من نوادر أصحاب شوقي بدري (أولاد أمدرمان)

[فتحي مسعد حنفي]

المشاركة الأصلية كتبت بواسطة سارة

عمو شوقى شخشيا

يادا النور يا دا النور القعدة باين عليها حتطول وانا ان شاء الله بيكتب رئيس الوردية

تقرير السوادوالرماد لكن الرهيفة التنقد انا غايتو ما بمرق من هناالا تجيبوا لى سمسمية ولا

كوارع

الا هل بلغت اللهم فاشهد

انتي الطمع عليكي شنو؟ما قلت ليك بجيب ليك 2 كيلو تسالي وممكن اضيف ليكي معاهم فول اسواني زي بتاع الحجات..المهم تبعدي من السمسمية والكوارع عشان ممكن ناصر يوسف يشيل حسك فيهم

[فتحي مسعد حنفي]

أسمعي يا زوجة أخوي شوقي..ما دام انتي بتفتحي البوست دا وبتقريهو وكمان صنفتينا يبقي تكوني عادلة وتسمعي دفاع المتهم الأول الهو أنا حسب كلام شوقي..
أنا ما ناكر اني كنت زول منحرف وبسوي كل الكانو الأمهات بحذروا منو لكن كنت بضر في نفسي وما بضر في زول تاني..لكن راجلك كان رباط عديل الناس بخافوا منو وعلي الرغم من انو ما كان لا بيسكر لا بيتسطل لكنو عثمان كوارع كان ملاك بالنسبة ليهو .
وبعدين المهم انو احنا ناس اتغيرنا وبقينا محترمين..
ابقي بي عافية وسلمي علي الوليدات

[سارة]

المشاركة الأصلية كتبت بواسطة فتحي مسعد حنفي

انتي الطمع عليكي شنو؟ما قلت ليك بجيب ليك 2 كيلو تسالي وممكن اضيف ليكي معاهم فول اسواني زي بتاع الحجات..المهم تبعدي من السمسمية والكوارع عشان ممكن ناصر يوسف يشيل حسك فيهم

انادايرة سمسمية زى حقت صاحبكم الاخد الاذن من البحر

وبعدين ناصر يوسف خلى عم شوقى يكمل كلامو بجى احكى ليك قصة الجزمة الفى ضهر العربية ودقى يا مزيكا

بمناسبة الفيزا وزيارة عم شوقى والله تلحق تجى لعم شوقى وما تجينى انا

بقوم اركب مكنة الحلب الملخبتة مع الفلاتة وليك امان الله اجدع بلطجى فى شلتكم ما بيحلك منى

وكان لى الفيزا هينة بندبرها اها قلت شنو

[ابوريم]

لكن ضعف المتابعة والمشاركة بتحسس الزول بأنو فارض نفسو علي الناس بي كلام ما مفيد.. وبيجيب الاحباط ودي حاجة انت شخصيا اشتكيت منها قبل كدا.

فتحي
القال ليك منو؟ بنتابع ونقرا لكن نشارك دي تحتا خطين بس قول لي كيف؟ نقعد نقزز بي الحكاوي الممتعة وننفعل معاها نشهق مرات ومرات نستغرب واخرى ننفقع من الضحك وفي غاية الاستمتاع.
بعدين ياخي المنتدى دة نصو اظن من مواليد تمانين وجاي - والحكاوي دي نحن العجايز ديل مواليد النص التاني من الستينات ما عاصرناها - منو البقدر يخش كتاب التاريخ يضيف ليهو.
تسلم يا عزيز وواصل السرد والحكي انت , وصاحب الاصحاب البتكتب عنهم (شوقي بدري) وربنا يديكم العافية ويطول في عمركم.

