يا رب الانكليز يرجعو

[سجيمان]

المشاركة الأصلية كتبت بواسطة سيد احمد محمد علي المامون

اقتباس:
المشاركة الأصلية كتبت بواسطة سجيمان


من مرقو الانكليز...ونحن عوتنا لي رب السما.....الانكليز ما وصلو اهلهم عديل..... شكلتنا قامت.... عبود قلبا.... القرشي مات صدفة.... قامت اكتوبر..... الشيوعين رفدوهم من البرلمان.... قامت مايو.... نميري عكليته.... قالو يدقسوهو لما اتعكلت قلبوها تلاتة ايام بس.... القذافي مسك فاروق وبابكر... والسادات رسل قوات القناة...قلبوها رجع نميري وقع فيهم كبر ما عارف العدو من الصليح... ونهى الحزب..وقع فيهم جزر ...بعد ما ضربو ليهو الانصار في ود نوباوي ,,وابا.....وكسرو شوكتهم.... مرقو الترابي والصادق والهندي.... الجبهة الوطنية .. تدريب في ليبيا.... دخول انصاص الليالي لامدرمان...يومين ما لاقين زول يشغل الاذاعة سعد بحر فاااات وين ما معروف جابوهو... دم للركب..حسن حسين عثمان محاولة فاشلة تانية.... اعدامات في وادي الحمار باتبرا(وادي الحمار دا مرشح يكون وطن بديل للرباطاب المتأثرين بسد الشريك... شفتو الحقارة دي؟)...... ضربوهم برضو.... ودم للركب برضو....المصالحة ناس جات وناس ابت تجي.... الترابي دخل القصر مع نميري...قوانين سبتمبر.. قطيع ايدين وكرعين... وجلد...وحفلات تعارف للزُناةواصدقاء الحان في الرادي والناس تسمع....محمود محمد طه..اعدام نص النهار يوم جمعة حرو يسلق البيضة....فليب غبوش ودق الجرس...انتفاضة ابريل.... سوار الدهب الجزولي.... سلموها في ساعتها.... جوطة في جوطة ما دايرين ناس الجبهة...قرنق شدّ حيلو... وعيطة وزيطة وزمبيرطة....انقلاب الانقاذ.... الترابي في راسو.... حرب الجنوب... عرس شهداء...وطهارة معارضين.....مرقو برا تاني..... جبهة الشرق... رعاة الابل والشاة والفهود الحرة......دارفور........طمع السلطة.... يلغي شعار( هي لله لا للسلطة ولا للجاه).... انشطار اصحاب سقيفة بني ساعدة.....انتصار العسكر.... اندحار الاب الروحي... وانزواه في المنشية... انتحار المشروع.... وانتصار الفتن......اليسار والابتسار نضم يدخل من الاضان دي ويمرق من التانية...اتفاقية نيفاشا... طيارات تقع وطيارات تقوم ناس تموت وناس تفوت وناس تغرق ياكلها الحوت... الصادق الميرغني...حارسين القُبب وراجين السلطة تجيهم و شيالة معاها الزوارة .... لسيدي الحسن وسيدي المهدي.....الحركة الشعبية السودان الجديد.. قلنا خير... طلعو سودانيّن جنوب وشمال ولا واحد فيهم جديد....ونحن همنا كلو القروش غيروها ام خمسة سمحة وام خمسين مالا خدرا...؟.....والرغيف خبرو شنو؟.... والخريف هجر القضارف..والصقط ليهو سنين ما سمعنا بيهو...والغريبة عائدات زراعة القمح مُدرجة في الميزانية.... الصقط البي يخلي القمح ينجض وينو؟....واحدة في التلاتة:- يا مجنون القمح.. يا مجنون الصقط.... يا مجانين نحن....... لكن باقي لي نحن اقرب للجن.....مجلس وطني وعمم وبدل وتيبان. وقروش من حقنا....ونضم كبار كبار..وناسين انو الصقط خلى البلد والقمح بلا صقط ما بينفع.....ويسوو في اريتا ميزانية السرور......والله تعبنا من الونسة.... يا ريت الانكليز يرجعو.... عشان ترتاحو حكومة على معارضة.... وترتاح معاكم حواء الطقطاقة من كل مرة لافحة التوب العلم ولو سالتها تقول ليك مرقت الانكليز بي دلوكتي دي.....واوعى يكون في زول عشمان في ربيع عربي سوداني......؟....... يا اخي طُز!.....




