قهوة النشاط !

[نزار حسن علي]

يا حلوييييييييييييييييين
اشواقنا بلا ضفاف
اقول ليكم النكته دي لما ادخل ليكم مرة تانية
قالوا واحد ما بحب جارهوومكجنه قام الجار قال ليهو بكرة بجي اتغدي معاك قال لية كويس قاموا اتغدوا براهم بدون الجار وطبخو للجار كديسة وعندهم ولد ما بسكت ابوهو خوفو قال ليهو لو قلته اي شئ بكتلك والجار جاء وختو ليهو الكديسة مطبوخة والجار اكل لما شبع قام الجار قال ليهم حاسي في شئ طالع لي في صدري قام الود الصغير قال ليهو هي بتطلع في الحيطة ما تطلع ليك في صدرك
ودقي يا مزيكة

[أبو أماني]

اقتباس:
المشاركة الأصلية كتبت بواسطة نزار حسن علي
يا حلوييييييييييييييييين
اشواقنا بلا ضفاف
اقول ليكم النكته دي لما ادخل ليكم مرة تانية
قالوا واحد ما بحب جارهوومكجنه قام الجار قال ليهو بكرة بجي اتغدي معاك قال لية كويس قاموا اتغدوا براهم بدون الجار وطبخو للجار كديسة وعندهم ولد ما بسكت ابوهو خوفو قال ليهو لو قلته اي شئ بكتلك والجار جاء وختو ليهو الكديسة مطبوخة والجار اكل لما شبع قام الجار قال ليهم حاسي في شئ طالع لي في صدري قام الود الصغير قال ليهو هي بتطلع في الحيطة ما تطلع ليك في صدرك
ودقي يا مزيكة


أيوا كده يا نزار يا رائع .. شرف القهوة بنشاطك الراقي ده .. وعطر سماواتنا بكل ظريف يا ملك الظرف .. و... دقي يا مزيكة ..

[أبو أماني]

مافي شئ بيعكنني في الدنيا دي..غير لما أجي القهوة القاها (صعيدا جرزا) العمال مركلسين في الجمبة حقت الشاي والقهوة والشيشة .. وكله على حساب المحل .. والزبائن طافشين .. كان آخر شهر برضو تعالوا .. عندنا شكك لساعة ميسرة .. وكان الحال زي حال الزين وولده والليمبي .. يعني أفلس من جنوبي ماشي ميطي في سوق الله وأكبر .. لاكين برضو ما يهم .. المهم تشرفونا .. أكان مصرين تطنشوا القهوة أنا والله بدق فيها جرس وأفكها بصمة خشمها .. عاوزين نسترزق بعد المعاش برضو تداقرونا .. يا ربي من ناس سودانيات ديل .. تكنوا عاملين ليهم عمل ..

[أبو أماني]

اقتباس:
المشاركة الأصلية كتبت بواسطة مرافي
ابو اماني شخشياً
ياخ والله القهوة منوره نوراً يعمي ياخ شين شين بس برضووو منوووور
وزايد المكان بهاء
وحات سيدي الحسن ليك وحشة فنجان قهوة ساموطي ما يفكها..
خليك فاتح على طول وما تقفلا تاني
وبالمناسبة هيفاء جايباها ليك تاني بس عليك الله اديها حسابا القديم ما تحرجنا معاها ياخي...
مع تحياتي لكل رواد القهوة...




عليك الله يا مرافي شيلي توقيعك حق المرأة الرهيبة دي وإلا فتحي مسعد حيجي يعمل فيها صاحبك أصلي عارف ذوقه في الجنس اللطيف .. قولي يا لطيف.. !!

