بيت النمل

[أبوبكر عباس]

المشاركة الأصلية كتبت بواسطة بدور التركي

كل سنة وانت مبدع ونبيل
كل سنة وانت طيب

تحياتي يا بدور
وحات سيدي الحسن يا بدور، النص دا، كنت داير أهديهو ليك انتي وسماح وواحدة تانية ما معانا في المنتدى إسمها ندى عبد الجليل

[فيصل سعد]

المشاركة الأصلية كتبت بواسطة بابكر عباس

تحياتي يا بدور
وحات سيدي الحسن يا بدور، النص دا، كنت داير أهديهو ليك انتي وسماح وواحدة تانية ما معانا في المنتدى إسمها ندى عبد الجليل

عليك الله تعفي لي ياخ كنت مفتكرك
حتهديهو لبت الرشيد اولا ..

[أبوبكر عباس]

المشاركة الأصلية كتبت بواسطة فيصل سعد

عليك الله تعفي لي ياخ كنت مفتكرك
حتهديهو لبت الرشيد اولا ..

يا أخي نحن ما صدقنا
انو الاستاذ جعفر بدري جانا راجع!
الحدود محفوظة

[فيصل سعد]

المشاركة الأصلية كتبت بواسطة بابكر عباس

يا أخي نحن ما صدقنا
انو الاستاذ جعفر بدري جانا راجع!
الحدود محفوظة

انا يا غرامي وصلت بيك
في الدنيا لحد الغرام
و لقيت ملامي على عينيك
يا سيدي زي الما ملام

تفصل يا كبير

[سماح محمد]

المشاركة الأصلية كتبت بواسطة بابكر عباس

وحات سيدي الحسن يا بدور، النص دا، كنت داير أهديهو ليك انتي وسماح وواحدة تانية ما معانا في المنتدى إسمها ندى عبد الجليل

عزيزي الأديب الوريف (بكور)
(بيــــت النـــمل) إضافة حقيقية لأدب ما بعد-بعد الحداثة..!!
تجربتك القصصية المميزة والتي تعتمد على عدم الرمزية البناءة وتستهدف قراء على مستوى عالي من (الشفافة) بغض النظر عن أي قارئ semi-رعاع..
هي حقا تجربة رائدة تهدف لتغيير كوني واسع..يوما ما ستجد القارئ الحصيف الممتلك لأدوات قراءة عالية و الذي يستوعبها..
ف
شكرا على على فكرة الإهداء

see u

[يحي عثمان عيسي]

[justify] [/justify][justify][/justify][justify]
من بيت النمل حكايات (1)

الحب من اول نظرة ... تآلف الارواح وتعارفها ... وهكذا ماكادت النملة ان تري هذا المخلوق المهاب الواقف امامها بكل ما فيه من ابداع الخالق وتجلياته حتي احست شعورا غريبا يداهمها ملك عليها كل حواسها تسمرت في مكانها واطالت النظر والتاوهات ولم تتمالك فهتفت ... احبك يا فوفو ...احبك يا فوفو ... هرعت اليه احتضنته وتلاشت تقبله تلك القبلة التي اودعت فيها كل مخزون قلبها ... احتضنها فوفو وغابا معا طويلا طويلا .. ترعرع هذا الحب ونمي واستطال وكان لابد له من مستقر وقرار ...فاتح الفيل والده برغبته في زواج نموله حبه وحياته التي لا فكاك منها ... يا ولدي انت جنيت نمله شنو العايز تتزوجا وفلفوله بت عمك مخطوبه ليك وانتو صغيرين لايمكن الزواج ده يتم واعمل حسابك من هنا ورايح مافي خروج الا بعد ما نعقد ليك على فلفولة وكمان حنربطك بالسلاسل ... اسودت الدنيا امام فوفو ..انتظرته نموله يوما بعد يوم هرعت اليه في كل الاماكن التي شهدت هذا الحب ..لكنه لم ياتي ..انزوت .. جفت الدموع وبدأت الاحلام تتلاشي ..امها كانت تراقب.. ظنت ان نوبات الاستفراغ التي كانت تنتاب ابنتها مصدرها هذا الالم الذي احدثه فراقها لفوفو .. لكن توالت النوبات وتركررت .... وفهمت الام بخبرتها الطويله ... وتاكدت تماما حينما فاجأجتها نموله برغبتها في صحن كمونيه .. لكن الطلب الغريب كان ما افصحت به نموله بانها تشتهي برسيم أخضر طازه... وووب على برسيم صرخت الام وده دايرهو ربطه ولا عصير بي شويه سكر فانتفضت نموله ما تجيبي لي سير ة السكر عايزاهو مسيييييخ ..لابد من مواجهتها بالحقيقة .... نموله انتي حامل وووب ووووب على اودي وشي وين سجم خشمي وسجم خشمي وانخرطت الام في بكاء هستيري ...لكن نموله ارتسمت على وجهها ابتسامه رضي وامل ..احتالت ثم احتالت حتي وجدت سبيلا الي فوفو والذي ما ان راها كاد ان يقطع سلاسله ..ارتمت في احضانه ..كده يا فوفو ولا تسأل على نمولتك حبيبتك تعانقا طويلا لكنهما افاقا على صوت الفيل الكبير ....انتي يا بت ما عندك اهل يربوك وكمان عينك قويه وجايا لغاية هنا .... عرس انا قلت مافي شوفي ليك صرصار ولا جعران يلا امشي من هنا .... استجمعت النمله اخر ما تبقي لها ... يا عمو حرام عليك ... أنا حامل الفيل الفي بطني ده البربيهو منو ؟؟؟؟؟؟؟؟
[/justify]

