ماشُفتا الجلا السوّاها؟!...(للناطقين بها).

[imported_عادل عسوم]

(قبل زواجي بسنوات)...
تم تجييشي كغيري من أهلي على امتداد منحنى النيل العظيم
(Great Bend of the Nile) لأن أبغض هذه (الجلا)*!...
وحقّ لي -حينها- أن أفعل ذلك...
اذ ما أظلمها...
وما أشنع فعلتها...
لقد استحقّت -فعلا-بأن يجردها راحلنا عبدالله محمد خير من ثوب أنوثتها فيُلبسها لبوس الرجال...
والظلم والعدوان -على الأغلب-ألصق بالذكور دون الاناث...
وجّه شاعرنا الراحل خطاب مظلمته الى شيخ شعراء المنطقة ود الدابي فقال:
ودالدابى مالك ساكت
ما شفت الجلا السواها
شال محبوبتى سافر بيها
كيفن عاد بعيش لولاها
بابور البحر مو عارفى
شايلة اعز زول جواها
ماهماها حالى ألبيّ
ما دام نوّرا وضواها
تشتكى بالعلي عيونى
أهملا ما سمع شكواها
اللحكيلك ألماك عارفو
كيف مسخت بلدنا وراها
كان كاتمي الشجن في وداعا
الاّ دموعا مو ساتراها
وأيه فايدة حياتى البعدا
آخوى أتقلب مجراها
تقصر او تطول ايامى
دى انا لامن أموت بطراها
من يوم رحيلا السمحة
خلّت فى العيون ذكراها
خلّت فى القليب بصماتا
أحرف كل يوم بقراها
ما بتحمل حبيبتى الغربه
لا لا وحاتا مو قادراها
وكيف حالا إن مشت فى بلدا
حارة وناسا مو شاكراها
كان فات المحطات جملة
يا حسن القرير بغشاها
قوم يوم التلاتاء أندلاّ
بى تالا الرصيف تلقاها
ما تعاين كتير وتشبّه
في ديك إياها ديك مو ياها
باينا حبيبتى من بسماتا
والنور يضوى من محياها
يا حسن أنت فوق أوصافا
جيب أبيات وقول معناها
واوعك ترتبك فى وداعا
ذى ما نحن ودعناها
واكتب لى جواب طمّنّى
لا يبقى السفر أعياها
ما بتقدر عليها الدرجة
إلا غلب عليها حياها
هاك منى الرسالة التالتي
وعينى بالدموع راوياها
تلقاك حافظى لل بيناتنا
وتبقى العشره مو نا سياها
إن كت ما بخاف عزالى
آزول كت بقوم ابراها
لكين بخشى قلنا وقالو
وحالى السمحه عارفه براها
...
فانبرى له راحلنا الآخر ودالدابي مواسيا وداعيا على الجلا وشانئا حتى قال وقلنا معه:
أنا اتمنّالة في دالة غريقة
تحتل فيها ماتفضل شقيقة
والدالة -للناطقين بغيرها- هي الحفرة العميقة في أعماق مياه النيل...
ويبقى هذا التفسير ساريا الى حين حضور (مُلاّك) المدينة وهم كُثُر في مدينتنا هذه وما كان لي بأن أُفتي بين ظهرانيهم
ولتكتمل الصورة هاهو كامل رد الخطاب من ود الدابي:
صحيح ياعبدو اخوى قولك حقيقة
كتير الطفشه ( الجلا ) من فريقة
يزازى نقل سميحات الخليقة
ورنين صفارتو نفسى ابت تطيقة
معاها انا كيف اسوى شنو الطريقة
تعيق فى الناس إله الناس يعيقة
اتمنالا فى دالة غريقة
تحتل فيها ما تفضل شقيقة
تطير ريشاتا منها بى فريقة
وصميم مكناتا تلتهمو الحريقة
قمرات نومه تسكنن ام دريقة
وتولد فى عنابرو عشان غريقة
بناتنا حليل سروحن فى السبيقة
لقيط ام راس مبقّعى و الكريقة
اديهن حلوه غير لبس ام دقيقة
وبدون كترت غويش نفسن طليقة
جمالن خلقة لو لفحن طريقة
وبدون مضغوط فرادا باهى زيقة
يا حليل قتانن الفوق السليقة
ليقيمتو تطمن الضارباهو ريقة
كتير قبلك يئن مضروب بديقة
تسد عبراتو تسمع لى شهيقة
...
(يتبع)
ـــ
*(الجلا) باخرة نيلية كانت تمخر عباب النيل مابين كريمة ودنقلا ويسميها أهل المنطقة (بابور البحر).

[imported_عادل عسوم]

لان قال الناس في حق (الموت) بأنه فراق الحبايب...
فان(الجلا) قد فاقت الموت قسوة وأنانية واثرة!
بابور البحر مو عارفى
شايلة اعز زول جواها
ماهماها حالى ألبيّ
ما دام نوّرا وضواها
لعمري انها لقمّة الأنانية والاثرة!.
ولولا أسباق ظنّ بأنها (موعارفي) ...
لكان جُرمها ذاك عن سابق أصرار وترصد!
...
والحديث عن هذا ال(جُرم) الذي تشارك فيه (بوابير بحر) كُثُر ووسائط نقل أخرى عديدة يطول...
لكن لتسمحوا لي ايراد هذه المداخلة الجميلة من الأخ الصديق الدكتور ياسين محمد ياسين أوردها مشكورا في ذات الخيط ولكن في منتدى آخر...
التحية لك أخي ياسين متبوعة بتهاني العيد السعيد وأسأل الله أن يعيده عليك والاسرة الكريمة هناك في بلاد العم سام..

أخي وأستاذي وصديقي الباشمهندس عادل
أهنئك في الساعات الأولى من صباح أول يوم في عيد الفطر قائلاً لك ولكل آل بيتك كل عام وأنتم بخير
"الشوق قيساب نوريقو متين"
يحاول البعد جاهداً أن يدخلني في زمرة الناطقين بغيرها ولكن لازالت الذاكرة حبلى بذاك الجمال والإرث وإن أصبح اللسان عاجزاً عن التعبير عنه والوقت سارقاً ، لذلك أسمح لي أن أجتر ما كتبته ذات يوم عن هذه الجزئية التي إجترحتها ، وكعادتك تأسر القارىء ولا تدعه يعرف وجهتك من الكتابة إلا عند نهايتها ، وهذا لعمري فن نادر ، وها أنا الآن أضع لك ولقرائك الآتي ولا أعلم إن كان قد يصب في مرماك أم لا:
ظلت البواخر تمارس ألاعيبها القذرة دوماً معه "وخلف الكي فوق جروحه المنوسرة" فعيلَ صبره ، فنادى هذه المرة بأعلى صوته مستنجداً بمكلومٍ ومظلومٍ آخر (ود الدابي) عانى أيضاً من هذا الجاني (الباخرة) الذي يرتكب جرائمه في وضح النهار وتحت مظلة القانون (يطلق صفارته) ، راجياً منه التدخل ملوماً إياه على الصمت حاكياً له "كيف مسخت بلدنا" بعد سفر الحبيب وكيف فاضت دموع البلد عند الوداع ، أما حياته فلم يعد لها فائدة ، ولولا "شيل الحال" ومخافة العازلين لتبع الباخرة :