أمبارح يا مرافي حلمت ليكم جنس حلمة .. قريبة من حلمتي حقة الميراث أبو مليار وستمائة جنيه داك .. حلمت يا ستي اللمنتي ليك إني جاي القهوة زهجان وقرفان عشان الزبائن طفشوا منها وناس زمان الحلوين بقوا ما بجوها .. قلت أفتل لي حجر وأشرب لي فنجان قهوة كارب .. تصوري وأنا داخل من الباب البراني كان ألقى ليك مفاجاءة من العيار الثقيل لقيت ليك القهوة مكتظة.. حلوة مكتظة دي مش؟؟ لقيتها ليك مستفة من جنس مخلوقات سودانيات .. gap
بسم الله ماشاء الله حتى الناس الطافشين من سودانيات شهور وسنين لقيتهم قاعدين كيمان كيمان يتونسوا ويقهقهو ..وكمان أجمل شئ لقيت ليك أختك الحنكوشة الحليوة دي .. أأأي همس الشوق ظاااطها .. لقيتها ليك زي ما تقولي كده داخلة ليها في دور ( ختيبة صاحب القهوة .. الوجيه أبو أماني) وعاملة فيها ضبان ضكر ولامة ليك في السجمان .. أأأي بدمه ولحمة أصلو رفدوه من الشغل حنيت عليه شغلته مشرف القهوة خلتو ليك يتجارى زي كليب الحر يا حبة عيني .. تعال هيني شيل البتاع ده وديه هناك... وتعال شوف الطاولة ديك عاوزين شنو؟وتوزع في الإبتسامات الما خمج .. على الزبائن .. حائمة حولهم زي فراشة برشاقتها المعهودة. وخفة دمها المريودة.. وإبتسامتها المعبودة ووقفت بعيييد أعاين ليها دون تشعر بيّ نظرة إعجاب وإنبهار زي نظرة سرورة لي لما شافتني أول مرة وقعدت تقهي فيني ..! وفي اللحذة ديك تمنيت من كل قلبي .. لو كان الحلم قلب حقيقة والكضب بقى واقع مٌعاش ..وفجاءة صحيت من النوم .. وأنا أتمتم قائلا .. مٌعاش .. مٌعاش ..يا الإنت على أبواب المعاش؟ وصحيت من النوم تماما على صوت أم أماني أطال الله عمرها ومفراكتها معاً..وهي تقول لي بصوت آمر .. قوم يا راجل الحق جيب لينا غاز .. الغاز خـلّص..وكانت الساعة تمام الثامنة ص. و.. دقي يا مزيكة على قول .. نزار حسن على يطراه الله بالخير أها .. بعد حلمتي دي بتجوا القهوة ..ولا نجي نحن؟؟ و... تشششاااووو

[أبو أماني]

قال شاعرنا المخضرم الأديب الديبلوماسي سيد أحمد الحردلو: الويل لأمة تنسى تاريخها ..ومن تراثنا الذي صار تاريخا بعض المفردات العامية الصرفة والتي توارت هذه الأيام بل إن الكثير من جيل اليوم قد لايعرفها.. تلاشت من حياتنا أشياء حبيبة للنفس مثل الزير والقلة والبمبر والعنقريب الهبابي والفركة القرمصيص وغيرها من أشياء كانت بالأمس ذات شنة ورنّة .. عليه عقدت العزم على أن أورد هنا ما أقدر عليه فلا نريد لها أن تصبح تأريخا يقف على أبواب مزبلته! وقديما قال كبارنا .. من نسى قديمه تاه.. فيما يلي عشرة مفردات كدفعة أولى ونواصل ..

(1) المشلعيب
(2) القحـف
(3) الدحلوب
(4) النطع
(5) الكابدلو
(6) الدقنوس
(7) القلوبية
(8) التبروقة
(9) الكودوندار
10) القشقش
************
فاصل ونواصل ................................

[أبو أماني]

نواصل الدفعة الثانية برضو عشرة حاجات وسنواصل ..

(1)أبو النوم
(2) النبرو
(3) اللدايات
(4) الدونكي
(5) الخمارة (بضم الخاء وتشديد النون)
(6) صفرجت
(7) أم بقبق (بضم البائين)
(8) البطان (بضم الباء)
(9) الصرمة
10) العمبلوق
************
فاصل ونواصل ................................

