقتباسك) في مداخلتي كنت اقصد من المستشفيات الحكوميه ومثلها من المستشفيات الخاصه ولا اظن ان ذلك عصي فهم المراد.. والخاص..الخوف من تكرار حاله من حالات العام... والا ما كان لي ان ادخل في تناقض التقدير..والتقليل..في ذات الوقت، لكم كأطباء ولمستشفى الزيتونه.. |
اقتباس:
د/زين يجيبو ونستو هنا ..ونحن كمان نتونّس ونقول هو ملزم بالتوضيح أو التصحيح .. وملزم ليه ؟؟ لأنّو الكلام الاتنقل عنّو أساء لآخرين ..ودا إلزام أخلاقي يابابكر ( ما طالبناهو عبر عريضة ) ..يجي يقول الكلام دا أنا ماقلتو ..أو قلتو بطريقة تانية ..بدل يقعد يتفرج علي زملاهو بتتم الإساءة ليهم بناءاً علي ونسة تلفون بينو وبين الدكتور المعالج ماكان بالإمكان إننا نعرفها لو د/زين احتفظ بيها لي نفسو .. تصحيح ما تم عبر المكالمات برضو بيخلّينا نراجع ما قاله د/أسامة الذي قال أنّه لا يذكر ما الذي قاله له د/زين .. وكما أوضح د/أنس قرار تركيب جهاز التنفس الصناعي اتخذه د/صلاح ..بعيدا عن د/أسامة الذي استقبل اتصال د/زين .. يللا قايس الكلام دا ..بما انبني من مداخلات علي معلومة تدخّل وإستجواب وتوجيه د/زين والذي كان مفصلي في تحسّن الحالة كما ورد ..وشوفو ملزم بالتداخل وللا لا ؟؟ __ تحياتي .. |
اقتباس:
أنا معاك انو في بلاوي في حكاية المستشفيات وعدم اهتمام بعض الدكاترة لما يحدث للمريض..ونحنا الما عايشين في السودان تفتكر انو احنا مفروض علينا اذا كانت المستشفي الفلانية فيها البلاوي دي ولا لأ؟؟؟ نرجع تاني لي موضوع دكتور زين الاتسببت ليهو أنا في موقف حرج وقلت اني متحمل المسئولية عن ما ارتكبته من خطأ بنقل كلام بحسن نية وبرضو مبني علي كلامك الفوق عن المستشفيات في السودان..وأنا بالنسبة لي المستشفي هي المستشفي سواء كانت حكومية أو استثمارية والمطلوب هو ببساطة علاج المريض.. ثانيا يا طيبان أنا الدكاترة ديل ما بعرفهم ولا حاولت أسيئ ليهم ولو ثبت ان هناك تقصير من أي واحد فيهم أنا ما حأكتفي بالاساءة لكن حأمشي آخد حق مريضي بي ايدي عدييييل.وفي النهاية الموضوع ببساطة كان في لبس تم توضيحه بواسطتكم ونحن نصدق كلامكم ونقول للدكاترة ياخوانا ما تزعلو أمسحوها في وشنا لكن دا ما معناهو ان الموضوع انتهي بالنسبة لي وأنا مصر اني أصل للحقيقة وهناك احتمال كبير اني أمشي الخرطوم بعد اسبوع وأول حاجة حأعملا هي اني أمشي لي أحمد زين أسوقو ونمشي للزيتونة سوا ولو ثبت انو كلام دكتور زين صح أنا حأسيئ ليهم المرة دي وجها لوجه ولو طلع ما صح حأعتذر ليهم on the spot أفتكر كدا ما قصرت. لعلمك الكلام الأنا نقلتو دا أنا مسئول عنو وماني ساحبو الي أن يأتي من يثبت اني كذاب..ويادكاترة الزيتونة أنا آسف الي أن نلتقي ويا ثبت أسفي يا سحبتو..وطبعا أنا بخاطبهم هنا عشان عارف انهم متابعين الموضوع أول بأول والما متابع الكلام بيصلو زي ما احنا بيصلنا كلامهم .. سؤال محيرني وهو ليه دكتور أنس نصح بسفر خالد مع انو الشي المعتاد لما زول يتعب برة بلدو الدكتور بينصح الناس المعاهو يسفروه بلدو .ولا يكون دكتور أنس اعتبر خالد صديقو هولندي والهولنديين أولي بيهو.ولا يكون خايف عليهو لو استمر في العلاج عندهم الأمور حتمشي لي أسوأ. |
