في هواك يا جميل.. باب الهبّهان

أسعد · 15-06-2012, 01:22 PM

لا نهدها اليمامة التي تهم بانطلاقها
ولا انحسار الثوب فوق ساقها
هو الذي حاصرني في الجسد الجزيرة
لكنه شيء بها
كأنه اليتم.. كأنه الفرار
يذوب ما بين ذراعي فتهدأ السريرة

أمل دنقل

مرات بتحتاج لزول/ة ، قريبة منّك، تونسك، تضحكك، تكلكل مزاجك بالغنا.. زولة غناية و وناسة وبتعرف كيف تدغدغك وتخليك تصل لأقصي ما في اللحظة من متعة. زولة تفكك من أسر العزلة وتخلطك خلطة كااااربة كدة ومن أمها.. تخلطك لمّا تعرف حاجة، تضحك معاها زي ما بيشتهي الضحك، وتغني معاها بصوتك الفقير، تتونسو سوا في أيِّ حاجة، تتونسو في حاجات بسيطة وفسيحة زي قلوب شفع الروضة، حاجات هباشة كدة ومورقة، تونسك بلغة مباشرة، لغة بريئة وخالية من كلمات زي "أعتقد" و"افترض" و"علي ما يبدو" و"حيث إنو" وهكذا.. كلمات بريئة من وهم الانتلجنسيا وترويج الشعارات الما جايب حقو.. تحكي ليها عن نادر خدر، وإنصاف مدني.. عن الحوت والربع ونجاة غرزة و وردي، عن سيد اللبن، وسيد المنقة والشايل المنقة.. عن البلابل وهادية طلسم . عن ريدتك الابدية للتسالي والمريخ وفيصل العجب، عن تشجيعك لبرشلونة واستغرابك من الناس البشجعو الريال. عن آخر مسلسل مصري حضرتو في حياتك، عن السينما والكلام البقولوهو الشمّاسة لمّا الفيلم الهندي يقطعوهو.. عن البت الشاغلتها في الشارع وقلت ليها (أموت ركن ياخ) وقالت ليك بس عليك الشين دة

وهي تحكي ليك عن حبها الابدي لملاح الخدرة المفروكة، والـشاي المهبهن.. وخوفها الدائم من الكلاب والضلُّمة،. عن استمتاعها لمّا تشرب زبادي كابو بالسفن اب، بالرغم من إنّو بخليها زي سكرانة وما سكرانة،عن عرس سامية صاحبتها والعريس المرطِّب.. وحبيب سامية الأوّل الجا الحفلة ومسك المايك وقال أيّها الناس.. (لا تحسبوا رقصي بينكم طرباً.. كويس معاكم..؟؟). وإنت مستمتع بالونسة ولسّع حكاية الزبادي بالسفن اب معشعشة في راسك. تحكي ليك انو قامت الصباح من النوم لقت الكهربا قاطعة، أدّت أخوها حمّودي الاسكيرت يوديهو للمكوجي الجمب بيتهم عشان يكويهو، تقوم تسألها: أها وكواهو..؟
تقول ليك أيوة.. ولو ما كواهو كنت لاقيتك كيف..؟
تقول ليها يعني الاسكيرت الاتكوا ياهو دة اللابساهو ده..؟
وتقوم انت تعاين للإسكيرت، وتغشي بمعاينتك بلوزتها الوردية، تبدا المعاينة من نقطة تماسها مع الاسكيرت وتطلع لفوق، تعاين للسمّاعة المشبوكة في الزرارة الفوق، وتنتهز الفرصة بالمرّة وتعاين للفوق، آآآآي، تعاين للفوق.. طوّالي تتذكر غنا الحقيبة وناس الحقيبة والحقيبة ذاتها.. تحس بطعم الملح في حلقك، في قلبك، وعشان تحافظ علي توازنك وما ترتبك، وبالمرّة عشان تزوغ من قبضتها ليك وإنت بتبحلق هناك، تتظاهر إنّك مركِّز نظرك علي السمّاعة المشبوكة في الزرارة الفوق.. تقول ليها: سماعتك دي بلوتوث..؟؟
تقول ليك لالا.. سماعتي دي إم. تي. إن
وتنفقعو بالضحك الاتنين.. عشان هي زولة سمحة، ووناسة.. وفاهماك كويس
ياخي زولة سمحة وغناية.. تطلب منها تغني ليك علي مزاجها، طوالي تسمعك

