المادح المسيح: علـي المبــارك

[محسن خالد]

ورد في تموليلت قبل ست سنواتٍ

آمنة امرأة مؤدّبة وتقية، ذهب بها ابنها العشريني إلى الحج، تعارض النميمة والفُحش منذ رأت قبر الساكن أم صيني:
كدي آبت افتحي الشي دا، -الراديو-، إمكن تجينا مدحة، علوية شدّاها عاد.
ما فيهو حُجار آخالتي آمنة، تزوِّر البنت، فهي شابة ومراهقة، طاعم لسان علوية الفالت وألا المديح؟
حاجة آمنة إبليسة: عاد إنت آلممسوخة! عاجباك طمسة المطموسة دي.
تمدح آمنة، للشيخ علي المبارك "الصوت الجارف والوحشي"، فَذّ الجمال:
شوووقك شاويني
طاااهِا يا الساكن أم صيني
وشوووقك شاويني
***
آآهييي...
لاحن لي بروقاً من جيهة البلد الفيهو يقيني
ويا ألله تحلحل قيدي توديني
وشووقك شاويني.

مدحة آمنة تحمّسها، تُغبِّش لها جيداً غَواية علوية، فتقول: هووي آعلوية، كان كدي قولينّا قوموا ساي، خربتيهو الكلام يا بت أمي.
(خيبتيييها الهدرة!).
تطالبها النعمة، صَرفاً للغلاط، هَيْ يا يمّة ختّيلنا الودع، والله (الربل) المسيخ وأب ريحةً رجال دا بمرق لي الجبنة من نفسي.
لا عَجَب، فالغيب ضرب من ضروب أمزجة الناس.
تدلق علوية جُراب الودع الصغير، على خطوط الرمل في ضارب الأرض والقَدَر، ثم تستعدل كَشَرها، تُضايره، كي تتكلم. أصابع يدها المعروقة تنغرز بين خطوط وحَبَّات مصيرها، صَدَف الودع، وظيفتها أن تُفَلِّي مصيرها ومصائر الآخرين إلى الأبد. إذن لن تجامل أحداً مهما كان في الطريقة التي تقضي بها يومها، أو تُعَبِّر بها عن حالها، والوحدة تساعد الإنسان على استنباط السخرية، وملاحظة الوجود بمشرط. الذي بوسط القطيع لا يلتمس من وجوده سوى أذناب من معه وجشائهم، والتفاته مع ضراط كل من ضرط.
"هووي يا آمنة، املي بطاطيرك ساي، وخلينا من علم أبو جليقة اللِّيلك دا، الساكن أم صيني فوق عديلو، سمع أضاني دي، قالوا راجلك محمود سروال صلاة الجمعة ما عندو ليهو طَبَيق".
"التاية" قرقارة وكاواية هي الأخرى، كدي يا يُمَّة، عافية منو محمود ود عمتي، باقي الأسبوع أم ميطي ساااي مع حاجّة أمونة، وصارعِني وأنصارعَك!
النسوان ملاعين، وأفحش وأشطن من الرجال حين خلوتهن، حاجّة أمونة إمّا أن تحرد حجّها، وإمّا أن تحرد تتبع أخبار ولدها المغترب، حيازة علوية.
(املي بطاطيرك ساي) هنا الريف تيكنيكس، الحُلُم، الحب، الأخبار، السينما، أفلام البورنو، الفياغرا، ومجمل حياتهم ينجزونها بتحلّقهم حول صَدَفة الودع الشيطانة هذه، والمأمول لها أن تنفذ عبر السرمد والعوالَم الخبيئة كلها وصيرورتهم القاسية.

هذا المقطع

آآهييي...
لاحن لي بروقاً من جيهة البلد الفيهو يقيني
ويا ألله تحلحل قيدي توديني
وشووقك شاويني.

ممّا ألّفتُه بنفسي للمدحة حينما كنتُ أقولها للأصدقاء بالجامعة موسى حسن وأشرف السر وحافظ عركش والصحابي الصادق وكمال أحمد المصطفى.. إلخ
ما بتعرف، مش؟ يضحك نهاركم

[محسن خالد]

وجدي يا عزيزي شكراً جزيلاً على البورتريه الذي أكرمت به تلك الروح الفالتة.
عن ابن المُبارك أعرف الكثير مما لم يقع عليه الناس، ولكن روحه غالبتني، لم أجد منفذاً إليها.
يا وجدي مشتاقين

----
البورتريه بتاعك دا قابلني زمان وعجبني ولما أكن أعرفك وأذكر أنني لفت إليه إيمان شقّاق.

[أسعد]

عن ابن المُبارك أعرف الكثير مما لم يقع عليه الناس، ولكن روحه غالبتني، لم أجد منفذاً إليها.

