قاموس المفردات العامية فى اشعار حميد

[طيبان]

المشاركة الأصلية كتبت بواسطة الجيلى أحمد

تحياتى ياشباب وشابات..
شغل بتاع نقاش مكرب, وأجمل مافيهو وضوح العبارة والفكرة وعدم تعويم نقاط الخلاف , دا واحد من البوستات البديعة..الواحد بقرا وبتعلم وبضيف لرصيدو اللغوى والمعرفى الكتير..
___________
عن اذنكم ياشباب داير طيبان دا بالجنمبة
ياطيبان, أنا ماشايف فى شرح معانى الكلمات المستعصية على الفهم أى سبب وجيه لجعل النص يوحى بقول كذا وكذا ..
يعنى مابالضرورة انو اسم راشد فى متن القصيدة بيشير لعبد الخالق محجوب!
رؤية زى دى بتخلى العمل الأدبى دا يتكلس وبتحشرو عنوة عنه فى اسقاطات ذاتية ..
فكرة البوست بتاع ماريل دا فى تبيين بعض الكلمات التى وردت باللهجة المحلية لكاتب النص الابداعى, لايجب تفسير النص الابداعى بها, فلو حدث ذلك فسيكون مجرد لوح أصم..محاولة تفكيك اللغة والمفردات المحلية شئ, ومحاولة صياغ معانى مختلفة لدلالات النص شئ آخر كامل الاختلاف ..


أجمل مافى النص الابداعى هو الفضاء الذى يمنحه لمطالعه..

سلامات يا الجيلي ، عساك مستّف عافية .
معاك في انّو تفسير النص المبدع ممكن يقفل النص ويحد من فضائه الواسع ، بتكون أكيد لاحظت لي انّو ردّي الذي وردت فيه دلالات راشد ،كان ردّا على نقطة أثارها أسامة معاوية دي واحدة ,الثانية نص رسايل ست الدار دا نص موغل في وضوحو ودلالاتو ،يعني مافيهو مجال تخيّل كبير ، في غضبة لاحقة في ذات القصيدة بيرد (بعتو شفيعكم يا عمّال ؟ بعتو وجيعكم للراسمال ؟ هاكم دي ) ، وحميد كان لامن يقول هاكم دي يخمش من الأرض خمشة ويكشحها على الوجوه الإفتراضية للعمّال ، جو القصيدة دي بالذات يسمح لجدل ماقصد ويقصد حمّيد ، (مؤكّد) الأنا أوردتها في ردي على أسامة كانت تأكيد للاسم الحركي للشهيد عبدالخالق ، لا لتأكيد انّو راشد مسمّى عليهو ،وعلى ذات النسق فتحت باب الدلالات الممكنة للأسماء الواردة ، فقط لأن النص يسمح بي كدة .عادة أنا مثلك لا أميل لتحنيط نص ابداعي ولا تنميطه ، أو قل أجتهد في ذلك .
شرح الكلمات العامية في شعر حميد برضو ممكن يحتمل شرح المعنى العام أو الجو المحيط بالجملة الشعريّة ،فالكلمات وحدها لا توصل المعنى الكامل أحياناً ، عندك مثلا كلمة (بنبونة ) أوردتها الأخت ماريل بمعنى بذور البصل وهو معنى صحيح تماما ، ولكن نفس الكلمة (بنبونة ) وردت في نص آخر لحميد (الضو وجهجهة التساب ) بمعنى النخلة الوحيدة الماعندها بنات .. في قوله ( بنبونة من كم وأربعين ..وحّيدا ما شالت جنى ، من جابا جدّو من المحس ، من هي السغيري محاننا ، يسقيها بالجوز ما فتر ، قدر اليرجّيها المطر ، والليلي حظّها طوفنا ) . أرجو ألا نكون قد بعدنا بالبوست عن مرماه المحدّد ، ولكّننا نحاول أن نوسّع في الماعون قليلاً وأهو كلنا مستفيدين من الحوار الجميل الداير ..

__

كن بخير يا صاحب .