عبدالوهاب وردي وتقييمه للفنانيين السودانيين والفن!! كلام عجب

[عبدالعزيز خطاب]

[youtube]http://www.youtube.com/watch?v=X5H7kQwXKKE&feature=related[/youtube]



عبدالوهاب وردي إبن الفنان الكبير محمد وردي..
أستمعوا لهذا الحوار وكيفية التقييم!!
ودعونا نناقش هذا النقد في إطاره..

عبدالعزيز خطاب

[عبدالعزيز خطاب]

عبدالوهاب وردي..

دفعتي بمعهد الموسيقى والمسرح قسم الموسيقى..

لم أسمعه طيلة سنوات الدراسة يدندن ولم أسمع صوته يغني علماً بأنه كان يقطن الغرفة التي تجاور غرفتنا أنا والأخ الزميل د. عبدالله شمو في الداخلية ببانت.

عبدالوهاب متخصص كنترباص.. وهي الآلة الكبيرة التي تشبه الكمان.
عبدالوهاب لم يدرس تأليف موسيقي ولم يدرس صوت ولم يدرس قيادة أوركسترا!!
تخرجنا في العام 1995م ولم يحضر عبدالوهاب ليتخرج معنا!! ولا أدري إن كان قد تخرج في الملحق أم في العام التالي أم أنه لم يكمل دراسته؟؟؟؟

[youtube]http://www.youtube.com/watch?v=rwSwgQV6_EE&feature=related[/youtube]


أستمعوا لتجربة عبدالوهاب الغنائية!!

[ناصر يوسف]

عزيز كيفنك


سلام

عبد الوهاب تخرج في كلية الموسيقي والدراما يا عبد العزيز


لم أستطيع الإستماع للصوت ( عندي مشكلة في الكمبيوتر)

ربما أعود بعد الإستماع للصوت

وإلي حين .. فلربما يكون مغني متميز ؟؟؟

قلت ...

فلرببببببببببما ......

[بابكر مخير]

الحبيب عزيز،
أسمح ليا معاك أختلف على خلاف شعوري نحوك،،
الكاشف "ذي ما بيقولوا؛ القامة ومن أعظم مطربينا" قالوا الحرف ما فكهو،، يعني كتاب ما قرآ خليهو معهد موسيقى..
إذن في حاجة تدي الزول شيتن خارج الحسابات وفي فطرة "وزكاة محبة ليك"،،
أنا بقيم نفسي (مش على كيفي، هو أنا وهي نفسي) متذوق ممتاز لفن الغنآ، بشوف المرحوم مصطفى سيد احمد هو شعارات يسارية ما فن للطرب، محمد الأمين عمل بنظرية لتظهر غير وتقبلته شريحة من المجتمع من نفس الروح "الرفض"،، محمد وردي موسيقي درجة الإمتياز دون مكملات لفنان بحضور يتقبل "يعني شكله ما إجتماعي،، عدييييل كدآ" وهلماجرآ...
لاحظ أنه دآ رأي،،
ما لقيت مرتع خصب من الجهالة عشان أنفثه وأنفس عن نفسي،،
آها دآ لقى الميكرفون و"المذيعة" والقناة والقروش..
خليهم يقولوا، ذي ما يقولوا..
ما تحرق دمك،، راجياك مشية لآتون السودان

[زول الله]

نرجسية زائدة وغرور مقيت و تعالي يستند على لاشيء
اشفقت عليه عندما أدلى برأيه في ترباس وعثمان مصطفى
واشفقت عليه تاني عندما ذكر ان السودان بلا فنانيين
وتالت مرة عندما تحدث عن اغاني الحقيبة
الاغنية المرفقة في الفيديو الثاني توضح إمكانيات صوتية مافيشة
عبدالوهاب وردي هو -للأسف- إبن الوز لكنه ماب يعرف يعوم

عزيزخطاب تحياتي و ودي









اقول قولي هذا واستغفر الله لي ....................

[عبدالعزيز خطاب]

المشاركة الأصلية كتبت بواسطة ناصر يوسف

عزيز كيفنك


سلام

عبد الوهاب تخرج في كلية الموسيقي والدراما يا عبد العزيز


لم أستطيع الإستماع للصوت ( عندي مشكلة في الكمبيوتر)

ربما أعود بعد الإستماع للصوت

وإلي حين .. فلربما يكون مغني متميز ؟؟؟

قلت ...

فلرببببببببببما ......