أها يا مبر شوفت كلامي مشى وجاء كيف !!
بس عشان تعرف أنه أخوك كاهن كبير ويرى ما لا ترون
عشان كدة قولنا ودعونا الله أن يعزنا بإحدى الحسنين في محسن دا

أسي عليك الله يا مبر موش حق ود المبارك راح في الكرعين


بالمناسبة يا سحس
كلامي وجهتو لمبر لأني زعلت بالجد من ردك الفوق دا
أما باقي حديثك عن شخبتي (الكمبيوترية)
أنت قايل ما كبشرتها وحفظتها كصورة
لانو منتدى خالد دا ما مضمون للتلاتين سنة القادمة

[أبوبكر عباس]

المشاركة الأصلية كتبت بواسطة وجدي الأسعد الأسعد

أها يا مبر شوفت كلامي مشى وجاء كيف !!
بس عشان تعرف أنه أخوك كاهن كبير ويرى ما لا ترون
عشان كدة قولنا ودعونا الله أن يعزنا بإحدى الحسنين في محسن دا

أسي عليك الله يا مبر موش حق ود المبارك راح في الكرعين


بالمناسبة يا سحس
كلامي وجهتو لمبر لأني زعلت بالجد من ردك الفوق دا
أما باقي حديثك عن شخبتي (الكمبيوترية)
أنت قايل ما كبشرتها وحفظتها كصورة
لانو منتدى خالد دا ما مضمون للتلاتين سنة القادمة

الكاهن الأكبر
تحياتي
عليك سيدي الحسن
أشرح لي مداخلتك الفوق دي*

هامش:
* و الله العظيم يا وجدي مداخلتك دي ما وقعت لي
عشان كدا طلبت منك تشرحها..

[أسعد]

بكور ازيك ياخ
الكلام دا امتداد لونسة شاتية مع مبر
كنت قولت ليهو إن شاء الله محسن ومحمد حسبو يتشاكلو ويحتوهو قرض مع بعض
أو إنه ربنا يرجع محسن للسودان
لأنه محسن دا الشايلو بهد جبال راسها عديل
وفوق لي طاقته ... عشان كدة أي حاجة تهبشو فيها بتلقاهو عندو لكن ما بقدر يعتلها ويجيبها لحدي عندك (يعني المشكلة مشكلة مواصلات)
لكن إلا في حالتين
الحالة الأولى إنه يتشاكل مع محمد حسبو ... ودي لانو محمد حسبو ناقد حاذق و عينو نجيضة وحكاك لمن بجيب الطايوق
وهنا محمد حسبو بحكو لمحسن بمرق منو المحسن ما قادر يمرقو

أو إنه محسن يرجع السودان
عشان يقدر يسخر الحاجة الشايلها دي في الشارع

لكن قعادوا في البلد الملاحها ساقط بخليهو بتاع مؤتمرات وسنمارات زي ضل الدليب يرمي بعيد في ناس ابن بطوطة وانت ماش

عليه يا بابكر
القصد من مداخلتي إنه محسن بقى زي السوبر ماركات الحديثة ... أي حاجة متوفرة لكن حاجتك الدايرها تمشي تجيبها براااااااااك ... لكن هو ما بجيبها ليك زي دكاكينا القديمة

[محسن خالد]

