يوم سودانيـــــــــات

[واحة]

تحياتى للجميع

بجد فكرة جميلة اتمنى الناس تتفاعل معها ، ومرتين كان دخولى

لإنو مافى زول من ناس البيت حينها .


تسلموا

( اذا فى امكانية اتذكر فى مامضى تم تفعيل مقترح : اى عضو يتغيب لمدة
15 يوم يفقد امكانية الدخول الا بخطاب للادارة او ماشابه ، عكود صححنى
ما اذكر التفاصيل الان .... ودا ممكن يكون حافز للناس انها تدخل وخاصة
هنالك الكثيرين خلف جدار الصمت ...

واحة

[نبراس السيد الدمرداش]

صبحكم ومساكم الله بالخير
اللمه حلوه والله بس الراي شنو نستفيد منها لو تمت
يعني نناقش موضوع بيهمنا نحن كاعضاء وبستفيد منو القراء والزوار

[حافظ حسين]

أها ما فضل ليكم يا شئون الافراد الا تقولوا يوجد ترحيل بعد العرض....
بدل الهيلمانة و الدستور دا لو مع بعض نحتنا رسينا دي و شفنا (يوم 313 متداخل), اليوم دا كان في شنو, أتخيل لي بيكون أفضل مما تعال يا سمية و تعال يا مرزوق نتلم.....
أها قولوا اتلمينا بدل 313 اتلمينا 3130 لحد ما صحن الباندويث إمتلا و أدفق, المحصلة شنو يعني؟....

ما عارف يا شئون العضوية بدل حركات الجمعيات الأدبية و المنتدي العلمي أفضل نقعد في واطة الله دي و نشوف ليه اليوم ابو 313 ما أتكرر و هل في سكة يتكرر و لا هو حصل كمعجزة و ما ممكن يتكرر تاني....

غايتو البوست دا ذكرني حشود الديكتاتوريين للجماهير المغلوبة علي أمرها ... يعني الدكتاتور داير يشوف حب الشعب ليه كيف, يأجز لطلبة المدارس بدون يمشوا بيوتهم يجوا طالعين كدا يلقوا ممثل الحكومة من الاستاذه واقف نبضه و واقف بالسوط و البصات واقفة برضو... العربات تحوم القري بالميكرفونات و وكلاء كل الدكتاتوريات ما حيقصروا طبعاً و ناس القري يقولوا مالوا نمشي سنجة أقلها نشرب بيستي كولا و نأكل فول و نجي راجعين... أها ميدان المولود يتملي لمن يدفق و يعرض الدكتاتور و يغني فنانه بعدها كل يرجع الي من حيث أتي مساهماً في المحافظة علي وسخ المدينة ببقايا كيس تسالي, فول حاجات أو أي مادة موسخة أخري....

في الختام يرجع الدكتاتور مطمئناً علي كرسية المحروس بحب الشعب

[خال فاطنة]

غايتو البوست دا ذكرني حشود الديكتاتوريين للجماهير المغلوبة علي أمرها .

gap

و الإقطاعيين السوفيت بتوع القرون الوسطى ما تنسى



أجمل حاجة يا عمك ذاكرتك إنتعشت

[مهند الخطيب]

ايوة تمام ....

كمان بقترح انو اليوم المفتوح ده يكون فيهو فطور وغداء وعلى حس الديكتاتور بتاع حافظ حسين ده الادارة تغمت لكل زول في ايدو مبلغ وقدرو ....

ويكون في أعلام كتيرة وصور لقادة الحزب ... والله صحي

وماتنسوا لازم يكون في لجنة منوط بيها (منوط دي كلمة جرسا غريب) الاعداد لهذا اليوم ....

السؤال البيطرح نفسو انو شحد العضوية على التواجد هنا في وقت محدد ممكن يضيف لفكرة الانتداء والتفاعل شنو؟
البعرفو انو العضو بيجي هنا لمن يكون مهيأ نفسيا وقلميا للتفاعل ، اها لو حددنا ليهو يوم يجي كسر رقبة يعني وللا يبقى من الخوارج ويفارق القبيلة ؟!!

غايتو انا بقترح خال فاطنة لرئاسة اللجنة ، وحافظ حسين مقررا ....

[خال فاطنة]

غايتو انا بقترح خال فاطنة لرئاسة اللجنة ، وحافظ حسين مقررا ....

