بوست تجريبي..

[الرشيد اسماعيل محمود]

المشاركة الأصلية كتبت بواسطة محمد عبد الرحمن

ياخ كيفتا حناني ذاتو


بعدين جميل لوم الضمير المستتر الغائب ده
حسة انا إتذكرتا ناس معينين

لاكين ده حال المجتمع الإسفيري
الإلتزام فيهو شخصي بحت و بتحكُم فيهو نفسك براك

بعدين فكفكة الحاجات دي من شوق و حنين و ما شابه من إندياحات
دايرا ود أبو عاقلة بي شنطة مفاتيحو يجي يساهم فيها

شوف اللوّنتهم ليك في مداخلتك وأقرا معاي..

الفكفكة..يعني فرز حاجات متلميّة مع بعض..
شفت كيف انت فكّيت الحنان وبقّيتو كون قائم بذاتو كيف..؟؟
يعني عبارة( كيّفت حناني) دي ياحليف حالة فكفكة عجيبة..
الحنان دة أكيد انت لا عارف شكلو ولا مكان قعادو..
صاح..؟؟
الحنان ده لونو شنو..؟؟ أحمر..أصفر..أخضر..خاتف لونين ولاّ لون زينب.
وطولو كم..متر..مترين..ميّة..كيلومتر..ميل..ولا فرسخ..
وزنو كم..؟؟ وقيّة..رطل..كيلو ولا طن..؟؟
طبعاً ما حتلقي إجابة..ليه..؟؟
لأنو قيمة معنويّة زيّو زي الأخلاق..والحب والخوف والمودّة وإلخ..
يعني مستحيل يجي زول يقول ليك والله أنا أتمتّع بأخلاق تزن ميّة كيلو..
أو بت تجي تقول ليك والله مشتاقة ليك ياحمُّودي شوق بنفسجي..
وبرضو ياحليف ماممكن تجي تقول لي مثلاً حنانك قاعد في البطين الأيمن
أو في الرئة ولا في المادة الرمادية الــــ في المخ..أو متحكر في طرف الرُكبة.
مسألة شائكة مش..
بس ممكن عادي تقول لي كيّفت حناني..
أو زدت افراحي الليلة..
أو تقول لي فكّيت لي الدبرسة بتاعتي..
ليه..
لأنو نحن بنقدر نحدِّد بصورة واضحة القيمة المسّاها الخطاب..
لمّا الموضوع يكون مرتبط بخطاب موجّه ناحيّة قيمة محددة، بنعرف نفك الإرتباط السرمدي بتاع القيم ده ونخت القيمة المستهدفة في الواجهة
عشان يصطدم بيها الكلام الجاي من الزول التاني ويحصل امتزاج بيكون
ليهو أثر طيّب في النفس.
فكفك ياخي وماتنسانا من صالح الفكْفكة.
ـــــــــــــــ
نفتقد ود ابو عاقلة فعلاً..
الرّجل الغمام..أينما حلّ هطل.
عساه بخير.

[سارة]

الرشيد فينا تعرف كم احب ان اقرا لك واقرأك
حكاية أقشر بيها دى رغم صحتها فيها تواضع جميل
بس حكايتك تقشر بيك دى بقت لى زى البرتقالى خاتف لونين






خارج منطقة التغطية
تلقى الفى مرادك ان شاء الله

[جيجي]

المشاركة الأصلية كتبت بواسطة الرشيد اسماعيل محمود

جيجي سلامات ياراقيّة..

