من سحّــارة ذكــريات البلــد (2) - عبد الــواحد، الصبي الفــارس

[النور يوسف محمد]

بسم الله الرحمن الرحيم

تسلم يا عكود ياخ ..
كم نحن فى حاجة الى مثل هذه ( السنْدات ) ..
( ننجَمْ ) فيها شوية ونقوم بعداك على المدافرة ..

الذى أود أن أقوله للمارين من هنا ,
حين يتراءى لك النص سهلاً بسيطاً فاحذره !!!
هكذا الكتابه عند أخينا عكود , وقليلٌ من يجيد مثل هذا العزف ..

فهذه كاميرا ثلاثية الأبعاد أو كما قال أشتر رضى الله عنه وأرضاه ..

فالسر فى ( النَص ) أنه ( بِكْرِى ) خالى من الشوائب والإضافات
كما ( النُص ) فكلاهما يتم الكيف ..

أما هنا ..

ثمّ . . . .

بدأت دقّة العرضة . .
في تلك اللحظة بالتحديد كان خير السيد مقابلاً لعبد الواحد وجهاً لوجه وبينهما خطوات معدودات، وبدأت العرضة بينهما.

فقد تجلت حبكة النص ..
ولك أن تطلق للخيال العنان وتسافر به الى حيث تحتدم المشاعر ..


ياخ .. (الله لا يهينك ... )

[عكــود]

سلام يا جنابو،

الله يديك العافية ياخي، فقد ملأني غروراً حديثك عن النص (شكّلها كما تود ).
ليس لي سوى فضل المناولة فيما أكتب ولا أسميها نصوصاً. هي ذكريات عزيزة تتاورني بين الحين والآخر و أحس قردنتها، وفي البال الكثير منها. غير أنّي كثيراً ما أفشل في عكسها كما تستحق.
هل جرّبت أن تحك ظهرك ما تحت لوحتي الكتف؟
ذاك هو حالي . .
إلا أن أجد العصاية ذات الطول و "العكفة" المناسبة لتقوم بتلك المهمّة، تكون آكولة الذكرى قد بردت.

بس قول يا معين!

[الرشيد اسماعيل محمود]

المشاركة الأصلية كتبت بواسطة عكــود

في الدارة أيضاً مبشّرين لا يشاركون في الصفوف، ينتظرون شبّالاً يترك نزّه أثراً على كتوف جلاليبهم. البعض متبلّم محاذراً أن تفوح رائحة مصفّى التمور منه. بعضهم يبشّر باليمين وعلى اليسار سيجارة يتصاعد دخانها على ضوء الرتاين مع ذرّات الغبار المُثار بفعل أرجل الصفّاقين، والبعض الآخر جعل من البطّاريّة "ذات اللون الفضّي و التلاتة حُجار" إمتداداً ليده المرتفعة للتبشير و التّي تراجع كف ذراع الجلاّبية عنها حتّى بان حجاباً ضاغط على الساعد.
[/COLOR]

ياسلام عليك..
ياعمدة ياخي وصف يمحَن الزول ويخلي يخت يدَو في خدَو ويعاين..
ياسلام عليك ياخي..
غايتو مقولة السهل الممتنع ياها قاصدين بيها جنس الوصف حقك دة..
محسن خالد في واحدة من تجلياتو السمحة ديك بوصي ليهو في زول قال:
ودس جسدك من نورك، ما يقصو دربك بالضُل،...
اها نحن تلقانا قاصين درب كتاباتك بالضل البيتكون بفعل الكتابة
المليانة ضي دي..
ياسيدي عيدك سعيد وكل الامنيات.
وربنا يرحم عبدالواحد.

[الرشيد اسماعيل محمود]

المشاركة الأصلية كتبت بواسطة عكــود

سلام يا جنابو،

الله يديك العافية ياخي، فقد ملأني غروراً حديثك عن النص (شكّلها كما تود ).
ليس لي سوى فضل المناولة فيما أكتب ولا أسميها نصوصاً. هي ذكريات عزيزة تتاورني بين الحين والآخر و أحس قردنتها، وفي البال الكثير منها. غير أنّي كثيراً ما أفشل في عكسها كما تستحق.
هل جرّبت أن تحك ظهرك ما تحت لوحتي الكتف؟
ذاك هو حالي . .
إلا أن أجد العصاية ذات الطول و "العكفة" المناسبة لتقوم بتلك المهمّة، تكون آكولة الذكرى قد بردت.

بس قول يا معين!

