أفيال مالي ... (صور)

[شهاب كرار]

المشاركة الأصلية كتبت بواسطة سمراء

الافيال دى عالم جميل جدا كغيرها من الحيوانات البرية وحقيقة كان نفسى اعيش فى واحده من المحميات الطبيعية الافريقية ..
ياشهاب تسلم وياريت تكلمنا عن علاقة المواطنين بتلكالفيلة ! يعنى ممكن تكون متواجدة وسط الاهالى ام فقط فى البرارى ؟

المنطقة الموجودة فيها هذه الافيال تكاد تكون خالية من السكان، وتصدقي ان القليل جدا من الماليين في اقاليم تمبوكتو وموبتي يعلمون بوجود هذه الافيال في تلك المنطقة...
الاهالي الموجودين في المنطقة دي بينتمو لي مجموعة عرقية واحدة اسمها الصونغي، والصونغي ديل عندهم ارث حضاري عظيم وعملو امبراطورية حكمت غرب افريقيا كلها في منتصف القرن الثالث عشر..
الاقليم الموجودة فيهو الافيال دي اسمو نجايفونكي (غايتو حاولي تلقي طريقة تنطقي النون والجيم ديل كحرف واحد)، وفيهو عشيرة واحدة من عشائر الصونغي اسمها عشيرة لابيتا، وعددم ما بيتجاوز الخمسة الاف انسان، والفيل عندهم حيوان محترم جدا ورغم انهم مسلمين لكن شكل الاحتترام البيقدمو للافيال بدل على انو من المحتمل انو الفيل كان طوطم العشيرة زمان ، عشان كدا عايشين في تناغم تام مع الافيال (في صورة بالمعنى دا)...
انا شاركتا في الحملة بتاعت تصوير الافيال دي شهر اتنين الفات، لكن فشلت في الحصول ولو على صورة واحدة، بسبب قلة الخبرة ونقص المال وسوء المعدات التي اعتمدت عليها...


---
من اسي التحكيم فاشل

[أبوبكر عباس]

شهاب و سماح عليكم النبي ما تسألوني تاني أسئلة صعبة
يا أخي أنا زول عجوز و الزمن الباقي لي ما كتير، الواحد في مرحلة لمليم الأطراف.

إستعنت بصديق بيطري مفتون بعلم التشريح المقارن و في التلفون دش لي كلام كتير، خفت الرصيد يكمل قلت ليهو: عليك الله رسل رابط يكون مفتاح للزول المنفتح على الدنيا دا!
الرابط:
http://www.seaworld.org/animal-info/...sification.htm

و ممكن منو تشوفوا أقارب الفيل المالي دا.

http://www.amnh.org/exhibitions/perm.../g_manatee.php

[سماح محمد]

المشاركة الأصلية كتبت بواسطة شهاب كرار

منتظرين تمومة الكلام
برااااك جيتي بي رجليك

سلامات تاني ياشهاب..
ماقلنا الموضوع مجرد اجتهادات عشان تعفونا من الزرزرة..أصلا نحنا أذهاننا ما مهيئة للإبداع ولا الإبتكار..تلقين ..تلقين..تلقين..لمان يمسخ العلم ذاتو..
ما شايفني مكتفية بالإستمتاع بمتابعة الأستاذ محسن خالد ود.محمد قرشي وبقية الشباب في زهرة الغرق..فبالله ما تورطني وأعفينا من المسئوليات العلمية دي
...
وشايفة د.بابكر عباس ما قصر مشكورا بمدنا بمواقع علمية متخصصة
...
والحديث عن مالي تكشَف لي ثراءه.. ماكان عندي عنها فكرة..
أرجو إنك تواصل
فمابين الطبيعة والثقافة يحلو الحديث

دمتم بخير

[محمد النور كبر]

شهاب..حبابك يا صديقي
و حباب ضيوفك..
خلى الملاحظة دي في راسك.. احتمال تعمل لينا منها حاجة لي قدام..
اقليم الدقون..اسمو مبوتي..و يتخيل لي في نطقهم ح يكون أمبوتي..!
في بعض الثقافات السودانية يطلق على الفكي مفردة امـُبتاري..و البعض الآخر.ز يقول عنه أمبـُتري..و هي قريبة من اسم اقليم أمبوتي بتاع الدقون..ولو استصحبت انو الناس ديل عندهم معارف متقدمة في السحر و الكواديك..فيمكن الربط بسهولة بين المفردة الشايعة في السودان و ان اسمها منحدر من ذلك الإقليم.. طبعا الفكي لمن يقولوا عنه امبـُتري.. فلآنه يعتمد على السحر اكتر..ده غير فكرة أنو في ناس دايرة تؤصل لفكرة هذا الوسيط و تجعل منها فكرة متسقة مع الدين الإسلامي..!
الفكي امبـُتري يركز على الأرواح و العروق و الطلاسم و الحجبات و المحايات..!
ولازلت احلم بزيارة جمهورية مالي..!
و دمت..
كبر

