اقتباس:
المشاركة الأصلية كتبت بواسطة أميرى
يعني لجوءكم السياسي ما لأسباب إقتصادية؟
وأنا اللي كنت فاكر
نفسي ألم في إحصائية دقيقة عن اللاجئين السياسيين في الخارج و نسبة الناس المرقت خوفا علي حياتها بالفعل كم والناس الكايسة أكل العيش بالفعل كم
أتمني ماتشوفي المداخلة من منظور شخصي
|
يا اميري انت مفتكر انو اللجوء لاسباب اقتصاديه ماليها علاقه بالسياسه؟
انت ما سمعت كلام ستات البيوت انو السياسه خاشه حتى في قفة الخضار ( البقى مجرد كيس هزيل).
بمعنى لما البلد تكون مقسمه لفئيتين طبقه الناس العائشه وطبقة الناس الدائشه و ممكن الزول الدائش ده واحد من الناس يعني زول بسيط لا بفهم في السياسه كنظريات وجعجعات لكن بيعاني عشان اللقمه والهدمه والعلاج ومدارس العيال, يعني الزول ده لو فكر يلجا لبلد تحترمه كزول بسيط ( واحد من الناس) لا ليه ضهر ولا حزب ولا وجاهات.
نقوم ندخله في علبو ونقول اقيف بعيد واشخت شخيت وعشان تكون لاجئ لازم امضاء من الصادق او بصمة الميرغني ولا عريضه من نقد ولا تيسير مدثر.
كسره
بالمناسبه انا نوهائي ما بحب شخصنة الحوارات العامه فطمثن من الناحيه دي.واذيدك من الشعر بيت انو لجوئي ما كان سياسي بالمعنى المفهوم و زوجي هو الكان سيد الكيس ومشكلته كانت معاناته كموسيقي من نظام شمولي كان بينظر للفن كرجس من عمل الشيطان (يعني كيس فني) وده كان قبل ما يفوز القشير بلقب الراقص العالمي في مهرجان رقص الميداين والشوارع والساحات الخضراء والجرداء وفوق القندرانات على انغام قيقم وشنان والبيعيو وهلما جرا.