اقتباس:
الونسة الخاصة يا طيبان فيها هلوستك، فيها سوء ظنك و فيها خيالك للاحداث بهناك و فيها سياق الحوار مع الطرف الآخر، يستحيل يقدر طرف ثالث ينقل الونسة دي بكل أبعادها، ح ينقل كلمات صماء طائشة و انت نفسك (الزول النقلو عنو) لو حبيت توضح الكلام المنقول عنك ح تفشل في توضيحو انت بتدفر في د. زين لخانة اليك و أعتقد إنو زول ذكي جدا و ما ح يستجيب ليك |
اقتباس:
التعليق بتاع (ردم المؤسسات الحكومية ) دا اتوقعتو يجي من بابكر عباس ..لكن شكلو حصانك أجري من حصانو .. الجملة دي بالذات أنا قصدتها .. المستشفيات الخاصة ياحافظ داخلة في سوق الله أكبر..بزنس يا سيدي ..يعني بي مكاتب محاماتهم وقروشهم البيدفعوا بيها إعلانات المحاكم في الصحف والبيانات التوضيحية ..وأي إساءة لأي مؤسسة طبيّة خاصة .. قد تستفيد منها مؤسسة طبيّة خاصة منافسة بطريقة أو بأخري .. لذا فهم أكثر حرصاً علي سمعتهم ..وما بيلعبوا في أكل عيشهم .. ولو بيتساهلوا يبقوا طير .. وما بعرفوا يلعبوا بزنس .. أمّا المؤسسات الطبية الحكومية فحالها يغني عن سؤالها ..ولديهم تبرير لأي تقصير وعدم سرير .. وشماعة قدر الضربة اسمها الإمكانات ..ونسبة ميزانية الصحة من الميزانية العامة ..صدقني لا قاعد يهمهم شكر لا بيوجعهم لوم .. المبررات دي ما بقدر يتّكل عليها صاحب مؤسسة خاصّة ..عشان كدة قلنا الداير يرش مؤسسة خاصة ينجّض شغلتو ..فالخصم منجّض شغلتو ع الآخر .. _ يللا دايرك تمسك لي قرن واحدة من مداخلاتي اتكسر بسبب نطحو قرن مداخلة أخري .. |
اقتباس:
وفي النهاية المسالة بقت مسالة اجادة بضاعة يعني بضاعتك لو ماجيدة القضاء مابيعمل ليك حاجة ولاشنو؟ دا باعتبار انتهاء المعيار الاخلاقي للمهنة |
اقتباس:
وأعتذر عن سوء فهمي .. __ تحيّاتي .. |
أها وصلتو لي وين وأخبار خالد الحاج شنو ؟؟
طيبان يا صديقي الحبيب هناك خطأ إرتُكِب من بعضنا هنا وقد شاركت أنا فيه أيضاً وبحسن نية .. إذ كانت بعض المعلومات غائبة عني ... أتت أختي وأختك نبراس وتقدمت بصوت شكر ( وهو بقيمة الإعتذار لو تدري ) دلفت أنا وتقدمت بإعتذاري أستاذنا الجليل / فتحتي مسد حنفي أتي هنا وأعتذر وغيرنا أيضاً قد جاء واعتذر إذن ما المشكلة أخي د. حزيفة ؟؟؟ حقيقي ... ما المشكلة وأنا هنا أسوق إعتذاري بوافر الأدب والإحترام لدكتورأسامه هذا الإنسان القامة السامقة والشامخه لدوره المتعاظم في رعاية الأخ خالد الصحية |
اقتباس:
النقل لما يكون فيهو نقطة مفصليّة بتسئ لي زول تاني وبتسحب البساط من صاحب فضل وتنسبو لي .. وأنا ما قلت النقطة دي طبيعي جدا أجي أقول أنا ما قلت كدة .. __ د/زين ليهو كم يوم في خانة اليك ..وأنا بدفر فيهو عشان يمرق منها ..فما تمدح ذكاءو ساكت تقوم تعجبو الخانة .. |
ياعم فتحي..
