اقتباس:
المشاركة الأصلية كتبت بواسطة بابكر عباس
أقول ليهم: أي مهاجر مستعد للعمل يستطيع أن يصنع لنفسه مجداً بأمريكا؛ يجوا جارين يحتفوا لي بمقولة نعوم بتاعة عنقريب الهنبريب!!
غايتو ثقافة ود أبزهانات دي، الله يكفينا شرها!
خلاص بعد عنقريب الهمبريب قولوا لي: الصباح نتحول لضل الضحى وضل الضحى بطوّل العمر! والزارعا الله في الصخرة بتقوم! وتجري جري الوحوش غير رزقك ما بتحوش!
يا خسارة السبعة ألف وأربعمائة وسبعة مداخلة!
|
سلامات يابابكر
بالمناسبة فكرة مصطفى سعيد الخلتو يرجع ويقعد في القرية المغمورة عند منحنى النيل دي ماتديها الواطة، فهي فعلا فكرة تستحق التأمل
في اجازتي الفاتت مشيت البلد مع ود عمتي، وهو مغترب ليهو سنين طويلة برة البلد، جينا ماشين جمب المقابر وكان ود عمتي بيحكي في قصة ما، بعد ما اتخطينا المقابر بكم خطوة كده قطع قصتو ورجع ناحية المقابر وشال ليهو فاتحة طوييلة وبعدين جاني راجع، قمت قلت ليهو ده شنو ؟ قام قال لي سمعت ناس المقابر ديل بيقولو بالله شوف ود احمد حجة يجي ماشي بي جمبنا فاتحة ماعايز يدينا ليها!
فيما بعد قعدت افكر في كلامو ده، هو بالتاكيد ماسمعهم ولا شي ولكن كلامو ده عليك الله مابيدي الموت معنى آخر؟ عليك الله لاحظ انو وهم ميتين عمل حساب انهم يلوموهو!
شخصيا اقتنعت تماما بانو الزول يجب ان يموت ويدفن في مكانو، وشخصيا لو كان عندي امنية في الدنيا دي فهي اني ايا كان المكان الحا اموت فيهو فأنا اتمنى اني اندفن هناك في البلد جمب اهلي، الفكرة دي براها مخلية الموت اقل رهبة في نفسي
يابابكر امشي امريكا وعيش الحلم الامريكي وافعل مابدالك، بس في النهاية لمن تجي تموت امشي موت هناك جمب اهلك، غير بعيد من مكان دفن صرتك، جمب الحوش الواسع وعنقريب الهمبريب الخ
على الاقل ياخي تلقى ليك زول يديك الفاتحة
