الثلاثاء القادم 14 ديسمبر الليله الثقافيه الثانيه

[نبراس السيد الدمرداش]

السلام عليكم احباب سودانيات اعضاء و زوار

قبل شهرين او تلاته كانت فكره و حلم سعينا و اجتهدنا و الحمد لله اتوفقنا و نفذناها بتشجيعكم جميعا و وقوفكم معانا اصبح الحلم واقع و حقيقه تمشي بيننا

لا يخفى عليكم و على كل من تابع عن قرب و كثب التعب و المجهود التم بذله لانجاح الليله الاولى جهد معنوي ,بدني و مادي حتى خرجت ليلتنا الاولى كما سمعتو و قراتم عنها و شاهدتم صورها وقريبا الفيديو (مفترض يكون بطرفك قريب جدا طارق الحسن)

الان نحن على موعد مع ليلتنا الثانيه و التي نتمنى ان تبز اختها من حيث التنظيم و المواضيع ونتمنى لها النجاح ايضا

فقط
نحتاج دعمكم جميعا
دعم بالافكار و التصورات الممكن تكون عليها و المواضيع
دعم مادي حتى نقدم ما يرضيكم/نا

اعضاء الداخل جميعكم ارجو التواصل بكثافه خلال هذا الاسبوع حتى نتفق على تفاصيل ما يمكن عمله

[طارق الحسن محمد]

شكرا لكم
جميعا
تحدثت مع الاستاذ والقامة
جعفر بدرى قبل يومين
تلفونيا
معكم
قلبا وقالبا
ما تشيلو هم
احلامكم لابد ان تكون حقيقة
ولكن بالدعم والدعم السخى
مودتى

[نبراس السيد الدمرداش]

طارق ازيك و عساك فاين زي ما بقول زول الله
طول ما انتو كلكم حولنا اكيد ما بنشيل هم
فقط هو الطمع في تقديم ليله احسن من الاولى
خليك قريب و ورينا انتو عملتو شنو

[عبده سعد]

تحياتى نبراس وطارق .
التاريخ معروف.
المكان لسع؟.
الأتصال بى منو؟
الدعم المالى محدد؟ أم مطلق؟
البرنامج برضو شكلو كيف؟
(نحنا حجاج داخل)

[احمد زين]

المشاركة الأصلية كتبت بواسطة عبده محمد أحمد

تحياتى نبراس وطارق .
التاريخ معروف.
المكان لسع؟.
الأتصال بى منو؟
الدعم المالى محدد؟ أم مطلق؟
البرنامج برضو شكلو كيف؟
(نحنا حجاج داخل)

مرحب بيك عبده
اجابة على اسئلتك
المكان نادي الشاطئ بامدرمان نفس مكان ليلة الافتتاح (ودي فاتتك)
الدعم المادي مطلق
اتصل على اي زول يعجببك من ناس الداخل بس بنصحك بي نبراس
البرنامج تحت التداول الان
لو عندك اي اقتراح لموضوع يكون عنوان للمنتدى مرحب بيك
مودتي

[ناصر يوسف]

المشاركة الأصلية كتبت بواسطة عبده محمد أحمد

تحياتى نبراس وطارق .
التاريخ معروف.
المكان لسع؟.
الأتصال بى منو؟
الدعم المالى محدد؟ أم مطلق؟
البرنامج برضو شكلو كيف؟
(نحنا حجاج داخل)

الحاج عبده محمد أحمد

مبروك الحج والسعي والطواف ما بين أمبده وحلة كوكو والحاج يوسف والجيلي والكلاكلات

أها ممكن نقول ليك حبابك بالأول كقلم يزيد من ألق سودانيات ؟؟

حبابك تب يا زول


د. أحمد والأخت نبراس ..

الوقت أصبح ضييق كالعادة يااااااااااااا سعادة

أها آخر الترتيبات شنو ؟؟

أنا سأكون خارج ملتكم هذه المره بفعل التأكسد الغير حميد الذي ظلَّ يلازمني بكل كل العناد

وربما أكون حاضراً مساء الثلاثاء دور الجاي بنادي الشاطئ

أرجو أن توضحوا لبقية الناس بالإحتياجات


يعني الليلة التانية دي محتاجه لي كم من القريشات علشان الناس تتكاتف سريييييييييع

وأنا عارف الليلة الفاتت عملت في جيوبكم شنو

عموماً الأيد الواحدة ما بتصفق

ولا شنو

أرجو إيراد رقم جوالك يا بتنا نبراس هنا للجميع وجوال أحد محمد زين أيضاً كشئ عملي

سلام

[نبراس السيد الدمرداش]

سلام عليكم جميع

اول شيء بكرا الثلاثاء الساعه 4 اجتماع سريع و بدون تاخير رجاء في الاسكلا
نتشاور بخصوص البرنامج و احتياجاتنا

ثانيا الميزانيه ما نقدر نحدد محتاجين كم مالم نحصر برنامجنا
بس زي ما قال احمد سقف لدعم مفتوح

رقمي 0915971159

[سمراء]

الاعزاء جميعا ً
كانت الليلة الاولى حدث يتحدث به جميع من شهدها
نتمنى ان تكون الثانية اروع واشمل ....فقد كانت الاولى محشودة بالكثير من البرامج
والتى لم يسعفنا الوقت لتغطية كل البرنامج المخصص لها ..
عليه نتوقع ان تكون التانية اكثر ترتيبا وتركيزاً

وحقيقه خلقنا قاعده كبيرة وسط المثقفين والمستنيرين والادباء ...
وسنتوقع لحضور الليلة الثانية كثيرمن رجالات الادب والاعلام الذين وعدو بالحضور والمشاركة ...

