Weekend
 

تقام في القرية الثقافية بكتارا معرض للفنان السوداني الصلحي وحتى نهاية الشهر المقبل.. يضم المعرض العديد من أعمالو واللي إمتدت لفترة أكتر نصف قرن ، إلتقطت بكاميرة موبايلي تأثيرالغربه والسجن والمنفى على أعمال الفنان..
وإلتقطت كم تصاوير عن الحياة والموت ، بنلقاها في مشروع ( الشجرة ) اللي بتموت واقفه ، ومشروع القبور...
ومحاولة إستنطاق الموتى ، من خلال الطائر (الزعًاط ) الي شاهدتو في الكثير من أعمالو كموتيفه بيحاول من خلالا إنو يوصًل رساله.. بتظهر الموتيفه دي في أكتر الأماكن رطوبة في أعمال الصلحي.. في القبور ، وبتظهر برضو في تواصلو الروحي مع السماء.. عمد لترجمة الحاجه دي في الكثير من أعمالو بوضع بصمتو إللي بتحمل إهتمامو بالفن الإسلامي والثقافة الإسلامية
لاحظت ندرة أعمالو حول المرأة .. إشتغل شغل أو شغلين .. لكنه ما ساهلات .. ولاحظت إنو إستخدم الحبر الأسود في العديد من أعمالو عشان يلقي حريتو في التفاصيل المولع بيها .
مشيت هناك مرًتين.. الإسبوع الفات كان المعرض مكتظً بالزوار من مثقفين ، ومثقفاتيه ، وسياسيين معًاطين ، وبرجوازية ، وفنأنين ، وإعلاميين ، و فضوليين.
إستنطقت نفر من الزوار ، صادف إنهم فنانين قطريين.. أشادوا بالمعرض ده ، أيما إشاده ، وقالوا ما معناهو أنهم بصدد أنو (يحردوا ) فكرة إقامة معرض على خلفية ماشاهدوه من عمل فني متماسك .

تولًى الصلحي منصب نائب وكيل الثقافة في عهد نميري ، إلا أنو أودع السجن لمناهضتة الحكومة ، وقضى بالسجن 6 شهور . (1)
غيًرت تجربة السجن حياة الفنان بشكل ملحوظ بحيث عبًر عن صدمتو عن واقع غياب الحريات في الكثير من أعمالو ، بل ليهو لوحه إسمها ( رأس وكيل الوزير ) (2) ، بتلقى فيها طائر بيجلس على كتف الشخص
لسبب من الأسباب ما عجبتني لوحة رأس وكيل الوزير ، لأنه أول إنطباع جاني لمن كشًفت ليها ، لوحة فان جوخ لمن رسم زوجتو ، وعلى كتفها فخذة لحم ..ولمن سألوهو دي منو دي : قال هذه زوجتي الزوله البحبها ،.. .. أها ودي شنو الحاجه المعلقها على كتفها ديك ..قال دي فخدة لحم أنا بحبها برضو !
فكإنو الصلحي عايز يشير لإنو في وحدتو دي ، كان خير جليس ليهو ، فكرة إنو يتماسك ، والأمل ده كان بيتبدى ليهو في هيئة عصفور لما ترمز ليهو من حرية ووو
حاولت إنو أطرد الفكرة دي من راسي لكن ما نجحت ، بل إنو حتى في زيارتي التانيه للمعرض أول أمس ، لقيت الإنطباع ده في محلو...
عموما ً .. الزوار ما معنيين بإنطباعي ولابعيوني البشاهد بيها ..
دي محاولة لإنو الواحد يتفرًج شوية بين خطوط وريشة الصلحي.
بعتذر عن التصوير الغير محترف ، فهذه المشاهدات إلتقطتها من موبايلي ، وبعد داك حمًلتها على اليوتيوب..
في الجزء الأول : نلحظ مشروع الشجرة وما يحملو من معان (الأسرة .. السلام الإجتماعي.. الحياة ونقيضها.. الصمود ) وزبنشوف برضو الفنًان في متاهته .. المتمثلة في خيوط العنكبوت ، وسؤالو المتكرر عن منو البينسج خيوط العنكبوت دي
إتكلًم عن الموت في ( الجنازة والهلال) ، وبارقة الأمل في (هم يظهرون دائماً ) (3)


