مجرد تشابه .. ليس إلا

[سمراء]

المشاركة الأصلية كتبت بواسطة Osman Hamad

الشغل الذى دا برجعنا تانى للشخبتة ;-)
احبك ياباش

منو ؟؟؟؟؟
مااااااااابصدق كلو كلو
عثمان " همد" شمسياً نو نو اكانت بليف

[جيجي]

المشاركة الأصلية كتبت بواسطة معتصم الطاهر

اقتباس:



مجرد تشابه أزمان ..

تلقيها عند الغافل

سلام جيجي .. عرجونة شنو كدا ما عارف

لكن العارفوا يهد العبادى و يجيب الباقى من نفس عصمت

قون الضفاري دا
شماره عجيب
الرسول بس وروني الجابه منو

[مُهيَّد]

أنا إسمى مكتوب !!

الحبيب ... مشتاقين وكفى ..

ولكَ العُتبى ..

[ناصر يوسف]

المشاركة الأصلية كتبت بواسطة Osman Hamad

الشغل الذى دا برجعنا تانى للشخبتة ;-)
احبك ياباش

شخبتك ماني مابيها

عِلأا الفيك إنعرفت ترا

وش مغيوووووووووووووووظ منك لامن داير يطرشق

بوستات الباش المِتِل دي

بصراحة ربنا كده أنا بخاف منها

دي بوستات أكبر مني

واصل يا باش حأدخل أقراك وما بقدر أضيف

والدخلني هني هسي ده يعلم الله

عثمان غمد لبد ده

[حسن سادة]

يا معتصم قرّب مني وأسمع الهمسة دي:

أنا عندي ليك سر من زمان
داير أقولو ومنكسف
كل ما اقول قربت ليك
تلقاني بادي من الالف
(إبداعاتك هنا أيها الساحر
قد توهتني وعذبتني وجننتني
جننت حرف الكلام وبرضو ادتني السلام )
ملكة سرد وحبكة درامية غاية في الروعة

[ابرا]

دي طوبتي وياها قنيبه ( ما قنب الاسد) يا باش

[علي حاج علي]

اقتباس:
المشاركة الأصلية كتبت بواسطة معتصم الطاهر
الحكاوي أدناه من خيال المؤلف


أى تشابه فى الأسماء أو الأحداث هو مجرد صدفة ..



المحترم معتصم الطاهر
الامنيات لك بالاستقرار والسعادة
نستمتع بالحكاوي .
اللغة سهله ، الافكار متشابهة .
الشخصيات تقترب وتبتعد من البطلة حسب (الصدفة التي ذكرها المؤلف) .
هل يصمد المؤلف بعد إكتمال الحكاوي ...
لعله يكون من الذين يؤيدون نظرية (موت المؤلف) ... ؟؟ !!
بينما نمارس نحن فكرة (القاري النموذجي) !!
دمت بخير ...

[جيجي]

المشاركة الأصلية كتبت بواسطة زول خرافي

دي طوبتي وياها قنيبه ( ما قنب الاسد) يا باش

ابرا ياخ تعال نعمل تحالف
انت كلمني بالبتنقشه وان بكلمك بالمامنقوش

[معتصم الطاهر]

سلامات جميعا

عدنا للدوحة و نعود

[الجيلى أحمد]

انا لله ياباش ,
انا لله يااخ..

طبعآ من يوم قريت لى منها الجزء الأول فى سوبا, وأنا أقول الباش دا مابراهو...

يااخى متعة مجنونة,
ماتعرف تخش بى وين وتطلع من وين
حرفنة ومهنية عالية

[معتصم الطاهر]

5- أنا عارفك حنين و بتشمّت على


ذات شلاقة .. رأيت تحت اسمها ..نورها الأخضر .. كتبت لها فى رسالة داخلية " هاتفك ..لو سمحتي " .. شعور جميل أن تحترم بنت حد الريدة .. زولة لم ترها .. لكنك تجد فيها شعور الأخت الصغيرة .. بت الجيران الطيبة ..
والغريبة أن صندوق رسائلها لم يكن مغلقا أو ممتلئا كما بقية خلق الكائنات المدعاة " لطيفة " .. غايتو جنس غايتو ..
كدت أتصل بالمشرف الفنى ليمسح الرسالة ..شلاقة اشراقة .. ( مرات كدا لازم يكون عندك واسطة تفيدك فى مصائب زى دى " حتى لو قال مالك الموقع أن المشرف الفنى ليس له اى تحكم فى الرسائل الداخلية .."
رأيته على الخط ( On line) .. سأرسل له رسالة داخلية .. ليمسح رسالتى ..
و لما كدت .. جاءنى ردها فى رسالة داخلية .. عفصتها و كأنى أطأ على كل كرامتى التى ستتمرمغ فى الوحل ..
وجدت رسالتها تحت عنوان ( هاك) .. رقم الهاتف و عنوان العمل كمان ..( ابو الزفت ذاتو ) ..
ثم ..ثواني معدودة و ..
رسالة داخلية ..ثانية ..
"احتاج نصيحتك .. أرجوك اتصل .."