ياسلام..
بتعجبني حميمية الوصف حقتك دي..
ثم ياخي..
العصاية ذات الطول والعكفة المناسبة دي كان لميت فيها المرة الاولي
تاني ماتفكها..خليها قريب منك..بس المشكلة الآكولة تتحول لمكان تاني..
والعصاية بتبقي غير مناسبة..ولا شنو..؟؟
ياسيدي بوست سمح..
والمتداخلين سمَحوه زيادة..
تسلم ياخي.

[الرشيد اسماعيل محمود]

عمدة سلامات تاني..
عاجبني البوست والله.
انا بعتبر نفسي من الناس المحظوظين اللي طافو غالبية مناطق السودان
شرقا وغربا وجنوبا وشمالا..
في سنة 2004 كنا في قافلة صحية لمروي..
ياسلام ياخي..
مشينا مروي وتنقاسي..القرير وأوسلي وقطعنا للركابية والأراك والزومة ومقاشي ومرينا بجلاس وزرنا البركل وطلعنا الجبل الشامخ ونزلنا كريمة وزرنا السد وهو في بداياتو ورجعنا تاني مروي ومرقنا جينا لغاية الحامداب الجديدة
يعني رحلة طفنا فيها اغلب مناطق الشمال استغرقت اسبوعين ولا احلي..
عاشرنا فيها ناس جميلين بشكل واشتغلنا برناج صحي معتبر وناجح بشهادة
الجميع..مع انو الناس هناك مرضانين بس بالحنية الزايدة..
واتعرفنا عن قرب علي الطمبور وفي اي حتة نمشيها كان الطمبور حاضر فيها..لدرجة انو شايلينو معانا في الباصات.
ياخي من اجمل القوافل الصحية الانا امشيها..
الحكي فيها بيطول قدر ماحاولت اكتب عن الرحلة دي غلبني والله
ما لقيت العصاية ذات العكفة المناسبة عشان احك الآكولة دي..
تصدق..؟؟!!
اكتر حاجة مرتبطة في ذاكرتي ست الجمال حقت ميرغني النجَار..
كنا بنغنيها في البص لدرجة ماحفظناها..
ياسلام ياخي..
انا ماني باكي علي ضياع امالي فيك..
ولا حتي نادب حظي ساعة جابني ليك
وخلاص قنع قلبي القبيل ميَال عليك
يقنتو ياست الجمال..
علمتو مايشتاق يشيل الشوق يجيك..
ومع اني ياست الجمال
عارف جمالك في الجمال طاغي ورهيب
وعارف مشاويرك طوال ..
ولو ما ني عاشق كان مشيها علي صعيب
ياسلام ياخي
ياسلام..
ياعكود والله كنت ناوي الاغنية دي اتكلم عنها بصورة سمحة
بس غلبني ياخي..
دي من اجمل الاغنيات الانا بسمعها ويومي بكتشف فيها جديد..
الناس ديل مجانين كلام سمح..
اللحن حقها تقول فصلو ترزي عتيق يدرك تماما ماذا عليه ان يفعل.
هبشة:
القرير جنَة..
ولسع متذكر ست الجمال لما غنوها لينا في في مقاشي ونحن داخل
جناين المنقة..ياسلام ياخي.
و..
لوميني نا..
ما انتي الغدرتي وقلبك اختار زول سواي.

[عكــود]

الرشيد سلام والله يدّيك العافية ياخي . .

فرحان والله بشوفة حرفك النديان من تاني.

مداخلاتك محرّضة دايماً و تسلْ الكلام من الدواخل سلْ.
و عجبني كمان تحريك بركة ذكريات تلك القافلة فيك (عين بير وفتحوها)،
دحين أروينا منها بعد ما بلّيت ريقنا.

بجيك صاد شايل ملء الكفّين وفاتح أُكرة باب الحكي بالكوع.

خلّيك قريب.

[عكــود]

المشاركة الأصلية كتبت بواسطة الرشيد اسماعيل محمود

ياسلام..
بتعجبني حميمية الوصف حقتك دي..
ثم ياخي..
العصاية ذات الطول والعكفة المناسبة دي كان لميت فيها المرة الاولي
تاني ماتفكها..خليها قريب منك..بس المشكلة الآكولة تتحول لمكان تاني..
والعصاية بتبقي غير مناسبة..ولا شنو..؟؟
ياسيدي بوست سمح..
والمتداخلين سمَحوه زيادة..
تسلم ياخي.

عصايَ ستصبحُ مزلاجَ بابي
فما ليَ فيها مآربُ أخرى

بل لنا فيها مآرب وقضاء حاجات!
متل حديثك الفوق ده، ياها العصاية أم عكفة ذات نفسها
والآكولة ما بتتحوّل مكان تاني يا الرشيد
فالموضع و الموجع متطابقان.
طُفت معك رحلتك، وتخيّلتها تماماً
واعجبني إجترارك.

