طلعت قبل شوية من معاينة في لجنة الإختيار

[احمد هارون فوراوي]

المشاركة الأصلية كتبت بواسطة عمر عبدالكريم

المعاينه لي خريجين حاسوب للخدمة بوزارة العمل
بالرغم من إني خريج قديم 2005 لكن الظروف ساقتنا للعمل في الشركات الخاصه حيث عملت في إم تي إن لأكثر من سنتين بعقد (مؤقت) في قسم خدمات المشتركين وماأدراك ماخدمات المشتركين .. وظيفه قاسيه لأقصى درجه , لكن زي مابقول المثل رضينا بالهم والهم مارضى بينا ، سرحتنا الشركه وسلمت القسم لشركه (آوت سورس) وتم إستقدام موظفين جدد برواتب أقل من نصف ماكنا نتقاضاه
قلت حينها لزميلي (سرّحونا قبال مايقوم لينا شعر ياأحمد)
المهم ماأسوقكم بالونسة ساكت زي ماقلت بالرغم من إني خريج قديم إلا إنو دي أول معاينة لي في لجنة الإختيار .. وعلى حسب ماكنت أسمع حفظت نواقض الوضوء وصلاة الجنازه وكل الأدعيه المعروفه وغير المعروفه لأنو كنت متوقع معاينة دينية بعيده تماماً عن التخصص لكن إتفاجأت أولاً بالنظام الشديد في المكتب وبالتعامل الراقي جداً .. وتم تسديد أسئلة المعاينة بعناية في مرمى تخصصي .. في سؤالين بره التخصص الأول عن مكان سكني والثاني عن المسجد الذي أصلي به .
ماعارف بس بالجد على عكس التوتر الطبيعي للمعاينات إرتحت للأشخاص الكانوا باللجنه وإندحت في إجابات بعض الأسئله بإسهاب .

المهم ياأخوانا أدعو لي يشيلوني ... مفروض البوست محتواهو كلو يكون طلب الدعاء ده بس يدي جرت في الكيبورد أعفو لي النقه .

بالتوفيق يا حبيب
ربنا يحقق الاماني

[احمد هارون فوراوي]

المشاركة الأصلية كتبت بواسطة رأفت ميلاد

يعنى الوظائف للمسلمين فقط .. جنس عنصرية

الله يوفقك يا عبد الكريم

دائماً تصطاد في الماء العكر ... اللهم أكفينا شر الفتن

[رأفت ميلاد]

المشاركة الأصلية كتبت بواسطة احمد هارون فوراوي


دائماً تصطاد في الماء العكر ... اللهم أكفينا شر الفتن

جيت أنت يا عكر
وعندك وش تتكلم بيهو .. ما وريتنا مليشيات دار فورطردوك ليه .. أو أنت مدسوس

[احمد هارون فوراوي]

المشاركة الأصلية كتبت بواسطة رأفت ميلاد

جيت أنت يا عكر
وعندك وش تتكلم بيهو .. ما وريتنا مليشيات دار فورطردوك ليه .. أو أنت مدسوس

جيت أنت يا عكر

ما منك .. من العليك وكل إناء بما فيه ينضح

ما وريتنا مليشيات دار فورطردوك ليه .. أو أنت مدسوس

ما ترسي ليك علي بر .. مطرود ولا مدسوس ؟
كان مليشيات دارفور طردتني مفروض إنت تكون أول زول عارف مش
انت قلت إنك من دارفور

بعدين مدسوس وكوز وامنجي ومدفوع ليك ... العبارات دي بقت مستهلكة وما عندها معني ودليل علي عجز وإفلاس ليس إلا.. شوف ليك نغمة تانية.