الحبيب ناثر الرحيق ابا رحيق

مودة تعلمها وحاجات تاني حامياني..

اشكر لك إفادتك بتخرج الاخ عبدالوهاب لأنني لم أعلم مصيره والأخوة إبراهيم الماحي ومحفوظ عليش لأنهم لم يرجعوا ليكملوا معنا السنة الخامسة.. وبعد التخرج تخارجت أنا من السودان..
كما أنني أحترم عبدالوهاب أكاديمياً لأن إحترامي هذا ينبع من إحترام مؤسسة درست وتخرجت منها..
عبدالوهاب لا يراعي أدنى معايير الأخلاق في النقد وما يفعله تجريح لفنانيين لهم بصمتهم مهما أختلفنا في إمكانياتهم وعدم قبولهم..
وليت كان نقده في الصوت والأداء والقالب اللحني وتفنيد ذلك حسب القواعد الموسيقية العلمية!!
أقرأ القصة التي سأكتبها في ردي على الحبيب مخير الله..

لك مودتي والأمنيات

[عبدالعزيز خطاب]

المشاركة الأصلية كتبت بواسطة بابكر مخير

الحبيب عزيز،

آها دآ لقى الميكرفون و"المذيعة" والقناة والقروش..
خليهم يقولوا، ذي ما يقولوا..
ما تحرق دمك،، راجياك مشية لآتون السودان

الحبيب مخير الله في ريدو البريدو

سلام ومحبة وأشواق

إن لم نوقر كبارنا لم ولن يحترمنا صغارنا.. والفن مسألة ذوق نسبي .. والأذن السودانية أحادية تربت على سماع نمط محدد وسارت عليه الركبان من بعد!!
وعبدالوهاب للأسف مسرف في عدم توقير الكبار وبل يصغرون في عينه لدرجة لا يراهم كما ذكر!!
دعني أحكي لك عن واقعة ..
كان أحد الزملاء والدفعة أبان سنوات الدراسة في زيارتي بتوتي وفي البص قابل دكتور محمد إبراهيم وهو بالنسبة لي أب وأستاذ وصديق وسأله دكتور محمد عن الفنان أحمد المصطفى فرد زميلي بأن أحمد المصطفى دخل الإذاعة عندما لم يكن لها خفير وبواب وقال له بأنه يغني من سقف حلقه وموسيقاه دائرية تردد ما يقوله .. عموما طلع ليه أحمد المصطفي شمار في مرقة!!
وبعد المغرب حضر لي دكتور محمد في المنزل وبعد السلام والتمنيات بالشفاء سألني!!
ما هو رايك في الفنان أحمد المصطفي؟؟
قلت له إنه عميد الفن.
قال لي هذا رايك أم رأي المعهد؟؟
قلت له في المعهد لا يدرسونا رأياً في أحد. بل يدرسوننا قواعد الموسيقي..
فحكى لي ما دار بينه وزميلي!!
فقلت له جيل الفنان أحمد المصطفى لهم التقدير والحب وهم من ساروا في طريق الفن الوعر حفاة (موصومون بالصعلقة) ليعبدوه لنا لنسير من بعدهم نجوم محترمين. وهم من شكلوا وجداننا وبأغانيهم تعلمنا الغناء.
فهدأ الرجل وإرتاحت أساريره ..

(أرسلت لك إيميل أتمنى أن تكون قد إستمعت إليه وإن لم يصلك فأخبرني لأرسله لك مرة ثانية)
محبتى التى تعلمها زائدة
عبدالعزيز خطاب

[عبدالعزيز خطاب]

المشاركة الأصلية كتبت بواسطة زول الله

نرجسية زائدة وغرور مقيت و تعالي يستند على لاشيء
اشفقت عليه عندما أدلى برأيه في ترباس وعثمان مصطفى
واشفقت عليه تاني عندما ذكر ان السودان بلا فنانيين
وتالت مرة عندما تحدث عن اغاني الحقيبة
الاغنية المرفقة في الفيديو الثاني توضح إمكانيات صوتية مافيشة
عبدالوهاب وردي هو -للأسف- إبن الوز لكنه ماب يعرف يعوم

عزيزخطاب تحياتي و ودي

اقول قولي هذا واستغفر الله لي ....................

