قاموس المفردات العامية فى اشعار حميد

[أحمد طه]

الأخ حافظ مساء الخير ، الشرّارة شبيهة بالقرّاصة ، إلا أنها أقلّ سماكة منها ، فهي تقع بين الفطير و القراصة ( الفطير رهيف كالكسرة ) ، و البعض يسمونها (الطبطاب) ،
و في معظم الأحيان تتم عواستها باليد (بدون قرقريبة) ، لأن عجين القمح متماسك و لا يحتاج إلى قرقريبة مثل عجين المريق

[ماريل]

المشاركة الأصلية كتبت بواسطة حافظ حسين

الشرار الشرار يا عالم
نحن مغرودين فيها


طيبان قالوا انت الوحيد ود القري الممكن تكون تنجدني
و الله انا ما بحب القوالة لكن و الله قالها لي اسامة معاوية
سألته في وش الكتاب قال لي يا حافظ نحن ابناء مدن ... العبارات دي شوف ليها ناس طيبااااان

يا شباب الشرار دا انا مغرود فيها و يدكم معانا

الشرارة يا حافظ نوع من(الفطير)
يختلف عن (الفطير)العادى فى انو الشرارة (اتخن شوية)
ويختلف عن(القراصة)فى انو(أرق شوية)
هذا النوع من (الفطير)يصنع مخصوص(للملاح مثل الخدرة والتقلية)
ولا يصنع للاكل مع(السليقة او اللبن)
يسمى الشرارة لانو يتم(شرها فى الصاج )
وتعاس(بقرقريبة مصنوعة من المعدن غالبا)
زمان كان اسمها(قرقريبة الحلب).........

[ماريل]

المشاركة الأصلية كتبت بواسطة أحمد طه

الأخ حافظ مساء الخير ، الشرّارة شبيهة بالقرّاصة ، إلا أنها أقلّ سماكة منها ، فهي تقع بين الفطير و القراصة ( الفطير رهيف كالكسرة ) ، و البعض يسمونها (الطبطاب) ،
و في معظم الأحيان تتم عواستها باليد (بدون قرقريبة) ، لأن عجين القمح متماسك و لا يحتاج إلى قرقريبة مثل عجين المريق

مساء الخير يا(افوكاتو)
غايتو انا قويت قلبى ونزلت مداخلة بخصوص(الشرارة)
لمن عملت ليها(اعتماد)لقيت مداخلتك دى نزلت قبل مداخلتى
اها زى اخدتلى عرضة وقلت
(والله اتارينى شقية ضمة وعررريفة زى احمد طه)

[أحمد طه]

المشاركة الأصلية كتبت بواسطة ماريل

مساء الخير يا(افوكاتو)
غايتو انا قويت قلبى ونزلت مداخلة بخصوص(الشرارة)
لمن عملت ليها(اعتماد)لقيت مداخلتك دى نزلت قبل مداخلتى
اها زى اخدتلى عرضة وقلت
(والله اتارينى شقية ضمة وعررريفة زى احمد طه)

ههههههههههههههههه ، أنا الشقي و عريف زيك ، دي ما شغلتكن إنتن

بالمناسبة (يا حافظ)
(شُرَّارَة) بترقيق الرائين ، لو فخّمتهن الحكاية تبوظ

[ماريل]

المشاركة الأصلية كتبت بواسطة أحمد طه

ههههههههههههههههه ، أنا الشقي و عريف زيك ، دي ما شغلتكن إنتن

بالمناسبة (يا حافظ)
(شُرَّارَة) بترقيق الرائين ، لو فخّمتهن الحكاية تبوظ

شغلت شنو يا افوكاتو؟؟
الشئ مو (عواسة)
الشئ(فهم)

[نغم]

المشاركة الأصلية كتبت بواسطة حافظ حسين
الشرار الشرار يا عالم
نحن مغرودين فيها



يا شباب الشرار دا انا مغرود فيها و يدكم معانا

هههه هاهاها يا حافظ
مالك وقفت عند الاكل قدر ده
خلى بالك هنى
ان ما انثت الشرارة تكون اخليت بالمعنى و شان لامن تجمع تخت التاء و اضحه و سمحى كدى

وبعد الشرح و الوصف دى كلو النكلمك تضوقا وين يا ود العمارات
تمش شارع 15 فى مطعم اسمو المطعم الشعبى اطلب طلب شرارة بى الروب ركز على الرائب دى شان تتمطقا كويس و تعرف كمان الفروقات اللت القراصى و اكان مشيت وكت فطور اطلب فى الاول قراصه بى التقليه او الدمعة و تقوم شنو تحلى بى شرارات الرائب و بعد ما تقش خشمك و تحمد ربك و تبقى مارق من هنوك
اذكر وصف حميدنا هنى

عليك الله شوفو الزول ده ست الدار كلها ما تجيبو علا حتت الاكل
الجنا جعااااااااااااان من دربك شارع 15

وصيتى ليك سوق معاك الشلة واكل الرائب بالهنا فى حشاك
ما تركز معانا ياخ دى ونسات جانبيه سمح

[نغم]