يا قمر أنا ما بطولك
أديني من نورك وميض
شان أنوِّر وابقي طولك
يااااا قمر
وبعد (ياااا قمر) دي تعمل ليها حركة كدة، زي الزول القاعد يمُص حلاوة (قزقز) وفجأة ختاها تحت لسانو.
تقول ليها العميري..!! يا الله ياخ.. من زمان وين انتي.. تقوم هي تضحك اثناء ما بتغني، تحس بضحكتها جوّة اللحن، زي الكأنها صوت كمنجة بتبكي.
يجيك صوتها مبلول بضحكتها، تحس بإحساس إنّك زول مهم كدة

وبعد ما هي تنتهي من الغنية، تاني تعمل ليك حركة الـ قزقز ديك وتقرص ليك بعينها، آآي تقرص ليك، بالرغم من إنكم براكم، تقوم إنت تخجل، آآآي الخجل الواحد دة، تستجمع قواك وتحتحت منك ما علق بخاطرك من خجل ودفء، تهبش يدها بلمسة كدة، ترتعش يدها، وصوتها وكلها.. ترتعش زي السرت فيها كهربا وما كهربا، النوع الـ بس بخليك تتبشتن داك وما تكون فاهم شي، وانت تستثمر الوضعية ، وضعية كهربا وما كهربا دي، تعاين ليها في عيونها، جوّة عيونها، تقوم هي تدنقر من الخجل.. آآآي، الخجل الواحد دة، تاني تعاين
فوق.. للسماعة، وللزرارة المشبوكة عليها، للاسكيرت، تتذكر المكوجي الكواهو، وحمودي الرسلوهو.. تسرح
يا ربي المكوة مرّت هنا..؟، وتعاين للـ هنا، ولا مرّت من هناك..؟ وتعاين للهناك.. التقول المكوجي المرزّق دة كواهو وهي لابساهو.. اللحظة ديك تكون هي مرقت من وضعية كهربا وما كهربا ديك، تقوم تمرقك من سرحتك بصوت لطيف: أها..؟ غني لينا.. تقول ليك وهي مبتسمة ابتسامة من النوع البحاصر داك، بحاصرك وما بديك فرصة لأي شي.. إبتسامة بتنفرج ليها الشفتين الاتنين، مع ملاحظة إنو الشفة السفلي بتكون متحمسة للبسمة اكتر من الفوق.. زي البتقول ليك هااااك البسمة دي، وترجع تاني تاخد الحزية مع الشفة الفوق في أمانة الله، وانت الزمن داك بتكون شلت البسمة، وشلت الريد، وشلت ودُّو

زولة سمحة بالشكل دة.. تشربو شاي سوا، كبايتك من غير هبهان، وحقتها بهبهان، لأنها بتحب الهبهان ونكهتو.. وإنت عكسها. واثناء شرابكم للشاي، إنت تعلق علي جمال الاسكيرت: والله اسكيرتيك شديد وشرط ياخ.. تقوم هي بحركة طبيعية تمد رجلها اليمين وتميِّلها علي سبيل التأكد ليس إلا.. إنت تلاحظ (بصورة غير طبيعية) وعبر فتحة الاسكيرت الممتدة مسافة شبرمن تحت لفوق أو من فوق لتحت (المهم هو شبر).. تلاحظ ساقها المنحسر عنو القماش الليّن.. تبلع ريقك بحركة ظاهرة (كُبع) وعشان تبرر لبلعة الريق الظاهرة دي، تقول ليها: هيْ ..!! بلعت لي هبهانة.. مع إنو كبايتك من غير هبهان
وتنفجر هي بالضحك لمّن تسيل دموعها، وتشاطرها انت الضحكة العامرة دي، وانت من اليوم داك تحب الهبهان، ما عشان نكهتو حلوة، بس عشان هي بتحبو
زولة في قعدة واحدة بس، تخليك تزيد في حب العميري، وتحببك في نجاة غرزة، والهبهان، وملاح الخدرة وزبادي كابو بالسفن اب
وتشهيك تبقي مكوجي

للكاتب الراحل المقيم/ الرشيد اسماعيل gap

أسعد · 15-06-2012, 01:24 PM

كتابة زي دين الحجر او اضل سبيلا

حسين عبدالجليل · 15-06-2012, 02:12 PM

علشان كدا أنا ياوجدي مستغرب في أخوانا البيحبوا الحبش بيتونسوا معاهم في شنو؟ ماهي المواضيع المشتركة - بالاضافة لحالة الطقس اليوم ؟ هذا مع العلم إنو الاحباش غير معروفين بشراب الشاي بالهبهان ( أو بدونه - ربما !) .

ثم إنو ياخ كتابة زي دي أعطها لنا في جرعات مخففة, فالجرعة المركزة ربما تسبب لنا حالة من الدوشان .

