اقتباس:
المشاركة الأصلية كتبت بواسطة قيقراوي
يا رحاب التداعي خلاني اجوبك ليكم القصة
الشغلة ما نظام ديت ؤ كدا
القصة حفلة عديل اتخيلي ؟
و البت الزوق قالت لي اعزم اصحابي . . . اسوي شنو : ان كان اصحابي من جنس الطيب اب راس دا ( المناقل ) شنكل ( 24 القرشي ) عبد الجليل هجو ( قنب الاسد ) ابوعبيده ( الشكابة شاع الدين ) خالد الرضي و علي حمودي ( الروصيرص ) سامر الراقي ود بركات اليوم داك ما لقيتو . . .
انا ارقى واحد فيهم و الوحيد الكان عندي فتيل ريحة ( شارلي ) و الله اخير منو " بت السودان " البكفنو بيها الجنازة ديك . . . عليك امان الله كلهم جوا بخبخوهو . . . طيب ما كان اتريح انا " المحتفى به " و البعدي كان جوا يشموه يقول ليهم : شرحوا . . .
يعني رهط ماشي ريحتو واحدة دي اشتراكية ماركس ما فكر فيها ذاتو . . . برضو قصة فرشة الاسنان دي بتكون فاتت عليهو . . . اتنين انا كنت راصد الحركة دي عندهم و عاملين فيها رايحين كل واحد يتسوك و يجي يختها في محلها كانها مشط سرح بيهو رويسو المدوقس دا . . . انها الفاقة و الإملاق يا عزيزتي و دا مبرر تاني غير الحب . . . لكن كفايتو فيها شك و ظن !!
اها تتوقعي من شلة زي دي تدعم كفاحي للانتقال لمرحلة ارقى من القاع الهم فيه دا ؟
غير الوترة و الشناف ما لقيت منهم شئ
و الاحباط . . . اسي الزولة السمحة دي بتحب ليك شنو ؟ العاجبة فيك شنو ؟ . . .
يا رحاب السلام امانة لامك و عليك الله اقري ليها كلام عماد الفوق دا بس ما تساهري بيها سمح ؟
|
السلام وصل يا قيقا و يحيوك باحسن منه
طبعا اجمل زول بحب امشي اتكلم معاهو في الحاجات الجديده دي، حبوبتي بت المني، ربنا يخليها:
- حبوبه، انتي مافي زول جاب ليك هديه الليله ولا شوكلاته ولا ورود؟
= هديه لي شنو يا بت؟ يوم ميلادي انا ما خابراهو، اكان لحفله الميلاد الليلتكم دي
- يا حبوبه اسمه عيد ميلاد اولا، وبعدين ده عيد تاني، الليله ما الفالانتاين، انتي مالك ما رومانسيه كده
= يوم الف...الشنو يا بت؟
- يا حبوبه ده يوم القسيس فالانتاين، بتهادو فيهو الاحبه و كده
= احبه؟ قصدك جدك الامير؟ و يجيب لي زهور؟ الزهور تاكل فيها يا يمه غنمايه ست النفر من احواض الحكومه، و مالنا و مال اعياد القساوسه احنا، شايفاني لابسه صليب؟ يصلب عدوك
- يا حبوبه ما بالضروره جدي، اي زول خاتي عينه عليك او معجب بيك او...
= انت يا بت كلام قله الادب ده شنو؟ الياهو ده علامك من مشيتي بلاد الخواجات؟
- انتي يا حبوبه مش شابكانا من زمااان انك قاريه كمبوني قاريه كمبوني، ما ادوكم عيد الفالانتاين ده؟
بالحيل قاريه كمبوني، اها ون توو سرري، و بعرف شوقار كمان، لكن كلام قله الادب ده ما ادونا ليهو، بنات اخر زمن، اصبري كان ما كلمت ليك امك انا
