في حوار تلفزيوني أطلقتُ دعوة للهجرة، عكس بوست عودوا للبلد!!

[imported_الطيب بشير]

http://www.youtube.com/watch?v=MSNhWQcDFoE

.
التحية للحبايب..القراء، الأعضاء و من نقر هنا بمصادفة تقنية..

بالخاطر بوست شهير كتبته قبل أعوام، و انتشر جدآ في النت، عن إمكانية، بل ضرورة، العودة للبلد، و أنا هنا بصدد كتابة العكس، مع سبق الإصرار، و بتفاصيل دقيقة..
نخليكم مع الرابط
و سأعود
مع رجاء إصلاح شأن الرابط بواسطة من يدري
خدمة لمن لا يدري
.

[imported_عبدالعزيز خطاب]

المشاركة الأصلية كتبت بواسطة الطيب بشير

http://www.youtube.com/watch?v=MSNhWQcDFoE

.
التحية للحبايب..القراء، الأعضاء و من نقر هنا بمصادفة تقنية..

بالخاطر بوست شهير كتبته قبل أعوام، و انتشر جدآ في النت، عن إمكانية، بل ضرورة، العودة للبلد، و أنا هنا بصدد كتابة العكس، مع سبق الإصرار، و بتفاصيل دقيقة..
نخليكم مع الرابط
و سأعود
مع رجاء إصلاح شأن الرابط بواسطة من يدري
خدمة لمن لا يدري
.

[COLOR="rgb(139, 0, 0)"][COLOR="rgb(139, 0, 0)"]الطيب البشير الصديق
سلام وأشواق وامنيات

السودان كعب لا يعرف ان يحافظ على الثروات التي يمتلكها.
لو كان هناك امل في تقدم البلد ورفعتها ورقيها لما تركك وأمثالك من من تركوا ر. غد العيش ل(طاعمها) كما تكرمت انت بتسميته. السودان فعلا يحتاج للمدربين في مجالات عصب الحياة من الذين تلقوا العلم والمعرفة في الدول المتقدمة مئات السنين عن السودان.
عودتك المهجر خسارة تحدثت عنها قصيدتك الرقيقة مع تغيير المواقع بينك والحبيبة والسودان.
موفق صديقي أينما حللت فانت فخر لهويتك.
وده المخلينا نقدم رجل ونرجع اثنين.

أمنياتي
عبدالعزيز خطاب[/COLOR][/COLOR]

[imported_عمر صديق]

ورينا كيف يا سعادتك
ما السفر ذاتو داير قروش
انا غايتو صابر فى واطة الله دى من حجة صباح لى حق الملاح
للجنيه البقعد بيهو فى محل نت
وادافر فى الموصلات ومشى كدارى الحمد لله على كل حال

[imported_هاشم الشيخ]

اخونا اللدود الطيب بشير
--


--

--

--
فوووووووووووووووووووووق ..
تخريمة:-
مشتاقين والله ..والله يكفيك شر السودان اليومين ديل

[imported_د اسامه]

سلامات الاخ الطييب بشير
او الاخ د.الطيب (مع انك معترض علي اللقب دا وربنا يسهل ان شاء الله ونشوفك دكتور قريب امين)
انا شاهدت جزء من اللقاء بس للاسف ماقدرت اكملو لظروف
الحاجة التانية تعرف موضوعك دا دخلني المنتدي بعد غيبة طويلة
والله نحن السودانيين ديل اغرب ناس
نمشي السودان نقعد نسب ونلعن
نمرق منو نقعد نتجرس
وهاك يا جرسة
ويا ريت بعد مده او وقت طويل
والله والله في ناس من المطاريبدو يتجرسو شوف عيني ما قالو لي
اها الحل شنو
انا القدامك دا اولادي معاي والحمدلله
بس اطلع بي جاي بعد اجازة ذي الزفت وكلها شكوة ومشاكل وما اطلع منها بي اي حاجة مفيدة
تلقاني تاني حنيت للبلد وبكوس للطريقة الترجعني تاني
بقت علينا قصة الاديب الدبلوماسي الراحل صلاح احمد ابراهيم رحمه الله
شين ودشن
هظارو خشن
سموم وسوافي
وحر سيافي
وكلمة مافي
وتسأل شن حبب فيهو
الحب في ذاتو مبرر كافي
/
/
/
اها لو لقيت علاج للمتلازمة دي او السندروم دا ادينا خبر
ينوبك ثواب
يمكن نتعالج
وليك الف تحية

[الرشيد اسماعيل محمود]

سلام يا جنابو،،،
ولكنّ أخلاق الرجال لا تضيق، بل البلاد هي من تفعل، مغالطة للأثر الشعري القائل:
"لعمرك ما ضاقت بلاد بأهلها ولكنّ أخلاق الرجال تضيق"

الجحيم يا سيدي، صار وطن!، فلنكن أكثر دقة لنعيد صياغة الجملة كالآتي:
الوطن صيّروه جحيماً


تحياتي

[imported_الطيب بشير]

.
يا خطــّـاب...صنقع فوق
شن بتشوف..بشوف الشوق..
و احمد غايب في الركايب ..
لا أتفق معك أن السودان كعب...كدة على إطلاق القول
لكني...
أتفق، بكل حسرة، مع الرأي القائل بأن السودان صار بلد إجازات!!
أشكرك على الثقة و الدعاء
و بإذن الله نلحق باقي الثلج في مينيابوليس
تقديري
.