[سماح محمد]

أخي عمر
تحايا طيبات
ربنا يوفقك ويكتب ليك الخير..وزي ماقلت ده المقصود بالبوست (الدعوات)
أما لو جيت لموضوع لجنة الإختيار:فاللجنة الخشيتها يابوي أريتها لجنة السرور..زي دي أنا لا شفت ولا عرفت ..ووالله اللجان دي أنا عندي معاها تجارب مريرة شخصية (يعني ماحكى لي عنها زول)..
أهم شئ أحب أوصيك بيهو إنو لو لا قدر الله ماشالوك ما تلوم نفسك أو تقيمها على إثر إختيارهم ده..
ربنا يوفقك..الأرزاق بيد الله..والبني آدم ما بيعرف الخير مكتوب ليهو وين..(وربنا ماشق حنكاً ضيعو)

[بله محمد الفاضل]

ندعو لك بالتوفيق
ربنا يجعل الوظيفة من نصيبك
وتكون كمان على ما تتمنى
وظيفة مستقرة
ودائمة
وداعم لتأسيس حياة جميلة
ضاجة بالحب والعيال


تحياتي

[احمد سيداحمد]

ربنا يوفقك وان شاء الله تكون الوظيفة من نصيبك

[ناصر يوسف]

المشاركة الأصلية كتبت بواسطة عمر عبدالكريم

المعاينه لي خريجين حاسوب للخدمة بوزارة العمل
بالرغم من إني خريج قديم 2005 لكن الظروف ساقتنا للعمل في الشركات الخاصه حيث عملت في إم تي إن لأكثر من سنتين بعقد (مؤقت) في قسم خدمات المشتركين وماأدراك ماخدمات المشتركين .. وظيفه قاسيه لأقصى درجه , لكن زي مابقول المثل رضينا بالهم والهم مارضى بينا ، سرحتنا الشركه وسلمت القسم لشركه (آوت سورس) وتم إستقدام موظفين جدد برواتب أقل من نصف ماكنا نتقاضاه
قلت حينها لزميلي (سرّحونا قبال مايقوم لينا شعر ياأحمد)
المهم ماأسوقكم بالونسة ساكت زي ماقلت بالرغم من إني خريج قديم إلا إنو دي أول معاينة لي في لجنة الإختيار .. وعلى حسب ماكنت أسمع حفظت نواقض الوضوء وصلاة الجنازه وكل الأدعيه المعروفه وغير المعروفه لأنو كنت متوقع معاينة دينية بعيده تماماً عن التخصص لكن إتفاجأت أولاً بالنظام الشديد في المكتب وبالتعامل الراقي جداً .. وتم تسديد أسئلة المعاينة بعناية في مرمى تخصصي .. في سؤالين بره التخصص الأول عن مكان سكني والثاني عن المسجد الذي أصلي به .
ماعارف بس بالجد على عكس التوتر الطبيعي للمعاينات إرتحت للأشخاص الكانوا باللجنه وإندحت في إجابات بعض الأسئله بإسهاب .

المهم ياأخوانا أدعو لي يشيلوني ... مفروض البوست محتواهو كلو يكون طلب الدعاء ده بس يدي جرت في الكيبورد أعفو لي النقه .

عمر عبد الكريم

يا أخوي كيفنك ....


وإنشاء الله يشيلوك ويدوك وظيفة في تخصصك تقدر تقول إنك شغال في تخصصصصصصصصصُصَك

وقبلها مرحب بيك وبي قلمك ال,ل مره أطالعو هنا

مرحب بكيك يا زول أمدرماني ...


ويااااااا شباب

رأفت ميلاد و أحمد هارون فوراوي

الشاب ده بيحكي لينا حكاوي جميلة عن شكل لجنة الإختيار الحالية وكيف إنو لقاها ما زي ما كانت في السابق وقال ليكم أدعووووووووووووا ليهو ... مُش تفتلوا ليهو البوست

أللهم وفق عبدك

عمر عبد الكريم

أللهم وفقه في مبتغاه يا أرحم الراحمين

أللهم آمين

[سمراء]

المشاركة الأصلية كتبت بواسطة عمر عبدالكريم

والله ياعباس الناس هنا مابقصروا
أنا حسي عندي زي 7 ارانب كده كل مااملك

عمر ياخوى الله يعدله عليك محل ماتقبل ....
بس سؤالى ...ال7 ارانب ديل لميت فيهم من وين قبل ماتشتغل

والله اقول ليك سر ..كان اشتغلته ابقى عشرة عليهن
لانو الشغل بطير منك الارانب

[هاشم]

اقتباس:
المشاركة الأصلية كتبت بواسطة عمر عبدالكريم
. لكن بصدق وجدت شباب متخصصين واسئلتهم مركزه تماماً .





