الإسلام هو الحل

[أسعد]

ايا طمطم

فالغرض الذي هوّ مرض فعلاً وأثبته التأريخ، كان بلا شك اعطاء رجال الدين سلطات سياسيّة مارس "أغلبهم" فيها قهر الشعوب على مر العصور البائدة، فمالكم كيف تتأسلمون؟!

قولي حفظنا السلطة السياسية من رجال الدين
اها كيف نحفظ السلطة السياسية من رجال العلمانية تحت غطاء الحرية والديموقراطية؟!
يا طمطم (الغرض مرض) هو شعار كل انسان اغواه شيطان السلطة



يا اهلنا لا فرق (دنيوي) بين اسلامي وعلماني الا بالتقوى ^_^

[خالد الصائغ]

المشاركة الأصلية كتبت بواسطة مبر محمود

تحيّاتي يا صائغ،
هسّي معقولة زول بنباهتك دي يا خالد، وبرضو بيسأل من نقطة بديهية زي النقطة الفوق دي؟! يأخي ظللنا نكرر عليك في أكثر من موضع هنا إن العلمانية مجرد فكر إنساني وضعي، وهي بذلك تحتمل أول ما تحتمل عدم الإتفاق حولها كما إنها تحتمل أيضاً التسويات التوافقية وصيغ الحد الأدنى، وهي في هذا تخالف الدين تماماً، فالدين لا يقبل التسويات ولا سبيل فيه لصيغ الحد الأدنى كونه ببساطة مرتبط بمسائل روحية وعقدية غير قابلة للنقاش ولا يمكن فحصها منطقياً وموضوعياً. بالبلدي كدا لو جيت للعلماني قلت ليهو قانوني الوضعي دا أفضل من قانونك الوضعي داك حيقعد في الواطة ويناقشك فيهو وفي النهاية يا يتفق معاك يا يخالفك يا يصل معاك لتسوية بإشتراطات الحد الأدنى، لكن لو جيت لزول الدين وقلت ليهم قانوني الديني دا أفضل من قانونك الديني داك حيلعنك ويكفرك ويتخذك عدو وقد يجاهد فيك، فالأمر عنده أمر عقيدة وليس أمر فكر، والعقائد بطبيعتها لا تقبل التسويات.

تحياتي و ودي يا مبر

و هو ياخ يا عزيزي أنا التاعبني معاكم شنو, غير البديهيات الإنتو بتحاولو تلتفو حولها كل مرة دي
في البداية يا مبر كنتَ تحاول أن تنفي و بشدة أن العلمانية لا تقول بإبعاد الدين, رغم إنو دي بديهية ناصعة جدا, ثم خطوتُ خطوة أخري لتقول بأن الدين يجب أن يبعد عن السياسة حتي لا يتلوث, ثم تجاوزتَ مسألة التلوث, لتأتي مجددا بحجة أخري لإبعاد الدين, و هي قولك بعدم توفر صيغة دينية متفق عليها للمشاركة السياسية, و حين سقتُ إليك بأن العلمانية أيضا تفتقر إلي توفر صيغة للتوافق, تأتي يا عزيزي لتقول لي بأن هذه بديهية يجب ألا تفوت عليّ, ثم تريد أن تقنعني بأن الإختلاف العلماني هو من رحمة الله بعباده حتي لا يتقاتلون و يكفرون بعضهم بعضا !!!
و في كل مرة يا مبر, كنتُ أسوقُ إليك حجتي علي عدم موضوعية إقصاء الدين عن الدولة,مهما كانت الأسباب.
ثم أنك حينما تقول يا عزيزي بأن الدين لا يمكن الإتفاق فيه علي صيغة محددة, و بالتالي فقوانين و شرائع الدين يجب أن تستبدل بالقوانين الوضعية, هذا يربكني تماما, هل لك أن تقايس لنا تصورك هذا بقوله تعالي: (وأنِ احكمُ بينهم بما أنزل الله) المائدة-49, و قوله تعالي (وَمَنْ أَحْسَنُ مِنَ اللَّهِ حُكْمًا لِقَوْمٍ يُوقِنُونَ). المائدة:50,, و لستُ في حاجة لأقول لك يا عزيزي بأن السياق ليس سياق تكفير أو إدعاء وصاية إيمانية, فقد تكون أكثر إيمانا بالله مني, و إنما هي حجتي إليك نقاشاً في إطاره العام, علَّك تراجع ما تقول به.
يا عزيزي يا مبر, موقفي يرتكز بالأساس علي أمر جوهري و إبتدائي,
كيف لي كمسلم يؤمن بأن الله هو الخالق و الرازق و المدبر, و هو الحَكمُ العدلُ, ثم يكون لي أن أستعيض عن ما شرعه لي من قوانين, بقوانين أخري وضعية.و كيف سيتستقيم ذلك مع سياق عبوديتي له,و مقام تعظيم ألوهيته لي.