كتبت ليك مداخلة ماهلة ..والله الجهاز براهو قفل..والله العظيم جد..
يكون من شنو..؟؟
أنا غايتو في تحليلي قلت يكون ما استحمل واحد من حاجتين:
يا إمّا ما استحمل الكلام المكتوب..(إحتمال وسط)
أو ما استحمل لطافة المكتوب إليه..(إحتمال قوي)
بس قطع شك هو مستحملني..لأنُّو جهازي وانا عارفو كويّس..
حسّاس كلما تعلّق الأمر بالرقة واللطافة..
قبل كدة في بت من الأعضاء هنا بعد لاقيتها في الخرطوم قالت لي:
بالله يارشيد خليك راجل لطيف زي الجيلي(والله العظيم جد)..
في حين أنو الجيلي(اللطيف طبعا) لقاها لابسة برتقالي قال ليها ياسلاااام ياخي..الأصفر ده جميل ياخ..
وبعد اكتشف غلطو قال شنو..قال النظارة بتاعتو معتِّمة..سنة يانظّارات مارتا.
والله ياجيجي أنا جادِّي في الكلام ده..
أها هسع أخير لطافة الجيلي ولا أخير أنا..؟؟
المهم:
الجهاز قفل براهو وكنت في المداخلة الطشّت ديك داير أقشر بيك من خلال الكلام..
صاحبتي سمحة جنس سماحة..
قالت لي الترحيل الليلة ما جاني تقدر تقدمني لحتّة المواصلات..؟؟
قلت ليها ليه لأ..
علي الأقل أقشر بيك في الشارع..
وقشرت بيها طبعاً..
لمّا اتكررت حكاية قدِّمني والترحيل ما جا..
إكتشفتَ إنّو هي ذاتها كانت بتقشر بي..هههه.
ياخي حكاية..
شكراً ياخي وخليك قريبة.
سلمتِ

صدقا لكلامك
على بالطلاق اناكمان بقشر بيك
ياجميل

[محمد عبد الرحمن]

المشاركة الأصلية كتبت بواسطة الرشيد اسماعيل محمود

شوف اللوّنتهم ليك في مداخلتك وأقرا معاي..

الفكفكة..يعني فرز حاجات متلميّة مع بعض..
شفت كيف انت فكّيت الحنان وبقّيتو كون قائم بذاتو كيف..؟؟
يعني عبارة( كيّفت حناني) دي ياحليف حالة فكفكة عجيبة..
الحنان دة أكيد انت لا عارف شكلو ولا مكان قعادو..
صاح..؟؟
الحنان ده لونو شنو..؟؟ أحمر..أصفر..أخضر..خاتف لونين ولاّ لون زينب.
وطولو كم..متر..مترين..ميّة..كيلومتر..ميل..ولا فرسخ..
وزنو كم..؟؟ وقيّة..رطل..كيلو ولا طن..؟؟
طبعاً ما حتلقي إجابة..ليه..؟؟
لأنو قيمة معنويّة زيّو زي الأخلاق..والحب والخوف والمودّة وإلخ..
يعني مستحيل يجي زول يقول ليك والله أنا أتمتّع بأخلاق تزن ميّة كيلو..
أو بت تجي تقول ليك والله مشتاقة ليك ياحمُّودي شوق بنفسجي..
وبرضو ياحليف ماممكن تجي تقول لي مثلاً حنانك قاعد في البطين الأيمن
أو في الرئة ولا في المادة الرمادية الــــ في المخ..أو متحكر في طرف الرُكبة.
مسألة شائكة مش..
بس ممكن عادي تقول لي كيّفت حناني..
أو زدت افراحي الليلة..
أو تقول لي فكّيت لي الدبرسة بتاعتي..
ليه..
لأنو نحن بنقدر نحدِّد بصورة واضحة القيمة المسّاها الخطاب..
لمّا الموضوع يكون مرتبط بخطاب موجّه ناحيّة قيمة محددة، بنعرف نفك الإرتباط السرمدي بتاع القيم ده ونخت القيمة المستهدفة في الواجهة
عشان يصطدم بيها الكلام الجاي من الزول التاني ويحصل امتزاج بيكون
ليهو أثر طيّب في النفس.
فكفك ياخي وماتنسانا من صالح الفكْفكة.
ـــــــــــــــ
نفتقد ود ابو عاقلة فعلاً..
الرّجل الغمام..أينما حلّ هطل.
عساه بخير.