الصفّاقين يا الرشيد، هم أدرى الناس بظبطة إيقاع الرقصة . .
و الرقصة المشاترة ما بيجاملوا ستّها،
عندما يحسّون نشاز راقصة . . يتعمّدوا "يطرقوا الصفقة"
بمعنى يلخبطوا إيقاعها، فتتبَرْوك ناشزة الرقصة أكثر . .
و يكون مصيرها:
سوّت توبها فوق راسها وتقول كدي تجري تتدّسا.
أو كما غنّى ود اليمني.

يعني الأمر لا يخلو من غتاتة أراها مُسبّبة،
فلحظات الطرب الأصيل لا تدوم طويلاً.

جاييك برضو.

[عكــود]

أضربوا الكف...واعدلوا الصف..
جات أمونة ...تتنى..اتقول عرجونة...
أضربوا الكف...واعدلوا الصف...
جات أمونة لابسي الشف...
أضربوا الكف...واعدلوا الصف...
وخلوها اتخمج الدارة...
خايلات دبلتا..ونقارا..
خلتنا اتقولوا سكارى...
..لاكين نحنا ماني سكارى...فرحانين برانا..
ياهلنا ماني سكارى...ست الناس معانا..!

وهنا حسّون محد سعيد يحثّنا على ضرب الكف من أجل أمّونة وصويحباتٍ لها كم نقرشت ورائهن طنابير وكم غنّت لهن الحناجر . .
أجشّها ورخيمها.

[الرشيد اسماعيل محمود]

المشاركة الأصلية كتبت بواسطة عكــود

..لاكين نحنا ماني سكارى...فرحانين برانا..

ياهلنا ماني سكارى...ست الناس معانا..!

عكود تحياتي..

ياسلام ياخي..
فرحانين برانا دي ياخي كلام عجيب..
الناس ديل عندهم تعابير كدة ما بتنفات بالساهل..
الزول الفرحان براهو ده صحي زي السكران لأنو بيكون شايف حاجة
الناس ماشايفنها زيو..
اكتر حاجة لفتت نظري طبعا في زيارتي لمروي حكاية الصفقة والايقاع دي..
قدر ماحاولنا نحاكيها ماقدرنا وماعرفنا ليها..
يبدو لي لازمك إحساس خاص عشان تظبط الصفقة ..
بعدين الصفَاقين ديل ياعمدة عندهم حوار بيناتهم مدهش..
في صفقة بتحاور اختها..وصفقة مشاترة عن قصد في نوع من الانسجام
المشاتر(ماتقول لي كيف)..يعني صفقة بتسبق النغمة وتتلقَاها في اول منعطف جمالي ويترافقن الاتنين بعد داك.
وصفقة تانية بهناك كأنها بتغازل ليها نغمة طمبور..
ياخي انا بتخيل لي كل اصبع عندو مهمة محددة مفروض يقوم بيها..
ياسلام ياخي..
ملحوظة:
انا هسع فرحان براي.

[abu qusai]

سلام يا عكود
حكي شبيه أم راس السال عسلا ونقط فوق العرجون زي ما قال السر ... ويا لون الفرح إنشر في جبين جدي التربال اللمة المسرة ... والله يا عكود أثرت جنس حاجات الله وحده يعلم بيها ... لعوب العروس ولعوب الأعياد واللعوب المتواصلة زمن السيد محمدعثمان جاي البلد لا حولا شهور اللعوب شغالة ... وفي أساطين الطمبور ما تنسى عبد القادر عبد الله حوة (ود بت مأمونة) ومحمد علي ود سقيد والد الفنان جعفر السقيد وقبلهم حبيب عوض الله وما تنسى أستاذ الأجيال الراحل حسن الدابي فقد كان عازفا ماهرا للطمبور والقائمة طويلة إلا أن أب خبتة وجد حظه من التوثيق عند السر عثمان .. في رنين أوتار طمبور أب خبته الفجر صمت ليالي الشاطي ... واب خبتة باسم قادل يطمبر ..
ويا حليل زمن عشان خاطر عيون أضحي بروحي وأصونك والصف كله يغني ..
لك التحية مرة أخرى وتحية لكل ضيوفك .
أبو قصي

[عكــود]

وأنا فرحان يا الرشيد بس ما براي
فرحان بطلاّتك وباصاتك السمحة دي!

اكتر حاجة لفتت نظري طبعا في زيارتي لمروي حكاية الصفقة والايقاع دي..
قدر ماحاولنا نحاكيها ماقدرنا وماعرفنا ليها..
يبدو لي لازمك إحساس خاص عشان تظبط الصفقة ..

