الإبل

[أبوبكر عباس]

النضوج عند محسن خالد:
نانسي عبيد الرحمن مهنسة بريطانية من أصل موريتاني أو متزوجة من موريتاني (مختلط علىٌ اسم عبيد الرحمن ده).
د. الفاتح حشاش* طبيب بيطري من الجزيرة و من أصل مدني و وزير للشئون الاجتماعية.

نانسي عبيد الرحمن في رحلة بحثها عن عمل و تنبهها لامكانية المساهمة في مكافحة الفقر، لاحظت ان موريتانيا تقوم باستيراد الحليب بالرغم من وجود اعداد كبيرة من حيوانات الحليب بالبلاد.
د. الفاتح حشاش في رحلة بحثه لمكافحة الفقر، يعلم بخبرته الطويلة الممتازة، أن البلاد تستورد الحليب بالرغم من الكم الهائل للحيوانات اللبونة، و أن أطفال الولاية بعانون من سوء التغذية و إنسانها من الفقر بالرغم من وجود اكبر مشروع مروي بالمنطقة.


نانسي عبيد الرحمن تحصلت على قرض فرنسى بقيمة 141 ألف دولار و أنشأت مصنع لتجميع الحليب و بسترته و من ثم بيعة ليعود جزء من ريعه للمربين، و لتساهم بشكل إيجابي في مكافحة الفقر.
الفاتح حشاش تحت إدارته ميزانية الشئون الاجتماعية و الزكاة، يقوم بتوزيع الصدقات على الفقراء و المساكين و يهتم ببناء الخلاوي بالتخوم، و بذلك يساهم في معظم الاحيان بشكل سلبي في مكافحة الفقر.

مع كل لتر حليب تجمعه نانسي عبيد الرحمن يتناقص هؤلاء الفقراء بواحد صحيح.
مع كل جنية يوزعة الوزير الدكتور يزداد الفقر بنسبة مئوية تساوي واحد صحيح.

و يبقى هناك فرق كبير بين الواحد الصحيح جدا بتاع نانسي عبيد الرحمن العظيمة، و الواحد الصحيح الناقص بتاع ديوان الزكاة و الشئون الاجتماعية.

* د. الفاتح حشاش مثال يشملنا جميعا ... النضوج السلبي زي ما بنظر ليهو محسن خالد و تبقى نانسي عبيد الرحمن مثال للنضوج الإيجابي برضو على رأي محسن خالد

[Wad Elbeck]

بابكر.. سلامات..
الموضوع شيّق للغاية..
فكرة إنتاج وتصنيع ألبان الإبل فكرة عظيمة وجريئة..ولكن تطبيق الفكرة على أرض الواقع فى السودان ده موّال تانى..
بعيداً عن عقبات المأكلة والإتسنكاح وكل واحد عاوز حقو..فالأمر يتطّلب بعض التغيير فى الثقافة الغذائية السائدة من حيث إستهلاك الألبان، لا سيما وأن توزيع الإنتاج سوف يعتمد على المدُن الكبيرة والتى فى الغالب قد إعتاد أهلها على ألبان الماشية والأغنام (أنا غايتو ما جرّبت لبن الإبل)..
فى أثناء فترة الجامعة أُتيحت لى الفرصة لعمل (Internship) فى مصنع ألبان الجزيرة ببركات، وهو عبارة جمعية تعاونية. تقوم العربات المؤجرة من قبل المصنع يومياً كل صباح بتجميع الألبان من مزارعى القُرى المتاخمة لمدينة ود مدنى (ودالنور، ودالنو، الحدّاد...إلخ). يقوم المصنع بتوفير الأعلاف والرعاية البيطرية للحيونات. المصنع كان به معمل لضبط الجودة حيث كنا نقوم بأخذ عينات عشوائية من ألبان القرى المختلفة ونجرى عليها بعض الإختبارات الكيميائية والفيزيائية للتأكُد من صلاحية اللبن وعدم غشه. كذلك كان يتم تصنيع الجبن ولكن على نطاق ضيّق.
حسب إعتقادى المتواضع أن المصنع كان له مردود إيجابى على الكل; المزارع، المستثمر، العمالة، أصحاب البقالات والمستهلك..
غايتو أخوك فى أيامو الأوائل جاهو "سهل بن ربيعة" من كثرة شراب اللبن المبستر..

[align=center][/align]
[align=center]شيكولاتة مصنّعة من لبن الإبل[/align]

[أبوبكر عباس]

المشاركة الأصلية كتبت بواسطة Wad Elbeck

بابكر.. سلامات..
الموضوع شيّق للغاية..
فكرة إنتاج وتصنيع ألبان الإبل فكرة عظيمة وجريئة..ولكن تطبيق الفكرة على أرض الواقع فى السودان ده موّال تانى..