زولي أنا يا زولي

مشتاقين يا فنان

النرجسية تقتل الإبداع.. وعبدالوهاب حتى هذه اللحظة لم يصل مرحلة محمد وردي إبداعاً ليرث منه هذه النرجسية!!
عبدالوهاب كان أحد مؤسسي ساورا ولنسأل ما أضافته ساورا في الخارطة الفنية الموسيقية؟
عبدالوهاب بدأ تجربة غنائية وذكر بأنه سيكون الفنان الاوحد في العام 2009م ولم يتحقق ذلك!!
عبدالوهاب وزع البوم امير الحسن للأستاذ محمد وردي والألبوم لم يحقق الطموح المرجو منه..
على أي شئ يتجنى عبدالوهاب على الفن والمغنيين؟؟

سآتي لتفنيد كلامة في الحلقة بشئ من القرأة المتأنية في كل ما ذهب إليه..

في زول قال ليك أنا زعلان منك!!
لك حبى واشواقي الجزيله
عبدالعزيز خطاب

[زول الله]

المشاركة الأصلية كتبت بواسطة عبدالعزيز خطاب

زولي أنا يا زولي
مشتاقين يا فنان
النرجسية تقتل الإبداع.. وعبدالوهاب حتى هذه اللحظة لم يصل مرحلة محمد وردي إبداعاً ليرث منه هذه النرجسية!!
عبدالوهاب كان أحد مؤسسي ساورا ولنسأل ما أضافته ساورا في الخارطة الفنية الموسيقية؟
عبدالوهاب بدأ تجربة غنائية وذكر بأنه سيكون الفنان الاوحد في العام 2009م ولم يتحقق ذلك!!
عبدالوهاب وزع البوم امير الحسن للأستاذ محمد وردي والألبوم لم يحقق الطموح المرجو منه..
على أي شئ يتجنى عبدالوهاب على الفن والمغنيين؟؟
سآتي لتفنيد كلامة في الحلقة بشئ من القرأة المتأنية في كل ما ذهب إليه..


في زول قال ليك أنا زعلان منك!!
لك حبى واشواقي الجزيله
عبدالعزيز خطاب

اذا كان هذا الذي رأيته وسمعته يتنبأ بالنجومية فهو يعيش وهماً كبيراً
الهرم وردي قال يوماً مامعناه ان عبدالوهاب ليس بفنان .. وقد صدق
غايتو إذا تواجد بعد رحيل وردي(له طول العمر) يمكن تتسلط عليه الاضواء بسيط كدا
ليس كـ فنان أو خليفة لوالده بل بإعتباره إبنه فقط لاغير وبعدها حيمشي الخور
الفنان -مثلك- لازم يكون فناااان جوه وبرا .... و الاولى اهم من التانية
الاكاديميات عمرها ما كانت اساس التقييم بالذات في الفن


بالله انا في زول بزعل مني ؟؟؟؟
قول ليهو حقك في رقبتي دي حلااالك اقطعا بدل الخروف
وقول ليهو لك العتبى حتى تمام الرضا

خطاب ياجميل لك كل الحاجات الجميلة ومستحيلة والممكنة برضو
ولنا ماتبقى

كل عام وانت والعائلة الكريمة كما تريد وتشتهي







اقول قولي هذا واستغفر الله لي ..................

[الرشيد اسماعيل محمود]

سلام يا عزيز..
تريزا شاكر، مقدّمة البرنامج مذيعة ضعيفة.
عشان كدة عبدالوهاب قلب عليها الطاولة وبدل ما هي تسأل بقي هو البيسأل..
ودة في رأيي أضعف من من مقدرتها علي الحوار.
ياخي الكلام البقول فيهو عبدالوهاب دة، كلام زول داير يظهر ساي ما أكتر..
داير يظهر من خلال مهاجمة الآخرين. حتي استشهاداتو وفرضياتو التأسيسيّة ضعيفة جدّاً..
لو لقت محاور حريف وذكي، كان طلعوا ليك أيّ كلام من بداية اللقاء.
استغربت جدّاً من تريزا شاكر..!!
معقولة بعد كلام عبد الوهاب المطلوق ساي دة، ما تقدر تستفيد في إدارة حوار ساخن..!!
غايتو ما بتدِّي حريف..

شكراً ومنتظرين عودتك للتفنيد، بحكم المعرفة الدقيقة بـ عبد الوهاب وردي.