والإحساس ده ما بيتعلّموهو، يا يكون أصلاً موجود ويمرقو الدليب، يا كمان ماهو في وما ليك في الصفقة نصيب. كتير من الناس الإتربّوا هناك ما بيعرفوا يظبطوهو (قسمة ونصيب ).

بعدين الصفَاقين ديل ياعمدة عندهم حوار بيناتهم مدهش..
في صفقة بتحاور اختها..وصفقة مشاترة عن قصد في نوع من الانسجام
المشاتر(ماتقول لي كيف)..يعني صفقة بتسبق النغمة وتتلقَاها في اول منعطف جمالي ويترافقن الاتنين بعد داك.
وصفقة تانية بهناك كأنها بتغازل ليها نغمة طمبور..
ياخي انا بتخيل لي كل اصبع عندو مهمة محددة مفروض يقوم بيها..

ياخي والله ده وصف عجيب وصحيح تماماً!
فعلاً مرّات واحد من الصفّاقين بيشترا بقصد، لكن هو بيكون عارف يرجع المُجرى كيف و متين، وباقي الجماعة ما بينزعجوا منّو، بل بيساعدوهو ويجاروهو.
وحكاية كل أصبع عندو مهمّة دي برضو صحيحة إلى حد ما، فوضع الأيادي أثناء صفقتهِن بيكون حسب إيقاع الدقّة. يعني مثلاً، الرتْرَتو -دقّتو سريعة- بتكون صفقة الإيدين قريبات من الصدر. أمّا الجابودي بيتباعدن الإيدين ويتلمّن قصاد الركبتين وهِن طالعات لي فوق وكذلك دقّة الحُـمْبَـيْ.
دقّة الإيقاع الشايقي بيكونوا الإيدين قريبات من الوسط في فرقتِن ولمّتِن.

و برضو راجع لك، بعد ما أشوف أبو قصي السخّن الدارة ده! وهو من الصفّاقين المشهورين.

[عكــود]

سلام يا أبا قصي وليك وحشة والله،
وبركة حس النقّارة ده المرقك!

حكي شبيه أم راس السال عسلا ونقط فوق العرجون

والله عاد ما فضّلت من الشُكر فرضاً ناقص، تسلم ياخي.
السر عثمان عندو وصف بديع.

كان الناس هناك محيّنين بالفرح ومعبيين وقاعدين على الهبشة. لعوب الأعياد ولعوب المناسبات المهمّة كانت لازمة ضروريّة للفرح كما كانت مناسبات لقيا وترفيه في زمن لم يكن للتلفزيون فيه من نصيب ولا لتعقيدات وسائل الترفيه الأخرى.
وما زلت أذكر عبدالقادر ود عبدالله حوّه بطنبوره وشخصيتّه المرحة و "المرّات" مشاغبة.
و ما دام جبت طاري "عشاااان خاطر عيونِك، أضحّي بروحي وأصونِك" لا بدّ من الترنّم مع زميلك عثمان سليمان (صاحب أجمل صوت غنّى شايقي) في:
يا الناسينا حبّك في ربيع دنيانا شال نوّر
أطراك كل ما اشوف لي عريس فرح في صحابو قام بشّر
وأطرااااك
إلى باقي أبيات رائعة السر البتبدأ ب "أطراك".

يا ود كتّي،
مداخلتك الفوق دي ما أشفت الغليل، وأنت من الذّين كم خجّوا الدارة وكم أدّو الرتاين نَفس وحقنة.
دحين آ خوي راجيك تدّينا من الطامرو في بطن الذكريات.

[abu qusai]

فات علي أن أترحم على (العم) عبد الواحد محمد صالح سراج النور .. تقبله الله القبول الحسن .. اللهم أغفر له وأرحمه واسكنه فسيح جناتك مع الصديقين والشهداء وحسن أؤلائك رفيقا .
وتااااااني راجع يا بلادي ..
ابو قصي

[عكــود]

اللهم ارحمه واغفر له
فقد كان فذّاً في كل شئ.


راجيك

[Nour]

اخي عكود لك التحايا ونسال الله لعبدالواحد الرحمة والمغفرة, في ردك علي الاخ الرشيد اريد ان استعير كلمتك بان الصفقة الموقعة قسمة ونصيب وكذلك الكتابة قسمة ونصيب والله اعطاك منها الكثير ومع النصيب يبدوا ان للوراثة دور خاصة باني قد قرأت لاخاك الكامل قصيدة رثاء الوالد فهي تحفة بحق , وكما قال لك الاخ معتصم الطاهر بان تاخذ الكتابة علي محمل الجد ولا اجامل ان قلت انك بارع واكثر.