لا يُفَتَّرُ الحُزْنُ عَنَّا، ودَمْعُنَا لا يَرْقَأ
ياخي دي حاجة بطَّـالة بـطّالة، أمس بالليل اندحرت روحي لأسوأ قاع لم يكن يمتلكه تصوري، ولقيت روحي برجف كلّي وليس لدي قدرة على الهرب لأي مكان، ولا لفعل أي شيء. اتدمدمت من وكتاً بدري ودي ما سويتها يمكن لأكتر من عشرين سنة، وعديت الليل كلو بهضرب، والله صحيت ولقيت نفسي ببكي في النوم، من الساعة تلاتة لصباح اليوم، ولا رغبة لروحي حتى في التوقف لتأمل هذه الفاجعة. دي حاجة بطَّـالة بـطّالة، وضربة كبيرة.
ليشنو وكيف ولياتو حكمة لقيت كلمات الغنية القديمة دي بتمشي في مؤخرة رأسي بأرجل منشارية لموسيقى تصويرية جارحة لدمع منهمر مني، ومن ناس تانين كتار ومن كائنات ما لينا كلّنا حيلة، والله ما عندنا حيلة ولا قدرة. رحيل خالد الحاج ضربة يا ناس، ما موت، ضربة تشيل ناس كتار وديار وعَمَار وخيِّرات وأخيار وتفرتك الحافل وتزيد الجافل سوط. كتلتنا فيك كبيرة يا خالد، ضربتنا فيك أكبر من حيلنا.
سلامة الضربة الفي القردود
أم رَدَمي الضربو جناينه
جاسوس دا غدار
خلانا عشان نسيب دارنا
السودان يا أخواني
فوقا نعمة لكن ما محظوظ
البدور يا ناس سلامة
إيدينا ليه اليوم ممدود
المدنوب ميرغني
الحكامة سألتني
عن قردود أم رَدَمي
بلدي بلد قوز
والرمالة..
بلد السودان عمومي
التعديل الأخير تم بواسطة محسن خالد ; 08-02-2011 الساعة 09:55 AM.
|