و ياعكود ياخ ماتشوف لينا الرشيد دا مالو ؟ أعتقد أن الأمر أكبر من حالة إحباط . أنا و آخرون نحتاج لوجوده هنا , وحديثك معه سيدلنا علي سبب غيبته . فليس بالأمر الهين أن تفقد سودانيات الرشيد , فبالاضافة لحروفه الانيقة فهو قد ساهم بجهد مقدر في العمل الاداري بسودانيات في الفترة الحرجة التي أعقبت و فاة خالد , رحمه الله.

زول الله · 15-06-2012, 03:23 PM

اقتباس:

المشاركة الأصلية كتبت بواسطة وجدي الأسعد الأسعد

كتابة زي دين الحجر او اضل سبيلا

بل اضل سبيلا ياوجدي
اضل سبيلا

اقتباس:

المشاركة الأصلية كتبت بواسطة حسين عبدالجليل

و ياعكود ياخ ماتشوف لينا الرشيد دا مالو ؟ أعتقد أن الأمر أكبر من حالة إحباط . أنا و آخرون نحتاج لوجوده هنا

اثني وابصم

واحد آخرون

اقول قولي هذا واستغفر الله لي.............

خال فاطنة · 15-06-2012, 03:47 PM

سلام يا وجدي...
شكراً ياخ لنقلك هذه الكتابة المنكًهة و المعتّقة، و إحتمال كبير تكون رغم أنف الكاتب، لكن أديهو في أنفو عليك دينك....
للأسف أنا جيت سودانيات في فترة قفل فيها الرشيد نصيبو من الباندويث، حزم حقايبو بعد أن عبأ داخلها حسرة الكثيرين و صراخهم غير آبه بحبال تربطه بهم و من صنع حروفه...للمنبر ذاكرة يا الرشيد لا تمحوها الإختيارات القسرية، و للذين به من الود ما يجعلهم يلاحقونك و يذكرونك دوماً بأن هناك ما يستحق الدهس على الخيارات التي ربما لم ترضي أحد سواك....لماذا ركنت لأكثر الخيارات أنانية؟
و أنا أتجول في رحاب إرشيفك التريان بالجمال و الخير و حب الناس بوصية من زميلة عزيزة _ حاولت أن أقرأ من خلال تفاعلك مع الآخرين _من تكون_ فالنتيجة للأسف لم تتسق مع موقفك الحالي بأي حال، كون القراءة لك تكشف بسرعة متناهية عن شخص ودود محب للناس لا يعرف حبره كما روحه طريق للقسوة و السادية...هكذا قرأتك هناك، و لم أكن أعرف جيد على أسباب الغياب، و لكن أجزم أنها مهما بلغت لا تضاهي أسباب التواجد و العودة...و أن حجة غيابك مهما قويت سيصيبها الوهن أمام رغبة أناس شاركوك ملح الكلمة و ملاح التواصل...ربما أعلم أنك ليست بحاجة لمزيد من النداءات التي لا شك سبقني عليها الكثيرين و بمختلف الوسائل، و لكني بحاجة لتذكيرك فقط بأن الركون لخيار يرضيك فقط دون الآخرين لا يتسق مع روحك التي لا تحتاج كثير عناء للبحث عن ما بها من طيبة و لطف

عكــود · 15-06-2012, 06:07 PM

وجدي
حسين
زول الله
خال فاطنة
سلام الله يغشاكم

رغم متابعتي لكل ما كان (بالله شوف "كان" دي تضرس كيف!) يكتبه الرشد،
لكن القطعة دي ما مرّت عليها عيوني.
شكراً وجدي.

نادينا ومعكم أنادي وأنده شيخ الكتابة، فقد طال الإحتجاب.

ليته يعود
ليته يعود

أسعد · 15-06-2012, 07:24 PM

الاعزاء حسين وزول الله وخال فاطنة وعكود
عليكم الله شوفتو الكتابة الفوق دي؟!
طبعا وكاي كتابة بارعة بتقوم تنشر ليك كل التفاصيل وبعدين القاريء بقوم يشيل التفاصيل البتناسبو وبخلي الباقي يعني القاري بقرأ علي حسب رؤيته وفلسفته في الحياة
فبقوم يمرق بالحاجة البتتناسب معاهو في الكتابة
حاجة كدة اشبه بمشاهدة فيلم اميركي اجتمعت فيه كل خصائص الافلام دراما, رومانسية ، فنتازيا ، اكشن والخ وكدة اها هنا بقوم المشاهد بركز مع الحاجة البتعجبو سوا كان زول موغل في الحبكانيات تلقاهو بقشقش في ديمعاتو مع كل لحظة رومانسية بين البطل والبطلة واذا كان من رعاة الاكشن تلقاهو ينطط مع كل حركة اكشن ويشهق مساااافه وما يفك الزفرة الا بعد الكتلة تحصل وهكذا يعني
اها في كتابة الرشيد اعلاه والتي تحمل صفات الرومانسية والدراما والغناء وكوميديا وقلة الادب والرشيد يتنقل في كتابته بين هذه الخصائص بدون ترتيب مستقصد بل بحركة عفوية تلقاهو اداك حتة رومانسية وفجعتن كدة يقلب ليك دراما ويرجع لي قلة الادب ، وبناء علي حالتي المذرية دي المفروض اركز مع مشاهد قلة الادب لكن ود اللزينا وبكتابته (البسيطة ومريحة والتي تحمل في طياتها كلمات تحتها كلمات) حبب لي باقي الخصائص اكتر من قلة الادب
عجيب ياخ