[أبوبكر عباس]

المشاركة الأصلية كتبت بواسطة عبدالعزيز خطاب

عبدالوهاب كان أحد مؤسسي ساورا ولنسأل ما أضافتة ساورا في الخارطة الفنية الموسيقية؟
عبدالوهاب بدأ تجربة غنائية وذكر بأنه سيكون الفنان الاوحد في العام 2009م ولم يتحقق ذلك!!
عبدالوهاب وزع البوم امير الحسن للأستاذ محمد وردي والألبوم لم يحقق الطموح المرجو منه..
على أي شئ يتجنى عبدالوهاب على الفن والمغنيين؟؟

سلامات عبد العزيز،،
دفوعاتك دي دفوعات عاطفية وليست لها علاقة بحق عبد الوهاب في نقد الفن والفنانيين!

خلينا نمشي واحدة واحدة، ونناقش الكلام الجا في الحلقة دي وانت بصفتك متخصص تعال فند الكلام دا:
الزول دا قال:
- ألحان كمال ترباس ضعيفة وما فيها مجهود
- عثمان مصطفى ليس بمغني

منتظرنك تفند الكلام دا بشكل مهني، ونوع الكلام بتاع كبارنا .... وعميد الفن ....وشكّل وجدانا.... ونوقر كبيرنا.... ما بنفع هنا.

[أبوبكر عباس]

المشاركة الأصلية كتبت بواسطة الرشيد اسماعيل محمود

شكراً ومنتظرين عودتك للتفنيد، بحكم المعرفة الدقيقة بـ عبد الوهاب وردي.

بالله المعرفة الدقيقة بعبد الوهاب مهمة؟
أنا كنت قايلها ما مهمة!

[عبدالعزيز خطاب]

المشاركة الأصلية كتبت بواسطة بابكر عباس

سلامات عبد العزيز،،
دفوعاتك دي دفوعات عاطفية وليست لها علاقة بحق عبد الوهاب في نقد الفن والفنانيين!

خلينا نمشي واحدة واحدة، ونناقش الكلام الجا في الحلقة دي وانت بصفتك متخصص تعال فند الكلام دا:
الزول دا قال:
- ألحان كمال ترباس ضعيفة وما فيها مجهود
- عثمان مصطفى ليس بمغني

منتظرنك تفند الكلام دا بشكل مهني، ونوع الكلام بتاع كبارنا .... وعميد الفن ....وشكّل وجدانا.... ونوقر كبيرنا.... ما بنفع هنا.

وعليكم السلام يا بابكر

لا أعلم بأي إحساس تقرأ كل ما أخطه يا بابكر!! وحتي إقتباسك إذا قرأته بغير الذي نويت، لأختلف ما كتبت..

عموما لمزيد من الإطلاع وحسن النوايا سأقتبس لك هنا بعض مما خطت في هذا البوست..

عبدالوهاب لا يراعي أدنى معايير الأخلاق في النقد وما يفعله تجريح لفنانيين لهم بصمتهم مهما أختلفنا في إمكانياتهم وعدم قبولهم..
وليت كان نقده في الصوت والأداء والقالب اللحني وتفنيد ذلك حسب القواعد الموسيقية العلمية!!

.. والأذن السودانية أحادية تربت على سماع نمط محدد وسارت عليه الركبان من بعد!!
وعبدالوهاب للأسف مسرف في عدم توقير الكبار وبل يصغرون في عينه لدرجة لا يراهم كما ذكر!!

سآتي لتفنيد كلامة في الحلقة بشئ من القرأة المتأنية في كل ما ذهب إليه..

طب نفساً يا بابكر عباس ففي سودانيات متسع لحروفنا جميعاً

عبدالعزيز خطاب

[عبدالعزيز خطاب]

المشاركة الأصلية كتبت بواسطة الرشيد اسماعيل محمود

سلام يا عزيز..
تريزا شاكر، مقدّمة البرنامج مذيعة ضعيفة.
عشان كدة عبدالوهاب قلب عليها الطاولة وبدل ما هي تسأل بقي هو البيسأل..
ودة في رأيي أضعف من من مقدرتها علي الحوار.
ياخي الكلام البقول فيهو عبدالوهاب دة، كلام زول داير يظهر ساي ما أكتر..
داير يظهر من خلال مهاجمة الآخرين. حتي استشهاداتو وفرضياتو التأسيسيّة ضعيفة جدّاً..
لو لقت محاور حريف وذكي، كان طلعوا ليك أيّ كلام من بداية اللقاء.
استغربت جدّاً من تريزا شاكر..!!
معقولة بعد كلام عبد الوهاب المطلوق ساي دة، ما تقدر تستفيد في إدارة حوار ساخن..!!
غايتو ما بتدِّي حريف..