ود الدابى مالك ساكت ما شفت الجلا السواها
شال محبوبتي سافر بيها كيفن عاد بعيش لولاها
بابور البحر مو عارفي شايلي اعز زول جواها
ماهماها حالي البي ما دام نوَّره وضواها
تشتكي بالعلي عيوني أهمله ما سمع شكواها
اللحكيلك ألماك عارفو كيف مسخت بلدنا ورآها
كان كاتمه الشجن في وداعه ال دموعه مو ساتراها
وأيه فايدة حياتي البعده آخوي أتقلب مجراها
تقصر او تطول أيامى دي إنا لأمن أموت بطراها
من يومة رحيله السمحه خلت في العيون ذكراها
خلت في القليب بصماته أحرف كل يوم بقراها
***
ما بتحمل حبيبتى الغربه لا لا وحاته مو قادراها
وكيف حاله إن مشت في بلدا حاره وناسا مو شاكراها
كان فات المحطات جمله يا حسن (لابد) القرير بقشاها
قوم يوم التلاتاء أندله بى تالا الرصيف تلقاها
ما تعاين كتير وتشبه ديك إياها ديك مو ياها
باينه حبيبتي من بسماتا والنور يضوي من محياها
***
يا حسن أنت فوق أوصافه جيب أبيات وقول معناها
واوعك ترتبك فى وداعه ذي ما نحن ودعناها
واكتب لي جواب طمني لا يبقى السفر أعياها
ما بتقدر عليها الدرجه إلا غلب عليها حياها
هاك مني الرسالة التالته وعينى بالدموع راوياها
تلقاك حافظي للبيناتنا وتبقى العشره مو نا سياها
إن كنت ما بخاف عزالى آزول كت بقوم ابراها
لكين بخشى قنا وقالو وحالي السمحه عارفه براها

هذه المرة كان لندائه وقعاً حيث لم يذهب أدراج الرياح وكانت هناك حياة لمن نُودي ، حيث رد عليه الأستاذ حسن الدابي ، حسب منهج شعرائنا في "المجادعات الشعرية / الإخوانيات" ، (أذكر منها على سبيل المثال: ود الدابي أستاذي القدير غلبت الحيلة جيتك مستشير / ووب علي أنا يا السرير الجن بدا / حمد سعيد ما كان أخير تسيبو الريد وتناساه القرير) منتصحاً بقول حمد سعيد في رده على استنجاد الأستاذ السر عثمان الطيب: (حمد سعيد شنو عندو ليك يالسر ، بلا ألمن انطوى انترجم بقالو شعر) ، حيث اعتصر (ود الدابي) ألمه وكل أحزانه واستجمع باقي قواه الخائرة لنجدة مظلوم "الككُر" عبد الله محمد خير (رحمه الله). ولكن لما لم يكن عند "ود الدابي" قوة تمكنه من النـزال واستخدام يده ، ولما كان يعرف أن استنجاد شيخ العاشقين لا ينفع معه الاكتفاء بأدنى مراحل الإيمان (استخدام القلب) لإزالة الضيم والضرر المتكررين استخدم سلاح المفردة (ثاني درجة بعد استخدام اليد) ، مكتفياً بلسانه حيث شهد على الجرم موضحاً عجزه اليدوي داعياً دعوة مظلوم لم يكن بينها وبين الخالق حجاب سائلاً الله أن يعيق "الباخرة مثلما عوقت الناس" بعد أن أضرت به تلك "المساسقة/ والمزازاة":

يا عبدو أخوي قولك حقيقة
وكتير الطفشه الجلا من فريقها
دا اليزازي نقل سميحات الخِليقا
رنين صفارتو غلبني أطيقا
تعيق في الناس إله الناس يعيقا
أتمناله في دالة غريقة
تحتل فيها ما تفضل شقيقة
تطير ريشاته منها بي فريقة
وصميم مكناته تلتهمو الحريقة
قمرات نومه تسكنن أم دريقة (السلحفاء)
وتلد في عنابرو عشان غريقة
كتير قبلك يئن مضروب بديقة
تسد عبراتو تسمع لي شهيقا

فتحققت تلك الأمنية وأصبحت "بوابير" البحر اليوم تحت الماء نسياً منسيا تفرخ في عنابرها السلاحف (أم دريقا) ، فالجيل الحديث لا يعرف عن هذه الوسائل ولم يرها ولم يسمع بأفعالها مع شعرائنا. لقد بلغت درجة كراهية الشاعر الراحل عبد الله (رحمه الله) للبواخر مبلغاً جعله يغير خططه ، في محاربة هذا الخصم ، من المواجهة المادية التي لا يقوى عليها إلى تقليل مستوياتها والتشكيك في مقدراتها والمقدرات العقلية للذين يسافرون بها إلا إذا كان قد أصابهم مسٌ من الجن أو لعبت بنت باطوس (الخمر) برؤوسهم ملعباً ، فنظم قائلاً:

اليقوم بي كربكان من اهلو تب ما عندو راس
إلا وحدن ....... جبد غتاه وكتحلو كاس

لم يسلم شاعرنا (رحمه الله) مما كان يعاني منه (نقل الحلوين) بسبب البواخر ، بعد أن غرق اغلبها وأصبحت غير صالحة للنقل ، ولم يهنأ بذلك ، حيث ظهرت "البصات السفرية" امتداداً لذاك العناء والشقاء فزاد سهره ، وفـُتحت له جبهة قتال جديدة لا حول له بها ولا قوة مع هذا الاختراع الجديد الذي يخطف "الحبائب" ولا تستطيع الرمال تعطليه مثلما كانت تفعل للعربات " السفنجة ".

تحياتي
و"الدالة" كما أشرت تسمى بـ "الكونية" أيضاً وهي مكان لا ينجو من يدخل فيه وعادة ما تكون فيها "فوارة" تغرق كل من يقترب منها وهي بالطبع تعتبر من أعمق الأماكن في النيل

[imported_عادل عسوم]

المشاركة الأصلية كتبت بواسطة azzam_farah

بعد الإطلاع على مُحْتَوى العمود وجدت أنني -بِإعتباري مِن غَير الناطقين بِها- لم أخسر شئ البته..