[خالد الصائغ]

المشاركة الأصلية كتبت بواسطة حافظ حسين

سلام سيد البوست و ضيوفه
خالد الصاشغ معليش أنك موجه الخطاب لبابكر لكن كيبوردي أكلني عشان كدا بحاول ارد
أولاً: فعلاً يا خالد نحن كبشر ما كتبنا اي وثيقة مع ربنا و ممكن نؤمن بيه بشكل مختلف من انسان لأخرو كويس أنك جبت موضوع الإيمان .... يعني وقت أنا أقول مؤمن بالقرأن مفروض ما انتقد اي حكم صادر منه صح؟ .... في حالة الإجابة بنعم , فالإيمان حد علمي يعني التسليم التام و أتخيل لي دا بتنافي مع الحراك الحياتي اليومي و ما اظن ممكن.....

محبتي

التحايا و تمام الود يا حافظ

و حد علمنا كلنا يا حافظ, الإيمان يعني التسليم التام, و تام دي معناها ما بتجزأ يا حافظ, و الإيمان ما بتنافي مع الحراك الحياتي اليومي , لأنو الإيمان بتعلق بما هو ثابت و مطلق, أي الإله (الله), ثم تأتي بعد ذلك مقتضيات هذا الإيمان, و الإيمان و مقتضياتو ما بنفصلو, إذن فإيمانك بالقرآن الكريم الذي هو من عند الله, يقتضي إيمانك و تسليمك بأي حكم صادر منه, فما وجه التنافي مع الحراك اليومي في ذلك ياحبيب !!!!

[خالد الصائغ]

المشاركة الأصلية كتبت بواسطة حافظ حسين

ثانياً: فعلاً الله كبير و تعالي عن ذلك علواً كبيراً و ما ممكن يجوا ناس الامم المتحدة أو غيرهم يصيغوا ليه قوانينه و الخ ..... كلام دينياً سليم لكن يا خالد لا نظرياً و لا عملياً سليم..... يعني بالمنطق البسيط اصلاً ما في قانون أو حكم ممكن يكون سرمدي و قاطع ليه 15 قرن و يفضل كما هو دون ان يتأثر.... و بعدين ليه الله ما يكون سخر ناس الامم المتحدة أو غيرهم عشان ينظموا الحياة؟

محبتي

إذا كان الكلام ده دينيا سليم يا حافظ, شنو بمنع إنو يكون سليم نظريا ولا عمليا, زي كأنك يا عزيزي عايز تقول إنو الدين حاجة متجاوزة للواقع, أبدا يا حافظ, الدين أقرب للواقع من شراك نعله, لأنو الدين في جوهرو هو العبادة, التي هي في جوهرا فعل التعاطي و التفاعل مع الحياة و الواقع, و شنو البمنع يا حبيب إنو القانون يكون سرمدي, حتقول لي لأنو الظروف بتتغير, حا أقول ليك يا حافظ القوانين تصاغ بشكل أساسي وفقا لطبيعة و جوهر الإنسان و ليس وفقا للظروف, و الطبيعة الإنسانية و الجوهر الإنساني لا يتغيران بتغير الظروف, الإنسان يا حافظ لم يتغير في أبعادو منذ أكثر من عشرة آلاف سنة (ده علي الأقل) يعني الإنسان هو ذات الإنسان في بعدو البيولوجي و النفسي و الكيميائي ... الخ.. و هو ذات الإنسان في شكل تعاطيه و تفاعله و مساهمته في سيرورة الحياة, جوهر الإنسان لا يتغير يا عزيزي, لذلك فدعوي أن ما شرعه الله لعباده من قوانين هو الأعلم بحكمته المطلقه أنها الأكمل لصلاح حالهم, غير ملائمة للعصر و أنها تحتاج إلي تغييرها أو علي الأقل إنو يتعمل ليها أدابتيشن ولا أبديتنق, عشان تواكب, هذه دعوي لا تستند في جوهرها لأي مسوغات موضوعية, إنسان العصر الحديث هو ذات إنسان آدم و حواء, و السارق هو ذات السارق , و كذلك الزاني و الظالم و المعتدي.