اقتباس:

تقول ليها العميري..!! يا الله ياخ.. من زمان وين انتي.. تقوم هي تضحك اثناء ما بتغني، تحس بضحكتها جوّة اللحن، زي الكأنها صوت كمنجة بتبكي.

أسعد · 15-06-2012, 07:30 PM

الرشيد مرة بتكلم معاهو في التلفون
وفي خضم الونسة قلت ليهو ياخ تعال راجع سودنيات
قام قال لي بجي ياخ بس كل بي وقتو
قمت اصريت عليهو
فرد علي (ياخ اجي اكتب شنو؟! كدي خليني شوية)
قمت رديت عليهو (ياخ تعال اكتب ايوووو شيء ان شاء الله سودانيات عالم من التواصل والمحبة او ان شاء تخت نقطة بس)
وانا بقول الكلام دا اتذكرتنا حالنا زماااان
لمن تجي بت سمحة ماشة في الشارع فيقوموا الشباب يشاغلوا فيها
(نظرة يااااااا ، بسمة ياااااا ) والبت تكون ماشة في مشيها زي الكأنو مافي شي
اها دا حالي مع الرشيد لمن انا قلت ليهو الكلام دا
قام صلح طرحتو ونزل بلوزتو ومشى فرتريب فرتريب زي الكأني ما شاغلتو

الرشيد الان موغل في منتشته العظيمة
ادعو له فانه الان متمنتش

معتصم الطاهر · 15-06-2012, 07:36 PM

دى ونسة طاعمة ..

البديري · 15-06-2012, 08:31 PM

شلاقة انت قِرفا

طارق صديق كانديك · 16-06-2012, 06:10 AM

كان عطاءه غير مجذوذ ، ثم جاء غيابه أليمٌ شديد .. !!

واحة · 16-06-2012, 06:48 AM

الاخ وجدى

اتحفتنا بهذه الونسة الراقية والبسيطة واهم حاجة انها

من القلب على طول

الرشيد ربنا يخرجك من صومعتك قريب

تسلموا على هذا الصباح المميز

واحة

سمراء · 17-06-2012, 07:38 AM

غايتو ياوجدى الدور ده بالجد احبطنى

وايما احباط كمان !!

وحاة الله قريت النضم ده قايلاك اتا الكتبتو ، وقلت ياها المكنة الجديدة بتاعت الجدية الفى الفيس ديك ..

___

اما المرحوم الرشيد فما عندى ليهو غير ....قوم لف..
ومعاها فندكة كمان

جمال عبد الناصر · 17-06-2012, 10:00 AM

وجدي

يا وجدي

وكت الزول الاسمو الرشيد دا بكتب جنس الكتابة دي
الكتابة الطاعمة دي .. وقاعد يغوص في تفاصيل التفاصيل
لمن يجيك ابو الكباس ( تعرف أبو الكباس ) وقتين انت راقد في عنقريبك وتقرب تنوم تلقي نفسك زي الداير تقع ليك في حفرة ولا حجرا كبير جاي عليك .. ما بتاخد ليك نقزة كدة وتكتشف انك راقد في العنقريب الليلك ...
ياخي زول زي دا حارد المنتدي دا تخلوه كيف
تدعوه ما تدعوه تتصلو بيه تكلموه .. ياخي متل الزول دا تخموه خم أربعة منو تجو تختوه وسط الحوش دا
الزول دا حكاي وكتاب ووسط اختياره للحروف تلقاه ما بنسي التفاصيل
انت زاتك مسنوح قول طارق جبريل الحبيب .. التحفر تجيب متل الكلام دا
...
ما عندي قول تاني
الا السلام ختام

هيفاء عبدالستار · 17-06-2012, 11:29 AM

اللطيف الاسعد الاسعد الاسعد..

ونحن والله الاسعد بهذا النّبش الجميل ..

كلام يخليك زى التور اب زمام ..قايدنك ومنقاااااد..