فقط أُحِب أن أُشير إلى أن "الشوايقة" مِن الرِحم النوبي كما قال التاريخِيين.. وهُم -أي الشوايقة- كذلِك فلاتة كما قال أ.د شيخ العُلماء/ عبدالله عبدالماجِد إبراهيم في كِتابِهِ [الإعلام بالأعلام] وأخيرًا فضح الفحص النووي مأثورة الشوايقة كَوْنِهم عرب.. قال أ.د يوسُف فضل: [كان الشوايقة يرطُنون حتى وقتٍ قريب].

كُل أسماء الأدوات التي يسْتخدِمها بني شايِق في زراعهم، نوبِية وأغلب أسماء القُرى والحَلال نوبِية.. ولِلتُرك جينات بَيِنه.. ونوري مِن أعمال مِرَوي وعسوم ضاحِيةٌ فيها، وكلهم جميعًا أرضٌ نوبِية..

ماشُفتا الجلا السوّاها؟! كانت تكفي

هسِع عليك الله يا عادِل عسوم بتقدر تقول لِسعودي إنك عربي بِدون ما تِتْلفت!

عزام فرح ياحبيب
(أدّعاء) العروبة لم يفت قطاره -حتى-أهلنا النوبة في الشمال ياعزيزي...
أقرأ هنا:
http://waseem.sudanforums.net/t366-topic
أما مابين ظفرين (كما يقول مذيعي قناة الجزيرة)...
فال(نطق) بها لا يعني الانتساب لها ياعزام
فكم من ناطقين (بها) دون أنتساب للقببيلة...
تماما كحالي ك(رتانا بنجي)...
اذ أني (أرطن) رطانة السكوت والمحس بطلاقة
وأكتب في منتدى موركة
واستمتع جدا لوردي عندما يغني:
أسّري نرجا داق الدو
بروين تيرا داق الدو
تاففينا أونتي أوني
أما ان عرجت على حسين الالا في سقدن سمّي أو ليمون أو أمبو التون أجو قوسو ألاهي قادرا كون تنّا أو بنيّا
أو دهب خليل من رائعته:
أوّو حوش تورا جوا
...
وقد كتبت من قبل وقلت:
أبداع الشايقية ابداع مكاني لا جيني...
والدلالة على ذلك وجود العديد من المبدعين الذين ساهموا في الرفد من القبائل الأخرى مثل النعام آدم وجعفر السقيد المنتميان لقبيلة الهواوير والعديد من الشعراء والمغنين المنتمين لقبيلة البديرية ومن قبل ذلك ولاد حاج الماحي المنتمين لقبيلة الجعليين!
مودتي ياحبيب

[imported_azzam_farah]

(رتانا بنجي)...

وردي عندما يغني:
أسّري نرجا داق الدو
بروين تيرا داق الدو
تاففينا أونتي أوني

حسين الالا في سقدن سمّي أو ليمون أو أمبو التون أجو قوسو ألاهي قادرا كون تنّا أو بنيّا

دهب خليل:
أوّو حوش تورا جوا

إبِييوو إبييوو.. كُسْلي كا كارلا عسومتود.. ياخ إمي نايْني!





(ثُم وقف بـ"هاء السكت" وهو ينظُر إلى السماء كأنهُ يقول:"دي هركة تعملحا برضو")

[imported_عادل عسوم]

اقتباس:
المشاركة الأصلية كتبت بواسطة azzam_farah

إبِييوو إبييوو.. كُسْلي كا كارلا عسومتود.. ياخ إمي نايْني!

(ثُم وقف بـ"هاء السكت" وهو ينظُر إلى السماء كأنهُ يقول:"دي هركة تعملحا برضو")

تعرف ياعزام
كتبت مرة في منتدى من منتديات أهلنا الشايقية مامعناه:
طالما كان المكان هو المذكي للابداع الذي يتميز به رفد الشايقية الشعري والفني...
فان (مناطق) أهلنا النوبة في الشمال أدعى -بسحر طبيعتها- لأن تذكي في الناس ذات الجذوة من الابداع وأكثر...
ومن يقرأ اشعار أهلنا هناك يتلمس ذلك جليا...
ولولا (العُجمى) وحاجز اللغة لبذّ أهلنا هناك اهلنا الشايقية بين جنبات هذا السودان العريض شعرا وغناء!
كدي بالله شوف البيت دا:
أمبو التون أجو قوسو الاهي قادرا كون تنّا أو بنيّا
انه الايمان الفطري بالله عندما ينداح على جمال الطبيعة والمكان!!
...
الشايقية قد اخذوا -كما تفضلت-كل مسميات الزراعة منكم...
وكذلك اخذوا آلة الطمبور...
بل هناك اقوال تفيد بأن ايقاع الدليب نوبي!
...
فما كان من البعض الاّ أن أتهموني بأني (آبق)

اها كدا كيف؟

[imported_عادل عسوم]

هذه الجلا...
قيل لنا بأنهم قد اسموها بذلك يوم (جلاء) الاستعمار *عن بلادنا...
أيُّ أستعمار ذاك؟!
ولماذا اصطلحنا على تسميته بالاستعمار ونحن (ندّعي) بغضنا وشنآننا له؟!
لقد قال المولى جل في علاه:
(وَإِلَى ثَمُودَ أَخَاهُمْ صَالِحًا قَالَ يَا قَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ هُوَ أَنشَأَكُمْ مِنَ الأَرْضِ وَاسْتَعْمَرَكُمْ فِيهَا فَاسْتَغْفِرُوهُ ثُمَّ تُوبُوا إِلَيْهِ إِنَّ رَبِّي قَرِيبٌ مُجِيبٌ) هود61
فقد وردت لفظة الاستعمار بمعنى عمران الارض!
فهل جاؤنا ل(عمران) أرضنا؟!
!!!
و...
وبقي أهلنا مستكينين لهذه الجلا وهي تجوس خلال الديار (فرّاقة حبايب)...
استكانة أوشكت بأن تحني منهم الظهر ردفا لانحناءة النيل على ابواب ديارهم...
اذ حالهم حال يغني عن السؤال...
فهم في كل عام يرذلون!
برغم أن (الدايرة لي سيدي مسجلة)...
والفائز يفوز بال(تزكية)...
وهو من قبل ذلك قد أتانا بال(اشارة)...
ومافتئ الناس -حينها-يهتفون:
عاش ابوهاشم
عاش ابوهاشم
عاش ابوهاشم
...
..
.

[imported_عادل عسوم]

و...
وكان لسان حالنا ...حمّيد
وكان لل(الجابرية) شرف تمثيلنا شخوصا وأمكنة على امتداد منحنى نيلنا العظيم...