-----

(1) : توجد مذكرات السجن في الدقيقة 06:48
(2) الدقيقة 00:48
(3) الدقيقة 14:51

في( شهور الجفاف ).. بنلقى الطائر الزعًاط ، والمئذنه ، زي عايز يشير لإنو في قحط في عدم التواصل الدنيوي والديني ، بيتمنى لو إنو الطائر ده بمقدورو إنو يحلًق بعيد ويطال المئذنه.
أعجبتني جداً لوحة الصوت الأخير (1) لأنها بتفصًل الحياة بشكل جيد.. الحياة الللي بنطالعها بصرخة الميلاد ، ونغادرها بالصوت الأخير ،
الصرخة دي بنلقاها واضحة بتتردد في إطار اللوحة ، وإذا غمَضت عينك بتلقاها بتتردد في الحياة اليوماتي بمقدار الكوته بتاعتنا من الشقاوه ومحصول بؤسنا وخيباتنا.

في (الجنين والطفل والطير ) (2) بنظرة ساخرة الواحد ممكن يقول :الحركة الطبيعية للبني آدم في مشوار حياتو :
إنو يتحرًك كجنين في مشيمة الحياة بعديها يتطوًر يبقى طفل ، بعديها يتدهوريبقى طيره زيو زي أي طيره حايمه ماقادرة تجاوب عن أسئلتها الوجوديه.


في العمل بتاع لا ظل إلا ظلًه (3) : بنلقى الطيره الزعًاطه لسه بتنقد في راسو وبتقول ليهو.. حتشيخ وإنت بتحاول تفهم الحواليك.. حاول تخلًف ذكرى جميله بعد ما تفوت.. لأنو ما بمقدورك تحتفظ بأي حاجه.


أما مشروع المرأة ، الطير ، الرمًانه (4): بنلقى الطير.. ما بينقًد الفاكهه إلا لمن تنضج.. ولمن تنضج ، بتقع ، لكن الطير تواصل مسيرة فتيشها عن الفاكهه النجضانه ..
أو بتصوير تاني : حول قصة الخلق بنلقى الكتير من الروايات بتقول إنو عشتار/ عشتاروت ، آدم حواء ، كتب ليهم إنو يفتشوا عن بعض إلى أبد الآبدين..
أو بطريقة تاني : الملل بين الcouple ده مردًو شنو..
أو بطريقة صادمه: في العلاقات ليه الواحد بيمل من الشريك التاني سريع ، ينقدو ويفتش غيرو.
سؤال صعب : البيعرف إجابتو : يرفع إيدو لكن بشكل silent أو يشتغل vibration باللاي.





-------------------
(1) 01:20
(2) 02:15
(3) 03:25
(4) 04:10

جيب من موبايلك يافاتح...

العمل بتاع (في يوم من الأيام قابلت حاكم) (1): ما قدرت إلتقطتو بشكل كويًس ..هل يرمز لزوجتو بإشارتو لكلمة حاكم .. بإعتبار إنو نحن السودانيين بننادي الزوجة بالحكومة..
اللوحة مقسمه لثلاثة أجزاء.. وفي كل جزء .. بنلقى في مره قاعده في كرسي ، بخشوع وطاعه غرييه وهيئة وضع يدينها بتدل على كده .. لكن ليه ؟ وليه تلاته نسوان (حاكمات ؟ )





العمل بتاع رؤية القبر (2)، إستهواني، لأنك بتحس بعتمة القبر ، ورطوبتو ، وبتسمع أجراس في راسك الكبير ده وبتحس بالشياطين بتتاوق ليك لو حاولت تكشًف للقبر.




