راكوبة المجادعات.. النمة والدوباي

[ابرا]

المشاركة الأصلية كتبت بواسطة سجمان

سكنتو الوريد فوق الوهم سكنّي
نظراتو المتل شُهب السمع سكّني
فعايل اشواقو زي هم اليتيم مسكني
أهدر كاللسد بي نظرة بس سكني

غايتوا عملا لله
الخنساء ذات فيس بوك


أنا ما اشتهيتك شان تكون
المتعة غاياتي في لقاك
ولا حلمت أكون معاك.. ساعة وأتناساو لقاك
ولا عرفت خطوط وجيهك
إلّا وإتمكّن هواك
عارفة انو اللحظة زايلة
وما دايمة برضو مع سواك
ولا حتّى شالتني الأماني سحابة مسنودة بسماك
متى مطرك وقع..
قبلو بتساقط هناك
وما ارتجيتك
ولا اتوهمت وعدك
شان أسرج الحلم
القلق
وتحقيقو يستعجل وفاك
أنا بس لقيتك: انت نبضات الفؤاد
بي ايدك اسباب الممات
مكيّف البال بي أوامرك
ومالك مزاجات الحياة
باقي لي أحوالي سيد
وتملكّك كل ضعف زاد
وجد?
كنت بتكاوي البعاد
ما قايلو بسقيك العناد
حصار هواك ما دامو زاد
بخنق القلب اللي راد
ومرات ليالي الفرقة أهون
من صباح والدو السهاد
بس
زي تقول سمّوك في جواي روح والنطفة كانت هي الميعاد
كلما ياطاني جمرك ألقى ريدك في ازدياد
الريدة ما دامت معاك أنا ناوي أقطعلك بلاد
بتذكرك مرّات معاي
صوت مديحك
شهيقي كل تنفسي
وصوت سؤالك: البينا جد بتقدسي?
ما قلت ليك مخلوق معاي قبل الميلاد..
أنا بس لقيت اني ما ملكي وبراي
لقيت:
بعضي معطون بي هواك وكلّي مملوك ليك براك!