[محمد النور كبر]

صديقي قيقراوي..حبابك
كتر خيرك على الترحيب يا صديقي..
غايتو الشايفو هنا ده حركة متسارعة للغاية..و نهج لو الناس حافظت عليهو ح يكون بصمة كبيرة خلاص..!
اهم حاجة تكون نافذة لمعاينة الحاجات من قريب..و مثل هكذا معاينة التعليم الرسمي نوهائي ما ممكن يوفرها للناس.. لأنو عندو ادعاءاتو الخاصة الداير يمررها و يفرضها للناس..!
ياخي دايرين نحكي عن شدرنا..و حجارنا (جبالنا)..ووديانا..و معارفنا العاشو بيها اهلنا لعدد من السنين..!
كتر خيرك..و ربنا يقدرنا على المثابرة هنا..
و اجمل التحايا لصديقنا خالد الحاج..فصبره سوف يثمر باذن الكريم..
و دمت..
كبر

[Mohammed Qurashi]

تحياتي ياشباب و شابات

ممكن تدينا لمحة عن تطور الافيال؟
يقال انو اقرب اقرباء الافيال هي الحيتان والدولفين، وهي كانت من الثديات المائية، الكلام دا سليم؟

مع إنو شهاب (قدس الله سره) إستزبلني و ماسألني لكن أهو الزول يعمل بأصله
ياخ عالم الأفيال و تطورها ده حكاية جميلة جد ..
كدي أول حاجه ساي كده بره الموضوع شوفوا جنين الفيل ده بريء قدر كيف


يلا كلام سماح في الجزئية التحت دي سليم تماما ..

المعلومة الاتوفرت لي تبعا للأدلة المورفولوجية والبيوكيميائية انو أقرب الثديات للأفيال هي أشكال من الثديات البحرية زي خراف وبقر البحر والبتتصنف على انها Marine Mammal

لكن بس زيادة على الـ Sea cow و الـ dugong أقرب ود عم ليهم هو المخلوق الصغير ده و إسمه Hyrax و دي صورته ..

يلا ده مدخل كويس علشان نحكي القصة الكانت بدايتها من 50 مليون سنة لما أسلاف الأفيال القديمة الكان حجمها أقرب للـ وَبْر Hyrax الفوق ده .. تقريبا بحجم الخنزير .. كانت فصيلة ناجحة جدا .. فوق الميتين نوع من الأفيال و منتشرة في كل القارات و البيئات ماعدا القطب المتجمد .. و لكن عبر الزمن ما فضل منها إلا 3 أنواع بس حاليا !! .. بيعتقد إن التغيرات المناخية الرهيبة الحصلت مؤخرا (العصور الجليدية المتكررة) أطاحت بتوازنها لأنها كانت كائنات متخصصة شديد في بيئاتها و ما بتقدر تتكيف بسرعة مع تغيرات المناخ الحصلت .. بالإضافة لمسألة الحمل الطويل و الحجم الكبير برضو ساهموا .. و بالنسبة للماموث المشهور الإنقرض من 10000 - 5000 سنة قبل الميلاد بس فنحن كبشر كان لينا اليد الطولى في الموضوع ده للأسف !! ..
مسألة زيادة الحجم دي تطوريا بتدل على ثراء البيئة العايش فيها المخلوق و المنافسه .. لأن الميل البيولوجي دوما هو للتصغير في حال العزلة .. في جزيرة ما مستحضرها حاليا لقوا فيها كل الحيوانات قزمه لأنها كانت غنية الموارد و مافي صراع من أجل البقاء بالمعنى الصعب داك .. فده ممكن يفسر ليه ود عم الأفيال الوًبْر ده لسه محتفظ بحجم أسلافه القديم !!
يلا دي شجرة النسب التطوري للأفيال و موضح فيها بعض الأنواع الإنقرضت و التلاته الفضلوا ..