انا كتبت راي سمّيتو غير رسمي .. فبالله اتعامل معهو بوصفو الأنا ختّيتو ليهو ..وماتقراهو قراية تانية ..كتبتو لغرض محدّد .. لا يتجاوزه .. ياناصر : الرد علي سؤالك مضمّن في مداخلتي الأولي بالبوست بتاعك .. وكنت قد دعوت كما دعا آخرون للتركيز علي ما ينفع خالد .. والتزمت بذلك . ثم تواصل إنتقاد آخرين ليست لهم عضوية بمنتدي سودانيات بناءاً علي معلومات نقلاً عن طبيب عضو بسودانيات ..لم يتم تأكيدها أو نفيها من جانبه حتّي هذه اللحظة .. يا ناصر يا أخوي .. لسنا ناكرو جميل ..وأنا شخصيّا لن أسكت عن توجيه تهم لمن وقفوا إلي جانب خالد في محنته .. وهذه (فنجرة ) مني ساكت ..لا علاقة لي بمستشفي الزيتونة تقع وللا تقوم ..كما لا أعشم في شهادة تقديرية منها .. إذا إنتو شايفين إنّو الموضوع دا يتقفل علي كدة .. أوكي .. لكن أي تلميح لتقصير قام به الإخوة الأطباء تجاه خالد .. ح أجي أرازي صاحب التلميح ..حتي يثبته ونمشي لخطوة تانية .. أو يبلع كلامـو .. __ وشكراً .. |
اقتباس:
لأنو أنا اصلي مفكر افتح بوست كبير عريض عن health information system in Sudan و من هسي تكون عارف انا في النظم الصحية الكادر البشري حيكون حاضر جداً لانه المكون الأول للنظام .... يعني الأطباء ما حأخليهم ما حأخليهم |
اقتباس:
طيبان يا زول يا طيب أريتها مني بخير يا رب http://albrkal.com/vb/showthread.php?t=12296 وإلي هنا نصلُ إلي نهاية المطاف لطي هذا الملف هذا إن قبلنا جميعنا إننننننننننن قبلنا |
اقتباس:
حافظ حسين يا صديقي النبيل أيها الإنسان الإنسان وأنت تعلم كم من الغبن في حلقي من الطب البشري في السودان ... وكنت ولولاك وبغضبي ذلك وأنا مُغيبٌ عن بعض المعلومات .. كنت سأحطم الأمر تماااااماً ربنا يتمم الشفاء علي أخونا خالد الحاج وسيكون لهذا البوست بعداً آخر وهاماً للغاية فقط سيأتي في حينه دونما أيُ إنفعالات بل بالنقد الموضوعي |
اقتباس:
البوست الكبير وعريض دا كنت منتظر فقط (وحي مرض خالد الحاج) ينزل عليك عشان تكتبو؟؟ شنو حكاية كل ما يهبشوا واحد في كلام مافي محلّو يجي يشهر لينا سيف كتابة بوست عن النظام الصحّي في السودان ..؟؟ أنا البكتب باسم طيبان يا حافظ .. لا أعمل بوزارة الصحّة السودانية ولا علاقة لي بمستشفي خاص بالسودان ..والنظام الصحّي الإكتشفت فجأة إنو مختل دا قلنا فيهو راينا زمان ..وكاتلنا بما تيسّر لنا حينها لإصلاح ما يمكن إصلاحه ..ولامن قنعنا من خيراً فيهو قدّمنا استقالتنا كتابةً .. ومرقنا في أرض الله الواسعة .. فيا سيدي أخد راحتك علي الآخر ..وكان درت ليك داتا من جوّة بنناولك ليها .. وبما إنو كلامك دا بيعتبر دعوة لحضور البوست الكبير وعريض ..فمن أسّة يا حافظ تعال جاهز للنقاش وجيب أدواتك كلّها .. وعن نفسي ح أتعامل معاهو كبحث علمي ..وبجيهو شايل منقاشي .. ويا اتعدل حال النظام الصحي بنهاية البوست .. يا كمان البوست لحق النظام الصحّي .. __ وأهو منتظرين .. |
ناصر سلامات ..