[الرشيد اسماعيل محمود]

المشاركة الأصلية كتبت بواسطة بابكر مخير

واصل،،،
وإن لم تريد أو تقدر،،
تكون ما قصرتا

شايفو قصّر معانا شديد..

يا مخيّر صاحبك بابكر قال عندو وقت فراغ كبير..
أها يسوّي شنو..؟
بادي بي بيت النمل..
الله يحلنا لما يصل بيت الشعر

[بدور التركي]

المشاركة الأصلية كتبت بواسطة بابكر عباس

تحياتي يا بدور
وحات سيدي الحسن يا بدور، النص دا، كنت داير أهديهو ليك انتي وسماح وواحدة تانية ما معانا في المنتدى إسمها ندى عبد الجليل

التعبير من أهم وظائف اللغة باعتبارها أداة التفكير
وسيلة للمبدع لنقل مشاعره وتجربته النبيلة الإنسانية إلى نص أدبي
وللغة ايضاوظيفة التخيل والتمثل للموجودات التى تسكن تحت خفقات الوجدان والجوانح لتخرج لنا بصورة جمالية شعرية لتكشف لنا عن جمالها بإقاع صوتي رنان
وماجاء. في نص المبدع النبيل الشاب الموهوب بابكر
من تشبيه وتخيل مرسوم بحبكة وفن ابدعه
يجعلنا نكتشف عالم جديد متفرد بخصائصه وأشكاله
بإختصار شديد
نحن اكتشفنا ولادة. نوع ادبي "جديد"
له شكله وفرادته..

شكرا على الهدية يا مبدع يا نبيل...
ولي عودة لتشريح النص وتشريحك

[يحي عثمان عيسي]

[justify] [/justify][justify][/justify][justify]
من بيت النمل حكايات (2)
أُسقط في يد الفيل الكبير .. حامل يا مفعوصة جايا ترمي بلاويك فينا ؟؟ ورفع رجله وهم ان يدهس بها نمولة المسكينه .. فصاح فوفو حرام عليك يا أبوي ديل روحين ...أيوه انا العملتها .... تسمرت رجل الفيل الكبير.... واعمت الدهشه قلبه حتي انه لم يسمع تحية فلافل التي وقفت امامه ... مالك الليلة لا سمع لاشوف .. تنبه لها ..معليش سرحت شويه في موضوع عايز اخد رأيك فيهو ... يعني لو فرضنا ... فرضا يعني ...لو فيل عرس نمله والتمله حملت المولود حيطلع شنو ... ضحكت فلافل ... ودي دايرا ليها سرحان ولا تفكير .. يا فيل منمل ولا نملة مفلله .. حكت له انفها ثم مضت ... فيل منمل ... نمله مفلله مصيبة ... الله لا كسبك يا فوفو صحي قليل الفهم ياكل الفول ويخلي اللحم .. ... وبعدين ؟؟؟ الحل الوحيد اربطا مع فوفو لغاية ما تلد وامشي أرمي المولود جنب البقولو عليها دي اسمها شنو يا ربي يعني لا فنان ولا لاعب كورة جاب اسمو معها فالحين بس ندي القلعة وجلال الصحافة وماعارف منو الرميلة وانصاف مدني ... المايقوما دي ما سمعو بيها ..
[/justify]

[يحي عثمان عيسي]

[justify] [/justify][justify][/justify][justify]
من بيت النمل حكايات (3)