شكراً ومنتظرين عودتك للتفنيد، بحكم المعرفة الدقيقة بـ عبد الوهاب وردي.

الرشيد الرشيد الجميل
مساك الله بالخير واليمن

العالم الآن أصبح يمعن في التخصصية في كل المجالات وهذا هو سبب نجاح العالم الأول في الإعلام وجميع المجالات..
سألت يوماً الأخ الصديق الاستاذ عوض جادين عندما كان مديراً للتلفزيون في وجود مجموعة من الإعلاميين ..في كل المحاور التي يجب أن يكون عليها التلفزيون ومن ضمن الأسئلة..
سألته إن كانت هناك إدارة بحوث تعنى بالسيرة الذاتية للضيف في كل مناحي حياته وبالاخص في سياق إستضافته .. فأجاب بأنه ليس هناك إدارة بحوث في التلفزيون!!
سألته عن إدارة إعداد البرامج وكيفة تشكيل اللجان المعدة للبرامج وكيفية تشكيل الفريق ومن من يتكون؟؟ وعندما كانت الإجابة بأنه ليس هناك مثل هذه اللجان قلت له يجب أولاً أن تحدد الفئة التي موجه لها هذا البرنامج ويجب أن تشتمل اللجنة على متخصص في مجال البرنامج إن كان سياسيا أو إقتصاديا أو ثقافياً الخ.. كما يجب أن يكون هناك متخصص في علم الإجتماع والمنتج ومقدم البرنامج والمخرج بعد أن يتوفر لهم البحث الكامل عن الشخصية المستضافة. ثم أن إدارة البرنامج لا تترك لمقدم البرنامج وإنما تديره اللجنة من خلف الكاميرا بالوسائل المتاحه.. كان هذا ما يخص هذا الجانب من الأسئلة.. وكان حواراً طويلا إستمر بعد ذلك لعدد من الجلسات مررنا بالديكور والأخبار والضيف والمضيف والإضاءة والمكياج والملابس وحتي مسح الحزاء لأن تلفزيون السودان الوحيد في الدنيا يركز الكاميرا على الحزاء..ثم واصلت الحوار مع الأخ الصديق دكتور أمين حسن عمر عندما كان مديراً عاماً للهيئة ..ختم هذا الحوار بعد عدد من الجلسات..بسؤال لماذا انت هنا؟؟؟
ليس هناك بالسودان مهنية. تريزا تعد وتقدم البرنامج ولا أحد يسالها عن ماذا قالت ولا يرشدها إذا فلت الحوار من يدها!! وهن/هم كثر في كل القنوات السودانية!!
أول أمس كنا في حوار جميل مع الاخ الإعلامي بابكر حنين عبر الإسكايب إستمر لساعة ونصف.. إتفقنا على كثير من الامور التي سنشرع في تنفيذها قريباً نحتاج فيها لكل فكر يسهم في بناء وطن الأجيال والمجتمع المدني بعيد عن التنظيمات السياسية حكومة كانت أم أحزاب.. ونحتاج لكل فكرة تسهم في هذا الجهد..
سأعود لعبدالوهاب وتفنيد ذلك اللقاء..
مودتي كاملة يارشيد
عبدالعزيز خطاب

[أبوبكر عباس]

المشاركة الأصلية كتبت بواسطة عبدالعزيز خطاب

لا أعلم بأي إحساس تقرأ كل ما أخطه يا بابكر!!

....

طب نفساً يا بابكر عباس ففي سودانيات متسع لحروفنا جميعاً

عبدالعزيز خطاب

سلام يا عبد العزيز وكل سنة وانت طيب،،
- أقرأ لك بإحساس المحاور، وهي قراءة لبعض ما تكتب وليس كل ما تكتب!
- يا سيدي والله ما في شئ شخصي، ولو قلت الروب زي عزام، بخليك يومين تلاتة، لكن أخليك كلو كلو دي فيها خيانة للحوار.

كدي عاين نوع كلامك دا:

والفن مسألة ذوق نسبي
عبد العزيز

أوافقك، لكن مش ممكن تجي تنسف العبارة دي في السطر البعدها مباشرة:

والأذن السودانية أحادية تربت على سماع نمط محدد وسارت عليه الركبان من بعد!!
عبد العزيز

تعال يا زول فند كلام عبد الوهاب بشكل مهني وأمسح برايو الواطة، والله تلقانا مبسوطين منك جنس بسطة ونرقد ليك في جرادل عصير الليمون.