على الدين يا عمك أنا قنعت من رئاسة اللجان دي من زمن كنا بنلقط الموليتة، أذكر حينئذٍ لميت الناس و ما لقينا موليتة....

و الحكاية بقت ليك فوق رأسي

المهم شيل خت شيل خت ما قدرت أقنع ليك الناس ديل أنا جمعتهم ليه، تقوم واحدة كدى من رفيقات الخلا أظنها كانت مقرر اللجنة تهدي من روع العالم المنفلتة دي، و تقنعهم بإن اللمة في حد زاااتها عمل إنساني رفيع.. حتى شوية كدى أخوك جبد نفسو

و من ديك أخوك فارق رئاسة اللجان فراق الصادق المهدي لرئاسة الحكومة..

المهم حافظ ما بناباهو لكن الفيك إتعرفت..

بدل تشوف لي زولة رقيقة تبقى مقرر اللجنة، تقوم تقول حافظ ! يعني كان الحكاية بقت لينا فوق رأسنا يقوم يطالب البورد كلو (بالإستفراغ هنا) gap

المهم كان الناس من أسي مقتنعة بإن اللمة في حد زاتا عمل إسفيري رفيع قول عووك

[مهند الخطيب]

يعني كان الحكاية بقت لينا فوق رأسنا يقوم يطالب البورد كلو (بالإستفراغ هنا)

آآآآآآآآآآآآآآآآآآآآآآآآآآآآآخ يامصاريني ....... كككككككككككككككك

ياخ انت مابتنسى ياخ!!

أهل البكا غفرو والجيران كفرو.....

[مشرف شؤون العضوية]

سمراء شكراً على ترحيبك بالفكرة
_________________
زول وخرافي وجيجي .. شكرا لمروركم
وفي إنتظار أراءكم ومقترحاتكم

____________________

شكراٌ واحة..خليك قريبة
لكن 15 يوم دي مش صعبة شوية
____________________

المشاركة الأصلية كتبت بواسطة نبراس السيد الدمرداش

اللمه حلوه والله بس الراي شنو نستفيد منها لو تمت
يعني نناقش موضوع بيهمنا نحن كاعضاء وبستفيد منو القراء والزوار

نبراس دة كلام سمح
وإيدك معانا..لما نبقى على التنفيذ نشوف إمكانية نحدد موضوع بيهمنا جميعا ونفتح بوست بخصوصه..
كوني بالجوار

[طارق صديق كانديك]

إن هم أن تصبح سودانيات المنبر الأكثر مشاهدة وقراءة هم يتلبس الجميع العضوية " والديكتاتوريين" بحسب وصف حافظ حسين الذي أتفق معه في ضرورة قراءة ما وراء سطر الرقم (313) ولكن هذا الهم هو أمر طبيعي لجعل سودانيات الأكثر مشاهدة على الأقل من عضويتها التي تتعدى الألف وسبعمائة عضو/ة، من ناحية واعادة تنشيط تداخل العضوية نفسها من ناحية أخري.

ان ابتداع الصيغ التي تسعى بنا الى تحقيق هذا الهدف ليس مسئولية شؤون العضوية وحدها بل مسؤولية الجميع من باب روح هذا الموقع التي جعلت العضوية تشعر بولاءها الكبير له والتفكير في كيفية تقدمه خطوات باتجاه التميز.

وليسمح لي الأخ مهند الخطيب لتعديل تساؤله بدلا عن ماذا يضيف شحذنا لعضوية المنبر للتفاعل ليصبح كيف نشحذ العضوية اذ مجرد " شحذنا" لهم يحدث التفاعل وتتم الحوارات في المطروح من موضوعات أو ما يطرحونه من موضوعات وهذا هو صميم عمل الموقع.

أخلص الى أنني أدعم هذه الفكرة وأبحث معكم عن الوسائل التي تسهم في جعل هذا الموقع الأكثر حركة ومشاهدة في محركات البحث .

شكري وتقديري لشؤون العضوية وللمتداخلين/ات

[مهند الخطيب]

نبراس دة كلام سمح
وإيدك معانا..لما نبقى على التنفيذ نشوف إمكانية نحدد موضوع بيهمنا جميعا ونفتح بوست بخصوصه..
كوني بالجوار

يعني ياشئون هو قرار وللا طرح للنقاش؟

لما نبقى على التنفيذ دي ادتني احساس انو الموضوع مفروغ منو و حيتنفذ حيتنفذ ......