-----------------------

(1) 00:16
(2) 05:00

الحمار يحمل أثقال كونه (حمار ) (1)

بوترية ( بيكاسو وقنينة الحليب ) (02) .. نجد الإستمرارية ونقاط التحول في رحلة الصلحي الفنيه من أيامو كطالب في مدرسة التصميم بكلية غردون ، إلى جامعة سليد للفنون الجميلة بلندن ، وصولا لإقامتو بأوكسفورد.


شجرة أنثى (3) .... الأنثى زيها زي الشجره ،
بتنمو ، (تكبر )
وتزهر ، (مرحلة المراهقه)
وتقطف ، (تتزواج أو يستباح محيط جسدها )
ثم تشيخ ، (نهودها تقع الواطه ، وتتبهدل بعد أول ولاده )
لتموت واقفه.



--------------------------
(1) 00:00
(2) 00:48
(3) 02:43

جدا يابنج.

وأنا طالع من معرض الصلحي ، لقيت معرض 6 فنانين من قطر ..
وبما إنو الولاد لحدي هسي ما إتفقدوني .. قلت إنقشط وأشوف الحاصل شنو..
لفت نظري خلو المعرض من الزوار .. وإنتفت إمكانية إنو الواحد يسأل.. لأنو في شغل جميل حق واحد إسمو مهدي الهاجري (1) ، عايز أعرف التكنيك الإستخدمو في اللوحة دي .. وليه بيكثر من الفقاعات في لوحاتو ، عايز يوصًل ياتو رساله ؟ لأنو لمن تكتًر الموتيفه بتاعتك ، العمل الفني بيفقد قيمتو.


بعديها طالعت وجوه ، على جباهها بتلقى العلامة التجارية بأرقام متسلسله..
فكرة غريبه وجديده ، قدر ما نحتً راسي ده ، ما قدرت إلتقط المغزى منها.

بقية النماذج ما لقت عندي قبول.. مافيها حاجه مميزة... مافي فكرة واضحة، والفنيشينغ بتاعها تعبان.




------------------
(1) 00:10

الشغل الخزفي ، ما بطًال ، لكن كان بالإمكان إنو يتجوًد أكتر..
عجبتني اللوحة في الدقيقة 03:23
ترمز لسكينة ، إمومه
بقية اللوحات : الضرب على الفرشاة واضح ،
ومافي تناسق بتاع ألوان ،
والمعالجات البالقلم الأسود واضحه..
أما عبد الرحمن المطاوعه ، فبيحتفي بتراثو .. حتفى بالزي الشعبي القطري
وتكنيك خطوطو جميل ومتناسق
شايف رسالتين ختاهم في لوحاتو ..
1/ بيشير للزواج..
2/ وبيتسائل عن وين الصديق..
يلفت نظر الناس لضرورة الإلتفات للنقطتين ديل.

تفسيرك ات ل (2) وقفة تأمل مبالغة شتت عقلى مع الصباح قام مشى حتات كتيييييييرة وليه عند الطفولة عقلنا بكون شغال فى كل الدوائر ولما نتدهور وى ما قلت نتعرض جوه دايره نختارها برانا او نقع فى شركها على المستوى الحياتى و الاعجب على المنظور الفكرى العفلانى نقعد نبحت فى حاجه واحدة و ننهك عقلنا حتى الدراسة بالمناسبة كانت اتجاه واحد وده الطين ملكتنا الفكريه كسودانين يعنى ليوم الدين تكون متخصص فى المحاماة و الطب و الهندسة و الزراعة وكان جاولت تفرفر بره الدايره لتمش للغنا او الدراما حيث الخيال الخصب - بمعنى برانا قاعدين نسجر عقولنا و نتدهور منو لينا و التسوى بايداك ....