[frame="7 80"]الجابرية
محمد الحسن حسن سالم (حميد )
كان ضحوية .
وكنّا نسنّد في المحروت
فجأة يدوي مكبر صوت
قال الريس مار بي فوقنا
من شغلتنا قلعنا عروقنا
إن شغلتنا بلا ماروقنا
فكّينالو حبل واسوقنا
وإنماسكنا يطمّن روقنا
قمنا جميع الحلة مرقنا
البيشوفنا يقول وا شوقنا
كان ضحوية
وكانت عين شمش الله قوية
وكان الريس في عربية
واقف طولو تحت شمشية
هللنالو وهلجنالو ..
ولوحنالن بالطورية
فرّ عبايتو وهزّ عصايتو
وهزّو بنادقن الضابطية
صفقنالن صفقة قوية
زغردنالن ..
وهّدن عندنا خمسة دقائق
قدمنالو كتاب الله
درقة وسيف .. تبروقة هدية
قفة تمودة .. وفاس دهبية
وكنا قبل بيّتنا النية
وبين بنتين علّينا اليافطة
اليافطة ام زيق الدمورية
وانعبينا هتافاً واحد :
( الجابرية تحي الثورة
دايرين بوسطة ومدرسة وسطى
والشفخانة وسوق منضبطة )
روح باسم
قام خاطبنا
بنهج الثورة الصارم وحازم
أمّن لازم من شفخانة والتعمير بالعون الذاتي
أمّن لازم من شفخانة ومدرسة وسطى
والتعمير بالعون الذاتي
إلا البوسطة دي ينظر فيها
اما السوق .. السوق منضبطة
وبالتأكيد .. للتجار الأسعار واضحة
للمستهلك باينة وواضحة
وإن جاملتوهن تبقى الغلطة
إنكيفنا .. رفعنا إيدينا وهزيناهن بالتأييد :
( لا تفريط في قوت الشعب
سحقاً سحقاً للرجعية
الجابرية ضراع الثورة
بالإنتاج حا نبني بلدنا )
وكانوا في جيهة ونحنا في جيهة
هُن إنهببو بالكابات ..
وما همانا الصيف وعرقنا
فات الريس وانفرتقنا
انفرقنا على الجابرية
كلنا ننضم وما صدقنا
بالجابرية تجيها البوسطة
الشفخانة ومدرسة وسطى
قلنا يا ريت لو زارنا فطور
وانحزمنا ضبحنا التور
كنا اقلاّ ضمنّا النور
أو ياريت لو زدنا الصفقة وعاش
ويسقط ويوية اليوية
كنا أقلاّ ضمنا الموية
كنا بننضم بي إيدينا
( ده أحسن ريس مرّ علينا )
من الله خلقنا وشُفنا خلقنا .
ده أول ريس ذاتو يجينا
وكونه يجينا يقنّب بيننا ..
يشوف البينا .. كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلي نحضر النشرة
كنا نرجع في كلماتو
إلا في ستة من الجابرية
قالوا تعبكم خارم بارم
يذهب حاكم خلف الحاكم
والجابرية تظل في حالا
حلة حياتها تسر الظالم
صدفة تموِّت وتحيا اطفالا
لا جلكوز لا تقرا رسالة
لا راح يطلع منها عالم
ما بينصفكن إلاّ ضراعكن
عبّو ضراعكم يا رجّالة
وخلو بصركن دغري وسالم
حكم العسكر ما بينشكّر
كلّه درادر .. كلّو مظالم
ما هو قدركن تحيو همالة
مقصودين والقاصد فاهم
وقاطعناهن .. حاربناهن
تمّيناها البينا شتائم
حالَتُن احسن ناس في الحلة
إيدا نزيهة .. عقولا نبيهة
وقلنا يفرزوا وقلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصّر واثقين فيها
وقطعناها معاهم جملة وقاطعناهن
وصاروا في جيهة ونحنا في جيهة
مرّ اليوم .. الشهر .. الحول
والجابرية بلد في حالا
قواسي شيوخا .. مآسي أطفالا
عذابات ناسا .. حلة تعافر ومقطوع راسا
من القُرّاصة ولي قَرّاصا
حلة تعافر ومقطوع راسا
عشرين كيلو من الجابرية
صبية تساسق بي كرّاسا
آ الجابرية عذابك فينا
لاكي القرية ولا كي مدينة
وفد في وفد يقوم ويجينا
عايزة دراسة واجراءات
عون امريكي قرض ألماني وحاحاءات
وحد ما نشوفلنا مسعولين
مسعولين أو خواجات
نجري نلم قدحاتنا عليها
ترطن ترجع زي ما جات
الشفخانة وعايزة دراسة
ومدرسة وسطى وإجراءات
لما المطوحة طالت بينا
إنذكرنا العون الذاتي
إنحزمنا وقلنا برانا
نبني نقوم لي الشفخانة
طوبة في طوبة .. وقومناها
ويوما التمت جات السلطة
عربي وعجمي ومرة رطانة
الشفخانة ده ما هو بُكانا
هاك يا تلتلة هاك يا ورطة
وغصباً عنك يا الجابرية
غصباً عنك يا أحوالا
وحمياتا وموت أطفالا
وحمرة عينكن يا رجالة
قوة إنشكت بيننا النقطة
وفي الجابرية تحوم الشرطة
هووا كلاب الحلة وصنّوا
ومن يوم داك ما شفنا الستة
وفد الحلة السافر جانا
قال إنأكد شاف الخرطة
ونحن بدل نبني الشفخانة
إنسرعنا بنينا النقطة
الشفخانة ده ماهو بُكانا
وكانت غلطة إنقلبت ورطة
إنفاهمتو مع المسعول ؟؟؟
إنفاهمنا مع المسعول
وقال حا يقوِّم للشفخانة ؟؟؟
أو يدفع لنا حق الطين
مع إنو النقطة وكت بُنيانا
قومتوها بلا زنزانة
في تقديرنا كلام معقول
كون يقوِّم لي الشفخانة
حاجة تضحك .. محرقة ... هانة
انتو تقيفو مع المسعول
واللا الكنتو تقيفوا معانا
وقلنا وخفنا نصد الجاي
خفنا نفشل باقي الخطة
فضلت جايي .. هي فضلت خطة
وانفرقنا على الجابرية
وانعلقنا تجينا البوسطة
ومدرسة وسطى
والشفخانة قصاد النقطة
تجينا .. تجينا .. تجينا ... تجينا
وما إنيقنّا ..
ناس إنولدوا وواحدين ماتو
لمّا الريس ودوشتو فاتو
فاتو العسكر .. وجو الأحزاب
ونفس الحلم إنجدد تاني
نفس الوجع الراح تحتاني
حتّلناهو جمعنا رفاتو
نفس اليافطة في نفس الحتة :
( الجابرية تحيي الشعب
دايرين بوسطة ومدرسة وسطى
والشفخانة بديل النقطة )
فينا إنكلم شيخ الحلة
صنقع .. دنقر .. سلم وصلّى
وكانوا كلاب الحلة بهووا
وقال كلمتنا تكون فد واحدي
شان ننقوى ما ننزلا
شان مشهادنا وعدل الحلة
نحن نفوِّز حاج البلة
وزاد هوهيو كلُّوب الحلة
وبعضنا عارض .. ردّ وفاوض
شيخ الحلة القام حمسنا
بلة الحمش الزول ما دلة
أول فاهم وقبلوا ولدنا
وراح يحكملنا بي شرع الله
هو .. هو .. هووا كلابنا
لمّا استغرب شيخ الحلة
وانفرقنا على الجابرية
انفرقنا ويوم الليلة إنجمعنا عموم الحلة
شيخ الحلة قرا القرآن
