راكوبة المجادعات.. النمة والدوباي

[سارة]

المشاركة الأصلية كتبت بواسطة سجمان

يا طير إن مشيت شيل السلام لي أم روبة
قول ليها الحبيب في الركبة ضاربة رطوبة
الضهر إنعوج لصقو البطن مشروبة
قبال السمح لي بطانا كات حبوبة

يا طير ان مشيت شيل للحبيب احزانى
قول ليهو الحنين ملك الفؤاد شلانى
الضهر انعوج وشمتوا في خـلانى
حلفتك بربك لو لمحة بس تغشانى

[طارق صديق كانديك]

المشاركة الأصلية كتبت بواسطة سارة

نسًام الخـــــريف هيج على احــــــــــــزانى
ومن وجهو الصبوح يا اخوانا جانى الجانى
لو يرضى ويحن او فى المنام يغشانى
أنفاسو المسك وعرقو جورج أرمانى


*جورج ارمانى دا عطر يا ناس وتانى كر

ماعصرتي عليهو شوية

نسامو البِهل جيهة الشرق يغشاني
داعجاها العيون براقا سيفو يماني
اضارف وازوغ منو ويمش يحواني
أما صديرو داك خلوه شيتن تاني

[سارة]

المشاركة الأصلية كتبت بواسطة طارق صديق كانديك

الديش النزل سوح الرويح بسلاحو
قمبر وانشبك عاني القليب نتّاحو
كتّر عليّ الشوق هالكني بي نبّاحو
زحزحتَ الجبال ما اتزحزحن أرياحو

الديش النزل جرح العيون بنصالو
وكت غًرز نشابو قلبى الرٍهيّف شالو
يا خلاى حبيبى بالحيل كتر ترحالو
راسيات الجبال تهتز من افضالو

[سارة]

المشاركة الأصلية كتبت بواسطة طارق صديق كانديك

ماعصرتي عليهو شوية

نسامو البِهل جيهة الشرق يغشاني
داعجاها العيون براقا سيفو يماني
اضارف وازوغ منو ويمش يحواني
أما صديرو داك خلوه شيتن تاني

نسامو البهل ريحة دعاش غامرانى
خمر الروم عيونو ووشم الشلوخ بطحانى
مربوع قامته اجلح وهو فى الاصل سودانى
عسلة ريقو تشفى كل العلل يا اخوانى

تانى كر هووووووووووى انا دايرة اتوب من المرابيع دى

[طارق صديق كانديك]

المشاركة الأصلية كتبت بواسطة سارة

تانى كر هووووووووووى انا دايرة اتوب من المرابيع دى

ما بتقدر تتوب يا قلبي المودر

[سارة]

المشاركة الأصلية كتبت بواسطة طارق صديق كانديك

ما بتقدر تتوب يا قلبي المودر

انا غايتو نويت انت حسًن الظن

[عكــود]

المشاركة الأصلية كتبت بواسطة سارة

نسامو البهل ريحة دعاش غامرانى
خمر الروم عيونو ووشم الشلوخ بطحانى
مربوع قامته اجلح وهو فى الاصل سودانى
عسلة ريقو تشفى كل العلل يا اخوانى

تانى كر هووووووووووى انا دايرة اتوب من المرابيع دى

أي نعم، باب التوبة ما اتقفل؛
لكن مع جورج أرماني وبل الريق ده التوبة قااااااسية.


الكاديلاك شوية متضارف،
فما عارفنو هنا:
اضارف وازوغ منو ويمش يحواني
الحواهو منو/شنو؟

لكن ما دام، بعد الزوغة مباشرةً، قال:
اما صديرو داك خلوهو شيتاً تاني
فالحكاية واضحة وما محتاجة.


سلام عليكم ويا سلام.

[حافظ حسن مختار]

عمري للحاوية الجمال أهديتو
قلبي مليتو بالريد والغرام عبيتو
مجنون ليلى فتو وغادي اتعديتو
خاويت السقد وسكنت مطرح بيتو

[طارق صديق كانديك]

المشاركة الأصلية كتبت بواسطة عكــود

الكاديلاك شوية متضارف،
فما عارفنو هنا:
اضارف وازوغ منو ويمش يحواني
الحواهو منو/شنو؟

لكن ما دام، بعد الزوغة مباشرةً، قال:
اما صديرو داك خلوهو شيتاً تاني
فالحكاية واضحة وما محتاجة.


سلام عليكم ويا سلام.

أهل الفهم مايروحو

[حافظ حسن مختار]

امس اتصلت علي الما خيبتلي ظنوني
قاتلي الشوق بحر لا متين تعود يا عيوني
كلامه المعسول هيج علي شجوني
ادربكت أفكاري ومن إيدي وقع تلفوني

[أبو دعد]

المشاركة الأصلية كتبت بواسطة سجمان

تاني انشبك عقلي وسرح بي غنمو
والبال انشغل فوقو الهموم اتردمو
الخلف الوعد اسباب مجيهو وعدمو
حاميهو المروق كفلا متقل قدمو
gapgap

تانى انشغل عقلى و سرح بالى
ما قادر اميز يمينى من شمالي
الخلف الوعد اسبابو يا زمالى
ما بحمل شمس الضحى و مشى الرمالى

[سجمان]

والله البوست دا عترتا فيهو بالصدفة..
ارجو من مشرف منتدى الحوار دمجو
في راكوبة المجادعات..

[طارق صديق كانديك]

المشاركة الأصلية كتبت بواسطة سجمان

لو ما خايف اتفضح ولّ أجيب لي سمعة
كنت مع الرغيفة من فاهو باخد كمعة

المشاركة الأصلية كتبت بواسطة سجمان

والله البوست دا عترتا فيهو بالصدفة..
ارجو من مشرف منتدى الحوار دمجو
في راكوبة المجادعات..

اي بالله خليهو يدمجو، كان نجي ناخدلنا كمعة

[سجمان]

المشاركة الأصلية كتبت بواسطة طارق صديق كانديك

اي بالله خليهو يدمجو، كان نجي ناخدلنا كمعة

تقنص انت بس..
قلنا عشان ما يتشتت دم القصيد على البوستات..

ثم إن الشوق علفنا ياخ..

[سجمان]

المشاركة الأصلية كتبت بواسطة سجمان

ارجو من مشرف منتدى الحوار دمجو
في راكوبة المجادعات..

الطلب دا ..
هل فيهو مشكلة بي طريقتو دي ولّ شنو
إذا فيهو أي مشكلة ورونا الإجراءات
المتبعة في مثل هكذا حالات..

شكراً