ويلكم من غضبة أبو محمد

[hatim ALi]

المشاركة الأصلية كتبت بواسطة أميرى

حاتم هسى نحن قاعدين نتغالط فى شنو؟
الحتة بتاعت انكم لميتوا المصاحف دى ما حقدر افتى فيها بالجد
لانى اول مرة اسمع بيها...
الشى الانا متزكروا كويس تجمع جزء كبير من طلاب هندسة ووقوفهم وهتافهم
وشغل التسخين والهتافات....ياعمك والله العظيم خالد عثمان زااتو اول مدنية 2001
كان شايل طوبته.........عبدالله جعفر ميرغنى اول الشهادة السودانية وخريج كهربا 2001
زااتو كان بى طوبتو....يا حاتم شكلكم وانتوا لافين تحفظوا المصاحف فاتكم الفيلم دة

بالنسبة لى شول هو فعلا كان فى ال ANF حتى قبل الاحداث بس انا قلت نجموا برز وبقى
المتحدث فى الاركان بعديها...نحن كنا اصحابوا واتفاجأنا انو شول فجأة يبقى نجمهم الاوحد
وازيدك من الشعر بيت...شول نفسوا اعتدى على محمد عمر خريج مدنية 2001
تحت التور...مع انو زميلوا ودفعتوا وما عندو اى توجه سياسى غير انو بس ملتزم فى رقبتوا
ولولا تدخل دكتور عبدالله خوجلى ....كان حدث شى لا يحمد عقباه

خالد و عبد الله جعفر في بريطانيا و يمكن سؤالهم و كونهم شالوا الطوب دا تصرف عادي بالمناسبة و للمعلومية كلاهما غير منظمين سياسياُ و ارجح ان شيلهم للطوب كان بسبب انطلاء فرية اهل الاسلام السياسي ان الجنوبيون جايين يحرقوا المسجد و هذا غير صحيح

لانو الجنوبيين صح كانوا منفعلين لكن كانوا بقولوا في كلمة واحدة لا انساها " هوي يا ناس هندسة نحنا ما دايرين منكم حاجة ، دايرين الناس الحرقو الكتاب المقدس دا طلعوهم لينا"

، شول اخر عهدي بيهو انو كان في جوبا و معلومة غير مؤكدة انو مشا امريكا مع نتالي

لكن حادثة اعتداء شول على علي محمد عمر لا اذكرها صراحة و مافي حد حكاها لي برغم معرفتي بشول و علي .

و الشهادة لله شول انسان في غاية من التهذيب و الاخلاق و النبل و من المستحيل ان يعتدي على زميله لوجه الله كدا لازم يكون في سبب ، و علي كان من اتباع الجمعية العلمية و كان من اصحاب الكوز علي صديق البخت المسدس في طبلون البوكسي الكلام دا قبل ما تحصل المفاصلة و علي صديق ينضم للترابي و بعداك يمشي كوريا الجنوبية

بتذكر بعد لمينا المصاحف رجعنا الكافتريا و قعدنا في بنشاتنا و المتأسلمين ديل كانوا لابدين في المسجد وبصرخوا في الناس "احموا بيضتكم احموا بيضتكم" و قلنا ليهم الرخ اليبيض فيكم تمشوا تحرقوا للناس كتبهم و تجوا تضاروا فينا ؟!
انتو وقت رجال بتعملوا الغلط و تجوا تدسوا ليه ؟!

ناس الحرس قفلوا الباب البيفصل بين كافتريا هندسة و الميدان الغربي من جهة و مباني الكلية -و المسجد لي جوا - من الجهة تانية ، و انا كنتا واقف جنب الباب دا و معاي عثمان قمبور و كم واحد من اولاد هندسة ولمن جوا الجنوبيون صاح كانوا منفعلين و غاضبين لكن نجحنا في افقناعهم انو ما يعبروا الباب دا ويمشو للمتأسلمين المدسوسين في المسجد ، و بعد عت و لج كتير مشوا و رجعوا علوم محل تجمعهم

الاحداث الفردية الحصلت بعداك دي انا ما عارفها ، لكن الهجمة الرئيسية للجنوبين الجو من علوم انا حاضرا و هم في النهاية رجعوا

دا للا ينفي انو كان في تحرش متبادل من الطرفين بعد ذلك في الداخليات و كان عادي الناس بتجي المحاضرات بي سكاكينها

الله يجازي ماهر الفلسطيني بتاع الجمعية العلمية و شيخ عبد الحي يوسف رأس الفتنة