والزول الرّشيد خلوهو ..يوم خيتو يجي ..

بنزل ..

لك مليون ورده وحفنة وُد ...يا اسعد يا جميل ..

15-06-2012, 01:22 PM	#[1]
أسعد :: كــاتب نشــط::	في هواك يا جميل.. باب الهبّهان لا نهدها اليمامة التي تهم بانطلاقها ولا انحسار الثوب فوق ساقها هو الذي حاصرني في الجسد الجزيرة لكنه شيء بها كأنه اليتم.. كأنه الفرار يذوب ما بين ذراعي فتهدأ السريرة أمل دنقل مرات بتحتاج لزول/ة ، قريبة منّك، تونسك، تضحكك، تكلكل مزاجك بالغنا.. زولة غناية و وناسة وبتعرف كيف تدغدغك وتخليك تصل لأقصي ما في اللحظة من متعة. زولة تفكك من أسر العزلة وتخلطك خلطة كااااربة كدة ومن أمها.. تخلطك لمّا تعرف حاجة، تضحك معاها زي ما بيشتهي الضحك، وتغني معاها بصوتك الفقير، تتونسو سوا في أيِّ حاجة، تتونسو في حاجات بسيطة وفسيحة زي قلوب شفع الروضة، حاجات هباشة كدة ومورقة، تونسك بلغة مباشرة، لغة بريئة وخالية من كلمات زي "أعتقد" و"افترض" و"علي ما يبدو" و"حيث إنو" وهكذا.. كلمات بريئة من وهم الانتلجنسيا وترويج الشعارات الما جايب حقو.. تحكي ليها عن نادر خدر، وإنصاف مدني.. عن الحوت والربع ونجاة غرزة و وردي، عن سيد اللبن، وسيد المنقة والشايل المنقة.. عن البلابل وهادية طلسم . عن ريدتك الابدية للتسالي والمريخ وفيصل العجب، عن تشجيعك لبرشلونة واستغرابك من الناس البشجعو الريال. عن آخر مسلسل مصري حضرتو في حياتك، عن السينما والكلام البقولوهو الشمّاسة لمّا الفيلم الهندي يقطعوهو.. عن البت الشاغلتها في الشارع وقلت ليها (أموت ركن ياخ) وقالت ليك بس عليك الشين دة وهي تحكي ليك عن حبها الابدي لملاح الخدرة المفروكة، والـشاي المهبهن.. وخوفها الدائم من الكلاب والضلُّمة،. عن استمتاعها لمّا تشرب زبادي كابو بالسفن اب، بالرغم من إنّو بخليها زي سكرانة وما سكرانة،عن عرس سامية صاحبتها والعريس المرطِّب.. وحبيب سامية الأوّل الجا الحفلة ومسك المايك وقال أيّها الناس.. (لا تحسبوا رقصي بينكم طرباً.. كويس معاكم..؟؟). وإنت مستمتع بالونسة ولسّع حكاية الزبادي بالسفن اب معشعشة في راسك. تحكي ليك انو قامت الصباح من النوم لقت الكهربا قاطعة، أدّت أخوها حمّودي الاسكيرت يوديهو للمكوجي الجمب بيتهم عشان يكويهو، تقوم تسألها: أها وكواهو..؟ تقول ليك أيوة.. ولو ما كواهو كنت لاقيتك كيف..؟ تقول ليها يعني الاسكيرت الاتكوا ياهو دة اللابساهو ده..؟ وتقوم انت تعاين للإسكيرت، وتغشي بمعاينتك بلوزتها الوردية، تبدا المعاينة من نقطة تماسها مع الاسكيرت وتطلع لفوق، تعاين للسمّاعة المشبوكة في الزرارة الفوق، وتنتهز الفرصة بالمرّة وتعاين للفوق، آآآآي، تعاين للفوق.. طوّالي تتذكر غنا الحقيبة وناس الحقيبة والحقيبة ذاتها.. تحس بطعم الملح في حلقك، في قلبك، وعشان تحافظ علي توازنك وما ترتبك، وبالمرّة عشان تزوغ من قبضتها ليك وإنت بتبحلق هناك، تتظاهر إنّك مركِّز نظرك علي السمّاعة المشبوكة في الزرارة الفوق.. تقول ليها: سماعتك دي بلوتوث..؟؟ تقول ليك لالا.. سماعتي دي إم. تي. إن وتنفقعو بالضحك الاتنين.. عشان هي زولة سمحة، ووناسة.. وفاهماك كويس ياخي زولة سمحة وغناية.. تطلب منها تغني ليك علي مزاجها، طوالي تسمعك يا قمر أنا ما بطولك أديني من نورك وميض شان أنوِّر وابقي طولك يااااا قمر وبعد (ياااا قمر) دي تعمل ليها حركة كدة، زي الزول القاعد يمُص حلاوة (قزقز) وفجأة ختاها تحت لسانو. تقول ليها العميري..!! يا الله ياخ.. من زمان وين انتي.. تقوم هي تضحك اثناء ما بتغني، تحس بضحكتها جوّة اللحن، زي الكأنها صوت كمنجة بتبكي. يجيك صوتها مبلول بضحكتها، تحس بإحساس إنّك زول مهم كدة وبعد ما هي تنتهي من الغنية، تاني تعمل ليك حركة الـ قزقز ديك وتقرص ليك بعينها، آآي تقرص ليك، بالرغم من إنكم براكم، تقوم إنت تخجل، آآآي الخجل الواحد دة، تستجمع قواك وتحتحت منك ما علق بخاطرك من خجل ودفء، تهبش يدها بلمسة كدة، ترتعش يدها، وصوتها وكلها.. ترتعش زي السرت فيها كهربا وما كهربا، النوع الـ بس بخليك تتبشتن داك وما تكون فاهم شي، وانت تستثمر الوضعية ، وضعية كهربا وما كهربا دي، تعاين ليها في عيونها، جوّة عيونها، تقوم هي تدنقر من الخجل.. آآآي، الخجل الواحد دة، تاني تعاين فوق.. للسماعة، وللزرارة المشبوكة عليها، للاسكيرت، تتذكر المكوجي الكواهو، وحمودي الرسلوهو.. تسرح يا ربي المكوة مرّت هنا..؟، وتعاين للـ هنا، ولا مرّت من هناك..؟ وتعاين للهناك.. التقول المكوجي المرزّق دة كواهو وهي لابساهو.. اللحظة ديك تكون هي مرقت من وضعية كهربا وما كهربا ديك، تقوم تمرقك من سرحتك بصوت لطيف: أها..؟ غني لينا.. تقول ليك وهي مبتسمة ابتسامة من النوع البحاصر داك، بحاصرك وما بديك فرصة لأي شي.. إبتسامة بتنفرج ليها الشفتين الاتنين، مع ملاحظة إنو الشفة السفلي بتكون متحمسة للبسمة اكتر من الفوق.. زي البتقول ليك هااااك البسمة دي، وترجع تاني تاخد الحزية مع الشفة الفوق في أمانة الله، وانت الزمن داك بتكون شلت البسمة، وشلت الريد، وشلت ودُّو زولة سمحة بالشكل دة.. تشربو شاي سوا، كبايتك من غير هبهان، وحقتها بهبهان، لأنها بتحب الهبهان ونكهتو.. وإنت عكسها. واثناء شرابكم للشاي، إنت تعلق علي جمال الاسكيرت: والله اسكيرتيك شديد وشرط ياخ.. تقوم هي بحركة طبيعية تمد رجلها اليمين وتميِّلها علي سبيل التأكد ليس إلا.. إنت تلاحظ (بصورة غير طبيعية) وعبر فتحة الاسكيرت الممتدة مسافة شبرمن تحت لفوق أو من فوق لتحت (المهم هو شبر).. تلاحظ ساقها المنحسر عنو القماش الليّن.. تبلع ريقك بحركة ظاهرة (كُبع) وعشان تبرر لبلعة الريق الظاهرة دي، تقول ليها: هيْ ..!! بلعت لي هبهانة.. مع إنو كبايتك من غير هبهان وتنفجر هي بالضحك لمّن تسيل دموعها، وتشاطرها انت الضحكة العامرة دي، وانت من اليوم داك تحب الهبهان، ما عشان نكهتو حلوة، بس عشان هي بتحبو زولة في قعدة واحدة بس، تخليك تزيد في حب العميري، وتحببك في نجاة غرزة، والهبهان، وملاح الخدرة وزبادي كابو بالسفن اب وتشهيك تبقي مكوجي للكاتب الراحل المقيم/ الرشيد اسماعيل gap التعديل الأخير تم بواسطة أسعد ; 15-06-2012 الساعة 01:25 PM.
أسعد :: كــاتب نشــط::