فقط ....نحتاج التكاتف من الجميع
الدعم المعنوى ...يكافى المادى للخروج بما يرضى ويشبه اعضاء وضيوف
واصدقاء سودانيات ...التى باتت معروفه وسط الكثيرين

[عبده سعد]

اقتباس:
المشاركة الأصلية كتبت بواسطة نبراس السيد الدمرداش
سلام عليكم جميع

اول شيء بكرا الثلاثاء الساعه 4 اجتماع سريع و بدون تاخير رجاء في الاسكلا
نتشاور بخصوص البرنامج و احتياجاتنا

ثانيا الميزانيه ما نقدر نحدد محتاجين كم مالم نحصر برنامجنا
بس زي ما قال احمد سقف لدعم مفتوح

رقمي 0915971159



تحياتى /والتلفون قدامنا ياهو،وبالمناسبة شوية خلو(العين قوية) ووضحوا الشغل،عشان برضو بعدين يمكن تظهر ليكم نواقص ،وفى الحالتين يا اما الدفع حيكون من أكتر اتنين أو تلاتة مهتمين ،ياكمان مشيتو الشغلانية ناقصة وفيها (بعض الحرج)عشان كدا من البداية (كربو)الدفع وكان فضًل بنفع للجايات ولاشنووووو؟

تخريمة:بالطريقة دى حنكون ملاوزين ياربى المبلغ معقول ولا شوية؟؟
لكن برضو الردود خلوها بعد الأجتماع التحضيرى يمكن تلاقو مؤشرات.

[نبراس السيد الدمرداش]

ازيكم
اتضح انو بكرا عطله
اها الراي شنو على موعدنا ولا نغيرو

[سمراء]

غداً باذن الله الاجتماع
المكان : الاسكلا
الزمن : الساعه 4 باذن الله

الرجاء عدم التاخير لدواعى امنية

[ناصر يوسف]

المشاركة الأصلية كتبت بواسطة سمراء

غداً باذن الله الاجتماع
المكان : الاسكلا
الزمن : الساعه 4 باذن الله

الرجاء عدم التاخير لدواعى امنية

عذراً سمراء

لظروف العمل قد أصل بعد الساعة السادسة

لو حألقاكم خبروني ...

موفقين بمشيئة الله

[احمد زين]

المشاركة الأصلية كتبت بواسطة ناصر يوسف

عذراً سمراء

لظروف العمل قد أصل بعد الساعة السادسة

لو حألقاكم خبروني ...

موفقين بمشيئة الله

والله يا ناصر انا مستغرب من عدم تفاعل الاعضاء مع الحدث
يا اخوانا واخواتنا البوست ده مفتوح لمناقشة الامور التي تهم المنتدى الثقافي
معقولة خلال الخمس يوم الماضية فيهو 11 مداخلة من 6 اعضاء
والله عيب

[ناصر يوسف]

المشاركة الأصلية كتبت بواسطة أحمد محمد زين حسين

والله يا ناصر انا مستغرب من عدم تفاعل الاعضاء مع الحدث
يا اخوانا واخواتنا البوست ده مفتوح لمناقشة الامور التي تهم المنتدى الثقافي
معقولة خلال الخمس يوم الماضية فيهو 11 مداخلة من 6 اعضاء
والله عيب

نعم يا أحمد التفاعل هو المطلوب وأظن إنو الناس متفاعله بس ما هنا عبر البوست ده وربما متفاعلين في مكان آخر ..
والغائب عذرو معاه ..
وبعدين الساعه أربعة بالعصر دي يا شباب كيفن نقدر نجيكم ؟؟

يعني أنا مثلاً بطلع من مكتبي الساعة 4:30 عصراً ..

وقول مرقت علي طول وقلت جايي عليكم ..

عاوز لي زي ساعة وربع بس سواقه بالعربية لغاية ما أصلكم من مكان عملي

أها شنو ليك ؟؟

[جانيت]

امس جهزنا وقلنا ماشين الاسكلا
الليلة كمان نجهز ونقول ماشين الاسكلا انتو عايزين لينا طردة من البيت ول شنو

ول ارحل براي عشان كل يوم اجي الاسكلا

طيب حضور بدل النقة الكتيرة وجاهزين جاهزين لحماية الدين

ماحاتاخر زي المرة الفاتت لانو بس لولا الظروف ماتاخرت