عم ماجد و الحلوين سلام ..
اخترت مداخلة آمال دي عشان فيها إختصار لوجهة النظر المعاكسة لوجهة نظري :
اقتباس:
المشاركة الأصلية كتبت بواسطة AMAL
سلام ياماجد
معترضة علي مجمعين الفي بداية البوست
وبعتبرا نوع من الكوار الحصل في الايام الفاتت
وكلو يعقوب استخدمو لحاجة في نفسه
وضد التصنيف ياماجد ومع رأفت تماما
يتساوي الاعضاء في الحقوق والواجبات من لحظة تسجيلهم وامتلاكهم للباسويرد
وكدا بتفتحوا باب عريض للاستثناءات والتمييز والمفاضلة بين الاعضاء
بكرة زول يطالب بانو العقوبة والامتثال للائحة برضو يكون عندو تصنيف وممايزة في مثال هنا اجده قريب جدا للحاصل دا الجدل بتاع انو المغتربين يصوتوا في انتخابات السودان ولا لا
المواطنة ياماجد هي الاساس
مادمت تحمل الجنسية بتعادل هنا العضوية يبقي تغيب ولا تقعد ولا وتغيب قدر شنو دي ما موضوعنا خلينا نخلي المواطنة هي الاساس ومانبقي آنيين الشايفنو الليلة مشكلة بكرة الايام بتوريكم انو عادي جدا
شكرا
|
واضح يا آمال إنو الناس الشايفه في خلل في اللائحة في مسالة الناس البتجي تصوت و تمشي أكتر بكتير جدا من الناس الما شايفنها مشكلة، البوست ده و كل البوستات الناقشت الموضوع ده بتثبت الكلام ده .
في مداخلة عميقة جدا لمبر ( ما عارفها في ياتو بوست ) لخص فيها مساؤي تصويت الاعضاء الما بشاركو في المنتدي و لا عندهم وجود هنا و كيف إنو الكلام ده بيناقض العملية الديمقرطية شكلا و مضمونا بمشاركتهم في إتخاذ القرار في مكان لا يهمهم أصلا . و بينسف مبدأ المحاسبة المهم جدا في العملية الديمقرطية ...
أظنك بتتفقي معاي يا آمال إنو الطائفية كانت سبب أساسي من أسباب فشل التجارب الديمقراطية، عدم الوعي في السودان الشقيق بجيب لينا الأحزاب الطائفية دي تحكم سنة وراء سنة لسبب واحد و بسيط : إنو منسوبيها بصوتو بالاشارة !! ليه يا آمال عايزة الناس هنا تصوت بالاشارة ؟! و كيف الناس دي من الأساس تقبل تصوت بالاشارة ؟! البصوتو بالاشارة للاحزاب الطائفية كان عذرناهم بالجهل، الناس البتجي بالايميلات دي، نعذرهم بشنو ؟! و كان هبشتيهم تلقيهم كلهم (متمشدقين ) و ممكن يدونا محاضرات عن الديمقراطية بالساعات الطوال !!
أنا وقفت في صف انك من حقك تحشدي من تشائي للتصويت لمن تشائي ما عشان ده كان تصرف سليم من وجهة نظري، لكن عشان ما كان في حاجة بتجرمو في اللائحة، هسي أنا ضدك تماما عشان اللائحة دي تتغير و ما يكون في سكة لحشد ناس ما عندهم علاقة بهذا المكان سوي انهم يوما ما طلبو الانتماء إليه، و المقارنة بين جنسية الفرد و عضويتو مقارنة عجيبة جدا لانو مافي أي علاقة ...
أنا في رايي إنو المقترحات القالها ماجد دي مقترحات عميقة جدا لتلافي مشكلة التصويت بدون المشاركة دي، و العندو مقترح أحسن, يقدمو، لكن لازم يكون في بند في اللائحة يمنع الزول الما بشارك هنا إنو يصوت ....
