أم ضرع خرفت وطلقت...

[imported_mohamed hemaid]

- الشمس المدقوقة وتد في نص السماء ابت ما تزح..ضل الليمونة المضبلني لابت تحتا وحالف ما يجي منسلي مارق..لا علّوب لا الشيخ واحدا طاري الآذان فيهم مافي..عنقريب أم ضرع نصو في ضل الليمونة والنص التاني في شمس الله ونص النص مهتوك من عمايل أب سنكيت الليلية والنهارية والرمضانية..(الله يرحو قطّاع الحبال)..كل زول في همو..النمل يشيل ويحفر في ترى حوض الليمونة..أم ضرع ترشرش في جسما والعنقريب والمكان الجايي منو الهواء والهمبريب..ريحة البن المقلي والجبنة مشاققات العرِق وداخلات النخرين ..
أم ضرع - مع رقبتا تهمس-:-
يآ ربي دي مني الجالدي رمضان دي..والله ان قمت وباريت الريحي الطاقي دي علا أعرفا..أسع تلقاها يا وحيدة شيطانا قوي او راجلا أقوى من الشيطان ويمكن ظروف.. الله أعلم..
أم ضرع تواصل في الرشريش وتبل التوب من نقاع الزير وتتغطى..شويتين يجن داخلات عليها مقطوعات النصيب..كلّهن التقول جايات من عرس مستحميات وقاشرات..
الحلوب:-
سلام جاكي..مالك منططي عويناتك ديل فينا؟ إن شاء الله خير..قولي ما شاء الله وعيني باردي لا تسحرينا..
أم ضرع -من محلّها ما قامت- :
سلام وحبابكن وماشاء الله عليكن..الزمن اتغير..وحآتكن ووحاة الله.. كان الشئ الساواتنو في نفسكن دا سويتو لي أب سنكيت في رمضان كان لي يوم الليلي أقضي..ومسعولات من الخير دحين ريحة الجبنة دي شاماتنها؟ وللا يتمارالي ساكت؟..
العرجي-ختت صلبا جم كرعين أم ضرع-:
الحالة دي قلنا الريحي جايي من عندك..لكن أسمعن قولي دا.. الأيام الأولانيي في رمضان كلها زي دا..هلاويس ..والشئ الفي قلب الزول يشمو في نخريهو..
الخبابا:-
أييّ والله صدقتن..أها أسمعي آ أم ضرع الإتفاق المن وراك دا..ونحن جايين عليكي قلنا نذكرك بي قصتك مع ود عشرة كل مرة تقولي لينا بقولا بقولا ولايوم الليلي راجنك وانتي ساواهو لينا في التقى..
أم ضرع:-
كدي جرلّكن عنقريبين تلاتة إتوهطن في الضليل دا إن بقى شالكن وتعالي آ الحلوب شبري الضل دا وشوفي الضهر ما ختا؟..النصليهو ونتفكّ منو..واطاتنا بتصبح إن بقينا رجينا الشيخ وعلّوب يبقى شالتن نومة..
الحلوب:-
انتي ضايقي علي الضهر مالك التقول مغرب..والله المغرب ماقعد تضيقيلو كدي..لكن بيني وبينكن هم زاتن مابيخلوكي تضيقي.. وقبال ما تغيب سمح تلقاهم أذّنو..
الرقطي:-
الضل ما ختا..يكون باقيلو تاني خمسة ستة ساعات كدي..
العرجي-تضحك-:
إنتي آ خرابا يومك مالو زي يوم اجدادنا القدام..كدي وقعي بعد ستة ساعات العشي يدخل..وكدي قومن النركع ونجي نقعد لي ود عشرة..
أم ضرع:-
هيي هيييي..وحاتكن ووحاة المدفون في الترب..إن بقيت حكيتلكن قصتي مع ودعشرة بس ياكن الفاطرات والله أعلم اليوم يتحسبلنا صيام..أنا في الفطر شاردي من حكيها أجي أحكيها في رمضان الكريم والله ياهو..وبالنهار كمان ..بري بري ماهو شيتا يتقال..إستغفر الله..إستغفر الله..كدي قومن إتوضن والحلوب التبقالنا إمام ..صلاتا كيف سريعي وسمحي.. كلها بالحمدو واعطيناك الكوثر..
ونواصل..

[imported_mohamed hemaid]

[web]http://sudanyat.net/forum/viewtopic.php?t=96&postdays=0&postorder=asc&start= 0[/web]

[أبو الحسين]

الغالي جداً ود أخوي حميد...

