شوفوا دنيتنا الجميلة...

[عادل عسوم]

المشاركة الأصلية كتبت بواسطة شليل

ساره ، آمال.. مشكورات على الإهداء ومروركم الجميل، معليش على التأخر في الرد لظروف الشغل ..سعيد بيسلًم عليكم بيقول ليكم كتًر خيركم وربنا يسعدكم.
حبابك أبو لؤي ، ومحمد ، ورنا ،
كل سنه طيببن طيبين..
ياوضئ.. أنا شايف عندنا هنا في نماذج بتاعة أطفال هنا ما جيده ، تلقى واحد عمرو تلاته سنين وربنا مافتح عليهو بإنو يتكلًم ،غير كده تلقاهو مركبين ليهو بمبرز وداير يرضع بعد ده كلو.. ده غير الأطفال الإستلبت لغتم سواء بيتكلموا خليجي أو ما بيعرفوا غير الإنجليزي.
دي ما بيئة صحية للولاد ، بتحجًم نطاق معرفتم وبتختزلم في كائنات بيتيه ، عشان كده أفضل ليهم يرجعوا بلدم يتعرفوا على الدنيا دي بحلوها ومرها وتناقضاتا.. يقروا : لي قطة جميلة سميتها سميره ، تنام في البيت معي وتلعب بأصابعي" ولمن يكبروا شويه يطاردوا نفس القطة الجميله دي ويمسكوها من ضنبا ويفنوها في راس البيت ، يحفظوا : ولي ديك له صوت جميل اللحن رنان ، وعند الفجر يوقظنا وطول اليوم شيطان، ويضبحوا نفس الديك ده إذا كرر قصة عند الفجر يوقظنا ويغنوا : نحن جند الله جند الوطن ولمن تنتهي الحصص يلعبوا حرب حرب.
الحياه جميلة في تناقضاتا يا عادل ، جميله أكتر في فتيشك عن المعرفه.. بتتعتًر كتير لكن بتصل ، خلال مشوارك ده بتكون إتوصلت لحاجات كتيره تكون أضافت ليك الكتير وصقلت شخصيتك.
ودي الحاجات الداير أوصلا للجيش الشعبي - البدين ليهم بإنو أنا لسه عايش ، مدعاة فخر ما إستهجان ..كويًس ؟- .. في إنو يعاين للحاجات في تناقضاتا ، في إنو يتمرد على الروتين والمحفوظات والحاجات الملقًنه ويفتح لنفسو شارع براهو.

حبابك ياشليل ياود أخوي
بالفعل أطفال (الغربة) تبدأ معاناتهم من أنتفاء شمسين!
شمس النهار...
وشمس الحراك والتداخل ياالفاتح...
فيتامين (د) وما أدراك ما فيتامين (د)؟!
ومن بعد ذلك -وكما تفضلت- أمر عدم القدرة على الهجاء و(الكلام)!
ثم يليه ضعف الشخصية في الخطاب ومخالطة الضيوف والآخرين!...
قبل أعوام ذهبت بأبنتي الكبرى لدراسة الطب في السودان...
وعندما تهيّأ أبني محمد من بعدها لدراسة الهندسة أشفقت عليه فارتأيت بأن أذهب به الى ماليزيا...
قد تقول لي (كان عليك ألحاقه بأخته)!
أقول لك بأني أشفقت عليه من (أجواء) قد ولد وترعرع في غيرها!
وأشفقت عليه كذلك من سلب وقائع (كثيرة) حدثت لأبناء أصدقاء آخرين!
وكان الأختيار لماليزيا لأشياء كثيرة:
1-السمت الأسلامي لمجتمعها وشارعها...
2-أتصاف المجتمع هناك بمزية النظام والترتيب والذي يخالف النمط الأستهلاكي المنداح هنا حيث نعيش (والتوصيف لدكتورتنا الغالية بيان رد الله غربتها الينا)...
3-التمرن أكثر على اللغة الأنجليزية دراسة و(تخاطبا)...
4-أنتظام الدراسة هناك...
5-الأنفتاح على تجارب آخرين وأكتساب المعرفة من خلالها كما تفضلت في مداخلتك الكريمة...
وغير ذلك من أسباب كثيرة...
وأحمد الله كثيرا فقد أوشك أبني على التخرج ولم آس على قراري ذاك...
قبل أشهر أرسلت لي أخته من السودان رسالة هاتفية بأن أفتح المدونة الشخصية لمحمد عادل عسوم!
فتحتها فدمعت عيناي...
وأتصلت عليه:
-ياباشمهندس محمد...شنو ياخي مابتكلمنا عن مدونتك الشخصية ياخي؟!
-والله ياأبوي كنت عاوز أكلمك بيها بس قلت بعد ما أعمل عليها شوية ترتيبات وتحسينات نهائية كدة لكن يعلموا ليها شنو الدكتورة دي الباين الفولة مابتتبلى في خشمها
صدقني لقد فرحت مرتين ياشليل...
المرة الأولى بوصول أبني مرحلة التخطيط لأنشاء مدونة شخصية (ممتازة) لنفسه ولكامل العائلة أيضا!
والمرة الثانية للتؤدة التي أكتسبها بأرجائه لأبلاغي بالخبر حتى يكمل كل مايراه يجوِّد عمله ليكون أكثر أبهارا وقبولا !
الحمد لله على نعمة الأبناء ياشليل...
وأرجو بأن يكون سعيد كذلك وأفضل...
مودتي