جميلة تحياتى
تعرفى الناس ديل فى اوربا قبل خمسين سنة واكتر كانت علاقاتهم الاجتماعية جميلة جدا ونادر ما يفارق احدهم منزل الاسرة ، لكن بعد تحول اوربا لنظام الرأسمالية اصبحت الحياة صعبة جدا ولازم الواحد يشتغل 8 ساعات على الاقل فى اليوم عشان يقدر يوفر عيشة جيدة يعنى حوالى 10 ساعات فى اليوم الواحد بيكون من وفى والى العمل او الدراسة ، ودا واحد من الاسباب الحقيقة لتباعد الاسرة طبعا مع اسباب تانيه منها ثقافة المجتمع وفهم الاستقلال عندهم ،لكن فى جزء كبير من الاسر عندهم علاقات حميمة جدا مع بعض طبعا اكيد ما بتحصل حقتنا رغم انو فى زيارتى الاخيرة للسودان بعد غياب اكتر من تسعة سنين لقيت الوضع الاجتماعى اختلف كتير جدا يعنى ممكن ما تشوفى اخوك فى البيت لكم يوم لانو بطلع من البيت من الصباح وياتى بالليل سعيا وراء كسب العيش واى زول فى السودان عندو اكتر من عمل بيطلع من الاول ويمشى للتانى ، لدرجة عندنا ناس عمى ساكنين قريب منا جدا سألت اخوى اخر مرة زرتهم متين قال لى اكتر من شهر شوفتى يعنى دى فى اوربا ممكن ما تحصل لكن لمن شرح لى انو بشتغل من 7صباحا حتى 9 مساء حتى يوم الجمعة عزرته وانا خايف يجى يوم فى السودان نبقى زى اوروبا والولد ما يشوف ابوه الابعد شهر او اكتر وبالشئ الشفتو فى السودان دا ممكن جدا تحصل .
بعدين تعرفى البوست بتاعك دا خلانى افكر فى حالة السودانين فى اوروبا واسئلة كتيرة زى هل نحن فى اغتراب ام هجرة ؟ وفكرة الوطن البديل ، لانو فى كمية من السودانيين ليس قليلة فى اوروبا تربى اولادهم الصغار على ثقافة هذا المجتمع وفى جزء كبير منهم ما بتكلمو حتى عربى ، قبل فترة قابلنى واحد سودانى بفتخر بى انو ولدو بتكلم هولندى احسن من الهولندين ونسى العربى لانه جاء هولندا وعمرو سبعة سنين وابوه فرحان وما بفكر انو بعدين لمن يكبر حا يجدعو فى (البياردا هاوس )
ختاما شكرا على الموضوع وعذرا لانى شطحته ونقيت كتير لكن ده بس لانو الموضوع من هموم الواحد .
|