صنّوا كلاب الحلة وهووا
وبلة إنقدم سمّ وصلّى ..
صنّوا شوية .. وهو هو هووا
وقام إنكلم .. وعند إنكلم كان بينقسم
النسوان الجاي تنهامز
الصبيان الجاي تنغامز
وكان بينبسّم
وكانو كلاب الحلة بهووا
شكّر وشتّم .. هو هو هووا
حلّل وحرّم .. هو هو هووا
هود سابنا .. وفات ودانا الآخرة وجابنا
قاطعناهو وصوتو إنوطّا
اصلاً واطي وتاني إنوطّا
دايرين بوسطة ومدرسة وسطى
والشفخانة بديل النقطة
التموين وزيادة الحصة
كهربا موية وسوق منضبطة
بلة انبرع وقال ببنيهن
هو هو هووا كلابنا
واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا
وبي إذن الله يضوّى الحلة
هتف الشيخ وهتفنا وراهو :
لا تبديل لشرع الله .. هو هو هو
ولا ولاء لغير الله .. طاء طاء طاء
عاش الفارس امل الحلة
بلة الطاهر علي حسب الله
بلة الطاهر علي حسب الله
كبر فينا وقام إندلّى
ولسة كلاب الحلة بهووا
وزاد هوهيون
كبشاً ضاع .. من مرحاتو وفاقع باع
بلة الطاهر على بلاّع
كانت أول مرة نشوفو
يومنا الشفنا اللاندكروزر
اللونا مخطط .. والبنوت الراسا مربط .. التنبوبر
لوري مكوش أقمشة .. سكر .. حتى الفوفو
وعتِّل تؤجر .. وامحى المنكر بي معروفو
بلة الطاهر علي بلاع
اكرمناهو .. اكرمنا ضيوفو
يشبة مَرَتْ الشيخ في وشيو
لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برّانا نغير قولنا
إلا كبار الحلة بقولوا
بلة ده هولنا
بلة ده أصلاً من ها الحلة
إلا إنربّى وقرا في الخارج
ورافق جدو الفتح التركي
وسيرتو انقطعت في المهدية
ومرة سمعنا استوطن برة
وقام إنزوج من مصرية
جابت علي ..
علي جاب الطاهر
حتى الطاهر خلّف بلة
جدو اشيطن اخير ما لانا
وبلة انسركن جاء وبرانا
أقرب واحد لي حاج بلة
أقرب واحد شيخ الحلة
بلة الطاهر علي حسب الله
أول مرة يصلي معانا
قدمناهو وقام أمانا
صوتو مرخرخ لمن يقرا
يقرا ويقطع زي البطرا
لامن يركع جسمو متختخ
عند السجدة سجودو ممخمخ
شيخ الحلة يقول عن امرو
زول غرقان في الدين من عمرو
ستة سنين قابض في جمرو
ما فكاهو طريق الله ..
صوتو وِدِرْ من كترة ذكرو
وجسمو التختخو شدة صبرو
قلنا حقيقة .. الزول بي عذرو
وفتنا قناعة .. ومانا قناعة
إلا الستة الصارو جماعة
قالوا ده زول ترباتو مياعة
ما بيشبهنا ورفعو وضاعة
زول زول دنيا ودنيا صياعة
قصة دينة ودقنو بضاعة
واحنا اصواتنا .. يا إما مضاعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ومدرسة وسطى
والشفخانة وموية نور
كونو يجينا ده ما منظور
وزيادة الحصة
الزول زول سوق
زول من جدو يلف ويدور
ويا الجابرية ده مطلب عادل
كونو تطيبي تكاتبي وتقري
ضوك يشلع .. دشك يرشع
واحنا دفعنا ضرائب بدري
ولسه بندفع .. لسع .. لسع
بس يا جماعة ..
إن قضينا حياتنا تباعة
وصنّيت رادي
وقول في الفاضي
خوفنا نقوم ما نلقى أراضي
ونحنا أساسنا وراسنا زراعة
والجابرية إن دايرة شفاعة
ما بيشفع لها إلا ضراعا
عبو ضراعكن يا رجالة
وخلو بصركم دغري وسالم
عبو ضراعكن يا رجالة
شيخ الحلة أضلّ وضلّ
واسألوا بُرّة وحاجة السُّرة
عن التيبان وحكاية الصُّرة
اللمّ البلة وشيخ الحلة مع شرع الله
والناس ديل العارضين برة
جرّبناهن كمين مرة
تاني نجرب شان ننضرّ
ويا الجابرية معاكي سلامة
كان الفوقك ما فات مرة
كان كلماتن ناشف ريقا
وكانت مرة
إلا حقيقة .. غلبنا نطيقا
وين في الصرمة وقل القدرة
سكتناهن بس ما صنّوا
وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا
وخليناهن برة الدارة
دايرين بوسطة ومدرسة وسطى
موية وكهربا والشفخانة
زيادة الحصة وسوق منضبطة
وصدوا كلاب الحلة يهووا
ينضم بلة يهووا معاهو
نهتف نحنا يزيد هوهيوا
مافي شهر جاتنا الخرسانة
جان السيخ .. الطوب .. الرملة
جا الأسمنتى شكارة شكارة
عديناهن ألف شكارة
كرمنالن خيراً جانا
وكل كلاب الحلة الهوّن
طفشنالن بالجبخانة
وفي صنانة تدودي الزانة
انغالطنا كتير في بعضنا
أولى المدرسة ؟ واللا البوسطة
أولى المدرسة والشفخانة
الشفخانة محل النقطة
ونان النقطة .. نحنا أهالي
وودنا صافي
بينا معزة جرائم مافي
وما بنحتاج لي شرطة ونقطة
تحصل علة .. في شيخ الحلة
وناس السلطة
نحنا الإيدنا بنت لي النقطة
والجيرنا زبالة اطيانا
ناس السلطة إن دارو النقطة
شي بُكان أرض الشفخانة
وما طالبانا خلاف زنزانة
مدرسة بوسطة
ستين طلبة وعشرين اوسطى
شغالين ما ملو سخانة
مدرسة بوسطة .. وقلنا غُنانا
يا الجابرية .. الله أدانا
حاج البلة المبروك جانا
جاب المدرسة .. جاب البوسطة
وبكرة يرجع للشفخانة
نصحى نصابح موية الدُّش
نمسى نلاقي الضو عمانا
مدرسة بوسطة .. مدرسة بوسطة
وتاوق .. تاوق .. تاوق ..تاوق .. تخ
وفجأة تبين في السطح الخرطة
وكب تنتصب الميضنة أخ
أخ من حظك يا الجابرية
سابع جامع بالجابرية
وصدوا كلاب الحلة يهووا
أخ يا الناس الحالُن قطّ
هو .. هو .. هو .. هووووا
في البلدان الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرق في الجابرية
بق في ارحامنا في شافع نافع
ترفعوا امو في حيطة الجامع
يكتب يسقط دجل السلطة
يسقط بلة وشيخنا التابع
وكشفناك وكشفنا الخطة
تحيا كلابك يا الجابرية
يحيا ضراع الزيتُن طالع
غُلب يصارع مر الواقع
يحيا ترابك والطورية
الجابرية تحيي الشارع
دايرين كهرباء دايرين موية
دايرين سلطة وسوف منضبطة
دايرين هسة زيادة الحصة
الشفخانة بديل النقطة
دايرين بوسطة ومدرسة وسطى[/frame]