أشواقنا سيول خور الحسن يا اخوي... وييييييييييييييينك ووين بلودك كل عام وأنت وأم أحمد وأحمد وأم ضرع وعكود وأمين بخير وعافية يا رب...

لكم ودي كله بلا حدود... وأها واصل نحن راجنك...

[imported_mohamed hemaid]

المشاركة الأصلية كتبت بواسطة أبو الحسين

الغالي جداً ود أخوي حميد...

أشواقنا سيول خور الحسن يا اخوي... وييييييييييييييينك ووين بلودك كل عام وأنت وأم أحمد وأحمد وأم ضرع وعكود وأمين بخير وعافية يا رب...

لكم ودي كله بلا حدود... وأها واصل نحن راجنك...

ود الحسين عمي..
أشواقنا ليك سيول خور صلاح( وللمعلومية المطر كان عاصر قبلي هذا الخريف)..
نحن موجودين وبكثرة إلا انت من ماجيت من السودان راجع وما مركز معانا..

أنا نفسي بسأل عن عكود وأمين والعذرو معاهو تايملس..


حميد..

[imported_خالد الحاج]

المشاركة الأصلية كتبت بواسطة mohamed hemaid

- سلام وحبابكن وماشاء الله عليكن..الزمن اتغير..وحآتكن ووحاة الله.. كان الشئ الساواتنو في نفسكن دا سويتو لي أب سنكيت في رمضان كان لي يوم الليلي أقضي..

[imported_mohamed hemaid]

ود الحاج أخوي..
وبرغم مشاغل الزمن لا زلنا في بالكم..
وصلني سلامك آالمبروك..وقدرو كيمان كيمان يا عملات ابو الحسين..
سعدت كثيراً لمرورك الجميل جمالك..فلا تنقطع عنّا..

ولّى زمان كسر الويكي..وأتى الحصاد الآلي..


حميد

[imported_amine]

يا سلام يا حميد ..
أنا جيت و تحياتي ليك يا أبو الحسين
و كبيرنا خالد الحاج الله يعطيه العافية ..
و شوقنا للبقية و على رأسهم عكود ..
و الله كان كدي أنا زاتي خرفت و نسيت ..
الشافي الله ..
رمضان كريم ..
تحياتي يا حلوين ..
أمين

[imported_mohamed hemaid]

المشاركة الأصلية كتبت بواسطة amine

يا سلام يا حميد ..
أنا جيت و تحياتي ليك يا أبو الحسين
و كبيرنا خالد الحاج الله يعطيه العافية ..
و شوقنا للبقية و على رأسهم عكود ..
و الله كان كدي أنا زاتي خرفت و نسيت ..
الشافي الله ..
رمضان كريم ..
تحياتي يا حلوين ..
أمين

أمين أخوي..
ياسلام ياخي..والله كنا شفقانين عليك..
وين يا راجل حمد لله على السلامة..وبركة العودة الحميدة..
الله يستر عليك من مناداة أم ضرع ليك بي (يافردة)..
الله يشفيك ويشفينا
قول آميين..
لا تطوّل علينا..
(تحياتي يا حلو)..


حميد..

[عكــود]

حميّد يا أب أحمد،
أنا تاني الحوش ده ما بعتّبو إن بقى أم ضرع ما أفصحت..
هي عاملة فيها شهرزاد وللا شنو؟
والله ياهو!!!

أبو الحسين
خالد
أمين
تضامنوا مع مطلبنا العادل أعلاه..
وأم ضرع يا خالد ما بتقدر على قضا رمضان عاد..
عشان كدي كانت بتخت لأب سنكيت منوّم مع السحور..
ما يحس إلا مع المغارب...لا تحرّكه إلا شهوة البطن،

عكــود

[imported_mohamed hemaid]

المشاركة الأصلية كتبت بواسطة عكود

حميّد يا أب أحمد،
أنا تاني الحوش ده ما بعتّبو إن بقى أم ضرع ما أفصحت..
هي عاملة فيها شهرزاد وللا شنو؟
والله ياهو!!!

أبو الحسين
خالد
أمين
تضامنوا مع مطلبنا العادل أعلاه..
وأم ضرع يا خالد ما بتقدر على قضا رمضان عاد..
عشان كدي كانت بتخت لأب سنكيت منوّم مع السحور..
ما يحس إلا مع المغارب...لا تحرّكه إلا شهوة البطن،

عكــود

عكود أخوي..
والله الحوش ده مابيبقى بلاك..الارضة بتمسك في شقايقو
ان بقيت طوّلت منو..( الحوش رملاتو كتيري) والفلق مافيها زيت
رجوع وراقدي عرياني فوق السريقة..