[خالد الصائغ]

المشاركة الأصلية كتبت بواسطة حافظ حسين

ثالثاً: انك ما قلت ان قوانين الأمم المتحدة بتتنافي مع الدين صح, طيب شخصي الضعيف يا خالد بطلب منك إجابة لمصلحة الحوار هل في تعارض بين قوانين الامم المتحدة و الأديان و لا ؟ لان بناء علي الاجابة علي السؤال دا النقاش ممكن ياخد منحي تاني.....

محبتي

وجود تعارض من عدمو يا حافظ ما الإشكال في حد زاتو, الإشكال في أولوية الإتباع لي ياتو فيهم في حالة وجود تعارض, و بالمناسبة أنا قوانين الأمم المتحدة دي لحدي هسة ما إطلعت عليها, و إطلاعي عليها ما حيغير من جوهر النقاش. و نقاشي مع الشباب واحدة من مفاصلو كانت الحتة دي يا حافظ, خلاصة تصوري للأمريا حافظ, إنو إذا كانت قوانين الأمم المتحدة بتتفق مع ديني, فمرحبا و سهلا بها, أما إذا كانت تتعارض أو تناقض ديني, فمتابعة ديني هو الأولي و المقدم عندي.

[خالد الصائغ]

المشاركة الأصلية كتبت بواسطة حافظ حسين

رابعاً: مع جدلك دا يا خالد بثبت معاك أن دين رب العالمين ما عنده نسخة متفق عليه, بناء علي الجدل نحن امورنا ممكن تتسير بأي نسخة؟
هل النسخة الايرانية, السودانية, السعودية, الافغانية و الخ من النسخ القديمة و الجديدة؟..... عليك الله يا خالد ما تقول لي حنجيب نسخة جديدة كرت كرتون لان ببساطة البشر ما فيران تجارب .... معليش يا خالد شايفك طالبت بابكر يتجاوز نقطة جيبوا لينا نسخة دي و انها بتخصم من النقاش .... كلام شوية عجيب, هو النقاش كله في شنو؟!!!!!

محبتي

ياخ و الله يا حافظ أنا مسألة المطالبة المستمرة بي إدراج نسخة لشكل المشاركة الدينية دي معطتني تماما , و شغال من قبيل بوضح بأنها ما أساسية في النقاش و ما بتغير من جوهر النقاش في شئ, و عشان أريحكم من هاجس المطالبة يا حافظ, هب إنو أنا مسلم عادي جدا, غير متفقه في الدين, و غير مطلع علي هكذا نسخة أو نموزج, لكن من ناحية تانية جوهرية , أنا كمسلم مؤمن و مسلَّم تماما (و الإيمان لا يتجزأ كما اتفقنا) بإنو قوانين ربنا دي ياها الإرتضاها لي و أمرني بإتبِّاعا, كيفن يجي زول يقول لي ياخ قوانين ربنا دي ما بتصلح معاك في العصر الحديث ده, ده جوهر النقاش بي كل بساطة يا حافظ.

[خالد الصائغ]

المشاركة الأصلية كتبت بواسطة حافظ حسين

خامساً: معاك 100% العلمانية ما في نسخة متفق عليها, لكن ميزتها عن النسخ الدينية ما فيها قدسية .... يعني ببساطة اي قانون, تشريع, أو تعامل طلع ما بحقق العدالة المطلوبة للبشر طوالي بتشال برا و بجي غيره من غير ما يجيك زول يرفع سيف التكفير و الموت....

