اقتباس:
المشاركة الأصلية كتبت بواسطة سمراء
يعنى حكاية غطى راسك كانت حنك عاضى منو ؟
اذا دى حركة فى شكل وردة ....يكون غلبو التعبير ساى ..
بس برضو كنتى تحسنى الظن يازولة ، ومافيها شى لو جريتى توبك وغمتى راسك ،،،عادى اهو تكونى استثمرتى حركتو فى شى كويس
نحنا ياسناء لو بارينا على فكرة انطباعيتنا عن الكيزان ، حانغلط فى ناس كتار ، وفى روحنا دى زاااته ..عشان كده المصريين بقولو اولاد ....ماخلو لى اولاد الحلال حاجة ....والعياذ بالله
طولى بالك يا اختااااااااااه وركزى فى سمك البنفعك  |
سموره تجربتي في الحياة علمتني ما احسن الظن باي كوز على وجه الارض لانهم حتى الله ما سلم منهم وحاولوا يغشوا الناس بقال الله وقال الرسول وما هم الاتجار دين ودينهم استرتش على مقاسهم وبيتغير على حسب المكان والزمان وبيتلونوا ذي الحربويه.
وانا الحمد لله ربنا راضي عني اكتر منهم وشفت كتير من علامات رضاء الله ورضاء والديي الله يرحمهم. وما مستنيه كوز يجي يوزع لي صكوك غفران لاني والحمد لله لا اكلت مال حرام ولا باكذب واتدهنس ولا بنافق زيهم والغلط بقول عليه غلط كان لي ولا علي.
زمان سنة 93 واحد من الكيزان اسمه ابو عكر لاقاني في رسيبشن مكتب وكنت هناك عشان اقدم لوظيفه وقال لي اتجاهك اسلامي ؟وقلتا ليه لا ,استغرب من صراحتي او بجاحتي و قلت ليه علاقتي بي ربنا واداء فروض الاسلام مافي مخلوق بيحاسبني عليه وانا ما اتجاه اسلامي وما حاكون في يوم من الايام.
قال لي فكري في الموضوع ده ولو بقيتي مستعده تبقي اتجاه اسلامي باشغلك في الحته الانتي عايزها قلت ليه ما دايراك تشغلني وما حابقى اتجاه اسلامي لا حقيقيه ولا مزيفه.
وتاني في نفس السنه ملحنا في عربيه بوكس دبل كابين قريب من موقف شندي بعدما وصلت بت خالتي الكانت ماشه شندي لخالي الله يرحمه وكان في الراديو اخبار واتكلموا في الاخبار عن انو امريكا بتدين السودان لرعايتها للارهاب وسالني سيد البوكس عن رائ : قلت ليه امريكا ما من حقها تدين اي بلد لانها بترعى اكبر بلد عنصريه و هي اسرائيل : قامت اتكيف من كلامي وافتكرني ببرئي السودان من التهمه وطوالي توشك وقال لي : تشتغلي في الامن؟ قلت ليه لالالالالالالا
قال لي حنديكي رقم ما متزكراهو حسي لكن كان فلكي , قلت ليه لالالا
قال علاقتي في الوسط النسائي كيف ؟ قلت ليه منعدمه
قال للظروف الاقتصاديه؟ قلت ليه لانعدام الحميمه والناس ما بقت ذي زمان
قال لي فكري!!!!!!!! قلت ليه لالالالالا
قال لي ليه؟ قلت ليه اخلاقي و تربيتي ما بتسمح لي اشتغل الشغلانه دي
قال انتي من وين؟ قلت ليه من عبري\ السكوت\الشماليه قال لي اي سي
مع اي سي كنت وصلت قصاد شارعنا في ناصر , قلت ليه انا وصلت ممكن انزل
نزلني ومشينا كل منا لحال سبيله
مشيت البيت مش اتعرض علي اشتغل جاسوسه عليكم وعلى الجيران
