أين تسهر هذا المساء

[مي هاشم]

المشاركة الأصلية كتبت بواسطة نهلة عمر الشيخ

احيي صراحتك وقسوتك

يا نهلة انتِ زولة غريبة جداً..
عايزة تكوني صريحة ومافي زول يزعل ولما أقول ليك كلام صريح تزعلي.!!!

وانت قتلتِ البوست براك..لأنك بتبحتي حاجات تصرف عن الموضوع الأساسي..
ودي من الحاجات البتخلي الواحد ما يتداخل ..لأنه بيكتب عن شي ويجيه رد عن شي تاني..
بالله بدل تزعلي راجعي مداخلاتك مع الناس..
وبكل صراحة أو قسوة (أيهما شئتِ) أقول ليك ... كأنك كايسة شكلة..

[مي هاشم]

يا نهلة سلام..
راجعت كل المداخلات عشان أشوف الحاصل شنو!!
بديتي موضوع سمح جداً..وكان ماشي كويس جداً..وما عارفة ليه حصل سوء فهم بيني وبينك؟!!لأني ما ضد أي شي كتبتبه بالعكس..انا ضد الطبطبة والملّيس..وقبيل قلت ليك في ناس ما بفكر أدخل معاهم أصلاً لأنهم إما معاهم أو لا..
ما سحبت مداخلتي الفاتت لأني كتبتها صادقة لكن بعتذر عن آخر جملة وأول جملة..
وكنت جاية على وجدي وناصر..
الناس ديل هاجوا ساي بلا سبب ..
فبعد إذنك تاني..

وجدي..
راجع مداخلاتك هنا وفي بوستات تانية حتلقى نفسك (فاكّيها في روحك حبّة) وبتتعامل كأنك عارف أي شي..وعندك القسوة برضو (الوش ده لزوم الخلاف لا يفسد للود قضية)

ناصر..
انت زول درامي ومخرج..يعني تعليق نهلة ده كلنا لو ما قبلناه مفروض انت الوحيد تقبله..
أي نعم هي أسلوبها صعب..لكن هي كده ياخ..نحاول نتعامل معاها زي ما هي..وحركات (فلان الفلاني) دي بطلها (دي ضحكة خبيثة)

يا نهلة..
ياخ ما تكتبي عن ختان الإناث ولا حاجة..بس روّقي المنقة شوية؟؟
وهاتي راسك أبوسو

[طارق صديق كانديك]

مساء الخير أخت نهلة

ود شوراني قال :

أحْ والوَحَّه ما بِتدُور تفَارق قلْبِي
أحْ من نَار فِلانَه وجَرْحها النوسَربِي
يا نَفْسِي الصّبُرْ لُوكِيهُو لا تَنْسلْبِي
الحَظْ ما بدُِوم يومْ غَالَبه يومْ تِتْغِلبي

ظللت أحدث نفسي أن أكتب عن " الوحيح" في الدوبيت السوداني أو بالأحرى أستعرض الذي كتبه بعض شعراء المسادير .. الزمن ممحوق ويلعب المزاج الهادئ دور كبير في ترتيب الفكرة وتجويدها عندي وهو مالا يتوفر لي على الاقل حاليا ...

غايتو بالعدم .. ح اشوف طريقة اسهر اقرأ فيما كتب عن هذا الموضوع ..

تحياتي

[نهلة عمر الشيخ]

المشاركة الأصلية كتبت بواسطة مي هاشم

يا نهلة سلام..
راجعت كل المداخلات عشان أشوف الحاصل شنو!!
بديتي موضوع سمح جداً..وكان ماشي كويس جداً..وما عارفة ليه حصل سوء فهم بيني وبينك؟!!لأني ما ضد أي شي كتبتبه بالعكس..انا ضد الطبطبة والملّيس..وقبيل قلت ليك في ناس ما بفكر أدخل معاهم أصلاً لأنهم إما معاهم أو لا..
ما سحبت مداخلتي الفاتت لأني كتبتها صادقة لكن بعتذر عن آخر جملة وأول جملة..
وكنت جاية على وجدي وناصر..
الناس ديل هاجوا ساي بلا سبب ..
فبعد إذنك تاني..