المشاركة الأصلية كتبت بواسطة أحمد طه
الأخ حافظ مساء الخير ، الشرّارة شبيهة بالقرّاصة ، إلا أنها أقلّ سماكة منها ، فهي تقع بين الفطير و القراصة ( الفطير رهيف كالكسرة ) ، و البعض يسمونها (الطبطاب) ،
و في معظم الأحيان تتم عواستها باليد (بدون قرقريبة) ، لأن عجين القمح متماسك و لا يحتاج إلى قرقريبة مثل عجين المريق

يا ود طه غايتو فى الباين لى كدى كلمة شرارة ذاتا جات من عملية شر القراصة بعد مو تنضج يشلوها يختوها فى الطبق او الصينى
و السرارة السوها باليد دى من نسوان قديرات و ماهرات يعلم الله يسوقن العجين دى بى طرف اصابعين تطلع شرارة تشبه توب الكريب من خفها و لينها ماها يابسى ولا محرقا
اما الطبطابات دى سميكه شويه و تشبه قراصة معظم الناس البعملوها فى السودان و الطبطابه دى يا حافظ تاكلا بى خدره مفروكه او باميى حااااااااره مع صحن سلطه و شطه خدرا صاحبك الجمبك ما بتعزمو ههههههههه

[نغم]

هنى وقفت و دموعى سون طققطق

نورا وجعت قلبى

اخدو: يعنى تم تزويجها غصبا عنها بالدق كمان

والمقطع ذاتو كيف كيف (ما وقع لى الحته بعد التسلسل هى خبرتو بالولادة و كمان العرس المأساوى ده ولا كيف المعنى)
صورا دموعا هى و الصور منو لا تقولو الخوجات القبيل ديلاك؟

[نغم]

الطشه حصلت ما عرفت الهوم homeمن end

[أبوبكر عباس]

المشاركة الأصلية كتبت بواسطة نغم

والاشارة هنا للشوق واحدة من خدم العمدة وكلمة خدم ترمز الى العمل المنزلى الروتينى من طبخ و نظافة
تمرقنا من السرارة اللت ... المكجناها

يعني يا نغم، عشان انتي مكجنة الكلمة، تقومي تطبخي ليها تبرير زي كلامك دا:

ومن المعروف انو خدم البيت بكونن من الاهل القريبين فى منظقة الشايقية
نغم

معقولة؟
معقول الشايقية ديل، كانوا متحضرين قدر دا، ونحن ما عارفين!

[نغم]

المشاركة الأصلية كتبت بواسطة بابكر عباس
يعني يا نغم، عشان انتي مكجنة الكلمة، تقومي تطبخي ليها تبرير زي كلامك دا:
معقولة؟
معقول الشايقية ديل، كانوا متحضرين قدر دا، ونحن ما عارفين!

تبرير شنو يا بابكر خلى كلام المثقافتيه ده
قلنا اجتهاد اجتهاد
عارف زى عشاك الليل امبارح
وفايت حد شوفك و سمعك اكان شفت ولا دى حالة اللاوعى اللتك تاوراتك تانى

ما تجرف البوست
انجر ليك بوست اخر و تعال نوريك حضارات سادت كمان

تخريمه
غايتو البتجيبك لى البوست ده شيتن مو هين تب
اكان ما كت مناسب الشايقى و ادوك بتهم
ظنتك كنت تعد النجوم و تبارى السراب
هههههههههههههههه

خصمتك بى سيدك الحسن تعفى لى ياخ
عفو الحياة

[أبوبكر عباس]

المشاركة الأصلية كتبت بواسطة نغم

ما تجرف البوست

انتو قصة ما تجرف البوست دي شنو؟ البوست دا، قلتو توثيقي! حبيت أوضح للقارئ الذي سوف يأتي لاحقا إعتراضي على تبريرك دا، وأتهمو (تبريرك) بمحاولة تزوير ذلك الواقع:

ومن المعروف انو خدم البيت بكونن من الاهل القريبين فى منظقة الشايقية
نغم

[نغم]

المشاركة الأصلية كتبت بواسطة بابكر عباس
انتو قصة ما تجرف البوست دي شنو؟ البوست دا، قلتو توثيقي! حبيت أوضح للقارئ الذي سوف يأتي لاحقا إعتراضي على تبريرك دا، وأتهموا (تبريرك) بمحاولة تزوير ذلك الواقع:
"ومن المعروف انو خدم البيت بكونن من الاهل القريبين فى منظقة الشايقية
نغم"

تزوير تزوير
(اضيفو فى رصيدك نغم زورت الواقع واهو سيفت التكويد)

قت ليك افتح بوست لمناقشة تزوير الواقع فى منطقة الشايقيى
و مآلات ذلك على ناس الوسط


تانى
خليك فى الحضرة سمح

[عبد القادر جاويش]

ماريل

لك التحية عى هذا العمل التوثيقى المهم ... لك التقدير والى الامام

[ماريل]

المشاركة الأصلية كتبت بواسطة عبد القادر جاويش

ماريل

لك التحية عى هذا العمل التوثيقى المهم ... لك التقدير والى الامام

متشكرة على الدعم
ربنا يقدرنى على المواصلة