[imported_الطيب بشير]

.
عاد يا عمر صديق ياخوي سألتني و بقول ليك
قدر القروش البتشتغلها أعمل منها توفير
لملم التوفير و سافر طوالي
أول خيار متاح
هناك دولآ يسميها الشباب (ياي) يعني تدق فيها و تدفعك لغيرها (طيران)
سافر تجد عوضآ عمن تفارقه
وانصب
لأنو الراحة كعبة
Good Luck
.

[imported_الطيب بشير]

.
أخي هاشم الشيخ
كيف حالك و السودان
أنا عندي بوست راح أجيب منو نسخه هنا
بيتكلم عن العودة الطوعية
هسع كفرت بيهو نهائي
عشان كدة عاوز أبريء ذمتي
السودان أصبح لا يطاق
دولة فاشلة تمامآ
وقع ليك؟
قال لدود قال
لدود النــّــتر؟
.

[imported_الطيب بشير]

.
مرحبتين دكتور أسامة
جد حبابك
و بركة في البوست دة الرجعك للكتابة
تعرف أنا عشت في أمريكا تسع سنين بفاصل زيارة وحيدة لأسبوعين بالسودان
دة كان خطأ
جيت السودان 2007 و كان الدولار بجنيهين و شوية
الآن سبعة و شوية!!
دة فرق أول
الفرق التاني في الناس!!
و دة تفاصيلو في الكتابة اللاحقة للردود
أنا الآن عائد عائد
لكن بخطة زيارات كثيرة، إن شاء الله، للسودان
أما متلازمة الشوق فلا حل لها عندي
بس سفر و عطلات
سفر و عطلات
بس
تقديري
.

[imported_الطيب بشير]

.
حبيبنا الرشيد
لك بعض الأشواق التي تعرف
و كل الود المحرّض على البحث
أتفق، تضيق البلاد بأهلها
نعم و أيم الحق تفعل
و قد صــيــّـروا دارنا جحيمآ...هذا حق أيضآ
لكن عوالم التواصل المفتوحة على مصار السايبر اسبيس تصب بمصلحة الإخاء الإنساني المعافى...
سأكتب، يا رشيد، من روشيستر مينيسوتا..و تقوم أنت بنقدي من الدمازين..و يقرأ لنا دكتور دوكة في طوكيو..و سناء مرسي في سيدني..و الجيلي في سيسيليا..فهل بعدُ نحتاج للبقاء في بلادِ تموت من القهر فرسانها؟
بقي أن أكرر طلبي باللقاء
فقط يأتي الطلب (كتابآ موقوتآ) هذه المرة..
.

[imported_الطيب بشير]

.

http://www.sudaneseonline.com/cgi-bin/sdb/2bb.cgi?

.

[imported_عبد المنعم شيخ ادريس]

اقتباس:
المشاركة الأصلية كتبت بواسطة الطيب بشير
.

http://www.sudaneseonline.com/cgi-bin/sdb/2bb.cgi?

.



يشهد الله يالطيب انك زول كويس
قريت بوستك داك عن العودة وكان فيه كتير من الحكمة والواقعية.
والآن بتقول بكل صراحة انك كنت غلطاااان.
والموضوع دا بهمني لأني ذاتي مرتدد بين العودة والاستقرار في امريكا
على اية حال موضوع الاجازات فعلا مهم
وانا هسة اولادي في السودان لمدة ثلاثة اشهر واعتقد انها مهمة رغم الحمى والاسهالات والامراض الاخرى.
فقد حسيت فعلا إنهم بقوا بينتموا للمسعودية قريتي الحبيبة

[imported_الطيب بشير]

.
مرحبتين العزيز منعم شيخ ادريس
أشكرك و الله
أولادك في المسعودية بيكونوا مبسوطين، لا شك، مع الأهل
و الملاريا مقدور عليها، رغم كونها ملمح متخلف جدآ للحياة في 2013!!
لكن أمراض البلد في الإقتصاد و الفساد..لا يمكن علاجها بالفهم القائم الآن و بالطاقم الحاكم الآن!! أنا يا منعم ما قلت إنو كلامي القديم داااااك غلط، لآ لأ، البلد هي الإتغيرت في الخمس سنة و شوية الفاتو، أو قول في السنتين الأعقبو الإنفصال تحديدآ، الدولار قفز من إتنين جنيه و شوية لي سبعة جنيه و شوية، يعني تلاتة أضعاف و شوية برضك، و دة بيخلي الحكومة المفلسة تتفنن في الجبايات لعدم وجود مصادر دخل لمن تعودوا اللهط، و سيأتي تفصيل الهرطقات الرسمية.
القراءات القديمة كانت مبشرة بالعودة، و الآن إختلفت جدآ، فقلت أفضل أعود و أنبه الناس للتغيير لئلا أكون مسؤولآ عن عودة من إستحسن فكرتي الأولى، و حتى لا أضلل الحبايب الغارقين في النوستالجي و خدر حلم العودة اللذيذ.

لك تقديري الأكيد

.

[بابكر مخير]

طيبون
سلااااااام
بوستيك دآ يابا
حرق جوف لي ناس الداخل من الحرقة
وطميمة للفي الخارج في الاحباط من ضبابية الداخل
ولو حكام الإنقاص بيقروا صاح
يقوموا ويشدوا الرحال
يمكن ليهم في الخارج يكون أحسن لكن الأكيدة
لي في الاكيدة لناس الداخل بتكون أحسن..
هي يابا كلها على كلها بقت جايطة
أكان داخل ولا خارج مع الفلس الضارب حتى ناس "الغرب"..
إجازة ما بطالة بث شرطن تكون ليلة ونص نهار، ما تشوف فيها لا تلفزيون ولا تمرق شارع بس مع الاهل في حدود ومن غير مطالب لأن البعض لا يفرق بين مغترب ولاجئ..
يلا سلام من تاني ليك وشوق