هذا موضوع لا يمكن الصبر عليه و لا يمكن الاتصال بها من مكان العمل .. سأرجع للمنزل ثم أتصل بها ..ثم أن هاتفي كعادته من النصف الثالث من الشهر ..بدون رصيد ..
رجعت للموقع وراجعت مواضيعها ..و فى " بوست " يشبه كتابتها الشاكية .. " البنات يتباكن و هي تتشكا".. و كعادة يدى المعصلجة وبروح الصحابة التى بدأت أديتها حبة لوم .."لزوم الريدة و كدا .."
ريدة لوجه الملاك .. لوجه الأرض التى تمشى عليها .. لأجل إنسانة كل ما أحمله لها حنية و شعور أعلى من الإشفاق و أقل من ريدة زول لزولة ..
حين وصلت المنزل .. بعد و دش منعش .. " بَرود و ليس استحمام "
يا إلياذتى .. هوميروس قادم .. ولكن ..آه .. آآآآآه .. بتوّر الأحزان .. ما عندى رصيد ..
اتصلت على اصدقائى برسالتى المجانية الشهيرة ( ارجوك اتصل) ..و لأن الكل يعرف مصائبي ..فلم ينجح أحد ..
أخيرا .. توكلت خرجت لشلة اللستك .. اصحاب الحوجة ..والعوز .. "احتاج رصيد ..يا جماعة " و مسألة عاجلة ..قرءوا جديتى و محنتى المنصوبة فى وجهى والظاهرة على آخره ..
طارق زول حوبات ... قال لى مبتسما " الموضوع الظاهر فيهو دشديش بالجيش" .. أجبته بانكسارة المقبوض عليه يشاغل بت الجيران .
ذهب معي الى ست الفول .. وقال لها
(بالله يا حاجة ألغى رطل "سمسمية و حولى للزول دا رصيد بالرطل التاني) ..
- سجمى الغايب منو؟ .. و مالو ؟
+ لا .. بس صاحبنا دا فى حوبة و كدا ..
- ان شاء الله خير يا ولدى .. البمرقك كدا .. والبجيبك لينا دا ما هين ؟
طارق : لا الموضوع ظاهر فيهو دامة و كدا ..
- و مالو يا ولدى .. خلى السمسمية فى حالها .. والرصيد ادفعوا آخر الشهر ..
و حولت لى رصيد (20 جنيه ) بالتمام و الكمال ..
اتصلت عليها .. قبل أن يرتاح الرصيد فى هاتفى "تلاتين حشرة" الشهير..
جرس .. " هذا المشترك مشغول الآن .. ... " ..
و لم استطع أن أشكر طارق إلا بهزة راس وأنا متوجه نحو حجرتي .. " الموضوع عاوز انبطاحة .." تدحرج نظرى الى أسفل حين أحسست بألم في قدمي ..اذ اصابنى شيئ على أظفرى فرأيت الدم و سفنجة على الرجل اليمين و شبشب على اليسار .. عرفت حينها لماذا " حنّ الشباب على حالتي واستجاب طارق"بسرعة .. و دقت الحاجة صدرها ..
نظرت الي الدم على أظفرى و أنا أردد " يا دم دا ما وكت الرسم واللون "
رنتان أخريين.. و انطلق صوت فيروز من هاتفها .. " عصفور طل من الشباك " وقبل أن يقول لها يا نونو .. جاء الصوت ..شافعا " ما شافعة نصاح"
سألَتْ: " ألو منو "
قلت اسمي كاملا .. ليس كما هو فى الموقع ..
وأجابت .. و ببرود حقيقى .. " أرجوك لا تتصل مثل هذه الساعة " ..و كأنى أراها تصر وجهها الذى قيل عنه طفولي غرير .. أو تبتسم جزلة بانتصارها ....
وعرفت حينها معنى أن يسقط فى يدك .. أو الصقط يصقعك نص الليل وأنت بلا غطاء ..
صبرت ممغوصا حتى الصباح ..تتلوى بطنى و يطعنن قلبى بحراب أكثر ايلاما من طعنتها ..
اتصلت عليها .. أهو ضعف مني !! أم لأفش غبينتي أم لأسترد كرامة شالها الهواء .. " ولكنها لم ترد " ..
وعلاقة قبل أن تبدأ بالبسملة اذ بها تنتهي باستعاذة ....

[معتصم الطاهر]

اقتباس:
المشاركة الأصلية كتبت بواسطة Osman Hamad

الشغل الذى دا برجعنا تانى للشخبتة ;-)
احبك ياباش

الشغل دا تحرش عديل بيك

ولما رجعك يكون فشل ..

بحبك اكتر جيدا

[معتصم الطاهر]

اقتباس:
المشاركة الأصلية كتبت بواسطة عبدالعزيز خطاب

عفراء

كمسه كمسه

جغم جغم

سقي سقي

الله يجازي محنك يا باش

مجرد تشابه ذكاء

عمو لذيذ

كيفنك

ياخوى المحطة دى التذاكي فيها ما اكبر من زولتى دى .. بس هى الغرض عمشها

[معتصم الطاهر]

اقتباس:
المشاركة الأصلية كتبت بواسطة جيجي

قون الضفاري دا
شماره عجيب
الرسول بس وروني الجابه منو

جيجي

قلب بتاء جماءة كلو

اوع يكون الشرك قبض ؟

[معتصم الطاهر]

اقتباس:
المشاركة الأصلية كتبت بواسطة مُهيَّد

أنا إسمى مكتوب !!

الحبيب ... مشتاقين وكفى ..

ولكَ العُتبى ..

انت مكتوب فى القلب

يا خوى .. كفانا تدينا رقم التلفون ..