مهندين ونورين - هديتي لكم اتسلوا بيها في رمضان
مهندين: عوووك احم اناس البيت
نورين : اتفضل حباب الضيف
اجنون جيبوا ليهو الابريق الكبير بتاع الحديد والمصلاية ووروهو المستراح .
كتر خيركم اجماعة
كيف المطر عند في ( اقعد الترك)
والله السنة دي بهمنا شبعنا لامن التيوس عافن العشار والغنم غرزن بدري بقينا كل ما زول نازل البندر نرسل معاهو يجيب لينا لبن (كاني ماني) علا يانورين اخوي صح اقالوا اللبن دا محلوب من شطور الخواجيات ؟؟
والله الجاي من برة ده اكان محلوب ولا شيتا تاني اكاكن دخل البلد ياها العوجة.
احم يدخل الصبية ( بقدح كبير) مكوناته عصيدة قطرها ربع متر فيها تقلية حمرها تتوسطها جزيرة صغيرة من النعيمية( ملاح الروب) يحدها ملاح الشرموط بخط عرض 15 سمن ...
ادني جاي يامهندين اخوي حمارتك برة خليتا مربوطة لكن هسي الخري اخوي ساقها يعمل ليها سيرفس سريع.
كتر خيرك انورين لكن هي ماشة ليها بس 19 كيلو وعليها ضمان .
برضو النعمل معاك الواجب وانتا ماقصرتا معاي تذكر حمارتي الغيرتا ليها سير كتينة بلا ماتشاورني علا ده الواجب وانتا اخوي معصور علي .
بلا اها بسم الله .
جم جم جم جم جم جم جم جم
تسمع صوت نور وهي تشقق الحطب في الناحية المجاورة شق شق شق شق
الدخري الدخري
بتنحنح مهندين
نورين اخوي دحين نور خلت المدرسة ولا لسه
والله طلعناها من الثانوي العالي ا زول البت بقت مرت عرس تقعد تباري في الانجليزي والرياضيات والتفاضل والتكامل بعددبن بنفعها هي ولا بنفعوها جننونا ولا ابوي عياله
هيع انورين براك بتعرف الاصول
تواصل نور ( هب النار)
هيب هيب هيب هيب
اها اولاد المسانيح ديل جيب تلحيقة شرموط
يدخل صبي يجر وراءه (جردلا من الملاح)
يسكبه مثل شلالات نياجارا
اها ولد كب الموية
كب كب كب
يكرطع مهندين وهو يتحسس شاربه الضخم
يدخل الدخري وهو ممسكا بالحمارة
مهندين ابوي ان شاء الله تكون شديد
كتر خيرك او ولدي
حمارتك سمحة والله دي في الكرين زيها زاتو مافي
اسكت ياولدي والله اشتريتا علي الزيرو ( تعنفط وتعنفط لمن عادما بنقط موية)
علا ياجماعة خلونا في المهم
انا كنت جاية يوم الاربحاء الا الشعفوفة ضربتنا وخليت مهند ولدي (بصرر) في العنز وانا لحقت البقر جفلن الا جبتهن من بكان بعيد
اها ازول ماتشرب الشاي اول ونتكلم
ااعفيني انورين اخوي لانو الانوار الطويلة بتاعت حمارتي ماشغالة والوطة ماشة علي الليل
انا بالدغري كده ولا باللفة داير بتكن نور لولدي مهند
الدخري احم
اسكت او ولد وامشي جيب الشاي
يغادر الدخري
احم شوف ا مهندين اخوي اتا كان للرجالة مكملها وكان للعرض بتسترو وكان للفزع والرجالة مكملها(جت) وشن جاب وجاب ولدك مهند زيك وكان ماتزعل النقول صابقك في كل شي علا بيت الشورةماخرب وحرم انحنا ناس نور ديل الواحدة مابتعاين لفوق الا لراجلها وصرتا لتوبها دي ماتقلعو كلوا كلوا واناحنا اولادنا كتار وخشم بيوت وبطن بيوت فيهن الشغال في السعودية وفيهن القاعد في البندر بخدم خدمتو وعندها ودعمن كدي خات عينو عليها بجي في عقاب السنة دي من بلاد الترك علا ما اتكلم (دوت)
لكن بعقاب السنة دي بنكمل الشورة وبنجيك كلنا براي واحد بعد ما جمارتي دي اربط ليها( شمبر وبساتم) وبتكون مرقت من العمرة واول ( عنفيطة) لبها بتلقاها مقسمة جنب الديوان الكبير والفيها خير بتبقي .