[همس الشوق]

حبيبي وين في قهوة النشاط بلاقي

صباح الورد يا ختيبي

مشتاقين

[همس الشوق]

نيابة عن جميع زوار القهوة

بننعي والدة الأخ والعضو الفعَال في القهوة نزار في وفاة والدته
وإنا لله وإنا إليه راجعون

[أبو أماني]

اقتباس:
المشاركة الأصلية كتبت بواسطة أبو أماني
ونواصل ..
(1) المشلعيب
إناء من السعف لحفظ الطعام معلقا بعيدا عن القطط
(2) القحـف
إناء من الفخار يصنع على هيئة كورة يغلى فيه اللبن
(3) الدحلوب
إناء من الفخار على هيئة حلة يحضر فيه الطعام .
(4) النطع
فرشة من سعف النخيل بها فجوة بالوسط تستخدمها النسوة زمان عند عمل مساج يسمي الدخان.
(5) الكابدلو
إناء من السعف لحفظ الملابس بديلا لشنطة اليد النسائي.
(6) الدقنوس
رأس الزول .. وغالبا تستعمل عند مخاطبة الأطفال.
(7) القلوبية
شرك للطيور مصنوع من سلك مقوي على هيئة دايرة مقسومة نصفين يدفن في الرمل وتظهر حبة العيش.
(8) التبروقة
فرشة للصلاة .. يستخدمها أجدادنا زمان تصنع من جلود الحيوانات .. بعد تحنيطها .
(9) الكودوندار
حشرة طائرة من فصيلة الخنافص جميل الشكل متعدد الألوان يصدر صوتا جميلا بجناحية عند الطيران مربوطا بخيط.
10) القشقش
قطع صغيرة متفاوتة من الخشب وعيدان الأشجار تستخدم للوقود وإشعال النار لعدم وجود الجاز والبوتو غاز وغيرة من المعدات الحضارية الآنية .. ************
فاصل ونواصل
قبل الفاصل التحية الحارة لختيبتي (سابقا)! هموسة وأتمنى عليها إثراء القهوة بتعليقاتها الظريفة وقفشاتها الحلوة .. ولا تهمتم بالشاكوش الذي أعطيتها له .. معليش تكبري تأخدي غيره ....

[أبو أماني]

اقتباس:
المشاركة الأصلية كتبت بواسطة أبو أماني
نواصل الدفعة الثانية برضو عشرة حاجات وسنواصل ..

(1)أبو النوم
نفايات توجد داخل الجيب تتكون من مخلفاته الصغيرة تسميها حبوباتنا (النفو) وتقال دلالة على الفلس الذي أعاني منه دوما !! ..
(2) النبرو
البعض يقول عنه إنه الساقية .. وبعض آخر يقول إنه العمود الخشبي الذي يربط في عنق الثور ليجر الساقية أو دولابها والله اعلم ..
(3) اللدايات
ثلاثة قطع من الحجارة توضع أسفل القدر لتجعل مساحة للفحم والنار تحت القدر لغلى وتسخين الطعام .. هذا زمن أبو من غير بوتوغاز..
(4) الدونكي
مجمع لماء الشرب تتجمع حوله الحمير وعلى ظهورها براميل حديد لتوزيع مياه الشرب للمنازل بالحي ..
(5) الخمارة (بضم الخاء وتشديد النون)
وعاء من الفخار يوضع بداخله الدقيق مخلوطا بالماء لتخمير العجين بصدد عمل الكسرة أو الخبز وتسمى (خمارة العجين)..
(6) صفرجت
لعبة يلعبها العيال بالزمانات .. ويلعبها إثنان .. يجمعوا الرمل على هيئة مربع أو مستطيل وتقام عليه عدة بيوت أوحفر يوضع فيها حجارة لكل فريق .. ويكسب الذي يضب (كلب) الخصم بين كلبين من كلابه .. والكلاب ترمز للحجارة .
(7) أم بقبق (بضم البائين)
وجبة شعبية سودانية منتشرة في غرب السودان مكونة من دقيق ولبن وخضار مجفف لا أذكره مع بعض البهار ..
(8) البطان (بضم الباء)
في البادية تعرف كلمة البطان بمعنى الصغار أو العيال ولدى الجعلين تحمل المعنى نفسه وفي ذات الوقت يعنى الضرب بالسوط عند الأعراس..
(9) الصرمة
أكرمكم الله هي الجزمة.. وأعتقد أنها كلمة وردت السودان من شمال الوادي والله أعلم ..
10) العمبلوق
هو الحمل أو العتوت ( صغير البهائم) ..
فاصل ونواصل ................................