ود البيك تسلم و يديك الخير،،
صحي التطبيق حا يكون شوية فيهو صعوبات، لكن ليك علي إجازتك الجاية في مدني تلقانا بدينا الإنتاج و أسوقك معاي البطانة و الدور ده حا يجيك "سهل بن سهل بن ربيعة الساهلي"

المشاركة الأصلية كتبت بواسطة Wad Elbeck

..فالأمر يتطّلب بعض التغيير فى الثقافة الغذائية السائدة من حيث إستهلاك الألبان، لا سيما وأن توزيع الإنتاج سوف يعتمد على المدُن الكبيرة والتى فى الغالب قد إعتاد أهلها على ألبان الماشية والأغنام (أنا غايتو ما جرّبت لبن الإبل)..

مدخلي لتغيير الثقافة الغذائية حا يكون هوس الناس بحليب الإبل كمادة علاجية و ممكن في المستقبل المسألة تتحول لنظام غذائي..
من ناحبة علمية أنا عندي تحفظات كبيرة عن ما يشاع من خواص علاجية لحليب الابل.

المشاركة الأصلية كتبت بواسطة Wad Elbeck

حسب إعتقادى المتواضع أن المصنع كان له مردود إيجابى على الكل; المزارع، المستثمر، العمالة، أصحاب البقالات والمستهلك..

تجربة البان الجزبرة مهمة جدا بالنسبة لمشروعنا و حا نستفيد منها..

شكولاتة النسمة جزء من المصنع الشغال انا فيهو حاليا بدبي.

[لنا جعفر]

بابكر وبقية ألاخوة الافاضل
مليون سلام وتحية
البوست ده مفيد وانا عايزة استفيد منو قدر مايمكن عشان كده عايزة اسألكم اسئلة محددة وواثقة من قدرتكم على الاجابة عليها...
عايزة أعرف مايثار عن قدرة حليب الابل في شفاء سرطان القولون مثلا
وهل هي بالقدرة التي يصورها بدو الجزيرة العربية ودول الخليج؟؟؟
انا مقيمة بدولة خليجية والبدو هنا لولا الاسلام لقدسو الابل مثلما يقدس الهندوس البقر
سمعت حكي يشبه الاساطير عن قدرات حليب الابل على الشفاء ومنح العافية
حليب البوش مرتبط بالموروث الطبي الشعبي هنا
ورغم ان السودان دولة بها ثروة حيوانية لايستهان بها ومن ضمنها الابل الا اننا لم نهتم ابدا به ولم اسمع به وانا في السودان ....كنت اسمع فقط عن كبد الابل عند اهلنا الكبار
--------
مستمتعة بكل المعلومات التي وردت هنا
واريد معرفة المزيد عن كبد الابل وحليب الابل وبول الابل
ومعليش يابابكر لو انحرفت ليك شوية بموضوع البوست
--------------------
لكن حقيقي فكرتك فيما يختص بالاستفادة الاقتصادية من الابل فكرة مبدعة وارجو ان توليها اهتمامك لكن ادرسها جيدا فالسودان بلد المفاجآت
تحياتي وشكرا للمتعة والفائدة
مودتي

[أبوبكر عباس]

المشاركة الأصلية كتبت بواسطة لنا جعفر

عايزة أعرف مايثار عن قدرة حليب الابل في شفاء سرطان القولون مثلا
وهل هي بالقدرة التي يصورها بدو الجزيرة العربية ودول الخليج؟؟؟
انا مقيمة بدولة خليجية والبدو هنا لولا الاسلام لقدسو الابل.....

ورغم ان السودان دولة بها ثروة حيوانية لايستهان بها ومن ضمنها الابل الا اننا لم نهتم ابدا به ولم اسمع به وانا في السودان ....كنت اسمع فقط عن كبد الابل عند اهلنا الكبار
--------

لنا جعفر
معظم الكلام حول الخواص العلاجية لحليب الإبل ما زال في طور الملاحظات الفردية، و العلاج بحليب الابل و مشتقات الابل يندرج تحت الطب الشعبى....

السودان يحتل المرتبة الثانية بعد الصومال من ناحية تعداد الابل و يكاد يكون نصف عدد الابل العالمي موجودة بالصومال و السودان..

كويس طلعنا جيران و طبعا نحن بنمثل الحاضرة بتاعتكم!!

