اقتباس:
المشاركة الأصلية كتبت بواسطة أنور محمد الفاضل
عديت معاي كل الجراح ودخلت لي دنيا مجهولة القدر
ما أظني ألقى في يوم سماح والجائي أكتر من خطر
أوهامي بتراوض الجنون سايقاني في رحلة سمر
في قلبي مكبوت الحنين وفي فكري متجاوز الأثر
مكتوبي وإن طال الأجل أنا ليهو زي مد البصر
...................
حافظ قوانين العبور والسكة لسه بتختبر
عارف أقاويل الخيال بتقسى في ليل السهر
وضحكة النجم البعيد سامعها تصدح في حذر
أنا عايز أكون أو لا أكون وحظي زي كل البشر
مرتاح وهادي وحالي زين وفي روحي يسري ربيع عمر
لاهم أزور خاطري الأليم لا خوف أخبي عشان سفر
أعاشر الناس بالوصال وكل الأماني معاي تمر
.....................
أجهل عذاب وأعبر سراب قبل الوصول أسمي اتحظر
تشمت الأزهار علي ما سامعة قدامي الخبر
مجبور أساير كون غريب ما فيهو كائن أعتذر
يا وجعة البحر الهلكني ومن أساي شاب واحتضر
حدوتة يحكيها الصغار ويكتبها تذكار القطر
..................................................
..................................................
|
سلامات أنور ويسعد صباحك،
ردّك بي غادي، أحرجتني بساطتو ومباشرتو
كوني اعتبرت دعوتك نوع من رد المجاملة
وهذا ليس مكانها..فلك العتبى على تعليقي البايخ.
اهن،
الحقيقة انا قريتك قبال كدا..وعادة وكت يكون عندي راي ماسمح بحتفظ بيه..
لأنّي اخاف جدّاً احبط الكاتب او اشعره ان ماكتبه ليس كما يبدو له
فكلّنا نكتب ونحن على ثقة انّو المكتوب دا الاكمل على حسب احساسنا..
ولأجل احساسك الصادق جدّاً دا انا بنأى عن ابداء وجهة نظر غير ماتنتظر
ففي النهاية سكب الاحساس على كلمات غض النظر عن وزنة قوافيها، كمالية لغتها وترتيبها فجهد الكتابة عندي مُقدّر.
النص عاليه:
مابقول ليك انا مقطّعة العربي..لكن بحاول بقدر الامكان اطلّع نص سليم..
الغلطات الاملائية بتخرب منظر النص وممكن جدّا تخرب المعنى، أسي "الجائي"دي وقفت مسافة لأعرف معناها، فماتستعجل واضبط الكتابة بقدر ماتستطيع ليخرج العمل في أبهى صوره.
الملفت عدم خلطك بين الألف المقصورة والياء، ودولا غلطات يشترك فيها ناس كتار جدّا.
اهتمامك بالقافية اكتر من المعنى واضح جدّا.. مثلاً مد البصر مهما طالت مسافته يظل قصير، لو هو معناك الأنا فهمتو، يبقى الاستخدام ماكان موفّق، او ربما زابط لكن ماواضح المعنى.
"حافظ قوانين العبور والسكة لسه بتختبر
عارف أقاويل الخيال بتقسى في ليل السهر
وضحكة النجم البعيد سامعها تصدح في حذر"
حلوة دي، عجبتني.
كمان بتورّي انّك قادر توزن الكتابة..فمجهودك ماحيكون كبير فيما عداها.
المعنى العام بتاع النص بعجب برضّك.
أتمنى ينزل ردّي عليك برداً وسلاماً، وخت في بالك انّي علّقت كقارئ عادي حسب موازينه التي تحتمل الخطأ والصواب.