[أبو أماني]

دلالة كبــرى

إعلان عن دلالة لقهوة النشاط .. الموقع ناصية من الجهتين بموقع سودانيات تقع في شارع رئيسي يسمى ( منتدى الحوار) ويبدو إنه الحوار الغلب شيخه..!! البيع بدواعي الهجرة خارج البلاد فالحكاية هنا في السودان ولعت (أوي) كيلو اللحمة بقى بخمسين وستين جنيه في أكبر بلد في العالم مشهور بثروته الحيوانية (بإستثناء الحيوانات الناطقة) وصحن الفول المصري بقى بي ثمانية جنيهات .. كذلك إرتفع سعر جالون البنزين ليصل 13 ألف جنيه بعد إنتاج النفط وقد كان بستة جنيهات عندما كنا نستورده .. أما الدولار فحدث ولا حرج .. فقد جعل من جنيهنا حاجة كده أقل من قيمة الروبية الهندية أو البنغالية .. لكل هذه الأسباب مجتمعة قررنا بيع القهوة .. والرهيفة تنقد..!!

يعلن الثري المشهور أبو أماني عن بيع ودلالة (قهوة النشاط) عن طريق العطاء وسوف يرسو العطاء على أقل سعر معروض .. تؤخذ كراسات العطاء مع دمغة فئة خمسة ألف جنيه غير مرتجعة لدي الحاضر الغائب الأخ أشتر .. جرس الدلالة سوف يقرع غدا بشارع منتدى الحوار الساعة الثانية عشر ليلا .. ! يلا .. تشششاااووو

[فخري الزين]

ممكن لو تكرمت وتلطفت وتجملت .......... ولو سمحت ترسل لينا كشف بمحتويات القهوه ؟؟؟؟؟؟؟؟؟
ثم سابعا مشتاقيييييييييييييين وكدا

[عزو الحاج]

ازيكم جميعا انا بعشق لمة القهوة وربنا يلم الناس دايما بالونسة الحلوة والمناسبات الجميلة فخري الزين لك التحية والسلام والاشواق كميات

[أبو أماني]

المشاركة الأصلية كتبت بواسطة عزو الحاج

ازيكم جميعا انا بعشق لمة القهوة وربنا يلم الناس دايما بالونسة الحلوة والمناسبات الجميلة فخري الزين لك التحية والسلام والاشواق كميات

عليك الله يا عزو ..اسع دي قهوة النشاط دي مالها ؟ عيبها لي عليك الرسول .. الجماعة فتحوا ليها فتحا مبينا .. يا أخي كنا زمان نتلم فوقها أنا وكل أفراد سودانيات بلا إستثناء نشرب الشاي والقهوة والناس كافيه .. وناس شيشة .. وكبتشينو وصوفت ديرينكس كمان .. ومرة مرة شايف دكتور مخيير هو وعكود قاعدين يجو يتلصصوا ويزوغوا في زاوية بعيدة .. وعكود قاعد يتلفت يمين وشمال زي العامل ليو عملة .. عملة بفتح العين يا أخ .. عملة بضم العين عليها (حظر) ومرة مرة كدي يتلفت تااااني يمين وشمال ولما يطمئين شايفه قاعد يصنقع لي فووووق ويكب ليو حاجة في خشمو !! بعديها طوووالي يبزق ولا مؤاخذة ووشو يأخذ طابع زول بطنو طامة ويطنطن بكلام أسمعه بصعوبة .. نقشت منو كلمتين بس .. واحد بلح .. والتانية قوي .. وكمان أسمع ليك بوكو بيقول ليو .. حق الشمالية .. لي أسع ما عارف حق الشمالية ده شنو؟ وكمان ما عارف علاقة البلح بالقعدة حقتهم دي شنو ؟؟ الرسول يا إنت كان عارف ما تقول لي؟ عموما خليك منهم .. ما شفت لي بيعة للقهوة دي .. ما قلت سمسار سمسار أي كلام ظاهر عليك .. يا أخي السماسرة الزييك أسع دي عندهم بيوت في كافوري .. والخال بانقا البيقرب ليهم دم ولحم نكروه .. وقالوا كفوري حبيبنا .. حبتهم قبورة يا أخ وإنشاء الله شحدت ربي بعد الركبين تجي في تولا ... أها يا أخي ودعتك الله .. المراءة دي من جبيل تكورك .. يا عابدين .. يا عابدين .. ولما تقول لي بصوت عالي يا أستاذ عابدين .. أنا قلبي قع يقع مني .. يلا .. تشششاااوو .. أنا ظاااطي قهوة ما فيها ناس همس الشوق ماقاعد ليكم فيها ...