[فتحي مسعد حنفي]

المشاركة الأصلية كتبت بواسطة سارة

انادايرة سمسمية زى حقت صاحبكم الاخد الاذن من البحر

وبعدين ناصر يوسف خلى عم شوقى يكمل كلامو بجى احكى ليك قصة الجزمة الفى ضهر العربية ودقى يا مزيكا

بمناسبة الفيزا وزيارة عم شوقى والله تلحق تجى لعم شوقى وما تجينى انا

بقوم اركب مكنة الحلب الملخبتة مع الفلاتة وليك امان الله اجدع بلطجى فى شلتكم ما بيحلك منى

وكان لى الفيزا هينة بندبرها اها قلت شنو

ما قلت ليك مرا بي ألف راجل..بس ما تدقي صدرك شديد عشان ما تجيك كحةالسمسمية بتاعة اخونا الاستأذن عشان يشرب من البحر دي لو جربتيها الشافك طشيتي كداري لي بلد تاني ما كضب..وفي حكاية لامن نتقابل ممكن أحكيها ليك عشان هنا ما بينفع..الجماعة بيدوني كرت أحمر..ودا بس عشان تعرفي نصيحتي ليك تبعدي عنها لي شنو..أصلو واحدة تشيكية عملت زيك وقالت الا تجرب وعينك ما تشوف الا النور البت ضربت السكلي وقامت تجري في كوريدور الداخلية والخواجات طلعو من الأوض يشوفو العبيد ديل عملو شنو للبت..افتكرونا دايرين ناكلها.
أها نبقي في زي دا يابت برنارد..

[فتحي مسعد حنفي]

المشاركة الأصلية كتبت بواسطة ابوريم

فتحي
القال ليك منو؟ بنتابع ونقرا لكن نشارك دي تحتا خطين بس قول لي كيف؟ نقعد نقزز بي الحكاوي الممتعة وننفعل معاها نشهق مرات ومرات نستغرب واخرى ننفقع من الضحك وفي غاية الاستمتاع.
بعدين ياخي المنتدى دة نصو اظن من مواليد تمانين وجاي - والحكاوي دي نحن العجايز ديل مواليد النص التاني من الستينات ما عاصرناها - منو البقدر يخش كتاب التاريخ يضيف ليهو.
تسلم يا عزيز وواصل السرد والحكي انت , وصاحب الاصحاب البتكتب عنهم (شوقي بدري) وربنا يديكم العافية ويطول في عمركم.

يازول طولة عمر شنو بعد ما قرضتنا..وقال شنو من مواليد النصف التاني من الستينات يعني أنا لما دخلت الجامعة انت لسة ما ولدوك وتقول لي عجايز..أها بالمناسبة شوقي دا أصغر مني بي شهور.يعني ندايد زي ما بقولوا حبوباتنا..لكن لامن شوقي كان بيخوف صعاليك أمدرمان أنا ما كنت بخش السينما براي والدور التاني بسمع بيهو سمع..وشوقي بالمناسبة راجل مؤدب جدا ومسيخ جدا كان كرهك زح منو وكان رادك يبقي بختك وبيحب الأصول جدا واحترام الكبار سنا ومقاما..في مرة كان قاعد مع أخونا فتحي محمود(الحاوي) صاحب كفتيريا البلو نايل سابقا قبال ما الكيزان يكسروها..كانو في بيتو في العمارة الكويتية وكان معاهم حيدر بورسودان..فتحي قام دخل جوا البيت يعمل حاجة فقام حيدر بورسودان قعد في كرسيهو.
طوالي شوقي قال ليهو قوم من كرسي المعلم ما تقعد فيهو .. حيدر بورسودان قام مخلوع كيف زول يتكلم معاهو كدا وهو الفنان المشهور المتعود الناس يدلعوهو..ودا طبعا بيوريك انو الناس بالنسبة لي شوقي مقامات مش لو بقي حيدر بورسودان..لو بقي حيدرأباد ذاتو لازم يعرف حجمو..
شكرا ياشاب يا ظريف علي المرور وما تبقي تغيب كتير..

[عثمان]

المشاركة الأصلية كتبت بواسطة شوقي بدري

وسنعود للآخرين

العم الرائع .. طابت أيامك ، يا عمك العودة دي متين ما منتظركم ، العزيزة سارة شنو عمك فتحي دا ما دوريهو خليهو يفته لينا شوية كدة قبل ما يجيكم بغادي

تحياتي/ عثمان الطيب

[Hassan Farah]