ما تشتغل كتير بردّي علي حافظ ..دي حاجة كدة علي هامش مؤتمر الزيتونة .. __ تحيّاتي .. |
سلامات يا طيبان ومشتاقين
تعرف فى فترة مرض طويلة لـ (نسيبتى) رحمها الله .. تعرفنا على كمية من الممرضين والممرضات ودكاترة الأمتياز .. خاصة فى الحوادث .. وبقى لينا مهام للمساعدة .. خاصة بالليل .. أتوفت الحجة وما قصروا معانا فى العزاء .. ممرضة لطيفة وهى بتنصرف .. قالت لينا (ودعناك الله وما أظن نتلاقى تانى .. البسيب المستشفى تانى ما برجع ليها) .. وقد كان :) فعلاً الحاجات دى بتظهر من وحى اللحظة .. ومن مرض ود الحاج شفاه الله .. نبتت هذه الأفكار .. جميل جداً يكون هناك نقد عام .. ولا يكون تراشق بخصوصية مع (الزيتونة) .. بشهادة الجميع لم يتعامل أحد مع خالد بإهمال .. بل يؤكد الكل بأنهم قدموا ما فى وسعهم حتى سلم الطائرة .. والذين يهمسون عن الأموال الطائلة .. فهى ليس لها علاقة بعمل الطاقم الطبى .. الموضوع هذا مناقشته لا تتم بمنأى النظام العام من البلاد .. والتردى كما فى النظام الصحى .. متردى فى التعليمى والبيئى والأقتصادى الخ .. والنظام الصحى كلمة واسعة جداً .. لا توفرها المستشفيات بل الدولة .. التدريب والتأهيل الذى يواكب الطب من حولنا .. إمكانيات المعامل والتحليل .. تأهيل قطاع التمريض .. تهيأة الجو الملائم للأطباء .. وأشياء أخرى تعرفها أكثر منى .. للأسف المستشفيات لدينا تفوقت فقط فى البنيان .. حتى التمريض تم جلب خبرات خارجية .. لغياب التأهيل المحلى .. فأصبحت المستشفى مثل أى (مشفى - rehabilitation) بإمكانيات طبية .. وقدرة محدودة من الجراحة .. طبعاً دى خواطر زول جرب هنا وهناك .. وليس معلومات دقيقة .. الشكر لطاقم (الزيتونة) على كل جهودهم .. وأتمنى من أى أنسان أطلق كلام على عواهنه من منطلق عاطفى أن يسحبه ويعتذر عنه .. فنحن هنا ليس فى (ونسة) خاصة .. بل فى مكان قد يصيب أناس قاموا بواجبهم على أحسن وجه .. فلا يكون هذا جزاء سمنار |
اقتباس:
و بعدين معاك أي بحث بكون في البداية إحساس بمشكلة .... بعدين الناس بتجي تحلل المشكلة هل هي مشكلة حقيقة و لا لا؟ و بعد تحليل المشكلة و التأكد من أنها حقيقة بجي البحث ... هسي في رأي أنا مرض خالد دا كان مشكلة عشان كدا أخذت الحيز دا كله من الجدل لكن أنا شخصياً ما نزل لي وحي معاها و كما تعلم أن نزول الوحي توقف قبل ما يزيد عن 1400سنة .... [QUOTE= أنا البكتب باسم طيبان يا حافظ .. لا أعمل بوزارة الصحّة السودانية ولا علاقة لي بمستشفي خاص بالسودان ..والنظام الصحّي الإكتشفت فجأة إنو مختل دا قلنا فيهو راينا زمان ..وكاتلنا بما تيسّر لنا حينها لإصلاح ما يمكن إصلاحه ..ولامن قنعنا من خيراً فيهو قدّمنا استقالتنا كتابةً .. ومرقنا في أرض الله الواسعة .. ..[/QUOTE] و الله يا طيبان عارف بتكتب بإسمك و أصلاً ما جاني شك في لحظة أنك بتكتب بالإنابة عن أي جهة أو شخص رجاء ما تحمل الإمور أكثر مما تحتمل ... اقتباس:
لكن أنا زول ما طموح شديد و النطمننك من هسي البوست دا ما حيعدل حال النظام الصحي لكن ممكن يفتح أسئلة أو إحتمال يلحق النظام الصحي لو ما مشي الصرف الصحي عديل فتك بعافية يا مان و بالله أعصابك --------------------- التعديل دا عشان أنا أول مرة أجرب إقتباس متعدد و في البداية ما ظبطت معاي... ما تقول عدلت خوفاً من العصرة |
[QUOTE=
شنو حكاية كل ما يهبشوا واحد في كلام مافي محلّو يجي يشهر لينا سيف كتابة بوست عن النظام الصحّي في السودان ..؟؟ ..[/QUOTE] يا سلام و الله القراية بحسن النية دي أصلاً ما كويسة ... يا خي انا قبيل قريت الكلام دا بحسن نية خالص لكن وقت رجعت تاني لقيت النية سودت ..... يا طيبان دا كلام شنو الكاتبه دا؟ يا طيبان أنا حافظ هنا بمثل نفسي و مسئول عن أي حرف بكتبه هنا شنو جامعني يهبشوا (واو الجماعة دي لي أنا و منو الكتبوا كلام ما في محله) أتمني أنك تحاسبني أنا كفرد ما أنا الجماعة و أكتر حاجة بعتز بيها في الدنيا فرديانتي ... فرديانية دي ما جاية من فريد لكن من زول لقي نفسه ما بقدر بعيش في قطيع عارف كيف؟ و تعال كلامي الما في محله دا وينو أنا كحافظ .... أنا كتبت هنا لنبراس كصديقة و زميلة معانا قولت ليها بالواضح ما تشكري بإسمي ناس الزيتونة , وكتبت تساؤولاتي المشروعة جداً في النظام الصحي السوداني.... لا جبت سيرة زيد لا عبيد عشان أقول بعرف و لا ما بعرف .... رجاء راجع مداخلاتي كلها لو لقيت أنا جرحت زول بالإسم قول |
حافظ يا مهدئ الأعصاب ..
حبابك ياخي .. بعد تعليقك للمرّة التانية عن انفعالي وغضبي فلا بد لي أن أتحسس قلمي ..وأقول .. يا صديق لا غضب شخصي تجاهك ولا ينبغي له أن يكون .. فدحين لو لقيت نفسي حار .. شيل ليك موية - تفضّلاً منك- ورُش مكان المداخلة ..وبرّدا .. وما بين الخيّرين حساب .. أها ياحافظ إدعائي لعدم الغضب لن يكون سوي محض تجمّل .. لاغير .. ولكني غضبت لطريقة تجريم الآخرين التي اتبعت من بعض الإخوة وأنت منهم - وهو كلام مكرور كما تري -فإنت يا صديق بنيت مداخلاتك علي فرضية تقصير في علاج خالد ..ومنه انطلقت لرحاب تردي الخدمات الطبيّة الواسع ..ودي يا حافظ ياها لخبتة الكيمان الأنا أبيتا .. أمّا إن كنت تري - حتي هذه اللحظة وبعد كل البيانات التوضيحية وآراء المرافقين لخالد - إنو ناس الزيتونة قصّروا ولا يستحقون الشكر .. (كما نوّهتَ في رد سابق لك ).. يبقي دا شي تاني ..ورأي يخصّك من حقّك أن تتمسّك به .. لكن لا يمكن الأخذ به .. ما لم تجيب أدوات نقدك وتقول قصّروا في كدة ..وكدة .. ويكون عدّاك العيب .. خلاف ذلك يا حافظ ببقي البنسوي فيهو دا جدل عقيم ..ومكابرة ليس إلا .. بالله يا حافظ هل تردي الوضع الصحي في السودان كان يحتاج لأزمة صحيّة كالتي حدثت لخالد حتي تتحرّك بإتجاه البحث ؟؟ ظنّي أنّك تعلم أن التردي بايت ومقيّل في هذه البلاد من قبل أن يفكر صاحب الزيتونة في إنشائها ..بل وأظنك تعلم أن الوضع الصحّي لو كان بعافيته لما تطاول كثيرون علي الدخول في الإستثمار الطبي بالسودان لدرجة أن صاحب أي بناية من طابقين علي إستعداد أن يعلق لافتة مضيئة معلنا عن ميلاد مستشفي ومستوصف .. وعموما مبارك عليك إلتقاط اللحظة المناسبة لبدء البحث .. فأن تأتي متأخرا - برضو- خيرُ ُ من ألا تأتي ..