وجدي يا جميل، تحيات وحب
إنت دايرني أرجع الشمال يا عزيزي؟ يضحك نهارك!
---

أجدُ في نفسي، ما ينتمي بقوّة لمُطاردي الحضارات ومتتبعيها المعجبين بإرادة الإنسان الخلاقة صانع هذي الحضارات. وأعتقد أنني شبعتُ من هذا السودان الشمالي، الذي له أهرام دون حضارة تترامَى تحت ظلاله. فتلك الحضارة الظل، الحيّة والمُدوّنة على الإنسان نفسه لا الحجارة، ستعيش في الجنوب وسيتراجع شقٌّ ضخم منها مع تراجع الحدود.
لو انفصل الجنوب، وليت هذا الفرض كان كابوساً حالما ينقشع، ولكنه الواقع للأسف! لو حدث هذا، فستواجه الدولة الجديدة أزمة كُبرى على مستوى "مصادر التاريخ" و"تحديد البُنى الثقافية الداخلية" لدولة ناشئة وكاملة لا إقليماً فحسب كما في السابق. ولن يستطيع أيُّ مُنَظِّرٍ كان أو مُفَكِّر تسمية ذلك بأنّ الدولة الجديدة في الجنوب ستواجه أزمة هُويّة وجودية حادة، فهويتنا الوجودية جميعاً هي الإنسان كما أسلفت وكرَّرت. ولكن ليس بوسع هذه الدولة الناهضة في الجنوب أن تقول إننا أفارقة أو كوشيون -هكذا ببساطة- وتكتفي وتقنع بذلك، هذا مستحيل لمن تأمّل وتدبّر في ثقافات العالم وأبنية حضاراته وسمتها. مستحيل بالمرّة، إذ لا بُدَّ من جهود جبارة على مستوى تأسيس الثقافة النظرية لدولة ثانية، وهذا من خلال ضبط وتحقيق ممنهج يقيها شر التبعية والارتهان غير المدروس لإشكالات الماضي مع الشمال، وفي ذات الوقت لا يقطعها ولا يبتها عن المصادر التاريخية المشتركة لها مع الشمال. هذا ضروري ولا محيد عنه، ما دامت ستنشأ هنالك دولة تامّة، لا إقليماً يقع في تخوم الثقافة السابقة التي تشظّى عنها. وهذه المشكلة ستواجه الجنوب فقط دون الشمال، لواقع تأسيس الشمال القديم في موقع الحضارة المادية للكوشيين وعلاقاته التاريخية، ولواقع أنّ الشمال كان قلباً لتلك الدولة البائدة، ويسهل فيه تعريف الكوشيين وكذلك الإسلاموعربيين بحيث لا يحتاجون لتعريف من أساسه. إذن سيتابع الشمال مسيرته السابقة فحسب، وسيستمر في أوهامه الماضية التي سبّبت هذا الانشطار في ذاته بعمل من برجوازية شمالية صنعها الإنجليز. بل ستتمتّن هذه الأوهام الاستعرابية أكثر مما مضى، لعامل خفوت السطوع لشمس الشمال نحو بيئتها من الأفارقة ولو مظهرياً على مستوى الديموغوسياسي*.
ولكن ماذا عن الجنوب الذي لا يمتلك متحفاً واحداً من أي نوعٍ كان، ولا داراً للوثائق، ولا شُعَباً خاصّة به وحده في مصر أو تركيا أو بريطانيا حيث نُقِلت أو سرقت الوثائق السودانية وحفظت على نحوٍ يعرّف ويدل على الشمال لا الجنوب. لأنَّها رُبِطت بالأساسات المادية للحضارة السودانية، وهي تُوجد في الشمال وحده دون الجنوب. كما لم تُبْنَ في الجنوب وزارة واحدة من خلال إرثٍ ومصادر ذاتية من لدن واقع ثقافاته مُفْرَدَةً. فالحقيقة أنّ الوزارات كانت اتحادية تعمل في الجنوب بوصفه إقليماً. ومحتواها كلّه، البنيوي والثقافي والأيدولوجي والرؤيوي، وتقاليدها وأدبياتها كلّها، الظاهرية القشرية، كل ذلك، ينتمي في جوهره للرؤية الشمالية، حصراً ووقفاً. إذ لم تكن تلك الوزارات تمثل تصوّراً ثقافياً ومرجعياً للجنوب في أي وحدة من الوحدات أو تفصيلة من التفاصيل. وهذه الإشكالية ستكون خطورتها بدرجات أكبر ناحية التربية والتعليم والثقافة والزراعة والتصنيع والرعي وستؤثّر على العلاقات الدبلوماسية والحضارية للدولة الناشئة مع جيرانها أجمعين، من خلال مفاهيم الثقة والتوجّه الحضاري، والتجاري، والثقافي، وتبادل الخبرات.

وهذا كلّه يحتاج لمنظرين ولمؤسِّسين معرفيين، بمواصفات الفكر والثقافة البحتة لا السياسة الجهولة، من أجل توفير البنية الأولية الحضارية النظرية لهذه الدولة من المراجع والمصادر التاريخية والتأسيسية، وربط ذلك كلّه ببؤرته الثقافية وآصاصه الإنسانية. فدعني أقلْ في هذه المناسبة، إنّ الحركة الشعبية محتاجة لكوادرها ومحبيها المؤسَّسين والناضجين من أبناء الشمال أكثر منه في أي يومٍ كان فيما مضى. فالموضوع ليس باليسر الذي يجعل ضعفاء العقول يقولون إنّ الحركة أكلت أبناءها من الشماليين لحماً ورمتهم عظماً، فهذا يوم حوبة المثقفين الشماليين إن كانت الحركة تدري ذلك، أوَ حقاً هي تدري ذلك؟
**