[imported_عادل عسوم]

وبقي الحال بذات الحال
وبقي النيل على ذات انحنائه...
قال جارنا ودعوض الكريم -رحمه الله-مرة:
-البحر دا من كترة ريدتو لينا شوفو كيفن دنقر فيشان يلمنا عليهو!
فأجابه سيداحمد ودباب الله:
نان آآودعوض الكريم ...باقيلك البحر دا ماعصر علينا؟!

و...
وانبرى حمّيد يحلم بالخزان...
وحلمنا معه...
[frame="7 80"]

بين الموجه والخزان حلم أنسان
هردت لهاتى بالغنوات
وقت يبرد حشاك يمى
من التعب البلا صالح
تفيقى تروقى تنجمى
تسوى مكانسك
المطرة تضوى البيت وتنحمى
تمرقى صبوحه للجيران
قدح فوق ايد وفى ايد المى
يلاقوك شفع الكتاب نضاف وظراف
ويغنولك غناوى الساب
وفى بيوضه مافى سراب
جبال كجبى وفيافى الكاب
تميد بالخضرة منقسمى
ولا آبار ولا هو سحاب
وتنهجمى من الدهشه تحاحيهن
غناكن نى غناكن نى
غنا الوهمى
ويهتفوا زى كلاب الحى
على الاغراب حوافى الصى
وبيوضه البراسيم فيها مفروضه
شوف عينى على الابواب
قماريها وحواريها وطواريها
بقت روضه بقت تشرب من الحامداب
تشربى عافى من ايدى
تدوى أيويا بى حشمه تسوى السى
وتبتسمى
تشوفى رهاب بعد نجمى
وأشوفو قريب قرب نضمى
أشوف العالم التحتانى
هيلا هوب وقف ناهض
ودك عمايد الفوقانى
جوة الجب رمى العارض
وفى السابو الدمارافراق عريق الحب
نبض قابض متل قبض الحروف فى اسمى
غناوينا القبيل رقراق
علينا تصب برد قارض
ألك طيناتا من دمى
وأرمله
من عصب عشاق
أنط تلب
ةأجيك عارض وأجر نمى
أدودى لهاتى بالغنوات
عقب يبرد حشاك ياامى
تسوى السى وتبتسمى
تسمى الله وتعتصمىبحبل القدرة
تتفرق ظلمه فيها نتحرق
صرمه قالوا ليك قسمى
أدودى لهاتى بالغنوات
عقب يبرد حشاك ياامى
وتقلبى اللكمه بى الكلمى
ضراعك يرمى مايدمى
تقيفى بعيد عن الشمات
تكونى أقرب لى من أسمى
واضمك بارتياح ياامى
أحبك صاح وصاح حلمى
ولاكى سعيه للضباح
ولاشمش الصباح حزمى
ولا كتف السلاح سواح
ةلا فى الخريف تبقى
ولا الفيضان يبضع بك
ولافى القيفه تنهدمى
ولا ان جات حارة تنهزمى
ولايغشى الغلب قلبك
فياحزن البلد عووووك كر
وياسعد
ضر
ضر
مع النسمى
وألو قيمه العمل عمى
وأفتحى ظلمتك للضى
سنى على النضال ايدى
سوكى بالهتاف فمى
شوارعك لى دويها
اذا ما آخر العلاج الكى
مراويدك حمر صمى
ياامى بليلتى ولا ضبايح طى
قليلتى ولاكتر سمى
وطنى ولا ملى بطنى
سكاتى ولا الكلام النى
سلام ياامى
سلام ياامى
سلام لاهكمى ولادكمى

[/frame]

[imported_عادل عسوم]

وما فتئنا نحلم...
وهل في اليدين-حينها- شيئ سوى الحلم؟!
...
..
.
تناديني (حبوبة)...
تعال آآ عشاي ودّي الجبنة دي لي جدّك في اللّقدابة بي غادي...
فأحمل صينية القهوة الى جدّي...
أدخل من الباب ذي الآرش العريض...
(آرش) يلج منه ضوء الشمس و...الناس على مدار اليوم...
ويقع بصري على صورة (سيدي) ...
ياااالتك الصورة...
لم أزل أتذكر تفاصيلها وكأنها أمامي!
الشال الملفوف حول عنق السيد علي الميرغني بعناية...
والنظرة!...
يااالها من نظرة!!
هي نظرة ان خلتها باسمة فهي كذلك...
وان خلتها غير ذلك فهي كذلك...
ترفع بصرك الى الصورة فتخالها تراقبك!...
فلا تلبث الاّ أن تحسُّ بال(رهبة) تتغشّاك بين يدي تلك الصورة!
لا أدري...لماذا تذكرت حال امرأة العزيز وهي تراود يوسف!...
يوم أن وضعت خرقة على عيني (صورة) لتمثال بجوار فراشها...
فما كان من يوسف عليه السلام الاّ أن قال لنفسه:
-ذاك لعمري برهانٌ بانّ ربي أولى بأن أتّقيه...
ثم مالبثتُ أن قرأتُ عن علماء قوم نوح السبعة الذين رحلوا الى ربهم...
فنصب الناس لهم (صورا) في الساحات للذكرى...
فما كان من الشيطان الاّ أن أحال تلك ال(ذكرى) تقديسا!
فكان ذلك هو المدخل الى عبادة الاصنام في الشام...
وجاء ابوسفيان من مكة زائرا ...
ليأخذ معه -منها- صنما يجد له مكانا بجوار الكعبة!
فسألتُ جدي ودعسوم:
-انت ياجدي الصورة دي جبتها من وين؟!
فما كان منه الاّ أن أنتهرني قائلا:
-ياولد دي صورة سيدي...
(اجابة تنم عن غضب و...استمساك)
...
..
.
(يتبع)

[imported_عادل عسوم]

...
كنت أودُّ جعل صورة (سيدي) مدخلا الى حوار...
كنت اود سؤاله عن العديد مما علق في ذاكرتي -وأن الطالب في المرحلة المتوسطة حينها-من عقائد أهلنا الختمية...
وددت سؤاله في البدء عن بعض تفاسير لآيات قرآنية في كتاب التفسير الاساس الذي الّفه السيد محمد عثمان الميرغني الاب...