15-06-2012, 01:24 PM	#[2]
أسعد :: كــاتب نشــط::	كتابة زي دين الحجر او اضل سبيلا
أسعد :: كــاتب نشــط::

15-06-2012, 02:12 PM	#[3]
حسين عبدالجليل :: كــاتب نشــط::	علشان كدا أنا ياوجدي مستغرب في أخوانا البيحبوا الحبش بيتونسوا معاهم في شنو؟ ماهي المواضيع المشتركة - بالاضافة لحالة الطقس اليوم ؟ هذا مع العلم إنو الاحباش غير معروفين بشراب الشاي بالهبهان ( أو بدونه - ربما !) . ثم إنو ياخ كتابة زي دي أعطها لنا في جرعات مخففة, فالجرعة المركزة ربما تسبب لنا حالة من الدوشان . و ياعكود ياخ ماتشوف لينا الرشيد دا مالو ؟ أعتقد أن الأمر أكبر من حالة إحباط . أنا و آخرون نحتاج لوجوده هنا , وحديثك معه سيدلنا علي سبب غيبته . فليس بالأمر الهين أن تفقد سودانيات الرشيد , فبالاضافة لحروفه الانيقة فهو قد ساهم بجهد مقدر في العمل الاداري بسودانيات في الفترة الحرجة التي أعقبت و فاة خالد , رحمه الله.
حسين عبدالجليل :: كــاتب نشــط::

15-06-2012, 03:47 PM	#[5]
خال فاطنة :: كــاتب نشــط::	سلام يا وجدي... شكراً ياخ لنقلك هذه الكتابة المنكًهة و المعتّقة، و إحتمال كبير تكون رغم أنف الكاتب، لكن أديهو في أنفو عليك دينك.... للأسف أنا جيت سودانيات في فترة قفل فيها الرشيد نصيبو من الباندويث، حزم حقايبو بعد أن عبأ داخلها حسرة الكثيرين و صراخهم غير آبه بحبال تربطه بهم و من صنع حروفه...للمنبر ذاكرة يا الرشيد لا تمحوها الإختيارات القسرية، و للذين به من الود ما يجعلهم يلاحقونك و يذكرونك دوماً بأن هناك ما يستحق الدهس على الخيارات التي ربما لم ترضي أحد سواك....لماذا ركنت لأكثر الخيارات أنانية؟ و أنا أتجول في رحاب إرشيفك التريان بالجمال و الخير و حب الناس بوصية من زميلة عزيزة _ حاولت أن أقرأ من خلال تفاعلك مع الآخرين _من تكون_ فالنتيجة للأسف لم تتسق مع موقفك الحالي بأي حال، كون القراءة لك تكشف بسرعة متناهية عن شخص ودود محب للناس لا يعرف حبره كما روحه طريق للقسوة و السادية...هكذا قرأتك هناك، و لم أكن أعرف جيد على أسباب الغياب، و لكن أجزم أنها مهما بلغت لا تضاهي أسباب التواجد و العودة...و أن حجة غيابك مهما قويت سيصيبها الوهن أمام رغبة أناس شاركوك ملح الكلمة و ملاح التواصل...ربما أعلم أنك ليست بحاجة لمزيد من النداءات التي لا شك سبقني عليها الكثيرين و بمختلف الوسائل، و لكني بحاجة لتذكيرك فقط بأن الركون لخيار يرضيك فقط دون الآخرين لا يتسق مع روحك التي لا تحتاج كثير عناء للبحث عن ما بها من طيبة و لطف التعديل الأخير تم بواسطة خال فاطنة ; 15-06-2012 الساعة 05:23 PM.
خال فاطنة :: كــاتب نشــط::

15-06-2012, 06:07 PM	#[6]
عكــود Administrator	وجدي حسين زول الله خال فاطنة سلام الله يغشاكم رغم متابعتي لكل ما كان (بالله شوف "كان" دي تضرس كيف!) يكتبه الرشد، لكن القطعة دي ما مرّت عليها عيوني. شكراً وجدي. نادينا ومعكم أنادي وأنده شيخ الكتابة، فقد طال الإحتجاب. ليته يعود ليته يعود
عكــود Administrator	التوقيع: ما زاد النزل من دمع عن سرسار .. وما زال سقف الحُزُن محقون؛ لا كبّت سباليقو .. ولا اتقدّت ضلاّلة الوجع من جوّه، واتفشّت سماواتو.

15-06-2012, 07:30 PM	#[8]
أسعد :: كــاتب نشــط::	الرشيد مرة بتكلم معاهو في التلفون وفي خضم الونسة قلت ليهو ياخ تعال راجع سودنيات قام قال لي بجي ياخ بس كل بي وقتو قمت اصريت عليهو فرد علي (ياخ اجي اكتب شنو؟! كدي خليني شوية) قمت رديت عليهو (ياخ تعال اكتب ايوووو شيء ان شاء الله سودانيات عالم من التواصل والمحبة او ان شاء تخت نقطة بس) وانا بقول الكلام دا اتذكرتنا حالنا زماااان لمن تجي بت سمحة ماشة في الشارع فيقوموا الشباب يشاغلوا فيها (نظرة يااااااا ، بسمة ياااااا ) والبت تكون ماشة في مشيها زي الكأنو مافي شي اها دا حالي مع الرشيد لمن انا قلت ليهو الكلام دا قام صلح طرحتو ونزل بلوزتو ومشى فرتريب فرتريب زي الكأني ما شاغلتو الرشيد الان موغل في منتشته العظيمة ادعو له فانه الان متمنتش
أسعد :: كــاتب نشــط::