(4) و بما انى ما شفت الشوت الى الان لكن سؤلك محفز و من غير السايلانت
و نفكير مشاتر خلقه جينيه الرجال ديل ملولين و الحبيبه لامن تكون حبيبه دى دائرة تفكيره ولامن تكون بين يديه ببحث عن حبيبه اخرى بس عشان يبثها مشاعره
ليه بكون الزوج بخيل و جاحد فى مشاعره و حبه لى رفيقة عمرو
قالو و الله يكفيك شر فالو بركن ليها يعنى برجع ليها فى حالتين
يمرض - يعجز


وان كان المقام مقام فن و جمال

لكن فكرت و الحق يقال حتى فى العرض ما زعاطه تستهوينى كتيرا الـ unthinkable

شليل
الأخبار و الأخلاق؟!

السنة الفاتت زي المواعيد دي كنت في زيارة لبيت الأستاذ إبراهيم الصلحي في أوكسفورد مع الصديقة الإعلامية سارة فضل، لتصوير حلقة لصالح قناة الشروق، الراجل كان عيان بسبب البرد، لكن و الله إستقبلنا إستقبال مفرح و خص قناة الشروق بي زيارة للمرسم و صور للوحات جديدة كان بيجهز فيها عشان تترحل لي أمريكا بي طيارة خاصة ، الحلقة مبزول فيها جهد خرافي ، إعداد و إخراج و تقديم سارة فضل بخيت ، لكن لحد حسع ماإتعرضت !! أتوقع و أتمنى تتعرض في العيد الجاي دا.

(2)
بمناسبة الطيره دي يانغم.. في واحد من الفلاسفه ما متذكر إسمو قال كلام عبثي ، ما بتفق كلية معاهو ، لكن في نقطه في كلامو بعاين ليها بعين مرفرفه.. قال ( أن تتأمل الحياه .. دون ضجه.. أو شكوى ، ربما يكون هذا أفضل المواقف..
ولكنا ونحن نتأمل سنكتشف أن الحياه ، مزاح ثقيل ، ولعب أخرق بالكلمات )..
مابتفق مع الجزو الأول المتشائم ،لكن الجزو الأخير بتاع المزاح الثقيل واللعب أخرق بالكلمات ده بتلقيهو في أوجه كتيره في الحياه .. ياخ حتى لو خنقك الجو ده وعايزه تشمًي شويه هواء ، وعامله فيها رومانسيه وبتتفسحي في شارع(الحريه) بتلقى نفسك بقدرة قادر في (السجًانه).. بتحسًي بإنو الحاجات كلها متآمره عليك ، ولزام عليك تكون طيره في شوارع ملانه طيور مابتفضي بيك لشارع حريه إلا في أحلامك.. إشارتك لتحديد مهنتك مما إنت صغير دي جات لأنك (مما كنت صغير بتلعب في التراب ).. ما بتطوًر أدوات معرفتك ، قاعد تتجلبط بالطين.. فعشان تاني ماتعمل كده ، يحددوا ليك مهنتك ، وزوجتك ، ويسموا ليك ولادك ، وياكلوا سمايتك كمان.. شان تآني تلعب في التراب ههههههه:D.

(4) إلقاء اللوم على أي من الطرفين ، ماجايب حقو.. فآخر الدراسات العلمية أثببت إنو النسوان الهرمون الأوسترادول بتاعهم زايد شويه هم البيتمردو على رفيق دربهم ،
وفي الجانب التاني أثبتت الدراسات إنو الزياده في هرمون التيستروين هي البتخلًي الراجل تكون عينو طايره ، فحقو نلقي اللوم على العشًه/ القطيه/الشجره البيتواجدو فيها الإتنين ديل ، وعلى العتمه الموجوده بيناتم ، ويغيرو من نظارة شوفهم للتاني.



(1) كيف الأحوال


(3) المداخلة أعلاه ماعندها علاقه بكاتب البوست ، والعفش على مسئولية صاحبه

متابعة يا شليل..
وبجي بالمهلة بإذن الله

فراءة نقدية

فنية

من فنان

لفنان كبير ..