محبتي

يعني أفهم من كدة يا حافظ إنو قدسية النسخ الدينية دي هو السبب الموضوعي لإبعادا و إستبدالا باللامقدس, طيب ياخ قدسية النسخ الدينية دي جات من وين, موش لأنها من رب العالمين, و بما أنها من رب العالمين يا حافظ يبقي معناها هي الأكمل و الأصلح و الأعدل, و لأنها من رب العالمين يا حافظ يبقي حينتفي إيمانا و تصديقا إنها تطلع في يوم من الأيام ما بتحقق العدالة.

يبقي الجكة دي كلها في شنو يخوانا


محبتي و كامل تقديري

[ام التيمان]

يا اخوانا البثبت شنو انو القوانيين دى
جات من رب العالمين

[مبر محمود]

المشاركة الأصلية كتبت بواسطة خالد الصائغ

ثم أنك حينما تقول يا عزيزي بأن الدين لا يمكن الإتفاق فيه علي صيغة محددة, و بالتالي فقوانين و شرائع الدين يجب أن تستبدل بالقوانين الوضعية, هذا يربكني تماما, هل لك أن تقايس لنا تصورك هذا بقوله تعالي: (وأنِ احكمُ بينهم بما أنزل الله) المائدة-49, و قوله تعالي (وَمَنْ أَحْسَنُ مِنَ اللَّهِ حُكْمًا لِقَوْمٍ يُوقِنُونَ). المائدة:50,, و لستُ في حاجة لأقول لك يا عزيزي بأن السياق ليس سياق تكفير أو إدعاء وصاية إيمانية, فقد تكون أكثر إيمانا بالله مني, و إنما هي حجتي إليك نقاشاً في إطاره العام, علَّك تراجع ما تقول به.

تحيّاتي يا خالد،
بالنسبة للآية الأولى فالمقصود هو العدل، أي أحكم بينهم بالعدل الذي أنزله وأمر به الله. والآية في مجملها تحث على تحري العدالة بإعتبارها قيمة جوهرية لابد لأي حاكم أن ينشدها إن أراد الرشاد. أما بالنسبة للآية الثانية، فهي تتحدث بصورة عامة عن أحكام الله على عباده، أي قضاءه وقدره فيهم، فالمؤمن الموقن الحق، ينبغي أن ينظر لكل تصاريف القدر بإعتبارها "حُكم إلآهي مُستحسن" وذلك لحكمة يعلمها الله وحده لا شريك له.

[ابو ابراهيم]

المشاركة الأصلية كتبت بواسطة ام التيمان

يا اخوانا البثبت شنو انو القوانيين دى
جات من رب العالمين

ياتو قوانين ؟؟؟
يا ستهم !!!

[خالد الصائغ]

المشاركة الأصلية كتبت بواسطة بابكر عباس

خلاص لو داير تتجاوز النقطة دي، انتا وأبو إبراهيم جيبوا كوتشينتكم وتعالوا، نحن جاهزين.
الشئ المتأكد منو، انو ناس حسن الترابي وبعد ال23 سنة الفاتتن ديل، برضو ما عندهم تصور لنظام إسلامي لإدارة دولة، بدليل كلام البشير صبيحة الإنفصال:
خلاص بعد دا، ما في أي دغمسة، هي لله هي لله

هسة الجاب طاري الناس ديل هنا شنو يا دكتور, أمرقم لينا عليك الله من سياق النقاش
ال23 سنة ديل ما بمثلو تجربة نظام إسلامي.

الكوتشينة ملحوقة يا دكتور, تعال وصِّل مع الناس مركبك ده لي مُشرعو.

[أبوبكر عباس]

المشاركة الأصلية كتبت بواسطة خالد الصائغ

هسة الجاب طاري الناس ديل هنا شنو يا دكتور, أمرقم لينا عليك الله من سياق النقاش
ال23 سنة ديل ما بمثلو تجربة نظام إسلامي.

الكوتشينة ملحوقة يا دكتور, تعال وصِّل مع الناس مركبك ده لي مُشرعو.