يا مي انتي شخصية جديرة بالاحترام فعلا
وصدقيني انا ما زعلت
بس حسيت الناس دي كلها عايزة تشاكلني باي طريقة ومن غير حتى ما تقرا كلامي كويس
الاختلاف في وجهات النظر مهما بلغت حدته ومهما كان شكل الاسلوب فيه يظل هو اختلاف في وجهات النظر
والمفروض الناس ما تشخصنو وما تستخدمو كوسيله للشتائم

[مي هاشم]

المشاركة الأصلية كتبت بواسطة طارق صديق كانديك

مساء الخير أخت نهلة

ود شوراني قال :



ظللت أحدث نفسي أن أكتب عن " الوحيح" في الدوبيت السوداني أو بالأحرى أستعرض الذي كتبه بعض شعراء المسادير .. الزمن ممحوق ويلعب المزاج الهادئ دور كبير في ترتيب الفكرة وتجويدها عندي وهو مالا يتوفر لي على الاقل حاليا ...

غايتو بالعدم .. ح اشوف طريقة اسهر اقرأ فيما كتب عن هذا الموضوع ..

تحياتي

يا سلام عليك يا طارق..يعني لو رايق ومزاجك هادئ كنت عملت شنو؟!!
بحالتك دي ما تمشي على بوست المسادير

[طارق صديق كانديك]

المشاركة الأصلية كتبت بواسطة مي هاشم

يا سلام عليك يا طارق..يعني لو رايق ومزاجك هادئ كنت عملت شنو؟!!
بحالتك دي ما تمشي على بوست المسادير

تسلمي يامي ...

هناك والله الديون كتيرة خلاص

قولي يامسهل ..

[عكــود]

[justify]سلام نهلة و المتداخلين/ات،

خلال شهر قدّر لي الله السفر لأربعة دول، بدءً بالأراضي المقدّسة و زيارة الحرمين الشريفين، ثمّ ثلاثة دول في جنوب شرق آسيا. خلال سفري كنت حريص على التوثيق و في البال بوست أفترعه هنا للحديث عن تلك الدول و شعوبها و إنزال الصور.
لم أوفّق حتّى الآن بالرغم من حث البعض (كانديك نموذجاً) لفعل ذلك.

في البال أيضاً بوست آخر ضمن سلسلة بوستات بدأتها بعنوان (من سحّارة ذكريات البلد) وصلت فيها الرقم (3) و أتمنّى مواصلتها.

تحيّاتي.
[/justify]

[نهلة عمر الشيخ]

والله يا طارق ويا عكود ما عارفه اشكركم كيف
مداخلاتكم دي وقبلهم مداخله مي اعادوا لي استعدال فتلان البوست بعد ما قربت اقنع منو

[نهلة عمر الشيخ]

المشاركة الأصلية كتبت بواسطة طارق صديق كانديك

مساء الخير أخت نهلة

ود شوراني قال :



ظللت أحدث نفسي أن أكتب عن " الوحيح" في الدوبيت السوداني أو بالأحرى أستعرض الذي كتبه بعض شعراء المسادير .. الزمن ممحوق ويلعب المزاج الهادئ دور كبير في ترتيب الفكرة وتجويدها عندي وهو مالا يتوفر لي على الاقل حاليا ...

غايتو بالعدم .. ح اشوف طريقة اسهر اقرأ فيما كتب عن هذا الموضوع ..

