من وحي السهاد
[align=center]
كلما أرقني التفكير فيما ينقصني..أمسك القلم لأكتبني بين صفحات هي كل ما املك من جسد
أنا لم اعرف يوما كيف أكملني كتابة
لذا فهذه أوراق ناقصة..أبدأها حين افتقد نفسي
وأعود للنوم عندما أجدني قبل السطر الأخير
عذرتَك
الحب يرتحل عبر أروقة التخلي..يرفرف بعيدا بعيدا
نجد أنفسنا فجأة حفاة على أرض من شوك
عراة وأكف الشتاء تحتضن أجسادنا
فهل نختلق صراعا في دواخلنا التي لم تفهم..كيف..ولماذا..وأين؟
أم
نجد العذر لمن سرق منا ذلك الحلم..الأمان..وتركنا وحدنا لنصارع تقلبات الحياة؟
عذرتََك
عذرتَك يوم رحلتَ بعيد
عشان قلتَ الظروف صعبة
وكتَمتَك سِر فِجوف الليل
يضوي معالم الغربة
وأبيت أحكيكْ..حكاية شوق
بيكتب نفسو في التربة
وتقوم ريح الشمال تمسح
ملامحَك عن أرض خصبة
بتطوف أفكاري ديمة بعيد
وترجع ليِّ مكتئبة
بتطوف أفكاري ديمة بعيد
تزورَك رغبة في التأكيد
عشان أفهم سبب هجرَك
ودمَّك بِجري فيني وريد
عشان أفهم سبب صمتَك
وأنا العلمتَك التجويد
وكنتَ النجمة في ليلَك
وكنتَ الطفلة يوم العيد
لبستَك زَي فرح زاهي
وزِيَّ البسمة فوقي جديد
عشان قدمتَ ليك روحي
بتقدم قلبي ليَّ شهيد؟
عشان أهديتَك الأحلام
ترُد الباقي لي بالإيد
ويرجَع حُلمنا الخاسر
يبدِد عمرو بالتسديد
أسدد ليك ثمن حبي
وأسدد ليك ثمن قلبي
وأسدد ليك دموع راحت
تلملم فيني من دربي
وبترجَع بي حروفي تعيد
عذرتَك يوم رحلت بعيد
عشان قلتَ الظروف صعبة
لأنك كنتَ عندي الكون
وعندَك.. كنتَ زَي لعبة
بتلعَب بيها زَي ما تحب
وبَعدَك..تدمِن الرهبة
بأحاسيس ديمة عطشانة
وتخاف يوم تمسك القِربة
وأنا الظنيت وجودك حي
أتاريك في الصدر حربة
بتَمَدِدْ بالنزيف جواي
جروحي اللسة ملتهبة
ومشاعري الهادية من قبلَك
بقت بعدَك تسِل الروح
بقت أطلال قلب مجروح
بقت فِدواخلي مضطربة
وعذرتَك يوم رحلتَ بعيد
عشان قُلتَ الظروف صعبة
لقيت ما عندي غير أعذِر
عذرتَك آخر المشوار
عذرتَك يا حلم غدار
عذرتَك رغم انو النار
بتحرِق في الصميم وصفَك
بتدمِن في الطريق رصفَك
وتزرَع فيني ميدانَك
وتحصُد في الحروب قصفَك
وتهرُب من رياح الشوق
وتلقى الشوق وسط عصفَك
ولما عيوني بتْغَمِض
عشان تهرُب من آلامه
بتلقى رؤاكْ فِأحلامه
بتلقى صباكْ فِأيامه
بتلقى مداكْ فِأوهامه
وتضيفَك للعمُر كُربة
وعذرتَك يوم رحلتَ بعيد
عشان قلتَ الظروف صعبة
بتزيد أحزاني بي ذكراكْ
أعيشَك كيف؟
أعيشَك يالشتاكْ ودَّر معالم الصيف؟
أحبَك؟..ولا أتناساكْ؟
أكونَكْ
ولا أحيا بلاكْ؟
أعيدَك..ولا ألغي هواكْ؟
وأَجَّدِد بالصدام جواي
مواجع تحضن الرغبة
وعذرتَك يوم رحلتَ بعيد
عشان قلتَ الظروف صعبة
وكتمتَك سِر فِجوف الليل
يِضوي معالم الغربة
وأبيتْ أحكيك..حكاية شوق
بيكتب نفسو في التربة
وتقوم ريح الشمال تمسح
ملامحك عن أرض خصبة
عذرتك
يا حجر أسود..تناسى مهابة الكعبة
وعذرتك..يا حجر أسود
تناسى مهابة الكعبة[/align]
|