روحان حلتا على بدن وبالظبط ذي ما بيقول رأفت ...اتنين في ( ......) منذ الطغولة هما لا يغترقان تشاركا الاحلام والمني الضائعة .. شحموط النملة العكروت وصنوه النمله ابو الريش المرح الخفيف .. شبت خطاهما وأشرابت هاماتاهما كنخلتبن ارتوتا من هذا النيل السلسبيل .... دقت طبول الحرب هنا وهناك وكغيرهما لا مناص أن ياتيا طوعا اوكرها فالرب يغضب ان تقاعسا وان يخرجا عن طاعة وليه في الارض ... حملا السلاح والعتاد وغادرا ..تطول بهما الدروب بن قري ومدن ... كان لابد من الراحة ولو قليلا ترجلا .. غير ان شحمط همس في اذن ابو الريش .. أنا زايغ ونتقابل ..دقت طبول الحرب سنين عده وابو الريش من خندق الي خندق بين جريح وقتيل وصراخ ونويح و الحرب تدور كلما خبت زادها الوالي سعيرا ......عاد ابو الريش بلا ريش هائما فقد سرقو كل احلامه ,,,,, فجأة توقفت مركبة فارهة واطل من نافذتها وجه ربما عرفه يوما ما لكنه تكور وتدور وتنعم وتدلل .... ابو الريش ..... مين شحموط والله ما عرفتك ده شنو ده ومن وين كل المنجهه والشياكة والعربية .... بعدين افهمك أركب ... وتوغلت بهما المركبة بين غابات شاهقة من الاسمنت والحديد والزجاج ووتوقفت ... اتفضل البيت بيتك .... أهذه الجنة التي وعدنا بها الولي ؟؟؟ لكنها هناك وانا لازلت امشي واتنفس ... جاء الخدم بالمحمر والمشمر واصناف واصناف لا يعرف منها اسما غير الرغيف .... يا سيدي الحكاية وما فايها وباختصار شديد جدا شايف العماره الجنبنادي العشرة طوابق .... أرجع بصره كرتين وما رأي غير عمارة ذات ثلاثة طوابق ... قصدك دي التلاتة طوابق ..... ضحك شحموط وضحك وضحك .. هنا اللعبة اخوك شفط السبعة طوابق ...... فهمت .... طيب تعال من هنا شايف .... اخوك شفط الباقي ... كمان شوف البتاعه ديك والله كان المفروض تكون .... واخوك شفط الباقي .... عرفت اللعبه ....انتظر دقيقه .. خود امسك المفتاح ده ... يا شحموط انت جنيت دي بطاقة عضوية ...... ده المفتاح يا عبيط
ومرت الايام وتقابلا فجأة دونما ميعاد .. أها يا ابو الريش شايف الموضوع واري معاك والحال اتغير الحكاية شنو ... والله اهو بنداقش هنا وهناك بالمناسبة يا شحمط شايف الخزان الجديد القدامك ده ... يا زول انت جنيت خزان شنو جاي تلعب في بيت اللعب .. وين ... ضحك ابو الريش طويلا اخوك يا شحموط ما شفقان يمين شفطو ليك كلو.....
[/justify]

[جيجي]

المشاركة الأصلية كتبت بواسطة بابكر عباس

تحياتي يا بدور
وحات سيدي الحسن يا بدور، النص دا، كنت داير أهديهو ليك انتي وسماح وواحدة تانية ما معانا في المنتدى إسمها ندى عبد الجليل

بالله هسه في زول يهدوا ليه بيت نمل

[بدور التركي]

المشاركة الأصلية كتبت بواسطة جيجي

بالله هسه في زول يهدوا ليه بيت نمل

أحسن ما يهدينا بيت العنكبوت

[ام التيمان]

بيت النمل دا
عاوزة اجرو

مودتى

[فيصل سعد]

المشاركة الأصلية كتبت بواسطة ام التيمان

بيت النمل دا
عاوزة اجرو

مودتى

دي شكلها موزونة على :

ساكنة قليبي و ما ليك دار
سكني قلبي معاك بالايجار

و ارقدوا عافية ..

[ام التيمان]

المشاركة الأصلية كتبت بواسطة فيصل سعد

دي شكلها موزونة على :

ساكنة قليبي و ما ليك دار
سكني قلبي معاك بالايجار

و ارقدوا عافية ..

يا ود سعد يا اخوى
اخير ليك بعيد بعيد
قليبك الرهيف دا
لو سكنتو معاى
بتعب شدييييييد

مودتى