15-06-2012, 07:36 PM	#[9]
معتصم الطاهر :: كــاتب نشــط::	دى ونسة طاعمة ..
معتصم الطاهر :: كــاتب نشــط::	التوقيع: أنــــا صف الحبايب فيك .. و كـــــــــــل العاشقين خلفي

15-06-2012, 08:31 PM	#[10]
البديري :: كــاتب نشــط::	شلاقة انت قِرفا
البديري :: كــاتب نشــط::	التوقيع: إلا....رسول الله، صلى الله وعليه وسلم

16-06-2012, 06:10 AM	#[11]
طارق صديق كانديك :: كــاتب نشــط::	كان عطاءه غير مجذوذ ، ثم جاء غيابه أليمٌ شديد .. !!
طارق صديق كانديك :: كــاتب نشــط::	التوقيع: الشمس زهرتنا التي انسكبت على جسد الجنوب وأنت زهرتنا التي انسكبت على أرواحنا فادفع شراعك صوبنا كي لا تضيع .. ! وافرد جناحك في قوافلنا اذا اشتد الصقيع واحذر بكاء الراكعين الساجدين لديك إن الله في فرح الجموع الفيتوري .. !!

16-06-2012, 06:48 AM	#[12]
واحة :: كــاتب نشــط::	الاخ وجدى اتحفتنا بهذه الونسة الراقية والبسيطة واهم حاجة انها من القلب على طول الرشيد ربنا يخرجك من صومعتك قريب تسلموا على هذا الصباح المميز واحة
واحة :: كــاتب نشــط::	التوقيع: حال الدنيا تسرق منيه فى لحظة عشم

17-06-2012, 07:38 AM	#[13]
سمراء :: كــاتب نشــط::	غايتو ياوجدى الدور ده بالجد احبطنى وايما احباط كمان !! وحاة الله قريت النضم ده قايلاك اتا الكتبتو ، وقلت ياها المكنة الجديدة بتاعت الجدية الفى الفيس ديك .. ___ اما المرحوم الرشيد فما عندى ليهو غير ....قوم لف.. ومعاها فندكة كمان
سمراء :: كــاتب نشــط::	التوقيع:

17-06-2012, 10:00 AM	#[14]
جمال عبد الناصر :: كــاتب نشــط::	وجدي يا وجدي وكت الزول الاسمو الرشيد دا بكتب جنس الكتابة دي الكتابة الطاعمة دي .. وقاعد يغوص في تفاصيل التفاصيل لمن يجيك ابو الكباس ( تعرف أبو الكباس ) وقتين انت راقد في عنقريبك وتقرب تنوم تلقي نفسك زي الداير تقع ليك في حفرة ولا حجرا كبير جاي عليك .. ما بتاخد ليك نقزة كدة وتكتشف انك راقد في العنقريب الليلك ... ياخي زول زي دا حارد المنتدي دا تخلوه كيف تدعوه ما تدعوه تتصلو بيه تكلموه .. ياخي متل الزول دا تخموه خم أربعة منو تجو تختوه وسط الحوش دا الزول دا حكاي وكتاب ووسط اختياره للحروف تلقاه ما بنسي التفاصيل انت زاتك مسنوح قول طارق جبريل الحبيب .. التحفر تجيب متل الكلام دا ... ما عندي قول تاني الا السلام ختام
جمال عبد الناصر :: كــاتب نشــط::	التوقيع: وما من كاتب إلا سيبلى ويبقي الدهر ما كتبت يداه فلا تكتب بكفك غير شيء يسرك في القيامة إن تراه

17-06-2012, 11:29 AM	#[15]
هيفاء عبدالستار :: كــاتب نشــط::	اللطيف الاسعد الاسعد الاسعد.. ونحن والله الاسعد بهذا النّبش الجميل .. كلام يخليك زى التور اب زمام ..قايدنك ومنقاااااد.. والزول الرّشيد خلوهو ..يوم خيتو يجي .. بنزل .. لك مليون ورده وحفنة وُد ...يا اسعد يا جميل ..
هيفاء عبدالستار :: كــاتب نشــط::	التوقيع: [frame="7 80"][align=center]إني مهرتك خافقي فافرد ذراعيك احتويني[/align] [align=left]هيفاء[/align][/frame]