ففي كتابه الذي سماه (تاج التفاسير) ص137 عند قوله تعالى :
أَوَ مَن كَانَ مَيْتًا فَأَحْيَيْنَاهُ وَجَعَلْنَا لَهُ نُورًا يَمْشِي بِهِ فِي النَّاسِ الأنعام :122يقول:
"ولما وصلت في التفسير إلى هذا الموضع رأيت في تلك الليلة المصطفى صلى الله عليه وسلم في محفل من الرسل الكرام ويقول لي الأنبياء من نوري، وطارت نقطة نور منه فتخلق منها صورة سيدنا إسماعيل الذبيح فقال لي هكذا خلقوا من نوري والأولياء من نور الختم ثم رأيته تلك الليلة عن يمينه جبريل وعن يده اليسرى ميكائيل وأمامه الصديق وخلفه الإمام علي، فقال لي صلى الله عليه وسلم بعد أن دنوت منه وقبلت جبهته الكريمة: ما قام بأمر الله والمؤمنين أحد بعدي مثلك شكر الله سعيك فقلت له يا رسول الله، فقال تعبت في المؤمنين ونصحتهم ما تعب فيهم أحد بعدي مثلك فقلت له أأرضاك ذلك؟ قال أرضاني وأرضى الله من فوق سبع سماواته وعرشه وحجبه. ثم نادى رضوان فقال يا رضوان: عمر جناناً ومساكن لابني محمد عثمان وأبنائه وصحبه وأتباعه، وأتباع أتباعه إلى يوم القيامة: ثم قال يا مالك فحضر فقال عمر: في النار مواضع لأعداء محمد عثمان إلى يوم القيامة. وأطال الكلام في الواقعة ونسأل الله التوفيق لشكر النعم بحق المصطفى صاحب الأسرار الجامعة" أ.هـ منه بلفظه..

[imported_عادل عسوم]

...
كنتُ اسائل نفسي...
هل خلق الله الأنبياء من نور الحبيب المصطفى صلوات الله وسلامه عليه كما يقول سيدي؟!
وهل خُلق الأولياء من نور الختم؟!
ثم عن قوله :

ثم نادى رضوان فقال يا رضوان عمر جناناً ومساكن لابني محمد عثمان وأبنائه وصحبه وأتباعه وأتباع أتباعه إلى يوم القيامة.

!!
ثم عن قوله:

ثم قال يا مالك فحضر فقال عمر: في النار مواضع لأعداء محمد عثمان إلى يوم القيامة.

!!

[imported_عادل عسوم]

...
وكنت أسائل نفسي ايضا عن حقيقة (ختم) الولاية...
فقد اسمى السيد محمد عثمان الميرغني نفسه بالختم أو خاتم الأولياء...
واسمى طريقته بالطريقة الختمية...
فقد قال السيد محمد عثمان الميرغني في الصفحة الرابعة من تاج التفاسير:

من رآني ومن رأى من رآني إلى خمسة لم تمسه النار ولا حرج على ذلك فإن الله يختص برحمته من يشاء

وختم الولاية هذا أمر سبقه اليه ابن عربي المتوفى في عام638هجرية بينما السيد محمد عثمان الميرغني قد توفي في عام 1268 هجرية!
يقول ابن عربي مدعياً لنفسه ختم الولاية:

"وأما ختم الولاية المحمدية فهي لرجل من العرب. من أكرمها أصلاً ويداً. وهو في زماننا اليوم موجود. عرفت به سنة خمس وتسعين وخمسمائة ورأيت العلامة التي له قد أخفاها الحق فيه من عباده، وكشفها لي بمدينة فاس، حتى رأيت خاتم الولاية منه –وهو خاتم النبوة المطلقة- لا يعلمها كثير من الناس وقد ابتلاه الله بأهل الإنكار عليه فيما يتحقق به من الحق في سره من العلم به. وكما أن الله ختم بمحمد صلى الله عليه وسلم نبوة الشرائع كذلك ختم الله بالختم المحمدي الولاية التي تحصل من الورث المحمدي لا التي تحصل من سائر الأنبياء فإن من الأولياء من إبراهيم وموسى وعيسى، فهؤلاء يوحدون بعد الختم المحمدي، وبعده فلا يوجد ولي على قلب محمد صلى الله عليه وسلم، هذا معنى خاتم الولاية المحمدية" (الفتوحات ج2 ص49).

ولم يقف أمر ادّعاء ختم الولاية عليهما...
فقد ادّعاها ايضا أحمد التيجاني الفاسي المتوفى سنة 1230هـ :

وهذا التيجاني جاء ليكذب جميع الذين ادعوا الختمية قبله على ألف سنة تقريباً. فإذا كان أول من ادعاها هو محمد بن علي بن الحسن الترمذي المسمى بالحكيم وكان ذلك في أواخر القرن الثالث الهجري فقد جاء التيجاني في القرن الثالث عشر ليكذب جميع الذين ادعوا الختمية قبله وليزعم لنفسه أن الله قد ختم الأولياء به حقاً وصدقاً، وأن الرسول صلى الله عليه وسلم قد بشره بذلك.

...
..
.

[imported_عادل عسوم]