تحياتي

ولانو الحظ ما بدوم يوم غالبه ويوم تتغلبي زي ما قال ود شوراني فكذلك مزاجك السيئ دا ما حيدوم
بكرة النفس حتروق وبكرة حنستمتع معاك بالوحيح و الدوبيت
وا وحيحي وا وجع قلبي
من صيدة القنيص الفترت كلبي
القاري العلم من دينو بتسلبي
والماشي الحجاز من جده بتقلبي
لقيتني كيف

[محمد عبد الرحمن]

نهلة سلامات

في اللحظة دي بالزات داير أكتب بوست لاكين قدر ما نحتا راسي ما لاقي موضوع

فبالله لو في موضوع إن شاء الله بالإيجار ناولينا ينوبك ثواب

[نهلة عمر الشيخ]

المشاركة الأصلية كتبت بواسطة عكــود

[justify]سلام نهلة و المتداخلين/ات،

خلال شهر قدّر لي الله السفر لأربعة دول، بدءً بالأراضي المقدّسة و زيارة الحرمين الشريفين، ثمّ ثلاثة دول في جنوب شرق آسيا. خلال سفري كنت حريص على التوثيق و في البال بوست أفترعه هنا للحديث عن تلك الدول و شعوبها و إنزال الصور.
لم أوفّق حتّى الآن بالرغم من حث البعض (كانديك نموذجاً) لفعل ذلك.

في البال أيضاً بوست آخر ضمن سلسلة بوستات بدأتها بعنوان (من سحّارة ذكريات البلد) وصلت فيها الرقم (3) و أتمنّى مواصلتها.

تحيّاتي.
[/justify]

اخ عكود
ادب الرحلات من اجمل الادب
فيه يتحول القلم لكاميرا تصور الناس والمدن والمواقف عشان كده اخر لينا الصور شوية في البوست عشان ما تفسد علينا متعة الخيال
بالنسبة لسلسلة سحارة البلد فاكيد حامشي اشوفها

[نهلة عمر الشيخ]

المشاركة الأصلية كتبت بواسطة محمد عبد الرحمن

في اللحظة دي بالزات داير أكتب بوست لاكين قدر ما نحتا راسي ما لاقي موضوع

جرب ختان الاناث

[رأفت ميلاد]

المشاركة الأصلية كتبت بواسطة نهلة عمر الشيخ
والله يا طارق ويا عكود ما عارفه اشكركم كيف
مداخلاتكم دي وقبلهم مداخله مي اعادوا لي استعدال فتلان البوست بعد ما قربت اقنع منو

نهلة خيتى سلام

ياخ والله ما قادر أفهم .. فى الأول جانى (إحساس) أنك بتبتكرى أسلوب كتابة جديد .. على وزن ثقالات محمد عبدالله الريح .. وكنت متوقع بعد كل ثقالة تجى حاجة منقذة .. زى مثلاً (هيييه الكاميرة الخفية) ..
ومرات (بحس) زى كأنك جادة ..
غايتو كلامك الفوق ده كان جاد .. بوستك مافى زول فتلو غيرك ..

بديتيهو على إفتراضات فى راسك .. وتقولى كلام وتفسريهو على هواك .. ممكن تلفق معاى وممكن لا .. فالردود كلها ممكنة .. لكن أنتى مستنية ردود على المقاس .. كملتى الليمون

غايتو أنصحك أقنعى منو .. ومداخلات عكود وكانديك فى (إحساسى) ببوستك ده .. أكتر مداخلتين غريبات عن البوست ده ..

إيه رأيك فى (محاسيسى) دى على قول سمراء

[عكــود]

المشاركة الأصلية كتبت بواسطة نهلة عمر الشيخ

اخ عكود
ادب الرحلات من اجمل الادب
فيه يتحول القلم لكاميرا تصور الناس والمدن والمواقف عشان كده اخر لينا الصور شوية في البوست عشان ما تفسد علينا متعة الخيال
بالنسبة لسلسلة سحارة البلد فاكيد حامشي اشوفها

شكراً نهلة على الإقتراح الوجيه.
سآخذه في الإعتبار إن شاء الله،
بس ربّنا يفك ساجور الكي بورد!

ألف مرحب بزيارة سحّارة الذكريات.

[نهلة عمر الشيخ]

المشاركة الأصلية كتبت بواسطة رأفت ميلاد

ياخ والله ما قادر أفهم ..

اول ما قريت الكلمة دي جاني رد في طرف لسان كيبوردي بس قلت يا بت بطلي القسوه