أضم صوتي تضامناً مع المتضامنين للمطلب العادل أعلاه..
أم ضرع النجيضي قدرت علي أب سنكيت واتفكّت من القضا
الا خايفين منها تفصح ..ونبقى نحن في القضا.؟

أم ضرع وود عشرة في الطريق اليكم..
(ود عشرة زي ود عشرة يا ابو الحسين لكن ماياهو.).


حميد...

[ناصر يوسف]

محمد حميد
عذرا إن كان مروري متأخرا كثيرا علي مطالعة تخاريف أم ضرع .... وأسأل نفسي لماذا تأخر مروري علي هذا البوح الغريب الأريب الجميل حد الإفضاح المجتمعي الحميم ... أراك وعذرا أن أستنطق هنا أسماء غيرك في تشابه الحكي وطلازته لديكم .. أراك وعثمان حمد وأبوجهينة أقلام ما فتئت تحجينا ببعض حجاوينا الملقاة علي ظلال التاريخ المجتمعي ... ولعلي الأن أعيش معها هي أم ضرع وهي تحجيني بمغامراتها بمثل ما تحجي سوسو حمادة عثمان حمد تلك الحكاوي الغنية بالتفاصيل المثيرة .. وكله واقع من المسكوت عنه في الحكي العام كما الجهر ......
لك أيها المترع بالأحرف النور ... سلام .... إلتفاف حولك حروفك البكر .... وتشكرات تريانات كرائحة القهوة التي تنامت لحاسة شم نون النسوة وحبيبةتهن أم ضرع التي خرفت وطلقت ....
هل يطول إنتظارنا لتواصل مد الحرف سريعا سريعا ؟ فأنا أعشق الحكي والحجاوي من لدنكم ... هيا سريعا سريعا إئتني بما عندك من حكاوي عنها هذه التي أحببت (أم ضرع) وعذرا مرة أخري إن جاء إطلاعي عنها للمرة الأولي هنا فق .

[imported_mohamed hemaid]

ناصر يوسف أخوي..
ميدالية أم ضرع الذهبية مهداة اليك ـ سبحة لحاء العرجون مرصعة
بقنديلة وكُرشة..بركاوية وتمودة..مشرقة ومدينة..ـ شكراًً وعرفاناًً
ابتهاجاً وسروراً بمرورك الجميل..قنّب طولاً بجوارها فضل اليمونة يسع
كل الحبائب..وانت اول الحاضرين..
ود يوسف أخوي..
لي الشرف الكبير ان أكون قريبا من العمالقة ود حمد وابي جهينة..
ولم نسبقك كثيراًً..فأم ضرع مهيلة الحجي نؤومة الضحى غتيتة الحكي
وما تحويه جعبتهاأضعاف ما قالته حتى الآن..ولكن جرعاتها صغيرة ..

لا تغب كثيراً..

دمت يا حبيب..

حميد..

[imported_عمر صديق]

الاخ حمد ودعثمان اهنئك فى البدءعلى هذه اللغة التى استطعت خلالها قول ما تريد
استطعت نقلها من اليومى والمعيش, اللغة العادية البسيطة
هى قطعة ادبية مكتملة بكل المقاييس وشكر يا ود عتمان

[imported_mohamed hemaid]

المشاركة الأصلية كتبت بواسطة عمر صديق

الاخ حمد ودعثمان اهنئك فى البدءعلى هذه اللغة التى استطعت خلالها قول ما تريد
استطعت نقلها من اليومى والمعيش, اللغة العادية البسيطة
هى قطعة ادبية مكتملة بكل المقاييس وشكر يا ود عتمان

عمر صديق أخوي..
سلامات وتصوم وتفطر علي خير..
ولو تعلم عمر أخوي كم أجد متعة في التخاطب
والحديث بهذه العادية البسيطة المتكاملة..
إنها لغة مشبعة بكلمات ومعانٍ في شكل صور
وتحف رائعة..

سعدت بمرورك وتراك ما مشيت بعيد
وود عثمان برضو قريبي..


حميد..

[imported_عمر صديق]

الاخ محمد حميد
تحية احترام
وانا اسف جدا للخطا الغير مقصود
خلطت بينك وبين الاخ الزميل عثمان حمد حتى هو شقلبت اسم ابوه يظهرانو الهواء ضربنى لانى كنت جاى من الدقى ولك العينى حتى ترضى