انكشاف سر مجزرة قصر الضيافة

[رأفت ميلاد]

سلامات يا أبو جنزير

المشاركة الأصلية كتبت بواسطة أبوجنزير
مرحب يا يارأفت وسعيد بمتابعتك

يا رأفت معليش



يا رأفت ياريت نضبط المصطلح بتاع الأسلاميين وكن حذر في أستخدامك ليه وياريت تفهمني صح وأستخدامك ليه أنت خطير جداً رغم أني فاهمك لكن في غيري ما بفهم
مصطلح الأسلاميين الفاكيه هنا كبير خالص

يا سيدى لا فى لبس ولا أى حاجة .. لكن يبدو أنت مزاول ليك قصة نصرانى دى .. نحن فى أحوال البلد .. والفرق بين الإسلاميين والمسلمين فرق السماء من الأرض .. وهم عديل كل الما معاهم مكفرنو .. يعنى أنت زيى واحد .. حاول تطلع من الحتة عشان تفهم كلامى .. القصة ما فيها دين كلو كلو .. بس دى من الحاجات النجحو في زرعها فى النفوس .. ما علينا وده ما موضوعنا هسة ..

نعم صحيح أنه في عداوة بين الاسلاميين زي المؤتمر الوطني والسلفييين أو المؤتمر الشعبي (عدو الأمس صديق اليوم) لكن ما تتخيل الشيوعيين كمان حملان وديعين وديمقراطيين لا يا رافت الشيوعين عندهم كوادر العنف البشيلو السيخ والجنازير وبدقوا الناس وبكتلو الناس وبعملوا انقلابات وعندهم أسلحة تاني زي أغتيال الشخصيات والاشاعات والتغبيش واللعب على الدقون والعقول واستحمار الشعب
الفرق بي انه الاسلاميين في يدهم السلطة والشيوعين سعوا للسلطة دي وفشلوا في المحافظة علي مع بداية مايو وسعوا ليها تاني وفشلوا والمجزرة ناتجة من فشلهم توضح عنفهم
الاتنين وجهه لعمله واحده ولو كانو نجحو في الانقلاب ولو عملوا انقلاب حا يعملوا نفس ما يفعله ناس المؤتمر الوطني وحا يعملوا ليه جهاز اكبر من جهاز المؤتمر نسخة من الكي جي بي ويتصدر الحكم ناس زي نافع وقوش يعني يجيبوا لينا ستالين وبريا وخرتشوف سودانين ويشردوا الناس الصالح العام ويحل كودرهم القيادة وياهو نفس الحصيلة مافي فرق بل بالعكس مرات النوازع الدنية عند الاسلاميين بتمنعهم من حاجات كتيرة ديك ما عنده لا نوازع لا وازع وما بترددوا يعملوا اي حاجة
أنت يا رافت قايل الشعب دا غبي وما عارف حقيقةالشيوعين والاتحاديين والانصار بتجنبوهم حالياً أتقاء لشرهم ومشاكلهم ولانه برضه معاهم في خندق واحد لكن ما بحبوهم ولا في شي غير دا يجمعهم بل البجمع الاسلاميين والاتحاديين حاجات كتيرة

ياخ الناس ديل عندك منهم موقف شخصى شديد .. غايتو أنا ما شيوعى .. ولكن ليس لى معهم خلاف لا سياسى ولا أنسانى .. وهكذا رضعناها ديمقراطية .. وعن العنف لم يكن له ذكر فى حياتنا العامة .. فهو أبتكار للمنظمين الأسلاميين حصرياُ .. نعم كان هناك عنف لفظى ولكنه كان فى أروقة السياسة العليا وداخل الجمعية التأسيسية .. وعمد الأمة والأتحادى على طرد الشيوعيين .. والحق يقال .. لم يقد حزب سياسى ما قدمه الشيوعيين لهذا الشعب .. من حقوق العمال وسلطة النقابات وأتحاد المرأة .. وأن كان حزب مفتوح لأنتميت إليه .. ولكن كما قلت هم كوادر بالإنتماء .. وهذا ضد مبادئى ..
والشعب لم يكن غبى .. ولكن لم يجد الفرصة لتملك حقوقه .. الأمتناع عن التصويت هو ما قتل الديمقراطية الحقة فى حياتنت .. وشجع على الأنقلابات .. أغلبية الفوز بالإنتخابات .. لم تكن يوماً أغلبية الشعب .. بل ولا 10% منه ..