[التباري]

يا عزيزي بابكر
كل سنة وإنت بخير
أنا شخصياً مداوم على شرب حليب ألبل منذ وجودي في السودان
وحتى الآن، بحكم مجاورتنا لأهلنا البجا والرشايدة في نهر عطبرة
حالياً هنا في مكة لدي أصدقاء بجيبوهو لي من الطائف كل أسبوع تقريباً
ولمان يتأخروا علي وأخرم ليهو شديد بمشي أجيبو من الشرائع
وأحياناً بسوق أولادي لعرب البطانة يحلبوهو لينا على الهواء مباشرة
مافي حليب يضاهي حليب النوق من أي ناحية
خاصة لمان يكون طازج وحاااار من ضرع ناقة ولدت حديثاً
ولدي ابن عمره حوالي ثلاثة سنوات يشربه ني (عادي) علماً بأنه لا يستسيغ الألبان
الأخرى المعبأة إلا في الشاي
أما فوائده لا تحصى ولا تعد
قبل فترة في واحد أصيب بورم سرطاني (حمانا الله وإياكم)
وصفوا له وصفة دواء بلدي من ضمنها حليب ألبل
المدهش إنه شفى تماماً
وما متأكد من مساهمة هذا الحليب في العلاج دا قدر كيف
لكن الحمد لله شخصياً ما بشكي من شي ، خاصة بطني ما شكيت منها زمن طويل
زائداً الأمراض الأخرى ربنا شايفني منها
الحمد لله على هذه النعمة
اتخيل زول سوداني ما جاتو ملاريا للآن .. رغم تعرضو لآلاف اللسعات من البعوض
كمان في حاجة تانية شقيقي مصاب بالسكري يجيني في البيت يشرب لبن ألبل لمان يترع
يقيس السكري يلقاهو نزل .. مش حاجة غريبة ؟؟
رغم ما فيه من دهون وسكر


الاستفادة من لبن النوق دا عمل طموح يا ريت الناس يقدروا ينفذوه
والله الناس هنا واقفين ليهو بالصف
ولو ما جيت بدري ما بتلقى قطرة واحدة منو
والفايدة في هذا المشروع متعددة: لصاحب المشروع، وللمواطن (الشارب)، ولراعي الحلال
نتمنى أن نرى مشروعاً مثل هذا في السودان خاصة وإن هذه النعمة تروح سدى تقريباً
لا يستفيد منها سوى القليل

[التباري]

يا جقلة العقيدك بكّر
فارسك ديمة في بلد العدو بيتوكّر
ناس بقرة وغنم أنا عندي ما بتشكّر
لبنك فيهو طب للماسكو مرض السُكّر

يوسف البنا

[أبوبكر عباس]

التباري
سلامات،،
سعيد جدا بهذه المداخلة...

زي ما أنا قلت للأخت لنا التأثير العلاجي لحليب الإبل ما زال من ناحية علمية مجرد ملاحظات...
العلم الطبي الحديث يعتمد إعتماد اساسي على نتائج التجريب العلمي و حتى لو حصل و إكتشفوا علاج بالصدفة لازم يخضع للتجريب و المماحصة الدقيقة..

أنا شخصيا اشارك تقريبا و بشكل يومي في مد من لديه إعتقاد في الناحية العلاجية بحليب الإبل، لكنني لا أوصفة للناس كبديل علاجي...

مشكور على مربع ود البنا..

[فيصل سعد]

يرفع لعناية الاخت سمراء،
بتوجيه من بابكر عباس و
للفائدة العامة ..

اطيب التحايا ..

[الرشيد اسماعيل محمود]

المشاركة الأصلية كتبت بواسطة فيصل سعد

يرفع لعناية الاخت سمراء،
بتوجيه من بابكر عباس و
للفائدة العامة ..

اطيب التحايا ..

صباحاتك ياباذخ
ياحبوب كدة انت خربت الرصة للجماعة ياخ..
سمراء دي اكيد عارفة انو في بوست خاص للأبل
عاملو بكور ده..
هي كانت حابة تتمنتش مع بكور في البوست بتاعا داك
(منتشة كل الناس اتنين اتنين)
ولما الدرب دخل ليها في الموية مالقت مراقة
غير الابل..
بس سلم القصب بتاعا داك ما قدر يشيلا..
و..
قلت لي بتوجيه من نديدك الرويعي

[سمراء]

بوست غير موفق

[أبوبكر عباس]

الشيخ محمد بن راشد آل مكتوم في زيارة لمزرعة البوش بدبي..
الصورة داخل المحلب



قال رويعي قال!!

[أميرى]

المشاركة الأصلية كتبت بواسطة بابكر عباس

الشيخ محمد بن راشد آل مكتوم في زيارة لمزرعة البوش بدبي..
الصورة داخل المحلب



قال رويعي قال!!

دة منو القال كدة أوعي يكون الرشيد بس

طااااارة يا عمك لقيتك

بس القميص الأصفر دة لزومو شنو يا بكور

[أبوبكر عباس]

المشاركة الأصلية كتبت بواسطة أميرى

بس القميص الأصفر دة لزومو شنو يا بكور

عايز تظهر؟..
ألبس أصفر

[جانيت]

المشاركة الأصلية كتبت بواسطة بابكر عباس

الشيخ محمد بن راشد آل مكتوم في زيارة لمزرعة البوش بدبي..
الصورة داخل المحلب



قال رويعي قال!!

ده منو البيقول ليك رويعي ده

غايتو للضمان عيب يا اميري ومحمد عبد الرحمن والرشيد

هسي بكور ده قدركم عشان تقولو ليهو كده