فلو جابت ليها مشي للسودان يا وجدي، غالباً سأسير جنوباً، لقد يئست من هذا الشمال الذي تتحَكَّم فيه الجبهة الإسلامية ويا قريب في القضارف دي، عمر البشير يسوي في جنس كلاماته المُحْبِطة والعايرة تلك. وتكفيني قُطيّة متواضعة بالقرب من كنيسة واو، فطور فول، غداء ويكة مع سلطة خضراء، وعشاء فول، وبرضو حق المريسة عليهم، ههه، ونظبّط البنقدر عليه، الحقيقة الموضوع محتاج لخُطط ثقافية ضخمة وطويلة المدى، مبتكرة ومقارنة بالواقع الميداني. كي نفي ذلك البيت العظيم.. العظيم، والخالد.. الخالد من معلّقة عبيد بن الأبرص حق إنسانيته وكفايته المجريّة:
ساعد بأرضٍ تكون فيها ... ولا تقل إنَّني غريبُ
والمرء ما عَاشَ في تكذيبٍ ... طُولُ الحياةِ له تعذيبُ

لكن باقيلك ناس الحركة الشعبية ديل شايفين الكلامات والمشاكل الجنس دي؟ الكلامات دي كبيرة بالجد، ومن نوع القَطْعُو كبير وشَبَحَو واسع، والمنتبهين ليها نادرين. والناس الكانت بتبرطع نضال.. نضال دي، قليلٌ منهم من يفهم أنّهم انتهوا من النضال الأصغر وجاءهم النضالُ الأكبر.





-------
بابكر عبّاس مشتاقين يا زول
خت ليك حرف في نجري للمصطلح دا واقسم معاي، شايفك زمان ختيت ليك حرف في واحد برضو من نجري وقلت يتذكروك برضو ههه

[أسعد]

فلو جابت ليها مشي للسودان يا وجدي، غالباً سأسير جنوباً، لقد يئست من هذا الشمال الذي تتحَكَّم فيه الجبهة الإسلامية ويا قريب في القضارف دي، عمر البشير يسوي في جنس كلاماته المُحْبِطة والعايرة تلك.

بخ بخ بخ يا قول المسلسلات الدينية
طيب يا محسن لو السودان دا ما بتتحكم فيهو جبهة اسلامية ورئيس أقواله وأفعاله عايرة ومفنجطة وكان السودان ينعم بديمقراطية سحا غدقا وشبعان حرية لمن بتكرع
يبقى تاني شين بندور بك
ونسوي بيك شنو زاتو
ياخي مالك داير تبقى لينا مسقف سوداني
وأنا الكنت بحسبك اتجردت من العادات السودانية والتي تتربع في أعلى هرمها (الشفقة)
أنت يا سحس المفروض ما تفكر في الحاصل أسي
سواء انفصال أو تلويح بتطبيق شريعة وإعادة تدوير أفغانستان مرة أخرى
وظهور عجاجة طالبان على ضهر شمال السودان
الكلام الحاصل حاليا دا كلوووو المفروض ما تشتغل بيهو يا سحس
أنت وأنت الوحيد المفروض تشتغل لي بعدين
وبعدين دي مقدرة بي كم وتلاتين سنة

أسي فرضاً إنه الكيزان رفعوا الراية البيضاء ورحلوا من السودان
أنت قايل خلاس حال السودان بنصلح؟
هههه
كدا يادوبك جاء عهد الجكاكة
ومن ثم يعقبهم عهد الجرادل
ومن ثم يليهم عهد البراميل وانت ماشي

يا سحس شعب السودان قائم علي الغلط من عاداته وتقاليده وثقافته
يبقى يا معلم المفروض تشتغل في الحتة دي زي جنس مقالاتك بتاعت أنانيا صفر و طورانية التلقي
ياخ والله بالغت فينا يا محسن

ثم بعدين اختيارك للجنوب على أي اساس؟
يعني اسي انت قايل الجنوب ح يكون احسن حالاً مننا ؟؟
ههه
ياخ ديل ح يكونوا كوبي بيست لينا
اللهم الاختلاف بكون في الديانة
لكن غير كدة تحلف تقول دا حمد وداااك حاج حمد


------------------------
طبعاً رؤيتك في مشكلة الجنوب كدولة مجثوثة التاريخ
دي شغل مية المية كما عودتنا في نظرة قلوب العارفين

[أسعد]

عن ابن المُبارك أعرف الكثير مما لم يقع عليه الناس، ولكن روحه غالبتني، لم أجد منفذاً إليها.

غايتو بنشكر بروف ودالقرشي علي سهرته الجميلة دي
أحسن من جنس غتاتة وكسل محسن خالد
http://www.sudanradio.info/arabic/mo...er.php?id=1407


اليوم عشت سهرة نهارية بالليل في حضرة علي ود المبارك وشيخه أحمد ود سليمان برواية بروف ود القرشي
سهرة من الجمال بأن تحيل ليلك نهارا