أصبحنا بي الله
كان الصباح أية
وكان الصباح إنسان
وجابتّلو كباية
صبح الصباح عطشان
وقالتلو كيف تنسى
كيفن تبيت جيعان
ما الدنيا حالها غريب
ما بتعرف التعبان
يا حليل زمان كنا
وكان الزمان نديان
كل القلوب طيبة
وكل الفريق أخوان
وكان الصباح نعمة
نقوم مع النجمة
ونفتش الأرزاق
معاي حاج احمد
بس الزمن فراق
وأنا ليه جد مشتاق
قال لي ناوي اهج
كان ألقى لي رقراق
أصلو الظروف صعبة
وأحوالها ما بتنطاق
وكان الصباح أية
وكان الصباح عنوان
وجابتّلو مصلاية وأتوكل الرحمن
صلالو كم ركعة ما اصلها الجمعة
صلالها متطمن متناسي للوجعة
وكان الصباح أية
وكان الصباح إنسان
***
أصلو الصباح للكد
نكدح.. نكل.. ننهد
شان الضمير يرتاح
شان العيال تسعد
تلقالا يوما زين ..
تلقالا شيتن زين
ونفوسنا متطايبة
رغم الزمان الشين
عود يا زمان وأرجع
تلقانا مشاقين
نحضن صباحك عيد
نفرح نغني نشيد فيه
الصباح عنوان
فال المزارعيه
سكان "بيوت" الطين
فال البساهرو الليل
ناسا هناها تعب
تفرح كأنو العيد
يوم تكرم الجايين
ديل الغبش سمحين ..
***
أصبحنا بي الله
و آمالنا كانت فيك
وأنتي العشم كلو
تبقيلنا ضفة ونيل
تبقيلنا غابة نخيل
أو نسمة تسعدنا
أو غيمة شايلة الخير
يبقى الصباح غنوه
مليانة بشرى وخير
أصلو الصباح آية
وأصلو الصباح عنوان
|