المشاركة الأصلية كتبت بواسطة فتحي مسعد حنفي

انت يابابكر الوداك تهبش في الفريزر عندي شنو ولا انت زي ما قالوا المصريين ما بتتبلا فولة في خشمك
التشيك انا لسة ما قبلت عليهم لكن عندي تجربة خاصة بتلم التشيك والسلوفاك حصلت لي شخصيا ومافي مانع اقولا عشان مافي زول يقول شايل حس الناس وناسي روحو..
تعرف يابابكر في أحد الأصياف..مش دي برضو جمع صيف ولا كيف أعتقد في بداية التمنينات براغ كلها صرفت ماهية التلاتة شهور والفلس ضرب الكل وكنا بنتلقط الأخبار عن الداخليات الفيها زول استلم قروش من أهلو وأنا قروشي الكان أبوي برسلها لي من دبي اتأخرت..
مشيت داخلية ياروف الفيها أحمد أدم وفي السكة مريت علي البنك اسأل عن حوالتي..وهناك باني سوبوتكوفا الكانت بتعرفني شخصيا قلبت في الورق وقالت لي قروشك جات لكن بالغلط رسلناها براتسلافا عشان زميلتي ما لاحظت انو انت سبت سلوفاكيا وعنوانك اتغير وما قرت باقي الورق وقامت حولت القروش لي براتسلافا..قلت ليها طيب هسع نعمل شنو؟قالت لي انا حأرسل لي البنك هناك عشان يرجع القروش لي براغ ودا حياخد حوالي اسبوعين..لا حول الله اسبوعين كيف وأعمل شنو في الجوع..
المهم قلت أمري لله وواصلت طريقي لي ياروف وهناك لقيت الجماعة كلهم مقشطين وفرقة المديح كلها هناك ..هاشم صالح وابراهيم الجزولي ومحمد محجوب عثمان وعبد السلام بابكر ومليجي وتاني منو ما متذكر..المهم عرفت انهم مفلسين ما عندهم حق الرغيف والمصيبة أنا ركبت الترماي بآخر كرونة يعني ما عندي حق الرجعة وأنا ساكن في فيترنيك أخر البلد من الناحية التانية.يعني مشوار عايز ليهو بالميت 4 ساعات مشي..
غايتو قلت أقعد مع الجماعة انشالله أتغدا بي عشرة وست..حوالي الساعة اتنين الباب خبط ودخل علينا زول سوداني طويل وضخم ومشلخ دنقلاوي وقال السلام عليكم..الجماعة كلهم نطوا وأخدوه بالحضن وأنا ما بعرفو..عرفوني بيهو وقالوا لي دا دكتور عثمان الجزار من بلغاريا..
الدكتور قعد وفتح الهاند باج وطلع منها شبشب وجلابية وفرشة أسنان والباقي كلو قزاز كونياك وجبنة بلغارية..طبعا احنا ما كضبنا ودورنا شلعي والمزة جبنة ونسينا الغدا والفلس..
لامن جات الساعة 11 بالليل أخوك بقي زي يني..شلعة يحكو بيها..قلت للجماعة أنا ماشي داخليتي عشان دي مواعيد آخر ترماي..الجزار أداني كرونة حق الرجعة وطبعا بعد الكم ساعة ديل اتصاحبنا..ووعدتو أجيهو تاني يوم أشوف باقي القزايز دي نعمل معاها شنو..
مشيت أترتح ووصلت محطة الترماي وبعد دقايق ترماي 9 وصل وركبت فيهو وبعد شوية دقست عشان المشوار طويل وأنا تقريبا نازل في نهاية الخط..
فجأة لقيت ليك زول بهزني من كتفي وبقول لي قوم احنا خلاص وصلنا ..عاينت ليهو وسألتو دي فيترنيك قال لي فيترنيك شنو وصلنا براتسلافا..أخوك نط وقام يجضم في روحو عشان يتأكد دي حقيقة ولا حلم..عاينت لقيت نفسي قاعد فعلا في قطر ومحطة براتسلافا الما بغباها برة الشباك والقطر علي وقوف..سألت الراجل أنا الجابني هنا شنو..الراجل ضحك وقال لي انت كنت سكران سكرة شديدة والكمساري جا وحاول يصحيك عشان التزكرة لكن انت كنت زي الميت فقام فتش جيوبك لقي الهوية بتاعتك فقال دا طالب أجنبي أكيد ما بكون ركب بدون تزكرة وخلاك ومشي..أههها وابتديت أفكر الحصل شنو والموضوع دا حصل كيف..وفي الآخر وصلت للتفسير المنطقي الوحيد وهو انو الترماي كل ما يجي داخل محطة السواق بالمكرفون بيقول اسم المحطة وترماي 9 بيجي بي محطة القطر براها سترشيد البتقوم منها قطارات براتسلافا..وأنا مع الطشمة لامن سمعت اسم المحطة نزلت ودخلت محطة القطر فتشت قطر براتسلافا والوقت كان بدري.عزلت لي قمرة فاضية ودخلت رقدت فيها والباقي لا علم لي به والمسافة بتاخد 6 ساعات زي ما عارف..
المهم طارت السكرة وجات الفكرة...أسوي شنو واتزكرت قروشي الفي البنك والساعة 6 صباحا والبنك في وسط البلد ودي ما مشكلة ممكن أمشي المشوار دا عشان طبعا جيبي ما فيهو ولا كرونة توصلني..
المهم اتوكلت ودورت الييادة لغاية ما وصلت البنك الكان مواعيد شغلو 8 ونص..قعدت في سلم البنك لغاية ما فتح ودخلت البنك أول واحد مع الموظفين وأنا خايف يكونو رجعو القراش لي براغ..لكن ربك رب الخير ستر ولقيت مذكرة براغ لسة ما وصلتم..
استلمت الحوالة وطوالي علي كافتيريا كنت بغير فيها القروش لما كنت في سينتس وبجي براتسلافا..
فطرت تمام وفكيت السكرة بي اتنين بيرة وركبت مشيت المحطة عشان أرجع براغ ولقيت في قطر بقوم الساعة 12 الضهر وفعلا ركبت القطر ووصلت براغ الساعة 6 مساء وطوالي علي ياروف للجماعة السألوني أها وصلت كيف أمبارح ولما حكيت ليهم اني جاي من براتسلافا طبعا ما صدقوني لغاية ما طلعت ليهم وص الاستلام من بنك براتسلافا ومن اليوم داك الناس بقو يحكو انو فتحي مسعد سافر براتسلافا بالترماي..ودي حقيفة عشان انا ركبت الترماي ونزلت في براتسلافا [color=#0080ا...]المهم قعدت معاهم لغاية ما القزاز كمل وقروشي كملت ورجعت داخليتي وابتديت من الأول اشمشم الداخليات الفيها زول جاتو قروش من أهلو..[/color]