جدي طه أبوعباس ولدوهو تقريبا سنة 1873
قبل سنة ستة بست سنين جاب ولدو الوحيد عباس
طه وابوهو ومعظم أهلو جاب طاريهم محمود ود أحمد (خالد بن الوليد زمانو) والمجاعة لحست الباقين
سنة ستة، عباس كان طالع ليهو فوق شجرة بكد ليهو في كعكول صمغ، نادتو إمراة من تحت الشجرة: هوي عباس هوي، امك وأبوك ماتوا، ولا هببو ليها وكنكش قوي في الكعكول (عرفو دا، المراقة).
الحمد لله كتشنر كسر رقبة الدولة الدينية (بعد 15 سنة)، وعباس المكنكش عاش زمن رخاء وسنة 25 جابو ليهو ولد سماهو تيمنا بمشروع الجزيرة وليس المهدي: محمّد أحمد.
أها محمّد احمد دا، هو الإستمتع جد جد وسكن قلب ودمدني وجاور الكاشف وسافر مصر وحجّ لكل من الحجاز ولندن وروما ومات يوم واحد سبعة 1989
بكّة الذي باركنا حوله، شبيه طه الجد، عافر عافر وحالف يحضر نهاية الدولة التانية...

دحين، يا خالد، نحن ما عندنا مانع نخليكم تجربوا تاني 23 سنة، بس طلب صغير، صغيرون جدا، سغنتوتي: أدونا فترة خمسين سنة إستراحة وتعالوا لخوها تاني، ما معقولة، التجريب كلو فينا نحن! ما معقولة ما نستفيد من طولة العمر السببها إكتشاف البنسلين يا أخ!!

[Magdy]

المشاركة الأصلية كتبت بواسطة حافظ حسين

ثالثاً: انك ما قلت ان قوانين الأمم المتحدة بتتنافي مع الدين صح, طيب شخصي الضعيف يا خالد بطلب منك إجابة لمصلحة الحوار هل في تعارض بين قوانين الامم المتحدة و الأديان و لا ؟ لان بناء علي الاجابة علي السؤال دا النقاش ممكن ياخد منحي تاني.....

سلام اهل البوست

انا زاتي كيبوردي اكلني

وماقدرت اسكت ياحافظ

ومادام الناس قررت تنسى جروح الاسلام النزفت

واللتي لازالت تنزف(فلسطين-سوريا-الروهينقيا .....الخ)

تحت مرأى ومسمع الامم المتحدة(دون ان تحرك ساكن اوحتى يطرف لها جفن)

ودايرا تبشر لينا بالامم المتحدة بمحاولة تجميل وجهها القبيح

حقوا تعرف قاعدة تبشر بي شنو

لانو الامم المتحدة (وهي عارفة بتعمل في شنو) على عكس كثير من المبشرين بها

مابتحاول اصلا تدعي الجمال في ماتدعو اليه

عشان كده بتستعين على تمرير قوانينها بغموض اللغة والتلويح بالعقوبات

لانها تعلم ان بعض ماتروج له حتى الحيوانات تشمئز منه (لادين لافطرة)

ودونك "حرية التوجه الجنسي" و "النوع الاجتماعي" و"الاسر غير النمطية" ..الخ

ف الداير يبشر بالعلمانية ماعندنا معاهو مشكلة

بس يكون صريح (زي الناس المتبني طرحهم) ويسمى لينا الحاجات بي مسمياتها

ويبطل محاولة مسك العصاية من النص او تجميل ماتعارف الناس على قبحه

ودمتم بخير

[محسن خالد]

عزيزي الفاضل وأخي الكريم خالد الصائغ
بعد التحية الطيِّبة
أنت محق، لقد خلطتُ بين الاسمين، فعفوك هو ما أؤمِّل يا عزيزي، وكذلك عفو الأخ خالد غالي.
قمتُ بتصحيح حتّات الغلط
وأرجو المسامحة مرة ثانية
كونا بخير

[محسن خالد]

دحين، يا خالد، نحن ما عندنا مانع نخليكم تجربوا تاني 23 سنة، بس طلب صغير، صغيرون جدا، سغنتوتي: أدونا فترة خمسين سنة إستراحة وتعالوا لخوها تاني، ما معقولة، التجريب كلو فينا نحن! ما معقولة ما نستفيد من طولة العمر السببها إكتشاف البنسلين يا أخ!!
بابكر

قلتَ أقصر الطرق تجعل من محاورك كوزاً، بالتالي تنسب له -وللإسلام بالمرَّة- كل مخازي الكيزان!
يا تُرى هل اسم هذه النوعية من الحوار "العلمية" تماشياً مع "نوعية" العلمانية المطروحة هنا والمنجورة ببوخها؟