عمر عبدالكريم ... أسأل الله أن يوفقك في سيعك

ويعينك ويسدد خطاك وييسر ليك الأصلح في دنيتك

تصدق أنا دخلت اللجنة ما عارف سنة كم بعد صف طويل

بس جلوس ما وقوف وعند دوري الساعة اتنين إلا شوية

وأول سؤال قريت الابتدائي وين طبعا بعد الاسم وكده

وجا واحد فتح الباب وقال ليهم الحافلة جات التقول قال ليهم

تحتكم عقرب كل واحد نطّ من كرسيهو وقالوا خلاص أمشي ومشيت

والبعدي قلت ليهو خلاص الحافلة جات تجي بكرة بدري.

[عمر عبدالكريم]

شكراً للدعوة ياأبوعلي الله يديك العافيه يارب

ياعم رأفت الوظيفه ماظنيتها للمسلمين بس لكن انا مالاقيت مسيحي في المعاينة الحقيقه
بس التعامل كان جيد ربما تخوفاً من الشباب في الفتره الحاليه أو أنه الغالب والله أعلم

[آخـر المواني]

المشاركة الأصلية كتبت بواسطة عمر عبدالكريم

في سؤالين بره التخصص الأول عن مكان سكني والثاني عن المسجد الذي أصلي به .

أولن سلام ..

تانين .. ربنا يوفقك في ما تصبو اليه ويجري الزرق الحلال عليك اينما كان .. سواء جراء هذه المعاينة أو في غيرها من الاماكن ..

تالتن ..

صدقني السؤالين البرا التخصص ديل هم المعاينة و علي ضوء اجابتك وما يترتب عليها من حيثيات و (بحيت) (أكسر الباء دي بالله) سيتحدد مصير قبولك او رفضك !!

وكان قلتي لي ليه ..؟ ح أقول ليك أنو في مكان سكنك أكيد هنالك بصابصة ينتمون اليهم وسيلجأون إليهم لتكملة الصورة عنك .. حيث يجب أن تعلم أن كل وظيفة (سيادية) كانت ام (عادية) خارجة من تحت كنف لجنة الاختبار (الباء مقصودة) يجب ـ (حسب) اقتناع القائمين علي أمر الدولة الآن ـ أن تكون لشخص إن لم يكن منهم أن يكون مأمون جانبه .. لذا كان السؤال عن مكان السكن أما عن الجامع .. فدي صراحة وراءها ما وراءها .. وخلينا نكون حَسُنِي النية و ما نشكك فيها


صدقني انو الأسئلة الكانت في مجال تخصصك كلها مجرد مسرحية لتطمينك و اقرانك انو اللجنة احترافية ..

اللجنة التي عينت قبل كدا واحد تخصص شريعة في وظيفة مدقق حسابات في هيئة مياه ولاية الخرطوم .. وما تقرير المراجع العام ببعيد عن الاذهان ..

[عمر عبدالكريم]

سمراء
يعني معقول بس من 2005 أكون قاعد مكتف يديني
أنا إشتغلت مع شركة إم تي إن سنتين ونصف تقريباً لكن زي ماذكرت سرحونا والقروش دي بالضبط هي مبلغ التأمين الإجتماعي الصرفتوا
وشكراً على الدعوة الصادقه

[عكــود]

العزيز عمر،

ألف مرحب بيك في سودانيات.

موفّق بإذن الله،
فبمقدار هذا التفاؤل الغلّف أحرفك، سيكون النجاح حليفك إن شاء الله.

أعجبتني والله ولا خوف عليك بإذن واحدٍ أحدْ.

سأدعو لك من كل قلبي.

[عمر عبدالكريم]

أحمد هارون شكراً للدعوه وأسأل الله أن يخفف على أهلنا بدارفور وأن ينهي المأساه الهناك بأسرع وقت