حكاوى لطيفة يا بوحليب --اولا تذكرنى تضامن الطلاب فى جيكوسلفاكيا تلك الايام-- بعدين ياخى انت لحد التمانينات ابوك كان بيرسل قروش-- المرحوم الشنقيطى كانوا اهلو برضو بيحولوا ليهو-- بعد ما يستلم التحويلة يقوم يوزعها على الشباب ويتبقى عنده مايكفى لتذاكر المينزا-- هو كان ساكن فى بودلى-- مرة واحد ضيف جا داخل عليه- من ديك البيكونوا مارين نحو المانيا -- الشنقيطى فى غرفته لا فى كفتيرة-- لا فى سكر-- لا شاى-- حب يكرم الضيف-- قال ليهو تشرب شاى-- الضيف لم يعترض-- الشنقيطى اتجه نحو الباب ليبحث عن مكونات الشاى وقبل ان يخرج عاجله الضيف-- والله اقول لك-- سوى لى كاكاو-- تفتكر ما كان رد الشنقيطى--
اما حكاية سفرك لبراتسلافا بعد سكرة ينى اظنك لاطشة من حكاوى موسكو-

[سمراء]

ياخ ده بوست دسم عديل كده ...

باسطة حلوانى بحرى بس

يلا ياعمو فتحى انداح بالله

[عباس الشريف]

بالله البوست ده اتنكت من وين الله اجازيك يا سمراء كان ساهرتو بينا

[مجدي مسعد حنفي]

ياسلام عليكي ياسمراء تعرفي الحمدلله اني فتحت البوست دا
وانا قاعد براي في البيت عشان كان ممكن المره والاولاد يفتكروني
جنيت من الضحك الضحكتو وانا بقرا في النوادر مع اني قريتا قبل كدا
لكن الحكاوي فعلا غريبه ومضحكه بالجد وياريت فتحي يرجع يكمل باقي
الحكاوي لانها كتيره وممتعه فعلاً .

[معتصم الحارث الضوّي]

العزيز فتحي
غايتو لو جيت اسكندينافيا وما جيتنا في إنجلترا حأشن/نشن عليك حرب أهلية!
كلها فركة كعب فعليك الله ما تستكثرها علينا.