يا رأفت دايماً بحب الشخص البتكلم معاه يعرفني كويس وعشان كدا ختيت ليك الاشارات دي عشان ما تتوه كتير وبخصوص جون قرنق أقسم أني ما حبيته يوم ولا انخدعت بالاوهام ولا الكلام الفاضي والهلاويس الكانو بروجوا بيها كهنة النفاق المصلحجية الجو متخيليين أنو الحركة الشعبية حصان طروادة يسمحوهم يدخلوا يحكموا السودان بموجب أو يروجوا لخزعبلاتهم البائدة واتصح أنهم كانو ركوبة لامواخذة حمار امتطهم للوصول لغايتها ودرع يتلقى الضربات في صراعهم مع المؤتمر الوطني بطولة قرنق وأنسانيته ووحدويته اكبر اكذوبة روجوها الغرضين واصحاب الاجندات وقرنق كان ماشي في اجنده موضوعه مسبقاً لهدف محدد يمكن انحرف عنها شويه عشان كدا كتلوه

أما قصتك مع قرنق زى ما قلت ليك خصوصياتك ومافى زول بجبروهو يحب زول .. القصة ما حب ولا كراهية .. القصة أنت ما قادر تمتلك قدرة الحياد .. ودى زى ما بقولوا الدخلت فينا من زمن كنا سواسيو .. الحرب فى الجنوب رضعناها ضد (المتمردين) .. وبعدين بقت جهاد .. كانت مسلم بيها ونحن فى الشمال عايشين فى سلام .. والحرب كانت فى حياتنا كأنها نكتة .. قرنق كانت ضرباتو كانت موجعة وأمتدت للغرب والشرق .. والإحساس العام كان كأنه (تطاول) لكن الحقيقة كان هناك شعب يتضور جوعاً وجهلاً وتخلف فى أتون هذه الحرب .. وكل من (تمرد) فهو (ثائر) وليس خارج ..
يكفى قرنف أنه أوقف نار هذه الحرب بحزم وليس بخنوع .. وأجلس جنود الله التى كانت تحرسهم القرود وتظلهم السحب على طاولة التفاوض وفرض عليهم شروط عادلة لشعبة ..
أيضاً ما علينا وليس موضوعنا .. ويكفينى أنت قلت (قتلوه)

بالنسبة لأبونورة صحيح الزول دا بتابع ومهتم بالموضوع لكن عدم حياديته واضح وانحيازه لابعاد التهمة الحزب الشيوعي بقى واضح وكلامه ما يساوي شيئ الأن وأتهمه بي سرقة لسان مولانا علوب وما حا اقتنع بيه ومصدق كلام عثمان السيد وعثمان عبدالرسول

دى أتهامات مريعة .. لا أعتقد تملك أدواتها .. عليك أن تطالبه بأثباتات تؤمن بها أولاً ثم تأتى بهذه الأتهامات .. خلاف ذلك فأنت تلفق التهم .. فمثل هذه الأشياء ليست بالإحساي .. بل بالدوامغ .. ولقد أيد أحد قرباء القاضى علوب بأنه حى يرزق

فقط حاجة واحده يظهر القاضي علوب بنفس الصورة الظهر بيها عثمان عبدالرسول وعثمان السيد ويقول الكلام القاله ابونوره ويثبت أنه دا ما التقرير وينفي التهمة عن الحاردلو وابوشيبة وجباره ودي حاجة ما مستحيلة يمكن بكاميرا موبايل تتعمل
ليه أبونوره ما جاب كلام مولانا علوب بالتفصيل ليه ما سجله ودي اسهل حاجه
الامر واضح غايتو انتظروا ابونوره

كلام سليم .. وكان يجب تنظر النتيجة قبل إلصاق الإتهامات

يا رأفت دي الحقيقة البمرق للأنقلاب زي المارق للحرب مستعد يموت لكن برضه مستعد يزهق روح انسان برئ من اجل انقلابه دا والأنقلاب دا قاموا بيه الشيوعين وإذا أدنا نميري بي أعدامهم كمان ندينهم بي ما فعلوه بي هؤلاء الضباط الابرياء

دى ما الحقيق لكن هو الواقع .. والفرق كبير
ما هو الإنقلاب يا أبو جنزير؟
الإنقلاب لا يُشترط فيه الموالاة مثل الحرب .. مثلاً قوات محمد نور سعد كانت حرب .. قوات التحالف كانت حرب .. قوات قرنق كانت حرب .. وما يحدث الآن فى دارفور والنيل الأزرق وغيرها فهو حرب ..