يا حليف عاطف خيري قال في الحنان

والحنانُ طعمهُ داكن’’ يميل إلى السُّمرة ،

وهو يُرى ،
يراه الرضيعُ متحققا غير منقوصٍ ، يراه ويحسّه مِثلما يرى صدْر أمّه
يراه المشرفُ على الموت كذلك ، يرى منه صفحةً من وجهه الممتنع
مشيحا بلونه إلى جهةٍ لا تطالُها بوصلة’’ ولا يتكّهن بها فلكيِّ مثابر.
وهو في كلِّ هذه الأحوال والمراتب مجبول’’ من طينة العصب المتماسكة الهشّة،
طينةٍ تبتلُّ بذاتها ولذاتها وتتشكّلُ على أصابع الحاجة والنزوع إلى آخر-كائنٍ
ما كان – لا ليمتزج فيه وينصهر ، بل ليتحقّق في عنصرٍ من عناصر التفرُّد
بالمكان في الذات العاشقة . والتفرّد بالمكان منزلةُ شاسعة’’ ومتشابكة.
إذ أن العشْقَ في جذْر مكان ، ومن انفرد به ، انفرد بالحواس
وبسائر شطحات الجسد ، لذلك فإنك لا تستطيع أن تتصوّر الله
أو تضع له ملحما ، فقط تتعشّقُه ، لأنه ملءُ المكان.
وللحنانُ لون’’ تخطىء العينُ اذ تراه – لأنه مُذاق – وتتوه الكفُّ حين تحاولُ
تحسّثس خطوطه المتفرّعة ، وتطشُّ القدمُ برغبتها في الوصول إلى أقرب قريةً
من قراه المستترة خلف نهر الظّمأ.
والذي سعى إلى لونه ، لعقه وذاقه ، لم يرهْ ولم يذهب إليه .
والحنانُ يلتهمُ بعْضَه ولا يشبع ، يشربُ بعضه ولا يرتوي
يقتلُ بعضه ولا يموت .

بيقولو الحاجات الماممكن نقيسا ممكن نعمل ليها مؤشرات
المشكلة حاجات العاطفة دي مؤشراتا بتختلف عند فرد عن الآخر

برضو في حاجات واضحة زي الكره مثلاً
لاكين في حاجات حتى التمييز بيناتا يكاد ينعدم زي الشوق و الحنين مثلا.




سارة سلامات

[الرشيد اسماعيل محمود]

المشاركة الأصلية كتبت بواسطة سارة
الرشيد فينا تعرف كم احب ان اقرا لك واقرأك
حكاية أقشر بيها دى رغم صحتها فيها تواضع جميل
بس حكايتك تقشر بيك دى بقت لى زى البرتقالى خاتف لونين

خارج منطقة التغطية
تلقى الفى مرادك ان شاء الله

قلتي لي خاتف لونين..هعهع.
ياخوّانا مانرفع إسكورنا شويّة ولا شنو..؟؟
حكاية هي تقشِر بي دي غايتو اتردّدت أكتبها..
بس قلت شنو..
ياخي أكتبا وما تعلِّم أصابعك الخوف..ياصابت ياخابت..
ده كلو في سبيل إنِّو الزول يبقي لطيف زي الجيلي..
بالرغم من أنّي قادر أفرز الألوان كويِّس.
غايتو دنيا بت كلب (زي مابتقول حبُّوبة أسامة الوريف)..
يعني ناس تحتفي بزول مافارز الألوان صاح..
وتتجاهل زول فارز كويّس بس ما لطيف..هعهع

[الرشيد اسماعيل محمود]

المشاركة الأصلية كتبت بواسطة جيجي
صدقا لكلامك
على بالطلاق اناكمان بقشر بيك
ياجميل

يازولة أقشري من طرف..
البيت بيتك..ههه
تسلمي ياجيجي..رجعتي لي بعضاً من حقي المسلوب.(وش ميّت من الضحك)

[سارة]