قلتَ إنك كنت ممنوع من دخول السودان بعد أحداث يوليو، معناها في زيارتك للمجر اتعرفت على ناس فضل الله ومأمون الحلفاوي وعباس.. إلخ الكانوا ضمن دفعة طلبة الطيران الحربي، وهي طبعا الدفعة المشئومة الرسلوا برقية تأييد لحركة هاشم العطا، وبعد عودة نميري الروس قاموا وزعوهم على الدول الإشتراكية، فكان نصيب المجر منهم السابقة أسماؤهم.

الله يرحم زمن الإشتراكية في المجر، فبدولار واحد كنا بنشتري ستة علب سجائر!
واصل يا سيدي

ما بعد الختام: مرطبات عبد القادر حاج السيد، ترزي الشقيقان، بار ويصة (رحمة الله على الأحياء والأموات منهم). ما ذكرياتك عن تلك الرموز الشخصية/المكانية؟

[فتحي مسعد حنفي]

المشاركة الأصلية كتبت بواسطة معتصم الحارث الضوّي

العزيز فتحي
غايتو لو جيت اسكندينافيا وما جيتنا في إنجلترا حأشن/نشن عليك حرب أهلية!
كلها فركة كعب فعليك الله ما تستكثرها علينا.

قلتَ إنك كنت ممنوع من دخول السودان بعد أحداث يوليو، معناها في زيارتك للمجر اتعرفت على ناس فضل الله ومأمون الحلفاوي وعباس.. إلخ الكانوا ضمن دفعة طلبة الطيران الحربي، وهي طبعا الدفعة المشئومة الرسلوا برقية تأييد لحركة هاشم العطا، وبعد عودة نميري الروس قاموا وزعوهم على الدول الإشتراكية، فكان نصيب المجر منهم السابقة أسماؤهم.

الله يرحم زمن الإشتراكية في المجر، فبدولار واحد كنا بنشتري ستة علب سجائر!
واصل يا سيدي

ما بعد الختام: مرطبات عبد القادر حاج السيد، ترزي الشقيقان، بار ويصة (رحمة الله على الأحياء والأموات منهم). ما ذكرياتك عن تلك الرموز الشخصية/المكانية؟

كيف يامعتصممجموعة قرقيزيا ديل كلهم أصحابي: دفع الله الدود وعباس أب قفيس ومأمون الحلفاوي والفاضل حرقاص وعلي النمس وعبد العظيم الحصان وحسن المصري وكل المجموعة الوقفت معاي في مدة التمانية شهور القعدتها في المجر بسبب ضربي لعسكري شرطة في بودابست سنة 1976.
شباب رائعين وعنوان مشرف للرجولة السودانية في أبهي صورها..
أما حكاية زيارتي لي انجلترا فدي اجبارية لوجود أختي في ابيجافيني بالقرب من كارديف ولازم أزورا كل ما أمشي أوروبا..

[رأفت ميلاد]

المشاركة الأصلية كتبت بواسطة فتحي مسعد حنفي
يامجدي ياخوي الحكاية ما زهايمر لكن ضعف المتابعة والمشاركة بتحسس الزول بأنو فارض نفسو علي الناس بي كلام ما مفيد.. وبيجيب الاحباط ودي حاجة انت شخصيا اشتكيت منها قبل كدا.

يا توحة متابعين والله .. لكن أنت عارف الحالات الإنصرافية بتتوه البوستات .. يعنى لامن يجى زول يستفز الناس زى صاحبك الكوز ده .. بخلى الأعصاب مشدودة ..ويخلى الناس محصورة فى حتة واحدة ..
واصل ياخ .. والبوست ده كان نزل هسة .. يوم بعد ما الحالة تهدأ تلقى فيصل نكتو

[عثمان]

يا عم فتحي زعلاااان منك شديد أنا والله
يعني أنا كنت عامل مداخلة تمت ليها سنة
وما اشتغلت بي الشغلة وكنت خاتي طوبتي وقاااعد حارسك من زمان
لكن ولا هببتو لي ساي "هسي عشان سمراء ورأفت ميلاد نكتو ليك البوست يعني؟"

أصلو أنا من زمان في المنتدى ده حاسس بحكاية الشلالايات دي زولي أكون معاه ما زولي الله معاه

على العموم ربنا يديم عليك نعمة الصحة والعافية أنت وأسرتك
تحياتي/ عثمان الطيب