وعفيتك من حكاية الوحي دي .. لأنو فعلا وقف قبل 1400 سنة ..فشكرا علي التذكير .. لما حكيت ليك قصة كفاح الطلبة فيما يخص علاقتي بالنظام الصحّي في السودان ..فدا لسبب توجيهك السؤال وإستئذانك مني في شأن البحث المزمع ..فحكاية تحميل الأمور ما لا تحتمل ما معانا .. عودة لعنوان البحث والذي صار أكثر تخصيصاً ..يمكن أساعد بشكل جدّي في الموضوع دا من واقع تجربة عدّة سنوات في الكواليتي مانجمنت ..خصوصا موضوع البوست رضا المستهلك / متلقي الخدمة .. أها يا حافظ .. أعصابي ما راقت بالله ؟؟؟ |
اقتباس:
مداخلتك الأخيرة قريتها .. وبرد ليك عليها بعد أطلع وأجي ..وأهي فرصة الواحد أثناء ماهو برّة البيت يفكّر ليهو في طريقة يمرق بيها من عصرتك ليهو دي ( وش معصور) .. ياحافظ بيّض نيّتك ياخي ..وأي كلام تشوفو ماواضح أسألني وبوضّحو ليك شديد ..بجي بورّيك أنا قاصد شنو بجملتي بتاعة الواحد اليهبشوهوا .. __ هبشك الما ضرّاك .. |
طيب يا شباب
أنا طلبت طي هذا الملف لكني شايفو لسه عاوزنا نلف معاه طيب .... قبل ساعات إتصل علي الأخ زميل البورد د. زين عبد الله من إيرلندا وتحدث معاي في محادثة طالت لأكثر من ساعتين أو ده حسب ما أعتقد ... من الساعه خمسه لغاية الساعه سبعه وشوية كنا بنتكلم وبشفافية عالية للغاية سألتو سؤال مباااااااااشر يا صديقي وريني الحاصل شنو ؟؟؟ أولاً وكونوا يجي دكتور زين هنا علشان ما يتحدث في أمر غاية في الحساسية أنا القلت ليهو ما تجي تكتب مطلقاً وده حفاظاً علي شرف المهنة وهو أيضاً قالها لي .. أنا لا أعتقد بأنَّ حديثي في الأمر عبر العام قد يفيد الأمر. ويا د. حذيفه يا أخوي د. زين بيستأذنك في إني أمدو برقم هاتفك وبيستأذنك كمان بإنو يتصل عليك ، في حالة إنك زغبت في التحدث معه في ذات الشأن فهل ممكن ذلك لأنكم كأناس أصحاب مهنة واحدة وبتفهموا نواصيها أكتر مننا نحن الـــ ( عنقاله ) ساكت ديل ونقاشكم مع بعض حيجاوب ليك إنتَ تحديداً بعض اللبس الحاصل طيب ... د. زين بيقول: ما قدمه زملائي هناك في مستشفي الزيتونه أمر طبيعي وعادي منهم كأطباء وأنا بعتبرهم قاموا بدورهم علي أكمل وجه ... وأنا بشكر د. أسامه علي ما فعله تجاه مريضو ... أنا شاهدتَ صورة لأخي د. أسامه أثناء نقل الأخ خالد من مركز العناية المكثفة إلي الإسعاف إلي الطاقم الطبي بالطائرة ... وللحق أقول .. بأنَّ ما قام به د. أسامه لا يستطيع أن يقوم به إلا طبيب مختص يعرف مدي خطورة نقل مريض في مثل حالة خالد الحاج من غرفة الإنعاش إلي عربة الإسعاف ومن ثمَّ تسليمه بعناية كاااااملة وبحرص لا يعرفه سوي طبيب مُقتدر إلي الطاقم الطبي الذي جاء بالطائرة الخاصة. وعليه أنا أري بأنَّ ما قام به زملائي لهو عمل رفيع يستحق الثناء وأقول بأنهم قد أدوا دورهم علي أكمل وجه .. أما فيما يلي جملةً قد خرجت مني للعزيز فتحي .. أظنه قد فهمها خطأ وله العذر في ذلك لما ظلَّ يعانيه من توتر نفسي تجاه أزمة إنسان قريب