يدخل الدخري بالشاي اتفضل ا عمي مهندين
ينهره نورين عمك شنو حقت الاولاد المايصيين دي قول ليهو ابوي
والله ا مهندين اخوي السنة الفاتت مشيت لي الاتبالية وكت مسكني القيرقان عامنول علا لقيت ليك جنس صبين ماتفرزهم من البننت
وكل واحد ماسك ليه شغل زي الرادي ابحجار ينضم شرق وغرب قالوا سموهوه المنجوه شنو
الدخري مقاطعا الموبايل
امشي ا الملعون اصلك اتا بجيب شغل المساخة ده
علا ا نورين اخوي كان تم المراد قال في الحلة الدون جا ليكم ود الريس عندو المنجوه القلتو دا بياجروا الدقيقة بي قرش خلي بتي نور تكلم ولدي مهند عشان يستريح ويخلي التهود الود النهار كلو مهود ومابقضي غرد كلو كلو قر قر قر امهندين اخوي بتخبرني بي حالتم المطاميس الواحد من يبقي علي العرس ببطل الخدمة ويعاين لي قدام
خير ان شاء الله بعد ماترجع اي مهندين اخوي بسوقا بشسشة وبوديها بحمارتي دي تكلم مهند وبحرسا بي عكازي دي بس كلم مهند مايكتر النضمي علا الفضيحة والسترة متباريات دحين بت الطاهر السنة الفاتت سوت ليها نضم مع جنونا كدي عرفتن من البنادر شالوا بيها حالنا كان مالحقناها بعرسة هسا كان تكون ساعية ليها واحد وتلقاها النهار تلحدث خارم بارم مع الجنون الماعندهم صنعة
في الديوان وخلف الحصيرة الكبيرة تتبسم نور وهي تتسنط للحديث بين مهندين ونروين حتي لكزها الدخري بعود عشر انتي ماعندك صنعة تقضيها ا المطموسة
اها اجماعة فتناكم عافية النمشي قبال الهبايب مايهبن والسفاية تبقي كتيرة
انت ابوي مهندين ماعندك منشات في حمارتك دي ولا شنو
لا والله او ولدي كنت مركب ليهو منشات (ميركن) لكن وقعت.
مهند يتمململ لي المغيرب يصل مهندين اها ابوي كيف حالك
هاك ياولد اعمل للحمارة دي (باركن) وتعال النوريك عمك نورين قال شنو
خير ابوي
سلام عليم ا ام مهند
كيف حالك
اهلا ابو مهند
كيف قيلت
والله خير علا ام نور بتسلم عليكي
الله يسلمها حا اقوم ارسل ليه مسجات واخشي عليها في الجات.
هيق هاق هاق
يابا الليلة حمارتك دي علا كان مفوتة طارة كلتش
عيب او ولد انتا عارف سواقت ابوك
مادايرة رمي صاجات عشان اوحل في القوز الوراني
انا بمشي بترس خفيف
اها المنجوه خير وزين عمك قال وكت يدقوا العيش بدونا خبر ونور كان في قسمتك بجيك علا ماتتشلهت ساكت ودحين ابوها قال في الشهر الليلنا دا بركبا وبجيب لود الطاهر تكلمك بمباول ود الطاهر عشان تستريح ويبرد حشاك اي الدخري علا بعد دا خت بالك في صنعتك البقر انا بقيت مابقدر عليهن دت
كويس يابا العليك عملتو
يفكر مهند طويلا تشاركه نور التفكيريؤرقهما السهر ينام مهند وجهدا تصحو نور علي احلام مهند وتصبحون علي خير.
ورمضان كريم
|
