بيتنا زماااااااااااااان..

[طارق جبريل]

الحبيبين كيفنكم
جيت جري من المدرسة لابس الرداء الكحلي والقميص اللبني... وكتين وصلت مربعنا لقيت قندران ابوي واقف..
قلت في نفسي يا ربي يكون كان شاحنلو فتريتة ولا عيش. باقي الحمام أليلي من امبارح ما رميتلو شيتا ياكلو..
والجداد تراهو ياكل في نوار القش مع الغنم في المراح المن تالا ناس أم النصر..
طلعت في الترلة لقيتلكم الفتريتي مشتتة مالي الدنيا... واااااجيدلي يبقالي مع راس القندران بملالي شوال... يعني سبوعين والحمام أليلي ياكل ويحمد ربه..
جريت سلك الباب ودخلت رميت الخُرتايي في عنقريب في البرندة وشلتلي جردل ومقشاشة وأمي صاقعالي: انت متين جيت لامن داير تمرق تاني
قلتلا: ماني مارق شي داير احصل اسقي الغنم واشتت العيش للحمام والجداد... باقي الجدادي البُني تكضكض باقيلي دايري تركض
خميت يا الحبان الفتريتي وبقيت امشي وأجي لامن مليتلي شوال وتكلتوا جنب المراح أليل الغنم.. وشلتلي طرادة من أمي ومشيت علي موسى بتاع القش
وقلتلو: بي طرادة يا عم موسى لكن شوفلي الفيهو النوار فشان الجداد خليتو يكاكي داير يرمي البيض في الزير المكسور في الركن.. عمنا موسى ضحك وربطلي القش
وجيت مخمخمو وماشي أغني.. لاقتني خالتي بثينة قالتلي ما شوفتة جمال يجي يجيب القش للغنم ديل.. قلتلا خليتو يلعب في كورة الشراب جنب المدرسة
قالتلي: الله يقلعوا الولد دة من هو يرضع في شطري معذبني.... ضحكت ومشيت خليتها..
بالله الغنم ديل شافني بس بقن يكوركن.... ميع ميع ميع ميع وانا صاقعلهن: أصُبرِن اللملا الجردل موية فشان تشربن وتاكلن..
صنقعت علي الغنمايي السوداء وقلتلا: ان بقيتي ما تقلتي شي الشهر دة ابوي بيمسكك يبيعك لي عبد الجبار الجزار.. وأنا طالع حدرت للتيس الكبير..
دخلتلن المويي وشريتلهن البرسيم وجاء الجداد وسطن يكاكي وياكل في النوار لكن الجداد البنيي ما جات طالعي والديك اللحمر وعندو ريشايتين صُفُور واقفلها في خشم الزير
يمد في جناحو مع رجلو اليمين ويكاكي زي صفاقين عثمان اليمني وكتين يهيجوا... قلتلو: اييي الخرابي باقيلي ركضت خلها لا تكسر علينا البيض أمش علي التانيات
طلعت لي برج الحمام ومليت الكوريي فتريتة... لقيت الضكر البني علي الرقيطة قاعد فوق الصفيحي وشغال يسوي في «غووووووغ غوووووووووغ غووووغ»
قتلو أصبر الزغاليل خلاص كبرن وباقيلي أمي آآآبتفويتن الجمعة دي وبعداك أن بقيت داير تدخل علي مرتك أدخل..
صنقعت علي الحمامة الرمادية لقيت معاها الضكر أليلا يغوغي ويرفع وينزل في جناحو ويزغد فيها باقي ليهن تلاتة ايام من شلنا زغاليلم...
قلت كدي شتَتلم الفتريتي بالله جوا ينطايروا من الصفايح زي قِطيع الصبيط في حش التمُر...
نزلت مشيت شلتلي جردل ومشيت جنب بيت عمنا مكاوي باقي الايام دي يبيضوا في بيتهم مليت جردلي رملة وجيت داخل الأوضة ألتنا
فرشت الرملة تحت عنقريبي وسويتها مدورة... امي جات داخلي قالتلي انت قاعد تصوت في شنو.. قلتلا الجدادي البُنيي ركضت وداير أجيبها هني
قالتلي: يا ولدي بتوســـخ علينا الاوضة وأخواتك يقومن ينقنقن... قلتلا: يمة البرد هناك وإن بقيت ما شفتلا بُكانا سخن البيض دة آآآبيفقس شي.. بشوفلي دبارة أربطها بيها في كراع العنقريب
مشيت نقلت البيض من تحتها في الزير وجبتو ختيتو في الرملة وقبضت الجدادي جبتها ختيتها في الاوضة وقفلت الباب فشان ألقالي دبارة أربطها بيها... ما لقيت غير تِكي قديمي ألت أبوي
جيت مسكتها ربطها مع كراع العنقريب المن تالا مخدتي فشان من تصبح وافتح عيني أقوم أتبنها وأشوف إن بقى فقست البيض...
ليلي ونهاري من مراح الغنم لي برج الحمام لي الجدادي الراكضي وبالليل وكتين امي تجي تمسحني بالجلسرين وكتين أقولها ماني داير اتمسح..
تقولي: شوف وشك كله مليان قشروب ورجلينك ديل دمهن والله ما تتمسح اشيل الجدادي دي ارجعها للزير وسط المراح...
باقي عارفاني مستني متين تطلع السواسيو... اسكت اتمسح بي جلسرين الجن دة وادنقر راسي من العنقريب واقعد اتونس مع الجدادي:
باقيلي ليكي مدة ما شربتي.. امشي أملالي كوز صلصة موية واخته جنب راسها وتقوم كدي تنقدني في اصبعي واقعد أضحك..
.....