.......

.... والله بعد كلامك ده ... ما محتاج لطه بعشر .. وحسبو سليمان .. يعني الا تمشي عريان وتجدع ... ومكانك هناك مع د. احلام حسب الرسول .... وعلي ذكر الطقطاقه .. اسرة ( العبراوي) ... ارتاحوا من.. ( المسلسل) ... السنوي .... ( ياغريب يلا لبلدك ) ...

... علي فكرة .. جزيرة فيجي... استقلت ... وحاتك .. بعد ثلاثه شهور بس... طالبوا بعودة الانجليز ..... انت جاي تسوق علينا ( وعيك ) ... بعد 56 سنه ....


.... كل الحب ...

يا سيد اجمد...انا كنت عشمان نحن نصلجها..ونبقى فيها عشرة.... لكن ناس فيجي عاقلين

[سجيمان]

المشاركة الأصلية كتبت بواسطة Sana Mursi

في بلدي الاول حاليا استراريا بعدما لفظنا الكنا معتبرنو بلدنا اول, عملوا استفتاء شعبي عشان يقرروا ينفصلوا عن التاج البريطاني بطلاق بائن والكلام ده كان في عهد حكومة الاحرار الكان رئيس وزراءها جون هوارد, عملوا الاستفتاء والاغلبيه اختاروا بقاء الامر كما هو عليه (انه اعلى الهرم بعد رئيس\ة الوزراء ) تكون ملكة بريطانيا الما بتهش ولا بتنش على اي حال. ولسه استراليا وذي كندا البريطانيه ونيوزيلانده وغيرها تابعه لدول الكمونولث.
بيني بينك يا سيجي لو الانجليز ما طلعوا كان حيكون عندنا بدل جامعة غردون جامعة كتشنر وتاتشر وبلير وبدل مستشفى الخرطوم مليون مستشفى محترمه ونضيفه بدل المستمرض البيموتوا فيه الناس بلا ديه. و ده غير خطوط السكه حديد والكباري المتينه المبنيه بي ذمه وضمير بدل الكباري البتخرب قبل الافتتاح.
يا سي جي مالكم علينا انت وشاهين شاهين متورين علينا قضروف في المراره والقولون

سلااااام... نضمك دا كلو سمح...... علا خسمتك بالرسول ترسلي لي كنغارو

[سجيمان]

المشاركة الأصلية كتبت بواسطة سارة

اها يا سجيمان قول كدى الله قبل دعوتك وجاب اللينقليز

تجيب شعب سودانى من وين؟؟؟؟

نحن ديل يا سارة.....لكن كل زول يمسك خشمو عليهو وما يقول بغم......

[سجيمان]

المشاركة الأصلية كتبت بواسطة Sana Mursi

في بلدي الاول حاليا استراريا بعدما لفظنا الكنا معتبرنو بلدنا اول, عملوا استفتاء شعبي عشان يقرروا ينفصلوا عن التاج البريطاني بطلاق بائن والكلام ده كان في عهد حكومة الاحرار الكان رئيس وزراءها جون هوارد, عملوا الاستفتاء والاغلبيه اختاروا بقاء الامر كما هو عليه (انه اعلى الهرم بعد رئيس\ة الوزراء ) تكون ملكة بريطانيا الما بتهش ولا بتنش على اي حال. ولسه استراليا وذي كندا البريطانيه ونيوزيلانده وغيرها تابعه لدول الكمونولث.
بيني بينك يا سيجي لو الانجليز ما طلعوا كان حيكون عندنا بدل جامعة غردون جامعة كتشنر وتاتشر وبلير وبدل مستشفى الخرطوم مليون مستشفى محترمه ونضيفه بدل المستمرض البيموتوا فيه الناس بلا ديه. و ده غير خطوط السكه حديد والكباري المتينه المبنيه بي ذمه وضمير بدل الكباري البتخرب قبل الافتتاح.
يا سي جي مالكم علينا انت وشاهين شاهين متورين علينا قضروف في المراره والقولون