غايتو لو بقى ح يتنفذ اكيد والبوست ده عرضة ساي فبالتوفيق ياخ ولو ما حيتنفذ يكون الله عفانا من مشروع ....

[مشرف شؤون العضوية]

تحياتي حافظ ومهند
وسعيدين بالنقد والنقاش الذي قام من أجله هذا المفترع

المشاركة الأصلية كتبت بواسطة حافظ حسين

المحصلة شنو يعني؟....

المشاركة الأصلية كتبت بواسطة مهند الخطيب

السؤال البيطرح نفسو انو شحد العضوية على التواجد هنا في وقت محدد ممكن يضيف لفكرة الانتداء والتفاعل شنو؟
....

شؤون العضوية في جزء من عملها بتستهدف الجانب الإجتماعي البيشكل جزء أصيل من رسالة المنتدى (التواصل المحبة)
وفي تصورنا ان تحديد يوم لشحذ هذه العضوية يشجع البعض من المتكاسلين، يسمح بحالة إزدهار على مستوى البورد بسبب تواجد كم أكبر من الأعضاء..ويضفي الكثير من الظلال الإيجابية على الجو العام للمنبر إجتماعيا..والذي بالضرورة له دور على منبر الحوار وحراكه..

(يوم سودانيــات) وكل برامج شؤون العضوية هي برامج للعضوية .. منها وإليها..لكم ان تقبلوا هذه التصورات وتدعموا تحركها للامام ولكم ان ترفضوها وتوئدوها كفكرة..
وهذا المفترع ليحدد الأعضاء ماذا يريدون وكيف..
فمرحباً بكم دائما..

شكراً لكما
..ولخال فاطنة

[مهند الخطيب]

المشاركة الأصلية كتبت بواسطة طارق صديق كانديك

وليسمح لي الأخ مهند الخطيب لتعديل تساؤله بدلا عن ماذا يضيف شحذنا لعضوية المنبر للتفاعل ليصبح كيف نشحذ العضوية اذ مجرد " شحذنا" لهم يحدث التفاعل وتتم الحوارات في المطروح من موضوعات أو ما يطرحونه من موضوعات وهذا هو صميم عمل الموقع.

الاخ طارق كانديك ياخ انا ماقلت (شحذ) انا استخدمتا المفردة (شحد) وقاصد معناها وجرسا ، الحكاية ياأخ طارق لاها كترة لااستجداء عضوية بشكل مشاريع سمبهارية عشان تجي تكتب ، فكرة التفاعل اساسا بتقوم على الرغبة والقدرة بالدرجة الأولى ، يللا لمن تجي تقول للخلق تعالو لي اليوم الفلاني عشان تتفاعلوا خليت ليهم شنو؟
وماصحيح انو شحدتك ليهم الجية بتخليهم يتفاعلو ، اها وتاني يوم من اليوم العالمي لسودانيات ده ح تسووا شنو ؟ لمن تاني يوم تلقى عدد الحضور اتنين نفر حتقول يامنو؟ والله الا تقول ليهم اليوم باظ تعالو نعيدو تاني ... فكروا ونفكر في طريقة تخلي كل الايام هي يوم سودانيات ....


يا أخ ...

[مشرف شؤون العضوية]

طارق كانديك

شكراً على دعمك للفكرة
وعلى توضيحك الذي سبقتنا به قليلا ..

تحياتي

[مشرف شؤون العضوية]

المشاركة الأصلية كتبت بواسطة مهند الخطيب

يعني ياشئون هو قرار وللا طرح للنقاش؟

لما نبقى على التنفيذ دي ادتني احساس انو الموضوع مفروغ منو و حيتنفذ حيتنفذ ......

غايتو لو بقى ح يتنفذ اكيد والبوست ده عرضة ساي فبالتوفيق ياخ ولو ما حيتنفذ يكون الله عفانا من مشروع ....

هو طرح للنقاش

نأسف لعدم دقة التعبير

[خال فاطنة]

اها وتاني يوم من اليوم العالمي لسودانيات ده ح تسووا شنو ؟

هو الحكاية ما معاها صبحية يعني؟