حول مسألة الأصل المائي ده .. فهناك قريب ليهم منقرض حاليا عاش حياة زي بتاعة القرنتية قبال 37 مليون سنة و كان طوله حوالي متر كده .. و إسمه Moeritherium

و كان في دراسة بتفتكر إنه هو أو أحد أسلافه (أجداد الفيل الحالي المباشرين) ممكن يكونوا مرحلة مائية في تطور الأفيال .. لكن ما بمعنى ناس الدلفين و الحوت (يعني من غير زعانف و تكيفات تنفس) لكن أقرب للقرنتية .. و غالبا مسألة الإحترار الحراري الكان بيحصل بين العصور الجليدية نشفوا المستنقعات و الخيران البيعيش فيها و مقلبوه
أها دحين الكلام كتير و أنا عندي قراية (مسمار جحا ) فهاكم الروابط دي أمشوا أقروا براكم
لكن بعد ما أخلعكم بالفيل المنقرض زمان ده !!

http://elephant.elehost.com/About_El...evolution.html
http://www.allelephants.com/allinfo/evol.php
http://www.ecotravel.co.za/Guides/Wi..._Evolution.htm
http://news.nationalgeographic.com/n...evolution.html

بالمناسبة يا شهاب سمعت عن نظرية القرد المائي ؟؟ البتقول بأن مرحلة في تطور الإنسان مرت في الموية ؟؟دي حاجة ذكرتني ليها مسألة الفيل دي !! .. إتذكرت إن محسن في حكاياتو مرة قال شاف زول بيخياشيم و حراشف طالع من الموية و مات على شاطيء قريتهم زمان !! .. جن مسلط موش كده
يلا فتكم بعافية

[شهاب كرار]

بالمناسبة يا شهاب سمعت عن نظرية القرد المائي ؟؟ البتقول بأن مرحلة في تطور الإنسان مرت في الموية ؟؟

يطرشني والله يا محمد قرشي*
اها دي تجي تحكيها لينا بالتفصيل
وسألتك المرة دي بالدرب عديل عشان شايفك عامل حردان**

---
*بس لو الواحد لاحظ حب الانسان للموية والاطفال تحديدا الكلام دا ممكن يكون اقرب للصحة.
** دا كلو من بابكر عباس وخلعه رداء الشفافية على كل من هب ودب

[قيقراوي]

المشاركة الأصلية كتبت بواسطة بابكر عباس

شهاب و سماح عليكم النبي ما تسألوني تاني أسئلة صعبة
يا أخي أنا زول عجوز و الزمن الباقي لي ما كتير، الواحد في مرحلة لمليم الأطراف.

لوووووووول

يا شهاب بصفتي صديقك انصحك ما تسال الزول دا أي سؤال ..
لا صعب لا ساهل ذاتو!

ياخ سؤالي الساهل داك، اجابتو مجرد [ عادي ] كان كافية و نص و خمسة لي..
يمشي يجيب لي كارثة عدييل كدا!؟

ياخ دا زي حالة واحدة يكون غريب دار و لغة - جايي من بلداً طيرا عجمي - ويجينا في البلد يسال عن " بُنية " يعني شنو؟ ..
اها زولك دا بفلكمو ليكم!!
البركة ما صعدنا في سؤالنا دا في السلم الاحيائي، و سالنا من الهومو سابينس ..
كان جاب لينا ناس المطافي .. و بوليس الاداب
لووووووووول

يا بيكو ياخ
اللغة دي سووها لشنو؟ ما هو لي جنس المواقف المحرجة دي ياخ!*
استاذ البلاغة زمن الثانوي، كان بقول لينا لو ما البلاغة ما عارف الناس كان عاشت كيف!؟
قال الواحد يقول ليك : يوم الخميس ماشي لاولادي!




------

* بعدين ذاتو قلنا ليكم حجبوهو من عيني ؤ كدا ياخ .. ما بنقدر نشوف كلو كلو.
قليك واحد عيالو كانو جاينو، و شابك ليك زملانو في الشغل : و الله مشتاق لمحمد جنس شوق - محمد ولدو - و ظل يكرر فيها حتى قالوا ليته سكت.
المهم الجماعة وصلوا، و اخطفهم و على البيت لا يلوي على شئ.
لمن قضى وطره، و طارت السكرة و حلّت الفكرة .. اكتشف انو نسى حبيب ألبو ( محمد ) و معاهو الشنط في ي ي ي المطار قبلم هناك!!

[Mohammed Qurashi]

المشاركة الأصلية كتبت بواسطة شهاب كرار

يطرشني والله يا محمد قرشي*
اها دي تجي تحكيها لينا بالتفصيل
وسألتك المرة دي بالدرب عديل عشان شايفك عامل حردان**

---
*بس لو الواحد لاحظ حب الانسان للموية والاطفال تحديدا الكلام دا ممكن يكون اقرب للصحة.
** دا كلو من بابكر عباس وخلعه رداء الشفافية على كل من هب ودب

سمح الكلام في خشم ستو ..

[youtube]http://www.youtube.com/watch?v=gwPoM7lGYHw[/youtube]

قصرت معاك ؟؟

[شهاب كرار]

المشاركة الأصلية كتبت بواسطة قيقراوي

لوووووووول

يا شهاب بصفتي صديقك انصحك ما تسال الزول دا أي سؤال ..
لا صعب لا ساهل ذاتو!