[أبو أماني]

رغم أنه قهوتنا دي تصديقها من المحلية .. أدبي إجتماعي ثقافي وممنوعين منعا باتا من تعاطي السياسة بداخلها .. لاكين في شمار حرقني بلحيل .. وأنا جاي على المكتب بمر بمكتبة وزي أي سوداني قح .. بدي نفسي الحق في التصفح المجاني للمانشيتات العريضة لكل الصحف .. الغريبة لاحظت أنه زبائن المكتبة من ناس الملح أكتر من البيشتروا .. والناس البيشتروا بيمشوا طوووالي بينما يتلكع أكبر وقت ممكن ناس الشمارات الملح .. وتلقى المكتبة مزدحمة بالناس وقد تحسد صاحبها بينما المسكين من الكاظمين الغيظ! .. وبنظر لصاحب المكتبة متعاطفا معه .. وأنا أري كل خلجات الضيق والتزمر الصامت من هذا التصرف العشوائي المتكرر صباح كل يوم .. بلا واعز أو ضمير .. وينفلت عيار الصبر من صاحب المكتبة عندما يتطاول .. أحد المتطفلين وينتزع الصحيفة ويقعد يقلب في صفحاتها بتأني .. فلا يملك المسكين إلا أن يزجره بصورة سافرة .. أوقف أحد المرتاحين أولاد المصارين البيض .. عربته الفارهة جمب المكتبة وترك الموتور شغال والباب فااااتح والمكيف يقول يا غربتي ومد لبتاع المكتبة ورقة من فئة الخمسين جنيه وطلب خمسة صحف .. منها ثلاثة سياسية وإثنين رياضيات .. وكان فرحتي أن الصحيفتين الآخيرتين كانتا من اللون الأحمر الفاقع غير أن فرحتي قد تلاشت وأنا الآحظ نظرات الحقد الطبقي تنبعث من عين(زميلي)! المتطفل جاري وهو يرمق الشاب الوسيم المرتاح بنظرات أشبه بنصل حاد يخترق الكبد .. ما كنت أقف طويلا تلكم الوقفة لولا أمرين أولهما أن الشاب دفع مقابل الصحف الخمس مبلغ 10 جنيهات حسوما! بينما طافت بخيالي تلك اللحظة صورة الخزين رحمه الله وهو يبيع صحيفة الثورة في عهد عبود رحمه الله أيضا .. وهو يصيح قائلا .. (البرش .. بي .. قرش !) بل وقبل فترة وجيزة جدا كانت الصحيفة بخمسين قرشا..ثم صارت جنيها..ثم ! الأمر الثاني إثنين من المانشيتات سمراني عند موقفي طويلا .. المانشيت الأول (إعتقال الصادق المهدي)!!.. وتعجبت في سري .. إذ كيف يعتقل رئيس حزب معارض؟ ومختلسوا المال العام يعتلون سدة الحكم! والثاني جاء بلسان المتعافن ! وهو يصرح بأن إنتزاع ملكية بعض الأفراد بالمنشية كان لصالح تشييد مسجد المنشية! شعرت بضيق وإختناق فأشحت بوجهي نحو الشارع مستنجدا بنسمة هواء زكية .. وكان لحسرتي أن وقعت عيناي بالجانب الآخر من الشارع على منظر آلة إزالة ضخمة تزيل كشكا للصحف اليومية والمستلزمات الطلابية بحجة إنه كشك عشوائي وإن المحلية تسعى لتجميل العاصمة!.. وبجوار الكشك عامود كهرباء تحيط بأسفله مجموعة أكياس قمامة متخمة بما لذ وطاب من فضلات الطعام حرصت محلية السجم والرماد على أن تتركها رأفة بالكلاب الضالة والفقراء المساكين! ..الذين عادوا من ديوان الزكاة بخفي حنين .. لك الله يا وطن .. ولك الله يا .. شعب معصوب الجبين.