محمد عريس بتى كيفنك
سامحنى فى التقصير انا الايام دى الاسكور حقى فى النازل بشهادة الرشيد
بس الله غالب
والحنان عندنا لا لون وله ولا طعم ولا رائحة
بس برضو خاتف لونين

ونقول للرشيد ياخ شكرا ياخ جانى مزاج اشكرك وبس
وش ميت من الضحك وليهو كم اسبوع ما ضحك الله وكيلك

[نبراس السيد الدمرداش]

وتتجاهل زول فارز كويّس بس ما لطيف..هعهع

يا رشيدنا عادي
اسي انت ما اتجاهلت مداخلتي
وانا بقول ليك مساء الخير
فشنو ما تتحسس وشيخي ما هين فاعمل حسابك منو

سرور بالجد افرزي
دا محمد عبدالرحمن الجاب سيرة الحنان
ما محمد عريس بتك

[سارة]

Det er ikke morsom å bli gammel



محمد مصطفى سامحنى يا جميل

[الرشيد اسماعيل محمود]

المشاركة الأصلية كتبت بواسطة محمد عبد الرحمن
بيقولو الحاجات الماممكن نقيسا ممكن نعمل ليها مؤشرات
المشكلة حاجات العاطفة دي مؤشراتا بتختلف عند فرد عن الآخر

برضو في حاجات واضحة زي الكره مثلاً
لاكين في حاجات حتى التمييز بيناتا يكاد ينعدم زي الشوق و الحنين مثلا.

ياحليف مساء الأنوار..
ياخي عاطف خيري ده بهوِّم في دنياوات كدة عجيبة..
طبعا كلام الحنان القالو دة كلام سمح آييي..بس ده كلام الشعرا والأدب.
بخصوص المؤشرات القلت عليها ونسبيّة الحاجات..
طيّب ليه ما أي زول يقوم ينجر ليهو مؤشرات خاصة بيهو..
أنا هسع لمّا أشتاق مثلا بقوم من النوم بدري خالص (جادِّي معاك)..
ولمّا أكون مستّف بالحنين..بكون زول نيرفز ومرتبك..
المهم:
أيِّ زول بعرف شكل عاطفتو وموعد ورودها..
وابو القدح بعرفي محل بعضِّي أخيُّو..مش كدة..
لازم النّاس تعرف تأسِّس شكل حاجاتها..
لازم الزول يكتشف عاطفتو المشربكة دي وبعد داك يقوم يجتهد في الفكفكة..
طبيّا مش لمّا الزول يصدِّع مفروض يرجع يشوف الحاصل شنو بصورة
إستقرائيّة..
يعني هل فوّت وجبة..؟؟
هل بطنو ما نصيحة..؟؟
هل ما اتناول شاي كالمعتاد..قهوة أو سيجارة..
مش كدة..
وبتاع (الأرتيكاريا)* برضو أوّل حاجة مفروض يسأل روحو:
هل أكل أكلة معيّنة..في بيتهم في نوع محدّد من الأشجار..
إستعمل صابونة محدّدة ما كان قاعد يستخدمها..
دي المراجعة الشخصيّة للإستنتاج ومن ثم التعرُّف علي الأشياء..
شيل الفوق وأسقطو علي العاطفة..
كان حسيت بأنك مدبرس مثلاً..إحتمال مشتاق لزول محدّد..
لو حسيت بإنك سيّد سرحان طول اليوم..يمكن ده الحنين الجاني منَّك..
ويمكن من تباريح الهوي..
المهم..وصفو بصعب ياجميل..
فتِّش جوّاك بتلقي روحك فكفكت و...
إتفكفكتَ.
ــــــــ
*نوع من الحساسيّة أو التحسُّس الجلدي.