بالنسبة ليه وهو بعيد عنه ... الأخ فتحي بالقاعرة وخالد في الخرطوم ... لقد ذكرت مسألة الإمكانيات الطبية وليس الكوادر ... وهذه مسألة أسمحوا لي بأننا كأطباء قد ناقشناها بمهنية وليس إزدراء من الناس ... نعم هناك مشاكل طبية بالسودان تتلخص في الإمكانيات وأعني بالإمكانيات الأجهزة المتطورة والتي قد لا توجد في السودان ... جهاز التنفس الصناعي مثلاً ... أنواع شتي ومختلفة ولكل جهاز مواصفات طبية تختلف من جهاز إلي آخر وبالتالي تختلف الكفاءة الطبية لكل جهاز .. والعالم تطور ووجب علينا أن نتطور وأعني هنا إدارات المستشفيات في كل العالم وليس السودان فحسب. وأنا سوف لن أخوض في أمرٍ بالغ الحساسية كهذا عبر المنابر العامه ولسنا ندعي الكمال ولسنا من يقول ما يسئ للناس وليس كافة الناس بل زملاء لك في مهنةٍ هي مهنة إنسانية في المقام الأول. هذا والله وبكل الصدق تلخيص لأهم ما جاء في الحديث بيني وبين الأخ الكريم د. زين عبد الله عبر المحادثة الهاتفية التي جرت بيني وبينه عصر هذا اليوم وقد إستأذنته بأنني سوف أُلخص ما دار بيني وبينه من حديث أرجو أن يكون اللبس قد أُزيل تماااااااااااماً هُنا ... ولدكتور حذيفه أقول يا صديقي أنا في إنتظار موافقتك علي إستئذان د. زين منك للتحدث في الأمر إن رغبت في ذلك شكراً للجميع وأنتم تتناولون الأمر بديمقراطيةٍ حقه |
الحمدلله ياناصر الحكاية طلعت خطأ في الفهم وليس خباثة وكذب..أما بخصوص موافقة طيبان فأنا بحكم معرفتي بيهو برد بالنيابة عنو وبقول ليك اديهو رقم التلفون علي ضمانتي وكان داير أنا بديهو ليهو طبعا دا لو ما غير رقمو العندي..سامحونا يادكاترة الزيتونة..
|
الأخ حافظ :
تبقي طالبني توضيح ..وإجابة علي مداخلتك الأخيرة .. بنلقي ليها فرقة يوما ما ..ونحن علي اتفاقنا فيما يخص البوست بتاع رضا متلقي الخدمة الطبية .. الأخوان رأفت وسفيان : برضو أعتذر عن التعليق علي مداخلتيكما ..البوست بقي علي قفلة بعد تطوّراتو الأخيرة .. الأخ ناصر/صورة للعم فتحي : انقلوا لدكتور زين عبدالله عدم رغبتي في الحديث إليه عبر الهاتف ..فليس بيني وبينه موضوع شخصي تتم مناقشته من وراء حجاب .. بيني وبينه ما كُتب هنا ..وماَلاته التي انتهت بمداخلة ناصر يوسف الأخيرة .. رغم تحفّظي الشديد علي مسألة نقل الحديث عبر طرف ثالث ..وهو موقفي المعلن منذ مداخلتي الأولي في هذا الموضوع .. يا عم فتحي : أرجو أن تعفيني من حسن ظنّك فيّ هذه المرّة .. فأنا أري أن الحديث مع الدكتور حول ما حدث لن يكون له جدوي .. وأهو البوست بيتشطّب .. ___ سأختم حديثي برد دكتور أنس البدوي ..المنشور بالبركل حول توضيح ناصر يوسف نقلاً عن د/زين عبدالله .. |
اقتباس:
|
اقتباس:
ما شايف حقو تتحفظ على نقل الحديث عبر طرف ثالت، الطرف الثالث دائما أساسي في البوست دا ما دام بنيت الإتهام على حديث منقول عبر طرف ثالث، ببقى من العدل ننفي الإتهام دا لو في طرق ثالث جاب لينا براءة ذمة من غير أي تحفظ |
| الساعة الآن 08:34 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.