[الرشيد اسماعيل محمود]

صنقعت علي الغنمايي السوداء وقلتلا: ان بقيتي ما تقلتي شي الشهر دة ابوي بيمسكك يبيعك لي عبد الجبار الجزار.. وأنا طالع حدرت للتيس الكبير..

ياخي متعة ما بعدها والله..

اسكت اتمسح بي جلسرين الجن دة وادنقر راسي من العنقريب واقعد اتونس مع الجدادي:
باقيلي ليكي مدة ما شربتي.. امشي أملالي كوز صلصة موية واخته جنب راسها وتقوم كدي تنقدني في اصبعي واقعد أضحك

ياخي إنت زول سينما..
مليان ومستّف بأزمنة بقت رهاب رهاب..
لكنها حاضرة بكل التفاصيل رغماً عن أيّ شي..
يا طارق:
والله كيفتني الليلة جنس كيف..

قلت لي حدرت للتيس الكبير..؟

[زاهر صديق الطيب]

ياسلام عليك يا طارق ياخ ..
ياخ ضممممممممه كدا قاع تبالغ في الوصف ..
عجبني جدآ سردك باللهجة الشايقية .. وهي فيها
مفردات عجيبة ياخ .. واصل عليك الله يا طارق
ولا تحرمنا من هذه المفردات الجميلة ..

تحياتي وإحترامي ..

[شبارقة]

المشاركة الأصلية كتبت بواسطة طارق جبريل

والديك اللحمر وعندو ريشايتين صُفُور واقفلها في خشم الزير يمد في جناحو مع رجلو اليمين ويكاكي زي صفاقين عثمان اليمني وكتين يهيجوا... قلتلو: اييي الخرابي باقيلي ركضت خلها لا تكسر علينا البيض أمش علي التانيات

مبدع والله يا طارق ... أضحك الله سنك

[بله محمد الفاضل]

المشاركة الأصلية كتبت بواسطة الرشيد اسماعيل محمود

ياخي متعة ما بعدها والله..

ياخي إنت زول سينما..
مليان ومستّف بأزمنة بقت رهاب رهاب..
لكنها حاضرة بكل التفاصيل رغماً عن أيّ شي..
يا طارق:
والله كيفتني الليلة جنس كيف..

قلت لي حدرت للتيس الكبير..؟

اليومين دي قاليك بحدر لي ود الفاضل

[الرشيد اسماعيل محمود]

المشاركة الأصلية كتبت بواسطة بله محمد الفاضل

اليومين دي قاليك بحدر لي ود الفاضل

بختك..

بختك يا حاج بلّة..

[الزوول]

قريبي كيفنك
والله ماك نصيح شي
آ خرابا النضمي ده قع تجيبو من وين
عندك خبر!!
انا زمان كت مصنفك مع السحاسيح
واقول في نفسي ...زول الامتداد وشغل العمارات ده متسلبط فوقنا كدي مالو
لكن يبقالي زي الداير اغير رايي كدي
كدي عليك الله كان ما حدستني:

المشاركة الأصلية كتبت بواسطة طارق جبريل

عمنا موسى ضحك وربطلي القش وجيت مخمخمو وماشي أغني..
.....