عندما نقول الشيوعيين قامو بإنقلاب فى مايو ويوليو .. ذلك لا يعنى من قاموا بذلك كانوا كلهم شيوعيين .. فهو أنشقاق من حفنة ظباط يحركون جنود بـ(التعليمات) .. فليس كل من رفع السلاح يؤمن بالقضية .. وعندما يسدل النزاع ستارته بأنتصار المنشق .. لا تحدث أعدامات على الأطلاق داخل المؤسسة العسكرية .. ربما أعفاء بعض الرتب .. ولكن الجنود فى طرفى النزاع يعودون كما كانوا لا لائمة عليهم لتنفيذهم التعليمات .. والعكس بالطبع غير صحيح .. عند فشلهم يتم أعدام قادتهم بأحكام عسكرية تمنع التمرد داخل المؤسسة العسكرية .. مثال لذلك أنقلاب عبود وأنقلاب النميرى وأنقلاب البشير نفسه .. لم تحدث أعدامات ولا محاكمات عسكرية .. لأن السلطة أُنتزعت من طرف مدنى .. ولاحظ أنقلاب الزبير الفاشل كانوا قيد الحبس وأنقذهم من المحاكمات أنقلاب البشير .. ولكن الحال أختلف فى أنقلاب هاشم العطا وأنقلاب حسن حسين وأنقلاب ضباط رمضان .. النزاع كان بين أنقلابيين .. الحياة لمن يفوز .. والموت للمهزوم ..
ولكن نعود للمهزوم .. من هو؟
هم قادة الإنقلابيين وليس الجنود وليس الظباط العاملين .. ومحتجزى قصر الضيافة لم يكن فيهم شخص من قادة أنقلاب مايو ما يدعو لتصفيتهم .. أحتجازهم كان أجراء طبيعى للحصول على السيادة ..

أدانة هؤلاء الناس لم يكن منا .. بل بقرارات قوات نميرى .. وهذا موضوع البحث

وانا واثق اني ما حا اعتذر وأبونوره كضاب وبرضه ما قدم ولا حاجه نفي قال دا من القاضي علوب لحدي الأن ما ظهر القاضي علوب وما معروف حي ولا ميت

أتكلما كفاية فى النقطة وشرحت ليك (وجهة نظرى)

معليش يا رافت أي حاجة بتشير إلى أنو عثمان السيد ماعنده غير يوضح الحقيقة وجا عشان يقول الحقيقة نميري الله يرحمه مات والموضوع دا تم اربعين سنة مصلحة عثمان السيد شنو يجي يقول ليه كلام غير الحقيقة حا يجني شنو ؟ لو كذب
نفترض انه عثمان السيد كذاب وعنده غرض البخلي عثمان عبدالرسول يقطع اصبعة ويكضب شنو ؟

ياخ أنا ما شككت فى كلام عثمان السيد .. أنا قلت لم يأت بجديد .. الكلام البقول فوقوا كلنا سمعناهو من أجهزة ناس نميرى .. هو بردد كلام وبيقرأ من ورقة .. لكن هو لم يكن طرف فى الأحداث ولا المحاكمات ..
ولعلمك الأجهزة الأمنية الصاحبت نميرى فى هذه الأحداث كانت (مصرية) بحتة وشوقى بدرى كتب بالتفصيل فى هذا الأمر من قبل .. الكلام القالو حسن السيد هو المشكك فيهو قبل 41 سنة .. عشان كدة قلت ليك فسر الماء بالماء

هههههها

التغبيش بكون دايما على الحقيقة وبصراحة الوضع قبل الفيديو كان مغبش الان ظهرت الحقيقة جلية وبدأت محاولات تغبيشها كدي لو اتخيل الفيدو دا ما اتعمل البحصل شنو والناس بتكون معتقده شنو ؟ ولا حاجه ما عارفين الاغتيال الابرياء ديل منو ناس شامبي ولا ناس جبارة لكن ظهرت الحقيقة بدت الجقلبة واتهامات عثمان السيد والطعن فيه وفي عثمان عبدالرسول

ياخ زى ما شرحت ليك ده اللغو منذ ذلك الحين .. تشكيك فى أقوال محكمة نميرى فى إدانة شامبى وأبو شيبة .. الجديد مفترض تكون مستندات حقيقية تنفى أو تثبت .. التغبيش فى أعتبار كلام عثمان السيد فيصل وما بعدو كلام .. د. نجاة كتبت خبر نهائى فى العنوان .. والفيديو لم يأت بجديد

على العموم الرحمه لي خالد الحاج مع عندي حاجه تربطني أو تجمعني بيه في الموضوع دا فياريت وأترجاك تبعده في نقاشك معاي الله يجازيه عن عمله الطيب ويشمله بي رحمته

أنا ما جبت سيرة خالد الحاج عليه الرحمة .. بل أستهجنت أقحام بيان له فى مقدمة البوست .. فأنا ضد هذا الفعل مثلك تماماً ..

وليك الشكر على النقاش المحترم وليك المودة

أشكر صبرك علىّ وطولة بالك .. وأعتذر إذا كنت جافاً أحياناً