ياخ سؤالي الساهل داك، اجابتو مجرد [ عادي ] كان كافية و نص و خمسة لي..
يمشي يجيب لي كارثة عدييل كدا!؟

ياخ دا زي حالة واحدة يكون غريب دار و لغة - جايي من بلداً طيرا عجمي - ويجينا في البلد يسال عن " بُنية " يعني شنو؟ ..
اها زولك دا بفلكمو ليكم!!
البركة ما صعدنا في سؤالنا دا في السلم الاحيائي، و سالنا من الهومو سابينس ..
كان جاب لينا ناس المطافي .. و بوليس الاداب
لووووووووول

يا بيكو ياخ
اللغة دي سووها لشنو؟ ما هو لي جنس المواقف المحرجة دي ياخ!*
استاذ البلاغة زمن الثانوي، كان بقول لينا لو ما البلاغة ما عارف الناس كان عاشت كيف!؟
قال الواحد يقول ليك : يوم الخميس ماشي لاولادي!




------

* بعدين ذاتو قلنا ليكم حجبوهو من عيني ؤ كدا ياخ .. ما بنقدر نشوف كلو كلو.
قليك واحد عيالو كانو جاينو، و شابك ليك زملانو في الشغل : و الله مشتاق لمحمد جنس شوق - محمد ولدو - و ظل يكرر فيها حتى قالوا ليته سكت.
المهم الجماعة وصلوا، و اخطفهم و على البيت لا يلوي على شئ.
لمن قضى وطره، و طارت السكرة و حلّت الفكرة .. اكتشف انو نسى حبيب ألبو ( محمد ) و معاهو الشنط في ي ي ي المطار قبلم هناك!!

غايتو يجازي محنك يا قيقا على قول بلة صاحبي (الزول دا غاتس وين اليومين دي؟)

[Mohammed Qurashi]

To Balance the theory
here is a site that criticize it
sink or swim

Enjoy this as well .. can you honestly try it on your baby??

[youtube]
http://www.youtube.com/watch?v=Aq4ZnrdtEGc
[/youtube]

[أبوبكر عباس]

و الله يا أخوانا أنا أصلا ما شفت لي زول بستمتع بالمعرفة و العلم و البحتي زي الشفيف قرشي دا!
و الله حسادة كدا أدعو ليك:
إن شاء الله يا بركة النبي يا محمد قرشي تعرس..

و زمنك ما يحوق على جيب البامبرز

[بدور التركي]

إمبراطورية مالي كانت قبائل سونينك ومادينكا قد انفصلت عن الكونغو عام1240م. حيث قام قائد ماندينكا ساندياتا كيتا بتكوين اتحاد للقبائل في الوادي الخصيب بأعالي نهر النيجر وجعل جيرانه تحت سيطرته مؤسسا إمبراطورية مالي
وكانت اكبر من مملكة غانا..
واثناء أوجهها امتدت من ساحل المحيط الأطلنطي بالغرب إلى ما وراء تخوم منحى نهر النيجر بالشرق..
وكان إمبراطورها نانسا موسى قد حج لمكة عام 1324م.عبر القاهرة
واستقبله المماليك بحفاوة بالغة
وفي هذة السنة أصبحت العاصمة تمبكنو بجنوب غرب نهر النيجر مركز تجارة الذهب وتعليم الاسلام
وفي أواخر القرن 14 استقلت الأقاليم الخارجية
ومن جنوب منحى نهر النيجر قامت قبائل موسى بقلب الامبراطورية واستولى الطوارق بدو جنوب الصحراء الكبرى على تمبكتو العاصمة وفي سنة 1500 امتد حكم مالي لمناطق بأعالي نهر النيجر
.....
المصدر
موسوعة الحضارات
اعداد: عيسى الحسن

[Mohammed Qurashi]

المشاركة الأصلية كتبت بواسطة بابكر عباس

و الله يا أخوانا أنا أصلا ما شفت لي زول بستمتع بالمعرفة و العلم و البحتي زي الشفيف قرشي دا!
و الله حسادة كدا أدعو ليك:
إن شاء الله يا بركة النبي يا محمد قرشي تعرس..

و زمنك ما يحوق على جيب البامبرز

أعرس تاني يعني
ميرا بنتي عمرها 15 شهر
كان شفتني زمان ..
كنت زي شهاب ده ..
بس خلاص قرب ينقبض في الشرك ..

[بدور التركي]

انت يا محمد مش عندك قراية وامتحانات
المقعدك مع الأفيال إيه

الله يحفظ ميرا ويصونها
فرحانة ليك بالسعادة دي
تتهنى وتسعد بيها يا رب