كلام خارم بارم.. بس يجي منه..!!
[align=center] رأس الســـــوط .. وتسمع .. شووووو!!![/align]
والله ياجماعة بصراحة كده سودانيات بقت محتاجة لشوية دفرة!.. يعني يلزمها فتح مواضيع تحرك البركة الساكنة هذه الأيام.. ما معقول والله يا أخوانا!.. يعني نحن البوردراب ديل قضيتنا ساهلة على الأقل ألواحد وسط اهله وناسوا وفي بلده ممكن ياكل نارو ويقطم ويمشّى يومو باي هووك أور كرووك! وفي لحظة زهج كان سوي السبعة وذمتها زول بقول ليو تلت التلاتة كم مافي، لاكين قلبي على (الاوت بوردرز) ناس مواطن وبوكو وسارة ومرافي وهمس والخال وعزوز وعكود وكل العقول النييرة المهاجرة والطيور المغردة خارج السرب..وهلمجرا..ديل بصراحة كده الواحد فيهم يمر بيو ظرف من الظروف يحس بروحو (لامنتمي)! أو خارج نطاق الإنسانية..! ويشوف نفسه أقل من سمسمة وهذه السمسمة ليست لها علاقة بسمسمية فتحي مسعد لذا لزم التنويه!.. أها يا أخوانا ناس زي ديل حقو الواحد يعمل ليهم حساب .. ويحاول قدر المستطاع يخلق ليهم جو سوداني بهيج .. فيو قعدة تحت ضل النيمة .. وعنقريبــين هبابيات (صُح مكعوجات بس مريحات)! ومافيهم لحافات حبل بس! وفوق كل واحد مخدة مليانة أثر دهن كركار من رأس ست الكل! أو رأس أحدى بناتها وبمبر وهيط قدامو كانون مربع فوقو شرقرق قهوتو تغلي وتجقجق وتقول يا غربتي وعدة الشاي والجبنة حوالين الكانون .. وجردل فوقو مويه للغسيل والطشت قريب من متناول الحاجة .. وجدادة لايوووووقه زي (ناس كده)! كل مايقولوا ليها (كر) بي جاي تجي بي جاي .. وآخر مرة إتقال ليها كر..يكرك الضريب وشقاق العناقريب!.. كانت فوق واحدة من المخدات ديك وقبال ينهروها كان رمت ليها حاجة كده! في المخدة وشتت تت!.. وأخونا المغترب في إجازة يجي يشوف المنظر ده ويتأفف بقرف في الظاهر بس بي جوووه (زي العسل على قلبو)! ويصرخ متظاهرا بالإشمئزاز تعالي هيني يا بت شيلي المخدة دي نضفيها من البلاوي بتاعتكم دي ويطلع علبة المالبورو الماخمج وولاعة ذهبية! من الجلابية هي قصدي الدشداشة المخنصرة القاشر بيها علي الجماعة! ويولع سجارتو وهو بي جوه مبسوط 44 قيراط ويأخدلو نفس طويل وينفثو بمزاج ويتابع الدخان المعلق في الهواء بفرح طفولي مطاردا خيوط الدخان بأصابع يده ولسان حالو يقول ملعون ابو الغربة لأبو اليوم الهدانا عليها وكختام العزيز نزار..ودقي يا مزيكة!.
الناس ديل ياجماعة كان ماعارفين بوريكم! .. بيكون الكي بورد أحب الأشياء لديهم في غربتهم أكتر من جواز السفر! والله الواحد فيهم لما يفتح المنتدى وقدامو كباية شاي أو فنجان قهوة ناسكافيه أو كبتشينو ساخن ويتصفح الحوارات القاجة بين المشاركين بكل سماحة وأريحية سودانية إشتهرنا بيها .. بيكون الساعة ديك متل التكنو ركب لو طيارة فجاءة كده ولقى روحه في السودان وسط الأهل والحبان .. دحين عليكم الله يا أخواني وخسمتكم بصاحب الجلالة وبخاتم الرسالة العتق الغزالة.. خلو البتسووا فيو ده.. الملاسنات والمناكفات الما جايبه همها!.. والناس العارفين ستة سبعة مفردات لغوية (قاشرين بيها على عباد الله كمين سنة!) متل قشرة الهدوم (الفرمالة)! والكشخات والتظاهر بإمتلاك ملايين الكنجالات! وكل يوم شابكننا ليك فلان عمل وفلتكان قال .. والكوبي بيست شغال..اليوم الفلاني إت قلت كدي والليلة قلت شنو ماعارف!.. وجيبوا فلانة قعدوها قدامي!.. وأنا لازم أبرئ نفسي من التهمة الفظيعة الإتهمتنى بيها .. ولا أنا إنتصرت عليك في بوست فلان .. وإنت إعتذرت لي في بوست علان أو التعدي على آخرين بإتهامات جائرة!.. وكل قول أو فعل يعود بي كم وخمسين سنة للوراء ويذكرني بعهد الطفولة.. والذي تجاوزناه بحمد الله أكثر عقلانية من أمثال هؤلاء..! ختاما ولأمثال هؤلاء أقول.. رفقا بأنفسكم أولا وبالآخرين ثانيا ثوبوا إلى رشدكم .. راعـوا (السن) التي وصلتم إليها وحاسبوا أنفسكم يرحمني ويرحمكم الله .. عارف نوع كلامي ده ما بيعجب بعض ممن لحقهم رأس السوط! إنشاء الله في نص الضهر ياااا رب! وقد يزداد (حقدهم) على شخصي البسيط وأتمنى أن يكون عدد من لحقهم رأس السوط قليلا في سودانيات بل أتمنى زوالهم من مجتمع سودانيات السليم المعافى عن بكرة أبيهم الليلة قبال بكرة! حتى يعود شعارنا كما كان عليه أصلا.. وضيئا متألقا براقا .. عالما من المحبة والتواصل والتسامح (والسماحة)! وسامحونا،،، يلا تشششااااوووو!
ملحوووووزة ود مخير :-
علييييييكم الله الكلام الخارم بارم الليل أبو أماني ده ما أفيد ليكم من كلام يدور في المجلس الوطني أو الشعب أو مجلس الأمة أو حتى مجلس هيئة الأمم المتحدة ؟! الله بسعلكم قولوا النصيحة!.
التعديل الأخير تم بواسطة أبو أماني ; 22-04-2010 الساعة 05:59 PM.
|
