اقتباس:
المشاركة الأصلية كتبت بواسطة أمير الأمين
يا حافظ هذا الضابط قتله بعض "دبابى الجهاد" الذى تحولوا من
"الجنوب" بعد مفاصلة القصر الشهيرة خازوقاً فى صحاب الامس..
معاك فى الحرب اكثر خسارناً برضو الحرب لا تقدم زهوراً ولا عنباً
اذا اردت حرباً عليك ان تعى وتتوقع تبعاتها..والحقوق اذا سلمنا بها
فهناك اكثر من وسيلة للوصول اليها..وما مانديلا وغاندى إلا امثلة تتحذى
|
سلام يا أمير
معليش يا أمير أسمح لي أقول ليك وقعت في نفس الفخ
الواقعين فيه كثير من مثقفي الشمال, مثقفين ضمايرهم ما بتسمح ليهم يتحملوا كل الجرائم الواقعة في دارفور و بالمقابل نفس الضماير دي ما بتسعفهم ينتقدوا الحاصل هناك .... عشان كدا بلفوا و بدوروا حول نقاط محددة و تصوير, أن الحرب في دارفور هي حرب بين الشعبي و الوطني.... و وقت الجرائم تقع قدام عيونهم في الخرطوم أو مدني .... بجوا ينتقدوا ابناء عمومتهم في الحكومة و يقولوا ليك في بيوت الاشباح الكان بعذبونا ناس دارفور... هسي يا أمير لو قلت ليك ضربة الفاشر البتككلم عنها دي و الاتكتل فيها الضابط ما قاموا بيها ناس العدل و المساواة و انما حركة التحرير بقيادة عبدالواحد وقتها كما اعلن ذلك رسمياً حتقول شنو؟
و لا عبدالواحد برضو دباب؟!!!!!
و مين قال الحرب بتقدم زهور و عنب
لكن برضو للحرب قوانينها الاخلاقية حتي لو كانت ما مكتوبة
لا تجهز علي الجريح... لا تبيد الحرث, لا تقتل الاسير.... لا تقتل النساء و الأطفال أو المدنين.... ما أتخيل لي في زول ازمنة الحروب بكون نفسه في عنب و زهور بقدر انه نفسه فلذات كبده تنجو....
قلت لي إذا أردت حرباً يجب أن أتحمل تبعاتها يا أمير
في البداية أنا داعية بتاع نضال سلمي.... لكن الانسان الفي مناطق الحروبات لا تسقط عنه هويته كانسان مجرد انه هنالك
و الحرب الدايرني أتحمل تبعاتها دي و لو الكلام زي ما انا فهمته من صياغه خطر جداً و أتمني أني أكون غلطان
تبعات الحرب دي في إغتصاب لنساء لو أنا أتحملتها هل انت بتقدر تتحملها؟
و خت في بالك أن النساء ديل ما شاركن في الحرب و لا بعرفن المتقاتلين منو و في شنو؟
الحرب دي يا أمير من تبعاتها حرق القري , أنا شخصياً ما بتحملها انت قادر؟
تبعات الحرب دي يا أمير أطفال بدون اي عايل و لحد هسي بتبولوا وقت يسمعوا صوت الطيارة , حتقدر تتحمل كل دا كيف؟
تبعات الحرب شيوخ اتكتلوا و شباب رغم انفهم اجبروا علي حمل السلاح بتقدر تتحمل دا؟
و لو داير تشوف تبعات الحرب امشي سوق نيالا, الجنينة, الفاشر, أو زالنجي و لكل سوق مجانينه و مجنوناته
أساكر جونا .... أساكر جونا
وااااااااااااااااااااااااااااااااااااااي
وااااااااااااااااااااااااااااااااااااااااااي
امسكي وليدي دي
دي نموزح لأحد مجنونات الجنينة كتبعات للحرب
زولة بتغني و فجاءة بتصرخ
و أتمني يا أمير تتحمل دا كله
و صدقني لو قدرت حتستاهل وسام التحمل دون منافس