[محمد عبد الرحمن]

المشاركة الأصلية كتبت بواسطة سارة

Det er ikke morsom å bli gammel



محمد مصطفى سامحنى يا جميل

عليكي الله يا سارة الصنف بتاع الليلة ده تديني منو

[الرشيد اسماعيل محمود]

المشاركة الأصلية كتبت بواسطة نبراس السيد الدمرداش
يا رشيدنا عادي
اسي انت ما اتجاهلت مداخلتي
وانا بقول ليك مساء الخير
فشنو ما تتحسس وشيخي ما هين فاعمل حسابك منو

يازولة ماممكن تقنعيني بكلامك ده إنُّو ما أشبه الليلة بالبارحة..
ليه..
لأنو أنا فارز الألوان بس قالو ما لطيف..
أمّا انتي..فــ فارزة الألوان كويس ولطيفة في نفس الوكت.
طبعا أنا ماكنت عارف اللطافة دي شنو إلا بعد ما اتهموني بعدم حيازتها.
أهو بقينا نفرز بين اللطيف وناس محمد عبدالرحمن..وبابكر عبّاس.
مساء الخير.

[الرشيد اسماعيل محمود]

المشاركة الأصلية كتبت بواسطة حسين عبدالجليل
الرشيد و محمد عبدالرحمن في بوست واحد ؟ إذن أسأقرأهم بكباية شاي بنعناع و استمتع بحوار ذكي.
ساضع قليلا من اللبن و مزيدا من النعناع في كوب الشاي لو رجع الينا المدعو "أميري " .

عودا حميدا يامحمد . ولاتحرمنا من حروفك الانيقة .

تعرف الرشيد عندي صديق لايحتمل الا قدرا معينا من جمال اللغة . يقرأ درويش بتمهل شديد , بضعة أسطر فقط في اليوم الواحد , ثم يقذف بالقصيدة بعيدا ويعود لها في الغد , وهكذا ..وهكذا .

قال لي بأنه يخاف من الجرعة الزايدة . يخاف ان تصرعه اللغة .
"فاجهش ياابن أمي باللغة "

سلامات ياهذا الحسينُ الجميل..
كم سعيدٌ أنا بتشريف الحليف ثانية ..
كم أنا سعيد ..
مثل سعادتي حين تكون بالجوار.
زمان ياحسين لي صديقٌ غاية في الرّهافة ..
يسعي نحو الجمال ويخشاه في آن..
يتحرّي الجمال أينما وُجد..
ولكنه ما أن يري شيئاً جميلاً فإنّه يجلس علي الأرض مباشرةً..
ويضع يديه علي رأسه خوفاً من أن يتداعي من عليائه علي حين غفلةٍ
من التماسك..
جميلٌ ذلك الصّديق الجميل..
الجمال ياحسين طاقة رغم أنّها خلاّقة، إلاّ إنّها أيضا أحيانا قاتلة..
والعرّافون وحدهم يدركون أنّه لا بدّ من اتقاء تراكيزه العالية..
وأنا لستُ عرّافا..
تسلم ياصديقنا البعيد القريب.
سلمتَ

[محمد مصطفي]

اقتباس:
المشاركة الأصلية كتبت بواسطة سارة
Det er ikke morsom å bli gammel



محمد مصطفى سامحنى يا جميل

اها امسك يالرشيد عندك دي أم جانيت
بيان بالعمل كده
خليت ليك جانيت وامها ما شايفات محمد غيري تااااااااب
هييييييييييييييييييييييييع

[محمد مصطفي]

اقتباس:
المشاركة الأصلية كتبت بواسطة نبراس السيد الدمرداش
سرور بالجد افرزي
دا محمد عبدالرحمن الجاب سيرة الحنان
ما محمد عريس بتك

ده يا نبروسة اسمو حديث الدواخل ...
يعني سرورة مشتاقة لي ... ونطق عنها قلبها الطيب الجميل
لذلك ودون انتباهة منها لما يدور حولها ...
لم تري محمد غير محمدها وعريس بنتها ... اححححححح انا
المهم قامت جابت اخرا وكبت شوقا ... وانا مصدق وحاسي بيهو
اها يا نسيبتي دي مرقتك منها ...
المرة الجاية ما تجيبي لي ضقلا اكركب ...
ركزي ما اطقشونا عين