عفوا صفيــة ... الاكذوبة الكبرى ... اسئلة مشروعة !!!

[الرشيد اسماعيل محمود]

سلامات يامحمّد..
الرواية القالتها صفية حسب الفيديو فيها ثغرات كتيرة..
رواية ما متماسكة علي المستوي النظري..
بس كمان حكاية بت يتم اغتصابها وتمرق تقول انا ياجماعة اغتصبوني..
دي بتخلخل تماسك نقض الرواية الأم.
إثبات عدم صدق كلام صفيّة، هل بينفي انو في جرائم مشابهة..ترتكب بصورة متكرِّرة..؟؟
قول طلعت كضابة، هل بيعني خلاص الحاجات مشت كويس، زي ماقالت البت..؟؟
أنا فهمت قصدك يامحمد..انا فهمتك (زي ما قال زين العابدين)..
انت عايز الناس تناقشك في اطار قراءتك للحكاية، بس ياخي من الصعب
انو الناس تتجاوز ربط الحاجات كلها واستصحاب ذاكرة مليانة بالقهر والكبت والجرائم والدماء..
فهنا ياصاحبي ما بينفع حصر الموضوع في سياقه..
عشان السياقات مربوطة بحبل متين..حبل ظالم وقاهر للطيش.
من ناحية طبيّة يامحمد:
البت عادي ممكن تقوم تمشي بعد سقوط غشاء البكارة ..
تمشي زيّ الترتيب، باستثناء حالة الخفاض الفرعوني، حتي الخفاض السنِّي
لا يؤثر علي مشيتها بعد سقوطه وتمزقه..
والخفاض الفرعوني ده ما اظن لي يامحمد متوفر في جيل التمانينات من البنات، شوف الفيديو وقرِّر العمر.
المهم يازول:
غير تستحمل مداخلات الناس المحمومة دي ما عنك حل..
تحيّاتي.
ـــــ
مواضيع صفيّة دي، ما كنت حابي أتداخل فيها، بس حبوبة مُبر قالت:
الما عندو قول، مازول.
أها قلت الواحد يتزوّل.