بسم الله الرحمن الرحيم

تسجيل إعجاب شديد بهذه القراءة ..
وكأنى بها قراءة على عجل ، يعنى يا شليل لو (قعدتا ) ليها
ونزلتا لينا الصور دى كل على حده ينوبك ثواب ..
على الأقل كما قال حسين نحن الساااهى ديل بنستفيد بلا شك ..

رؤى جميله ونظرات نافذه ... شكراً كتير ..

ثبًتها يابنج.. ماشايف حامد بريمه كان بيثبًت الكور كيف:D..
في الحقيقة أنا في البداية كنت عايز أنزل الشغل ده بكاميرا ، لكن لاحظت زحمة اللمبات الفي المعرض أثرت في إلتقاط الصور ، مهما تغير وضعك وتتلولو بتلقى ال reflection بيكون موجود في الصورة.. أعدك الويك إند الجايي أنزلهم واحده واحده والدنيا ضحى.
تحياتي

سلام يا أم التيمان..
عندي رغبة أعمل بيان بالعمل لنصك ده ، لكن لسه الشياطين الفي راسي ما كثُفت لي من تصوير البرتقاله ال (لها نصف يد )..
يُرجى عدم الشرح..
أعدك قبل نهاية اليوم ده . بمحاولة متواضعه/ ما محترفة ، لزول ترجم نصك ، للوحه ..

الأخلاق والأخبار مُناسبه.. مرًات قصيرة تيله ، ومرًات طويلة تيله.. ..عسى أن يجدك مكتوبي هذا طويلة تيله على الدوام :D..
مؤسف التأخر الغير مبرر ده ، بتمنى معاك إنو تقدًم في أقرب فرصة ، عشان المشاهد السوداني يزح (القضا) اللابت في عينو من تأثير البرامج المعًاطه ، ويفرك عينو مرًه تاني لمشاهد أكبر براحاً..
ليك وللأستاذة ساره فضل الله التحيه

شلو الحبيب
بتكيف جدا جدا لمن " تنغمس" فى معرض ورسومات
بالجد بحسك ريشة ، والوانك روحك الغزيرة بالمتعة
عارف عندى هواية مراقبة رسام يرسم والموديل جواهو
تلقى عايش فى عالم منفصل من حركات عيونو واطرافو واخساسو
بمارس هوايتى دى فى نهاية كل عام فى جامعة السودان مع اعمال التخرج
نحت ـ، رسم ، خزف ..الخ
متعة ودهشة مابعدهم ..

كسرة / الميتين تيوب ده ماظاهر عندنا ياخ;)
حقو تجدع لى انا زاتى تلفونك :D

شليل هذه الصور التقطتها من حديقة المنزل
ممكن تنفع شكل لوحات؟

ويلكم باك يابنج
واهلا بمي الحبيبة
نورتو يافنانين
http://www.sudan-forall.org/files/salahi-14.JPG
http://www.algadwa.com/markaz/shamel...23/9850003.jpg
http://www.akhirlahza.sd/oldwebsite/.../01/salahi.jpg

حسين أخوي..
أخوك لافنان لا الله قال.. ممكن تقول عليو زول بيهتم بالتفاصيل + بيحب يشخبت.

اقتباس:
المشاركة الأصلية كتبت بواسطة حسين عبدالجليل http://sudanyat.org/vb/images/buttons/viewpost.gif
أخوي شليل:
بصفتي زول غير فنان خالس , بأستمتع جدا عندما أقرأ لفنان, يجيد الكتابة, و يتحدث عن أعمال فنية . مثل هذا الحديث يتيح لنا , معشر غير الفنانين, النظرللآشياء و لو للحظات بعيون الفنان .

بوست رائع وأعمل حسابك من فتالين البوستات الما فنانين , قاتلهم الله .

ميتين الفيرفوكس على ال fire alarm.. غالبني أعمل إقتباسات.. شغال كوبي بيست ساي.