مِنطَرّي كُتْ قعْ تغني في شنو ؟؟

المشاركة الأصلية كتبت بواسطة طارق جبريل

ليلي ونهاري من مراح الغنم لي برج الحمام لي الجدادي الراكضي وبالليل وكتين امي تجي تمسحني بالجلسرين وكتين أقولها ماني داير اتمسح..
تقولي: شوف وشك كله مليان قشروب ورجلينك ديل دمهن والله ما تتمسح اشيل الجدادي دي ارجعها للزير وسط المراح...
.....

غايتو دي سبب غييري لى رايي فيك
فشان الحكايي دي مشترك فيها معاك
أماني كان عندنا حرورية جلسرين
....
...

[طارق جبريل]

اقتباس:
المشاركة الأصلية كتبت بواسطة الرشيد اسماعيل محمود

ياخي متعة ما بعدها والله..

ياخي إنت زول سينما..
مليان ومستّف بأزمنة بقت رهاب رهاب..
لكنها حاضرة بكل التفاصيل رغماً عن أيّ شي..
يا طارق:
والله كيفتني الليلة جنس كيف..

قلت لي حدرت للتيس الكبير..؟






يا الرشيد كيفنك
عاد تيس الجن دة ما شايف شغله نسويلو شنو

[طارق جبريل]

اقتباس:
المشاركة الأصلية كتبت بواسطة زاهر صديق الطيب
ياسلام عليك يا طارق ياخ ..
ياخ ضممممممممه كدا قاع تبالغ في الوصف ..
عجبني جدآ سردك باللهجة الشايقية .. وهي فيها
مفردات عجيبة ياخ .. واصل عليك الله يا طارق
ولا تحرمنا من هذه المفردات الجميلة ..

تحياتي وإحترامي ..



زاهر كيفنك ابوي
يا حبيب الله يجبر بي خاطرك
ترانا كلما يتاورنا الحنين قاعدين نجي نكتب

[طارق جبريل]

اقتباس:
المشاركة الأصلية كتبت بواسطة شبارقة

مبدع والله يا طارق ... أضحك الله سنك




شبارقة كل سنة وانت طيب ياخي

[طارق جبريل]

اقتباس:
المشاركة الأصلية كتبت بواسطة بله محمد الفاضل
اليومين دي قاليك بحدر لي ود الفاضل


وحات نضري ما براك

[طارق جبريل]

اقتباس:
المشاركة الأصلية كتبت بواسطة الزوول
قريبي كيفنك
والله ماك نصيح شي
آ خرابا النضمي ده قع تجيبو من وين
عندك خبر!!
انا زمان كت مصنفك مع السحاسيح
واقول في نفسي ...زول الامتداد وشغل العمارات ده متسلبط فوقنا كدي مالو
لكن يبقالي زي الداير اغير رايي كدي
كدي عليك الله كان ما حدستني:



مِنطَرّي كُتْ قعْ تغني في شنو ؟؟



غايتو دي سبب غييري لى رايي فيك
فشان الحكايي دي مشترك فيها معاك
أماني كان عندنا حرورية جلسرين
....
...


يا قريبي عاد ما اتلومت معاي
انا مسحسح افوووووووو
كنت بغني في «شادية ما عارف ألت الله تراني بزرع»

[احمد سيداحمد]

[طارق جبريل]

المشاركة الأصلية كتبت بواسطة اسمر

الله الله عليك يا اسمر

[بله محمد الفاضل]

المشاركة الأصلية كتبت بواسطة الرشيد اسماعيل محمود

بختك..

بختك يا حاج بلّة..

المشاركة الأصلية كتبت بواسطة طارق جبريل

اقتباس:
المشاركة الأصلية كتبت بواسطة بله محمد الفاضل
اليومين دي قاليك بحدر لي ود الفاضل


وحات نضري ما براك

الرشيد أمسك الباب
وخلي متاكا بعد ما تمرق
أوعك تجي تاني
حذرتك

أخي العزيز الغالي وصديقي الصدوق الجميل
الأستاذ الفذ طارق جبريل أطال الله عمره وأبقاه ذخراً وسنداً للضعفاء أمثالي
يا رب ترضى علينا
وتنولنا المراد
طبتم سيدي ودمتم في رعاية الله وحفظه