...
مالبث جدّي الاّ أن أنتهرني عندما رأى شرود ذهني وقال:
-ياولدي ان بقا ماعندك شغلة تسويها قوم شيل (قفة السكّر) دي وأمش علي حوش عمك رشاد داك واملاها من الكُريق المفروش تالا الكيم بي غادي واندلّ البركل تحت وودها لي حبوبتك الزهرة بت اب ريش باقي حبوبتك قع تريد الكريق...
فنهضتُ من مكاني وأخذتُ (قفة السكّر) وغادرته متوجها صوب حوش عمي رشاد...
واستدرك جدي قائلا:
-ياوليد حسن هوي
-ايوة ياجدي
-ابق عشرة لاتلخبت الكُريق بالكُرشة فيشان مفروشات جمَ جم
-سمح آجدي
والحق يقال بأن منتهى قدرتي على التفريق بين انوع التمر هي لنوعين فقط هما البركاوي والقوندولي ...اذ البركاوي أطول وانحف بينما القوندولي اكثر امتلاء وأقصر طولا...
فما كان مني الاّ أن اتجهت صوب زوجة عمي وسالتها بصوت خفيض عن مكان الكُريق فأرتني أياه باسمة...
ملأتُ قفة السكر واتجهتُ راجلا الى البركل تحت...
والمشوار الى البركل تحت هو (وووكابُل دستانس) كما اعتاد القول الأستاذ عثمان ودابجارة دوما...
وصلتُ الى حوش حبوبتي الزهرة بن أب ريش فوجدت (عنقريبها) يتوسط حوشهم الكبير الذي يعجُّ بشتى أنواع اشجار النخيل...
وذاك حال البيوت في البركل تحت فهي تجاور النيل وقد اعتاد الناس زراعة النخيل في حيشانهم تلك الفسيحة...
الزهرة بت اب ريش رحمها الله أمرأة قد تعدت المائة من عمرها حينها ...وقد حباها الله بذاكرة قوية وبصر وبصيرة الى أن لاقت ربها راضية مرضية...
ما ان رأتني قادما حتى ابتسمت لي وقد بدا شعرها الابيض الذي تشوبه بعض بقايا الحناء على أطرافه...
وذاك ما دعا أحد رصفائي من ابناء الجيران بأن يقول لي:
-آآجنا هوي ...أكنك عاين لي شعر حبوبتك دا في زمّتك ما قع يشبه سبيب قندول العيشريف؟
فنالته نتاج حديثه ذاك نهرة من أمه و(قشطات) بي شخاليب عرجونة صفراء على رجليه...
سلّمتُ على جدتي واتجهت صوب ابنتها (الخالة جارة) وهي تتوسط عددا من النسوة استعدادا ل(لقّيط التمُر)...
ولاح لي القفاز عثمان العربي بشنبه الكث الطويل والذي قال عنه ود ازرق يوما:
-عثمان العربي دا عليك أمان الله عندو شنبا تشوفو وان بقيت واقف بي قفا
قال عثمان العربي وهو يستعد للصعود الى أول (تمرة) موجها حديثه الى جدتي الزهرة:
-ياحاجّي هيي أخير تزحّي بي عنقريبك دا غادي فيشان دار أرمي سبيطة القفاز بي هني...
فما كان مني ومن معي من الرفقاء الاّ أن حملنا جدتي بعنقريبها الى طرف الحوش...
فشرعت تسألني عن جدي وبقية أهل البركل فوق وانا أجيبها بسرور...
ثم بدأت تتحدث لي عن ماضي ايامها كعادة كل أهلنا من كبار السن...
وذكرت لي من بين طيات حديثها شيئا عن (بوابير البحر) فسالتها:
-انتي ياحبوبتي تعرفي شي عن بوابير البحر ديل؟
-أيّ ياعشاي أتذكرن زي البارح دا وكت جن بي هني في الساموري القدامنا دا
واستطردت:
كنا ساعتا بُطان...
سمعنا صوت الصفافير والدنيي القايمة بي لاتحت في البحر قمت مرقت ومعاي حبوبتك بتول وآمني بت باشاب وفاطني بت البُلُك وبناتا تانات من الدبوناب وساقة الخلوة...
مشينا علي البحر وطلعنانا فوق دبدب جم حوش ناس ودالمقبول ببلا نشوف بوابير البحر ديل جايات متباريات ومشكوكات شك الكببريت بالخواجات والبنادق ديل يسوّن التح تراح فوق روسينن وصوت مكرفون من البابور القداميّي وواحد ينضم منو بالمصري...
أها الدنيي دي بس بلا يوم الغيامي والرجال ديل واقفين فوق القيف يعاينو بلا جا ود نعملو من تالا كريمي ونهرنا وقال:
-يابنات أمشن علي بيوتكن الرصاص دا لا يجي في واحدي فيكن وتلحق الصح...
بلا جرينا ورجعنا البيوت وساعتا قالوا ديل الكفار جو يحتلّو البلد
(يتبع)

[imported_عادل عسوم]

التحية لابن الدبة العزيز عبداللطيف شوتال وقد كتب:

الاخ عسوم .. تحية طيبة وكل عام وانت بخير..
فى أعتقادى أن ما اصاب البنية التحتية لخطوط النقل والمواصلات وكل مواعين النقل على اختلافها برية وبحرية لم يكن ناتج عن اسباب اقتصادية أو سياسية ..
فسكك حديد السودان لم تتهالك وتتهاوى الابسبب اللعنات والدعوات التى لاحقت(قطار الاحد )
بأن الله يقفل بيتو ويجعله حطاما خردة ...
قولو آمين بيتو ينسد .... ونلقا فى الكاسنجر خُرد ...
ولم تبرك البواخر النيلية (كالقرنتى) فى دالات النقل النهرى بكريمة الا بسبب تلك الدعوات ..

تعيق فى الناس ... اله الناس يعيقا
اتمنالا فى دالة .............غريقة
تحتل فيها ........ماتفضل شقيقة
أخيييرا.....!!!!
أيضا اعتقد لم ينحنى النيل عند هذه المنطقة بسبب تضاريس الارض او عوامل طبيعية ولكن ايضا بسبب دعاء شعراء منطقتنا (المظلومين )على البواخر النيلية بأن لا يسهل لها طريق فأستجاب الله لدعواهم فتعوّج أمامها المسار اضافة الى سيرها عكس التيار....
كنا طلبة ..نقف على رصيف النيل بمدينة الدبة كما كان يقف الراحل عبدالله محمد خير .. نعيش و نشهد مواقف وداع الباخرة كل ثلاثاء(يزازى نقل سميحات الخليقة ) وهى ترسل عادمها من مبخرتها( ذات اللونين الاسود والازرق ) وموجها الذى يلطم خد الرصيف ونحن نرقبها حتى تختفى عن انظارنا وهى تغادر باتجاه كريمة .....
تنويه :-
قميرات نوما تسكنن ... ام دريقة
وتلد فى عنابرا ....عشان غريقة
علق الشاعرو الفنان الراحل عوض عبدون على هذين البيتين فقال / ام دريقة تبيض ولاتلد وان باضت فانها تبيض فى اليابسة على رمل ( الساب ).. الشاطىء ....

[imported_عادل عسوم]

زواجي كان في موطن أهلي (البركل)...
وقد عزمنا بأن يكون شهر العسل في مصر...
ويومها لم يكن طريق شريان الشمال قد شُقّ وعُبِّدَ بعد...
ولم يكن مطار مروي يعمل بعد...
ذهب أخي الى سوق كريمة ليحجز لنا تذكرتين على البص المغادر (تلوت الليل) الى الخرطوم حيث كانت النية بأن نقضي فيها أياما ثم نغادر الى القاهرة...
لكنه عاد ليقول:
-قالوا العربات وحلانات في قبل التمتام ليهن اسبوع!
فالسيول قد فعلت فعلها في الطريق-غير الممهد أصلا-الى العاصمة...
وظللنا في البركل ننتظر فرجا كي نسافر...
كنت أعدّ الايام بحسرة...اذ كنت أخصمها من اجازتي السنوية وأنا الطالب في جامعة أم القرى بمكة المكرمة...
وبقي الأهل من حوالي مواسين...
(فقد كان مكتوبا لنا أن نسافر على متن (الجلا))!
يتبع...