يا سناء..نحن ليه ما دخلنا الكمنولث؟..... هم قفلو خلاس؟؟؟

[سجيمان]

المشاركة الأصلية كتبت بواسطة سماح محمد

ياسجيمان

ده كلو عشان الصقط ماجاء..
اها
الربيع يجي كيف؟!!..


ثم انو:
البلد عمرها ما استقلت

ونبعث لكم التحايا بمناسبة عيد الاستغلال*




* مقصودة ياأشرف السر

عدم السقط... يا سماح انتي قايلاهو هين؟؟؟؟؟

[بابكر مخير]

لمن إتخارجت بعد الإنقلاب مباشرة كان وجهتي أرض الكنانة
مشيت ودعتا خالي،،
قال ليا:
إحنا غلطنا في أنهو الإنجليز مرقوا
آها حسي لمن تمشي "مصر"
شوفوا ليكم طريقة جيبوا المصريين
لأنه الإنجليز بعد إتحلوا مننا ما أظنهم بيرجعوا
المصريين ياهم شبهنا وعندهم فينا طمع






الحبيب
أتاريهو
ما برآهو خالي ندمان علي فراق "العيون الزرقاء"

[سجيمان]

المشاركة الأصلية كتبت بواسطة بابكر عباس

- دول زي السودان، الصومال، تشاد، النيجر وموربتانيا والتي يكون فيها المناخ الصحراوي وشبه الصحراوي غالب، من الصعب على هذه الدول ان تنجح كدول,
- إستعمار هذه الدول بواسطة الأوربيين أملتو عليهم توازنات سياسية أكثر منها إقتصادية.
اللهم إلا يجيها فرج زي بتاع ناس الخليج.

من الصعب ان تنجح كدول؟؟؟؟؟؟ يا بابكر.....خلاس يفرتقوها..ويريحونا...

[سجيمان]

المشاركة الأصلية كتبت بواسطة وجدي الأسعد الأسعد

كاااااااااااااااااااااك

العزيز سجيمان
تعرف عندي صاحبي وضعو وحالو اسواء من وشو الذي يلعن قفاهو
وفي ساعة تأمل بديعة قال لي والوقار كابي شووووو من وشو
قال لي (صدقني السودان دا ليوم الدين وضعو ما حيتصلح)
قلت ليه ياااااااااااخ حرام عليك ما تحكم بالاحكام القطعية دي
قال لي يا معلم أحكام قطعية بتاعت فنيلتك؟! أخوك كلامو عن تجربة اسألني أنا المجرب
اسواء الناس حظاً في هذه الدنيا هم حملة شهادة التسنين لانو ما بكون عارف يوم ميلادو ومتلصق في رأس السنة
والسودان دا ما عندو شهادة ميلاد عشان كدة عيد استقلالو على رأس كل سنة

بصراحة أنا سكت لانو صاحبي ألجمني حجرا، لانو فعلا ناس حملة شهادة التسنين لو ما حظهم شوم ما كانوا روحوا شهادة ميلادهم






باي زا واي
صاحبي دا انا ذاتو ^_^

ههههههههههههههههههه..........انا برضو زيكم انت و السودان.....

[بابكر مخير]

المشاركة الأصلية كتبت بواسطة طارق صديق كانديك

سجيمان مساك الله بالخير

يارب الانجليز ما يرجعو ... !!

طيب يا BOSS
يا رب القيامة تقوم
ونبقا أكيد
إتحلينا من حكم البوم