يا أخواننا عليك دينكم نزلوا لي بوستيي ده من فوق.. جني جن أكون متشعلق ، وبفكر بصوت عالي والناس يتصنتوا لي..

أبشري يافنانه.. يسعدني أسمع منك ، ومن غيرك.

بفتًش لي في برنامج يسمح لي بإلتقاط صور من الفيديو..
بمجرد من أنزلو.. يسعدني أسمع رايك زول فنان (أديب) يقرا صاح

نسجِّل حضورنا، ونتابع..

تحيّاتي يا شليل

خلى الجرسه


شرحو

تعرف غزالة حى باريس النافرة ديك شفتها تنزل من الحريه تخش حى ثلاثه حيث الرمتاله وقعاد العامود و الضلله و اللقاء فى كورنر البيت الحبشى ده لامن تكون الطيره مساكه فى جناح الرومانسيه
البجيب لى السجانه شارع ما مسفلت بنزل الواطه :D:D
لكن حالة لما كنت صغييييرة لعبت بالعروس باربى ومتمرده فى الواقع على هيئة باربى دى (حلوه فى الواقع) دفعنى شوفك هنا لكمية الالعاب اللوثتنا صغاروسيطرت اللعاب التى فى على الباقى من عقلنا لكنى بحكى عن حالنا لامن بدنا القرايه اكان بختيارنا او المختارة وهى فترة تشكيل النضج و الوعى نقرا فى خط واحد اربعة سنوات او اكثر للتخرج وما نستفيد حتى من رحلات الجامعة خلى الرحلات الونسه فى المدرجات اها دخلتنا فى حيص بيص ومش كان ممكن نقرأ اكاديمى و تقنى معا وكان نفسى ادرس دراما حتى بعد التخرج وبقيت مستقله ذاتيا لكن فكرت فى الماستر فى المجال ذاتو- التفكير الابداعى - لو حاله جنيتك برضو ما عندنا الا من رحمته الظروف
-الالعاب النحكيك عندنا شافع ما اكمل الثلاثه سنوات فى الروضه الان اول اكتوبر الجارى ده تم تحويلو من قسم البلى جروب الى البراعم شويه دراسه قاليك - شافعنا حرن ما يخش الكلاس ده قال لى الابله فى باعوده هنا هههههههههه وشيل و حنسك يقعد 5 دقائق ويجرى قال عندو صاحبتو تونا و ابله سكينه هناك- استدعو ابوهو - الاب رجع البيت قال لامو عشان تانى تخوفيهو بى الباعوضه لامن تنومى يطفو النور ويقولو باعوضه بخت راسو ينوم فى حين انو الالعاب البلعب بيها شافع اليوم مازى الالعابنا ديك تراب شنو و جزمه و شراب الشئ طايرات وتويز اها هو عرف يكب الزوغه من فصلو زى ما مجنن امو هسه هو لامن يمسك الكمبوبتر يحيرك والله مرة غنا و مرة كرتون لامن يمرق للمجتمع ونكون عايزنو يقدم ليهو - يقوم يهاجر لبلاد العم سام ديل شفع نصاح عندهم وسائل غير لكن فرص كعبه فى السودان


(4) اللوم على الكتمه بس ياخ ولو ما كتمت بيناتن ذاتو ما حلو عشان الحياة تمش و كل مرة يغيرو من نضاراتم ههههههه لمقاس اكبر اكيد للشوف
كونى طيرة ازهو بخيلاء الطاؤوس وسط اقرانى من البنيات
وكونى طيرة بالجد كده و سط لمة كبيرة فى حلتنا بنات ولاد
حالة كونك بتشوف القمرو الرمله بيضا و التامل مشدوه

ختيت فنجان ونستى معاك - براى

----------------------
لما القطار دور حديدو

بتلقا فى بابنوسه
كترت المحطات يا شليل



من هنا
عليك الله بنج يعنى شنو البتقولا دى - معشرقه لى ههههههههههه

سلام لكل المتداخلين ، وكتًر خيرك ياعكود كده الواحد ممكن يواصل بدون مايحس إنو مُشعلق ومُراقب :D.. أهلين يا أزهري ، عرض الطير الخداري ما موجود في المعرض مالم يكون ضمن فئة - بدون عنوان - المُلاحظ إنو الفنان ده طيلة النصف قرن دي بتلازمو طيره في الكتير من أعمالو..
أهلين يالنور.. أعدك بإنو حأقوم بتصوير المعرض بكره ، وبعد داك نقزقز برواقه فيهو..
سمراء الفنانه.. أعدك بمشاهدة لايف لرسمة أم التيمان.. بس خلي المود ، والدماغ الكبير ده يستعدل شوية..

أم التيمان.. أهلين مرًه تاني.. الصور ما واضحه.. لكن بكثير من المعالجات ممكن تصبح لوحه..

آمال .. ويلكم وسواد ليلكم :D.. وليكم باك إنتي ذاتك.. النماذج دي معروضة في المعرض ..( شجره أنثى )، (الجنازة والهلال) ، والفينيشنغ ده بتاع (رؤية القبر)

بركه بالشوفه يا الرشيد.. سعدت بحضورك هنا ، حأرد ليك الزياره بهناك:D

فشلت في العثور على برنامج يتيح لي إلتقاط صور من الفيديو ..أعد بتصوير المعرض بكره ، لأنو بعد بكره حيقام أوبرا عايده في كتارا ، وحيكون الوصول لهناك صعب وال(باركنغ أصعب )..

بناء على رغبات المتداخلين والمطالبين بإلتقاط صور ثابته .. قمت باللازم .. لكن بنصح المشاهد بشوف اللوحات في الفيديو ، لأنو الفيديو فيهو براح كويًس إنك تكشًف من كم زاوية بخلاف الصورة الثابتة / الجامدة..

(2) الجنين والطفل والطير..


بنلاحظ في بؤرة اللوحة الجنين متكوًر في مشيمة ( الحياة ) راسو مقلوب.. ودي بداية ما كويسه إنك تواجه الحياه دي بالقلبه :D..
أها تستمر وضعية الحاجات المقلوبه دي ، والمحكمة ب(الحبل السري ) المستشري في اللوحة (تفاصيل الحياه ) عشان تآمن..
بعد خروجك من المشمية دي ، بتواصل حالة كونك راسك مقلوب ( يسار اللوحة تحت المشيمة) ..وما بتقدر تعي الحواليك..
الوعي القاصدو الفنان هنا.. كنه الكون / السماء/ التواصل الروحي.. بإعتبار إنو أداك مفتاح تنفذ للوحه دي اللي هي البسمله ( في المربوع الأعلى يسار اللوحه )..
أها عايز تتبسمل ، تطرد شياطين الصراع ديل ، أهلا وسهلا.. ما عايز تتبسمل برضك أهلا وسهلا.. في الآخر إنت زول طيره ساي:D.

(4) المرأة والطير والرمًانه


هنا المرأه و(الرجل) حاضرين بالمناسبه في الأشرت ليها حول الملل بين الcouple وقراية الطير بينقد الفاكهة النجضانه ويفتش عن فاكهه غيرها..
والرجل إلا تعايني ليهو بالعين المجرًده ( يمين اللوحة - تحت الرمانه - تحت يد المرأه ، متدلى إلي أسفل ).. تعايني ليهو بالعين المجرًده لأنو المجتمع ما بيجرًم الراجل العينو طايره ، بل بيجرًم المره العينها طايره.. لكن هو بيكون متدلدل في إطار حياتك.


(3) مبسوط من قرايتك.. فنجان جبنه بشمالك يروي الدنيا بحالك.

(1) بنج benj كلمة يستعملوها أخواننا الدينكا ، وبيطلقوها على الزول الكبير الأعلى شأنا/ شأواً كدلالة للتوقير زي : سلطان ، ضابط ، قائد .